Shukla Yajurveda · Chapter 9

vājapeya rājasūya yajñāṅgamantrāḥ/ vājapeyaḥ 1-34, rājasūyaḥ 35-

deva savitaḥ pra suva yajñaṃ pra suva yajñapatiṃ bhagāya /
divyo gandharvaḥ ketapūḥ ketaṃ naḥ punātu vācaspatir vājaṃ naḥ svadatu svāhā

dhruvasadaṃ tvā nṛṣadaṃ manaḥsadam /
upayāmagṛhīto'sīndrāya tvā juṣṭaṃ gṛhṇāmi /
eṣa te yonir indrāya tvā juṣṭatamam /
apsuṣadaṃ tvā ghṛtasadaṃ vyomasadam /
upayāmagṛhīto'sīndrāya tvā juṣṭaṃ gṛhṇāmi /
eṣa te yonir indrāya tvā juṣṭatamam /
pṛthivīsadaṃ tvā'ntarikṣasadaṃ divisadaṃ devasadaṃ nākasadam /
upayāmagṛhīto'sīndrāya tvā juṣṭaṃ gṛhṇāmi /
eṣa te yonir indrāya tvā juṣṭatamam

apāꣳ rasam udvayasaꣳ sūrye santaꣳ samāhitam /
apāꣳ rasasya yo rasas taṃ vo gṛhṇāmy uttamam /
upayāmagṛhīto sīndrāya tvā juṣṭaṃ gṛhṇāmi /
eṣa te yonir indrāya tvā juṣṭatamam

grahā ' ūrjāhutayo vyanto viprāya matim /
teṣāṃ viśipriyāṇāṃ vo ' ham iṣamūrjaꣳ sam agrabham /
upayāmagṛhīto 'sīndrāya tvā juṣṭaṃ gṛhṇāmi /
eṣa te yonir indrāya tvā juṣṭatamam /
sampṛcau sthaḥ saṃ mā bhadreṇa pṛṅktam /
vipṛcau stho vi mā pāpmanā pṛṅktam

indrasya vajro 'si vājasās tvayā'yam vājaꣳ set /
vājasya nu prasave mātaraṃ mahīm aditiṃ nāma vacasā karāmahe /
yasyām idaṃ viśvaṃ bhuvanam āviveśa tasyāṃ no devaḥ savitā dharma sāviṣat

apsv antar amṛtam apsu bheṣajam apām uta praśastiṣv aśvā bhavata vājinaḥ /
devīr āpo yo va ' ūrmiḥ pratūrtiḥ kakunmān vājasās tenāyaṃ vājaꣳ set

vāto vā mano vā gandharvāḥ saptaviꣳśatiḥ /
te ' agre' śvam ayuñjaꣳs te ' asmin javam ādadhuḥ

vātaraꣳhā bhava vājin yujyamāna ' indrasyeva dakṣiṇaḥ śriyaidhi /
yuñjantu tvā maruto viśvavedasa ' ā te tvaṣṭā patsu javaṃ dadhātu

javo yas te vājin nihito guhā yaḥ śyene parītto ' acarac ca vāte /
tena no vājin balavān balena vājajic ca bhava samane ca pārayiṣṇuḥ /
vājino vājajito vājaꣳ sariṣyanto bṛhaspater bhāgam ava jighrata

devasyāhaꣳ savituḥ save satyasavaso bṛhaspater uttamaṃ nākaꣳ ruheyam /
devasyāhaꣳ savituḥ save satyasavasa indrasyottamaṃ nākaꣳ ruheyam /
devasyāhaꣳ savituḥ save satyaprasavaso bṛhaspater uttamaṃ nākam aruham /
devasyāhaꣳ savituḥ save satyaprasavasa ' indrasyottamaṃ nākam aruham

bṛhaspate vājaṃ jaya bṛhaspataye vācaṃ vadata bṛhaspatiṃ vājaṃ jāpayata /
indra vājaṃ jayendrāya vācaṃ vadatendraṃ vājaṃ jāpayata

eṣā vaḥ sā satyā saṃvāg abhūd yayā bṛhaspatiṃ vājam ajījapatājījapata bṛhaspatiṃ vājaṃ vanaspatayo vi mucyadhvam /
eṣā vaḥ sā satyā saṃvāg abhūd yayendraṃ vājam ajījapatājījapatendraṃ vājaṃ vanaspatayo vi mucyadhvam

devasyāhaꣳ savituḥ save satyaprasavaso bṛhaspater vājajito vājaṃ jeṣam /
vājino vājajito'dhvana skabhnuvanto yojanā mimānāḥ kāṣṭhāṃ gacchata

eṣa sya vājī kṣipaṇiṃ turaṇyati grīvāyāṃ baddho ' apikakṣa āsani /
kratuṃ dadhikrā ' anu saꣳsaniṣyadat pathām aṅkāꣳsy anv āpanīphaṇat svāhā

uta smāsya dravatas turaṇayataḥ parṇaṃ na ver anu vāti pragardhinaḥ /
śyenasyeva dhrajato ' aṅkasaṃ pari dadhikrāvṇaḥ sa horjā taritraḥ svāhā

śaṃ no bhavantu vājino haveṣu devatātā mitadravaḥ svarkāḥ /
jambhayanto hiṃ vṛkaꣳ rakṣāsi sanemy asmad yuyavann amīvāḥ

te no ' arvanto havanaśruto havaṃ viśve śṛṇvantu vājino mitadravaḥ /
sahasrasā medhasātā saniṣyavo maho ye dhanaꣳ samitheṣu jabhrire

vāje-vāje 'vata vājino no dhaneṣu viprā ' amṛtā ' ṛtajñāḥ /
asya madhvaḥ pibata mādayadhvaṃ tṛptā yāta pathibhir devayānaiḥ

ā mā vājasya prasavo jagamyād eme dyāvāpṛthivī viśvarūpe /
ā mā gantāṃ pitarā mātarā cā mā somo ' amṛtatvena gamyāt /
vājino vājajito vājaꣳ sasṛvāꣳso bṛhaspater bhāgam ava jighrata nimṛjānāḥ

āpaye svāhā /
svāpaye svāhā /
'apijāya svāhā /
kratave svāhā /
vasave svāhā /
'aharpataye svāhā /
'ahne mugdhāya svāhā /
mugdhāya vainaꣳśināya svāhā /
vinaꣳśina ' āntyāyanāya svāhā /
''antyāya bhauvanāya svāhā /
bhuvanasya pataye svāhā /
'adhipataye svāhā

āyur yajñena kalpatām /
prāṇo yajñena kalpatām /
cakṣur yajñena kalpatām /
śrotraṃ yajñena kalpatām /
pṛṣṭhaṃ yajñena kalpatām /
yajño yajñena kalpatām /
prajāpateḥ prajā ' abhūma /
svardevā ' aganma /
amṛtā ' abhūma

asme vo ' astv indriyam asme nṛmṇam uta kratur asme varcāꣳsi santu vaḥ /
namo mātre pṛthivyai namo mātre pṛthivyai /
'iyaṃ te rāṭ /
yantāsi yamano dhruvo 'si dharuṇaḥ kṛṣyai tvā kṣemāya tvā rayyai tvā poṣāya tvā

vājasyemaṃ prasavaḥ suṣuve 'gre somaꣳ rājānam oṣadhīṣv apsu /
tā ' asmabhyaṃ madhumatīr bhavantu vayaꣳ rāṣṭre jāgṛyāma purohitāḥ svāhā

vājasyemāṃ prasavaḥ śiśriye divam imā ca viśvā bhuvanāni samrāṭ /
aditsantaṃ dāpayati prajānan sa no rayiꣳ sarvavīraṃ ni yacchatu svāhā

vājasya nu prasava ābabhūvemā ca viśvā bhuvanāni sarvataḥ /
sanemi rājā pariyāti vidvān prajāṃ puṣṭiṃ vardhayamāno ' asme svāhā

somaꣳ rājānamavase'gnimanvārabhāmahe/
ādityān viṣṇuꣳ sūryaṃ brahmāṇaṃ ca bṛhaspatiꣳ svāhā

aryamaṇaṃ bṛhaspatim indraṃ dānāya codaya /
vācaṃ viṣṇuꣳ sarasvatī savitāraṃ ca vājinaꣳ svāhā

agne ' acchāvadeha naḥ prati naḥ sumanā bhava /
pra no yaccha sahasrajittvaꣳ hi dhanadā ' asi svāhā

pra no yacchatv aryamā pra pūṣā pra bṛhaspatiḥ /
pra vāg devī dadātu naḥ svāhā

devasya tvā savituḥ prasave 'śvinor bāhubhyāṃ pūṣṇo hastābhyām /
sarasvatyai vāco yantur yantriye dadhāmi bṛhaspateṣ ṭvā sāmrājyenābhi ṣiñcāmy asau

agnir ekākṣareṇa prāṇam ud ajayat tam uj jeṣam /
aśvinau dvyakṣareṇa dvipado manuṣyān ud ajayatāṃ tān uj jeṣam /
viṣṇus tryakṣareṇa trīꣳl lokān ud ajayat tān uj jeṣam /
somaś caturakṣareṇa catuṣpadaḥ paśūn ud ajayat tān uj jeṣam

pūṣā pañcākṣareṇa pañca diśa ' ud ajayat tā ' uj jeṣam /
savitā ṣaḍakṣareṇa ṣaḍ ṛtūn ud ajayat tān uj jeṣam /
marutaḥ saptākṣareṇa sapta grāmyān paśūn ud ajayaꣳs tān uj jeṣam /
bṛhaspatir aṣṭākṣareṇa gāyatrīm ud ajayat tām uj jeṣam

mitro navākṣareṇa trivṛtaꣳ stomam ud ajayat tam uj jeṣam /
varuṇo daśākṣareṇa virājam ud ajayat tām uj jeṣam /
indra ' ekādaśākṣareṇa triṣṭubham ud ajayat tām uj jeṣam /
viśve devā dvādaśākṣareṇa jagatīm ud ajayaꣳs tām uj jeṣam

vasavas trayodaśākṣareṇa trayodaśaꣳ stomam ud ajayaꣳs tam uj jeṣam /
rudrāś caturdaśākṣareṇa caturdaśaꣳ stomam ud ajayaꣳs tam uj jeṣam /
ādityāḥ pañcadaśākṣareṇa pañcadaśaꣳ stomam ud ajayaꣳs tam uj jeṣam /
aditiḥ ṣoḍaśākṣareṇa ṣoḍaśaꣳ stomam ud ajayat tam uj jeṣam /
prajāpatiḥ saptadaśākṣareṇa saptadaśaꣳ stomam ud ajayat tam uj jeṣam

eṣa te nirṛte bhāgas taṃ juṣasva svāhā /
'agninetrebhyo devebhyaḥ puraḥsadbhyaḥ svāhā /
yamanetrebhyo devebhyo dakṣiṇāsadbhyaḥ svāhā /
viśvadevanetrebhyo devebhyo paścātsadbhyaḥ svāhā /
mitrāvaruṇanetrebhyo vā marunnetrebhyo vā devebhya ' uttarāsadbhyaḥ svāhā /
somanetrebhyo devebhyo ' uparisadbhyo duvasvadbhyaḥ svāhā

ye devā ' agninetrāḥ puraḥsadas tebhyaḥ svāhā /
ye devā yamanetrā dakṣiṇāsadas tebhyaḥ svāhā /
ye devā viśvadevanetrāḥ paścātsadas tebhyaḥ svāhā /
ye devā mitrāvaruṇanetrā vā marunnetrā vottarāsadas tebhyaḥ svāhā /
ye devāḥ somanetrā ' uparisado duvasvantas tebhyaḥ svāhā

agne sahasva pṛtanā ' abhimātīr apāsya /
duṣṭaras tarann arātīr varco dhā yajñavāhasi

devasya tvā savituḥ prasave 'śvinor bāhubhyāṃ pūṣṇo hastābhyām /
upāꣳśor vīryeṇa juhomi hataꣳ rakṣaḥ svāhā /
rakṣasāṃ tvā vadhāya /
avadhiṣma rakṣo' vadhiṣmāmum asau hataḥ

savitā tvā savānāꣳ suvatām agnir gṛhapatīnā somo vanaspatīnām /
bṛhaspatir vāca ' indro jyaiṣṭhyāya rudraḥ paśubhyo mitraḥ satyo varuṇo dharmapatīnām

imaṃ devā 'asapatnaꣳ suvadhvaṃ mahate kṣatrāya mahate jyaiṣṭhyāya mahate jānarājyāyendrasyendriyāya /
imam amuṣya putram amuṣyai putram asyai viśa ' eṣa vo 'mī rājā somo smākaṃ brāhmaṇānā rājā //