Shukla Yajurveda · Chapter 40

īśāvāsyopaniṣat/ jñānakāṇḍam

īśā vāsyam idaꣳ sarvaṃ yat kiṃ ca jagatyāṃ jagat /
tena tyaktena bhuñjīthā mā gṛdhaḥ kasya svid dhanam

kurvann eveha karmāṇi jijīviṣec chataꣳ samāḥ /
evaṃ tvayi nānyatheto 'sti na karma lipyate nare

asuryā nāma te lokā 'andhena tamasāvṛtāḥ /
tāꣳs te pretyāpi gacchanti ye ke cātmahano janāḥ

anejad ekaṃ manaso javīyo nainad devā ' āpnuvan pūrvam arśat /
tad dhāvato 'nyān aty eti tiṣṭhat tasminn apo mātariśvā dadhāti

tad ejati tan naijati tad dūre tad v antike /
tad antar asya sarvasya tad u sarvasyāsya bāhyataḥ

yas tu sarvāṇi bhūtāny ātmann evānupaśyati /
sarvabhūteṣu cātmānaṃ tato na vi cikitsati

yasmint sarvāṇi bhūtāny ātmaivābhūd vijānataḥ /
tatra ko mohaḥ kaḥ śoka ' ekatvam anupaśyataḥ

sa pary agāc chukram akāyam avraṇam asnāviraꣳ śuddham apāpaviddham /
kavir manīṣī paribhūḥ svayaṃbhūr yāthātathyato 'rthān vyadadhācchāśvatībhyaḥ samābhyaḥ

andhaṃ tamaḥ pra viśanti ye 'saṃbhūtim upāsate /
tato bhūya ' iva te tamo ya ' u saṃbhūtyāꣳ ratāḥ

anyad evāhuḥ saṃbhavād anyad āhur asaṃbhavāt /
iti śuśruma dhīrāṇāṃ ye nas tad vicacakṣire

saṃbhūtiṃ ca vināśaṃ ca yas tad vedobhayaꣳ saha /
vināśena mṛtyuṃ tīrtvā saṃbhūtyāmṛtam aśnute

andhaṃ tamaḥ pra viśanti ye 'vidyām upāsate /
tato bhūya ' iva te tamo ya ' u vidyāyāꣳ ratāḥ

anyad evāhur vidyāyā ' anyad āhur avidyāyāḥ /
iti śuśruma dhīrāṇāṃ ye nas tad vicacakṣire

vidyāṃ cāvidyāṃ ca yas tad vedobhayaꣳ saha /
avidyayā mṛtyuṃ tīrtvā vidyayāmṛtam aśnute

vāyur anilam amṛtam athedaṃ bhasmāntaꣳ śarīram /
o3m krato smara klibe smara kṛtaꣳ smara

agne naya supathā rāye ' asmān viśvāni deva vayunāni vidvān /
yuyodhy asmaj juhurāṇam eno bhūyiṣṭhāṃ te nama ' uktiṃ vidhema

hiraṇmayena pātreṇa satyasyāpihitaṃ mukham /
yo 'sāv āditye puruṣaḥ so 'sāv aham /
o३m khaṃ brahma //