Shukla Yajurveda · Chapter 4

agniṣṭome ṛtvig yajamānasya śālā praveśamārabhya krītasomasya śālāpraveśānta mantrāḥ
4.1 edam aganma devayajanaṃ pṛthivyā yatra devāso ' ajuṣanta viśve / imā ' āpaḥ śam u me santu devīḥ / oṣadhe trāyasva /
ṛk sāmābhyā saṃtaranto yajurbhī rāyas poṣeṇa sam iṣā madema /
svadhite mainaꣳ hiꣳsīḥ

āpo ' asmān mātaraḥ śundhayantu ghṛtena no ghṛtapvaḥ punantu /
viśvaꣳ hi ripraṃ pravahanti devīḥ /
ud idābhyaḥ śucir ā pūta ' emi /
dīkṣātapasos tanūr asi taṃ tvā śivāꣳ śagmāṃ pari dadhe bhadraṃ varṇaṃ puṣyan

mahīnāṃ payo si varcodā ' asi varco me dehi /
vṛtrasyāsi kanīnakaś cakṣurdā ' asi cakṣur me dehi

citpatir mā punātu /
vākpatir mā punātu /
devo mā savitā punātv acchidreṇa pavitreṇa sūryasya raśmibhiḥ /
tasya te pavitrapate pavitrapūtasya yatkāmaḥ pune tac chakeyam

ā vo devāsa ' īmahe vāmaṃ prayaty adhvare /
ā vo devāsa āśiṣo ' yajñiyāso havāmahe

svāhā yajñaṃ manasaḥ /
svāhoror antarikṣāt /
svāhā dyāvāpṛthivībhyām /
svāhā vātād ā rabhe svāhā

ākūtyai prayuje 'gnaye svāhā medhāyai manase 'gnaye svāhā dīkṣāyai tapase 'gnaye svāhā sarasvatyai pūṣṇe 'gnaye svāhā āpo devīr bṛhatīr viśvaśambhuvo dyāvāpṛthivī ' uro ' antarikṣa /
bṛhaspataye haviṣā vidhema svāhā

viśvo devasya netur marto vurīta sakhyam /
viśvo rāya ' iṣudhyati dyumnaṃ vṛṇīta puṣyase svāhā

ṛksāmayoḥ śilpe sthaḥ te vām ā rabhe te mā pātamāsya yajñasyodṛcaḥ /
śarmāsi śarma me yaccha namas te ' astu mā mā hiꣳsīḥ

ūrg asy āṅgirasyūrṇamradā ' ūrjaṃ mayi dhehi /
somasya nīvir asi /
viṣṇoḥ śarmāsi śarma yajamānasya /
indrasya yonir asi /
susasyāḥ kṛṣīs kṛdhi /
uc chrayasva vanaspata 'ūrdhvo mā pāhy aꣳhasa' āsya yajñasyodṛcaḥ

vrataṃ kṛṇutāgnir brahmāgnir yajño vanaspatir yajñiyaḥ /
daivīṃ dhiyaṃ manāmahe sumṛḍīkām abhiṣṭaye varcodhāṃ yajñavāhasaꣳ sutīrthā no 'asad vaśe /
ye devā manojātā manoyujo dakṣakratavas te no 'vantu te naḥ pāntu tebhyaḥ svāhā

śvātrāḥ pītā bhavata yūyam āpo 'asmākam antar udare suśevāḥ /
tā 'asmabhyam ayakṣmā' anamīvā 'anāgasaḥ svadantu devīr amṛtā ' ṛtāvṛdhaḥ

iyaṃ te yajñiyā tanūḥ /
apo muñcāmi na prajām /
aꣳhomucaḥ svāhākṛtāḥ pṛthivīm āviśata /
pṛthivyā saṃbhava

agne tvaꣳ su jāgṛhi vayaꣳ su mandiṣīmahi /
rakṣā ṇo ' aprayucchan prabudhe naḥ punas kṛdhi

punar manaḥ punar āyur ma 'āgan punaḥ prāṇaḥ punar ātmā ma' āgan punaś cakṣuḥ punaḥ śrotraṃ ma 'āgan /
vaiśvānaro' adabdhas tanūpā 'agnir naḥ pātu duritād avadyāt

tvam agne vratapā ' asi deva ' ā martyeṣv ā tvaṃ yajñeṣv īḍyaḥ /
rāsveyatsomā bhūyo bhara devo naḥ savitā vasor dātā vasv adāt

eṣā te śukra tanūr etad varcas tayā saṃ bhava bhrājaṃ gaccha /
jūr asi dhṛtā manasā juṣṭā viṣṇave

tasyās te satyasavasaḥ prasave tanvo yantram aśīya svāhā /
śukram asi candram asy amṛtam asi vaiśvadevam asi

cid asi manāsi dhīr asi dakṣiṇāsi kṣatriyāsi yajñiyāsy aditir asy ubhayataḥśīrṣṇī /
sā naḥ suprācī supratīcy edhi mitras tvā padi badhnītāṃ pūṣā'dhvanas pātv indrāyādhyakṣāya

anu tvā mātā manyatām anu pitā'nu bhrātā sagarbhyo 'nu sakhā sayūthyaḥ /
sā devi devam acchehīndrāya somaꣳ rudras tvā vartayatu svasti somasakhā punar ehi

vasvy asy aditir asyādityāsi rudrāsi candrāsi /
bṛhaspatiṣ ṭvā sumne ramṇātu rudro vasubhir ā cake

adityās tvā mūrdhann ā jigharmi devayajane pṛthivyā' iḍāyās padam asi ghṛtavat svāhā /
asme ramasva /
asme te bandhuḥ /
tve rāyaḥ /
me rāyaḥ /
mā vayaꣳ rāyaspoṣeṇa vi yauṣma /
toto rāyaḥ

sam akhye devyā dhiyā saṃ dakṣiṇayorucakṣasā /
mā ma' āyuḥ pra moṣīr mo 'ahaṃ tava /
vīraṃ videya tava devi saṃdṛśi

eṣa te gāyatro bhāga' iti me somāya brūtād eṣa te traiṣṭubho bhāga' iti me somāya brūtād eṣa te jāgato bhāga' iti me somāya brūtāc chandonāmānāꣳ sāmrājyaṃ gaccheti me somāya brūtāt /
āsmāko' si śukras te grahyo vicitas tvā vi cinvantu

abhi tyaṃ devaꣳ savitāram oṇyoḥ kavikratum arcāmi satyasavaꣳ ratnadhām abhi priyaṃ matiṃ kavim /
ūrdhvā yasyāmatir bhā adidyutat savīmani hiraṇyapāṇir amimīta sukratuḥ kṛpā svaḥ /
prajābhyas tvā /
prajās tvā'nuprāṇantu prajās tvam anuprāṇihi

śukraṃ tvā śukreṇa krīṇāmi candraṃ candreṇāmṛtam amṛtena /
sagme te goḥ /
asme te candrāṇi /
tapasas tanūr asi prajāpater varṇaḥ parameṇa paśunā krīyase sahasrapoṣaṃ puṣeyam

mitro na' ehi sumitradhaḥ /
' indrasyorum ā viśa dakṣiṇam uśann uśantaꣳ syonaḥ syonam /
svāna bhrājāṅghāre bambhāre hasta suhasta kṛśāno /
ete vaḥ somakrayaṇās tān rakṣadhvaṃ mā vo dabhan

pari māgne duścaritād bādhasvā mā sucarite bhaja /
ud āyuṣā svāyuṣodasthām amṛtāꣳ 'anu

prati panthām apadmahi svastigām anehasam /
yena viśvāḥ pari dviṣo vṛṇakti vindate vasu

adityās tvag asi /
adityai sada 'ā sīda /
astabhnād dyāṃ vṛṣabho ' antarikṣam amimīta varimāṇaṃ pṛthivyāḥ /
āsīdad viśvā bhuvanāni samrāḍ viśvet tāni varuṇasya vratāni

vaneṣu vyantarikṣaṃ tatāna vājam arvatsu paya 'usriyāsu /
hṛtsu kratuṃ varuṇo vikṣv agniṃ divi sūryam adadhāt somam adrau

sūryasya cakṣur ārohāgner akṣṇaḥ kanīnakam /
yatraitaśebhir īyase bhrājamāno vipaścitā

usrāv etaṃ dhūrṣāhau yujyethām anaśrū' avīrahaṇau brahmacodanau /
svasti yajamānasya gṛhān gacchatam

bhadro me' si pracyavasva bhuvaspate viśvāny abhi dhāmāni /
mā tvā paripariṇo vidan mā tvā paripanthino vidan mā vṛkā' aghāyavo vidan /
śyeno bhūtvā parā pata yajamānasya gṛhān gaccha tan nau sam̐̐skṛtam

namo mitrasya varuṇasya cakṣase maho devāya tad ṛtaꣳ saparyata /
dūredṛśe devajātāya ketave divas putrāya sūryāya śaꣳsata

varuṇasyottambhanam asi /
varuṇasya skambhasarjanī sthaḥ /
varuṇasya' ṛtasadany asi varuṇasya' ṛtasadanam asi /
varuṇasya 'ṛtasadanam ā sīda

yā te dhāmāni haviṣā yajanti tā te viśvā paribhūr astu yajñam /
gayasphānaḥ prataraṇaḥ suvīro 'vīrahā pracarā soma duryān //