Shukla Yajurveda · Chapter 3

agnyādhānam (१-८), agnihotram (९-१०), agnyupasthānam (११-४३?). cāturmāsyaḥ varuṇapraghāsaḥ (४४-४८), sākamedhaḥ (४९-६१), vaiśvadeva (muṇḍanakarma) (६२-६३)

samidhāgniṃ duvasyata ghṛtair bodhayatātithim /
āsmin havyā juhotana

susamiddhāya śociṣe ghṛtaṃ tīvraṃ juhotana /
agnaye jātavedase

taṃ tvā samidbhir aṅgiro ghṛtena vardhayāmasi /
bṛhacchocā yaviṣṭhya

upa tvāgne haviṣmatīr ghṛtācīr yantu haryata /
juṣasva samidho mama

bhūr bhuvaḥ svaḥ /
dyaur iva bhūmnā pṛthivīva varimṇā /
tasyās te pṛthivi devayajani pṛṣṭhe' gnim annādam annādyāyā dadhe

āyaṃ gauḥ pṛśnir akramīd asadan mātaraṃ puraḥ /
pitaraṃ ca prayantsvaḥ

antaś carati rocanāsya prāṇād apānatī /
vyakhyan mahiṣo divam

triꣳśad dhāma vi rājati vāk pataṅgāya dhīyate /
prati vastor aha dyubhiḥ

agnir jyotir jyotir agniḥ svāhā /
sūryo jyotir jyotiḥ sūryaḥ svāhā /
agnir varco jyotir varcaḥ svāhā /
sūryo varco jyotir varcaḥ svāhā /
jyotiḥ sūryaḥ sūryo jyotiḥ svāhā

sajūr devena savitrā sajū rātryendravatyā /
juṣāṇo 'agnir vetu svāhā /
sajūr devena savitrā sajū uṣasendravatyā /
juṣāṇaḥ sūryo vetu svāhā

upaprayanto ' adhvaraṃ mantraṃ vocemāgnaye /
āre ' asme ca śṛṇvate

agnir mūrdhā divaḥ kakut patiḥ pṛthivyā ' ayam /
apāᳬṃ retāᳬṃsi jinvati

ubhā vām indrāgnī ' āhuvadhyā ' ubhā rādhasaḥ saha mādayadhyai /
ubhā dātārāv iṣāꣳ rayīṇām ubhā vājasya sātaye huve vām

ayaṃ te yonir ṛtviyo yato jāto ' arocathāḥ /
taṃ jānann agna ' ārohāthā no vardhayā rayim

ayam iha prathamo dhāyi dhātṛbhir hotā yajiṣṭho ' adhvareṣv īḍyaḥ /
yam apnavāno bhṛgavo virurucur vaneṣu citraṃ vibhvaṃ viśe-viśe

asya pratnām anu dyutaꣳ śukraṃ duduhre ' ahrayaḥ /
payaḥ sahasrasām ṛṣim

tanūpā ' agne 'si tanvaṃ me pāhi /
āyurdā ' agne' sy āyur me dehi /
varcodā ' agne 'si varco me dehi /
agne yan me tanvā ' ūnaṃ tan ma' ā pṛṇa

indhānās tvā śataꣳ himā dyumantaꣳ sam idhīmahi /
vayasvanto vayaskṛtaꣳ sahasvantaḥ sahaskṛtam /
agne sapatnadambhanam adabdhāso ' adābhyam /
citrāvaso svasti te pāram aśīya

saṃ tvam agne sūryasya varcasāgathāḥ sam ṛṣīṇāᳬṃ stutena /
saṃ priyeṇa dhāmnā sam aham āyuṣā saṃ varcasā saṃ prajayā saꣳ rāyas poṣeṇa gmiṣīya

andha sthāndho vo bhakṣīya maha stha maho vo bhakṣīyorja sthorjaṃ vo bhakṣīya rāyas poṣa stha rāyas poṣaṃ vo bhakṣīya

revatī ramadhvam asmin yonāv asmin goṣṭhe 'smiṃl loke smin kṣaye /
ihaiva sta māpagāta

saꣳhitāsi viśvarūpy ūrjā māviśa gaupatyena /
upa tvāgne dive-dive doṣāvastar dhiyā vayam /
namo bharanta 'emasi

rājantam adhvarāṇāṃ gopām ṛtasya dīdivim /
vardhamāṇaꣳ sve dame

sa naḥ piteva sūnave 'gne sūpāyano bhava /
sacasvā naḥ svastaye

agne tvaṃ no' antama' uta trātā śivo bhavā varūthyaḥ /
vasur agnir vasuśravā' acchānakṣi dyumattamaꣳ rayiṃ dāḥ

taṃ tvā śociṣṭha dīdivaḥ sumnāya nūnam īmahe sakhibhyaḥ /
sa no bodhi śrudhī havam uruṣyā ṇo' aghāyataḥ samasmāt

iḍa' ehy adita ' ehi /
kāmyā ' eta /
mayi vaḥ kāmadharaṇaṃ bhūyāt

somānaꣳ svaraṇaṃ kṛṇuhi brahmaṇaspate /
kakṣīvantaṃ ya ' auśijaḥ

yo revān yo 'amīvahā vasuvit puṣṭivardhanaḥ /
sa naḥ siṣaktu yas turaḥ

mā naḥ śaꣳso' araruṣo dhūrtiḥ pra ṇaṅ martyasya /
rakṣā ṇo brahmaṇaspate

mahi trīṇām avo 'stu dyukṣaṃ mitrasyāryamṇaḥ /
durādharṣaṃ varuṇasya

nahi teṣām amā cana nādhvasu vāraṇeṣu /
īśe ripur aghaśaꣳsaḥ

te hi putrāso ' aditeḥ pra jīvase martyāya /
jyotir yacchanty ajasram

kadā cana starīr asi nendra saścasi dāśuṣe /
upopen nu maghavan bhūya ' in nu te dānaṃ devasya pṛcyate

tat savitur vareṇyaṃ bhargo devasya dhīmahi /
dhiyo yo naḥ pracodayat

pari te dūḍabho ratho'smāꣳ aśnotu viśvataḥ /
yena rakṣasi dāśuṣaḥ

bhūr bhuvaḥ svaḥ suprajāḥ prajābhi syāꣳ suvīro vīraiḥ supoṣaḥ poṣaiḥ /
narya prajāṃ me pāhi /
śaꣳsya paśūn me pāhi /
atharya pituṃ me pāhi

āganma viśvavedasam asmabhyaṃ vasuvittamam /
agne samrāḍ abhi dyumnam abhi saha ' ā yacchasva

ayam agnir gṛhapatir gārhapatyaḥ prajāyā vasuvittamaḥ /
agne gṛhapate 'bhi dyumnam abhi saha ' ā yacchasva

ayam agniḥ purīṣyo rayimān puṣṭivardhanaḥ /
agne purīṣyābhi dyumnam abhi saha ' ā yacchasva

gṛhā mā bibhīta mā vepadhvamūrjaṃ bibhrata ' emasi /
ūrjaṃ bibhrad vaḥ sumanāḥ sumedhā gṛhān aimi manasā modamānaḥ

yeṣām adhyeti pravasan yeṣu saumanaso bahuḥ /
gṛhān upa hvayāmahe te no jānantu jānataḥ

upahūtā' iha gāva' upahūtā' ajāvayaḥ /
atho 'annasya kīlāla 'upahūto gṛheṣu naḥ /
kṣemāya vaḥ śāntyai pra padye śivaꣳ śagmaꣳ śaṃyoḥ śaṃyoḥ //
3.44 (varuṇapraghāsaḥ ४४-४८)
praghāsino havāmahe marutaś ca riśādasaḥ /
karambheṇa sajoṣasaḥ

yad grāme yad araṇye yat sabhāyāṃ yad indriye /
yad enaś cakṛmā vayam idaṃ tad ava yajāmahe svāhā

mo ṣū ṇa ' indrātra pṛtsu devair asti hi ṣmā te śuṣminn avayāḥ /
mahaś cid yasya mīḍhuṣo yavyā haviṣmato maruto vandate gīḥ

akran karma karmakṛtaḥ saha vācā mayobhuvā /
devebhyaḥ karma kṛtvāstaṃ preta sacābhuvaḥ

avabhṛtha nicumpuṇa nicerur asi nicumpuṇaḥ /
ava devair devakṛtam eno yāsiṣam ava martyair martyakṛtam /
pururāvṇo deva riṣas pāhi //
3.49 (sākamedhaḥ ४९-६१)
pūrṇā darvi parā pata supūrṇā punar ā pata /
vasneva vi krīṇāvahā' iṣamūrjaꣳ śatakrato

dehi me dadāmi te ni me dhehi ni te dadhe /
nihāraṃ ca harāsi me nihāraṃ niharāṇi te svāhā

akṣann amīmadanta hy ava priyā' adhūṣata /
astoṣata svabhānavo viprā niviṣṭhayā matī yojā nvindra te harī

susaṃdṛśaṃ tvā vayaṃ maghavan vandiṣīmahi /
pra nūnaṃ pūrṇabandhura stuto yāsi vaśāꣳ2' anu yojā nvindra te harī

mano nv āhvāmahe nārāśaꣳsena stomena /
pitṝṇāṃ ca manmabhiḥ

ā na 'etu manaḥ punaḥ kratve dakṣāya haviṣe /
jyok ca sūryaṃ dṛśe

punar naḥ pitaro mano dadātu daivyo janaḥ /
jīvaṃ vrātaꣳ sacemahi

vayaꣳ soma vrate tava manas tanūṣu bibhrataḥ /
prajāvantaḥ sacemahi

eṣa te rudra bhāgaḥ saha svasrāmbikayā taṃ juṣasva svāhā /
eṣa te rudra bhāga' ākhus te paśuḥ

ava rudramad īmahy ava devaṃ tryambakam /
yathā no vasyasas karad yad yathā naḥ śreyasas karad yad yathā no vyavasāyayāt

bheṣajam asi bheṣajaṃ gave'śvāya puruṣāya bheṣajam /
sukhaṃ meṣāya meṣyai

tryambakaṃ yajāmahe sugandhiṃ puṣṭivardhanam /
urvārukam iva bandhanān mṛtyor mukṣīya mā'mṛtāt /
tryambakaṃ yajāmahe sugandhiṃ pativedanam /
urvārukam iva bandhanād ito mukṣīya māmutaḥ

etat te rudrāvasaṃ tena paro mūjavato' tīhi /
avatatadhanvā pinākāvasaḥ kṛttivāsā' ahiꣳsan naḥ śivo'tīhi //
3.62 (vaiśvadevaparva ६२-६३)
tryāyuṣaṃ jamadagneḥ kaśyapasya tryāyuṣam /
yad deveṣu tryāyuṣaṃ tan no 'astu tryāyuṣam

śivo nāmāsi svadhitis te pitā namas te 'astu mā mā hiꣳsīḥ /
ni vartayāmy uṣe'nnādyāya prajananāya rāyas poṣāya suprajāstvāya suvīryāya //