Shukla Yajurveda · Chapter 5

agniṣṭome ātithyamārabhya yūpanirmāṇaparyantam mantrāḥ

agnes tanūr asi viṣṇave tvā somasya tanūr asi viṣṇave tvāti'tither ātithyam asi viṣṇave śyenāya tvā somabhṛte viṣṇave tvā'gnaye tvā rāyaspoṣade viṣṇave tvā

agner janitram asi /
vṛṣaṇau sthaḥ /
'urvaśy asi /
āyur asi /
' purūravā asi /
gāyatreṇa tvā chandasā manthāmi /
traiṣṭubhena tvā chandasā manthāmi /
jāgatena tvā chandasā manthāmi

bhavataṃ naḥ samanasau sacetasāv arepasau /
mā yajñaꣳ hiꣳsiṣṭaṃ mā yajñapatiṃ jātavedasau śivau bhavatam adya naḥ

agnāv agniś carati praviṣṭa ' ṛṣīṇāṃ putro 'abhiśastipāvā /
sa naḥ syonaḥ suyajā yajeha devebhyo havyaꣳ sadam aprayucchant svāhā

āpataye tvā paripataye gṛhṇāmi tanūnaptrye śākvarāya śakvana ' ojiṣṭhāya /
anādhṛṣṭam asy anādhṛṣyaṃ devānām ojo 'nabhiśasty abhiśastipā ' anabhiśastenyam añjasā satyam upa geṣaꣳ svite mā dhāḥ

agne vratapās tve vratapā yā tava tanūr iyaꣳ sā mayi yo mama tanūr eṣā sā tvayi /
saha nau vratapate vratāny anu me dīkṣāṃ dīkṣāpatir manyatām anu tapas tapaspatiḥ

aꣳśur-aꣳśuṣṭe deva somāpyāyatām indrāyaikadhanavide /
ā tubhyam indraḥ pyāyatām ā tvam indrāya pyāyasva /
ā pyāyayāsmānt sakhīnt sanyā medhayā svasti te deva soma sutyām aśīya /
eṣṭā rāyaḥ preṣe bhagāya ṛtam ṛtavādibhyo namo dyāvāpṛthivībhyām

yā te ' agne 'yaḥśayā tanūr varṣiṣṭhā gahvareṣṭhā /
ugraṃ vaco'apāvadhīt tveṣaṃ vaco ' apāvadhīt svāhā /
yā te ' agne rajaḥśayā tanūr varṣiṣṭhā gahvareṣṭhā /
ugraṃ vaco ' apāvadhīt tveṣaṃ vaco ' apāvadhīt svāhā /
yā te agne hariśayā tanūr varṣiṣṭhā gahvareṣṭhā /
ugraṃ vaco ' apāvadhīt tveṣaṃ vaco ' apāvadhīt svāhā

taptāyanī me 'si /
vittāyanī me 'si /
avatān mā nāthitāt /
avatān mā vyathitāt /
vided agnir nabho nāma /
agne ' aṅgira ' āyunā nāmnehi /
yo'syāṃ pṛthivyām asi yat te'nādhṛṣṭaṃ nāma yajñiyaṃ tena tvā dadhe /
vided agnir nabho nāma /
agne ' aṅgira ' āyunā nāmnehi /
yo dvitīyasyāṃ pṛthivyām asi yat te'nādhṛṣṭaṃ nāma yajñiyaṃ tena tvā dadhe /
vided agnir nabho nāma /
agne'aṅgira ' āyunā nāmnehi /
yas tṛtīyasyāṃ pṛthivyām asi yat te 'nādhṛṣṭaṃ nāma yajñiyaṃ tena tvā dadhe /
anu tvā devavītaye

siꣳhy asi sapatnasāhī devebhyaḥ kalpasva /
siꣳhy asi sapatnasāhī devebhyaḥ śundhasva /
siꣳhy asi sapatnasāhī devebhyaḥ śumbhasva

indraghoṣas tvā vasubhiḥ purastāt pātu /
pracetās tvā rudraiḥ paścāt pātu /
manojavās tvā pitṛbhir dakṣiṇataḥ pātu /
viśvakarmā tvādityair uttarataḥ pātu /
idam ahaṃ taptaṃ vār bahirdhā yajñān niḥ sṛjāmi

siꣳhy asi svāhā /
siꣳhy asy ādityavaniḥ svāhā /
siꣳhy asi brahmavaniḥ kṣatravaniḥ svāhā /
siꣳhy asi suprajāvanī rāyaspoṣavaniḥ svāhā /
siꣳhy asy āvaha devān yajamānāya svāhā /
bhūtebhyas tvā

dhruvo 'si pṛthivīṃ dṛꣳha /
dhruvakṣid asy antarikṣaṃ dṛꣳha /
acyutakṣid asi divaṃ dṛꣳha /
agneḥ purīṣam asi

yuñjate mana ' uta yuñjate dhiyo viprā viprasya bṛhato vipaścitaḥ /
vi hotrā dadhe vayunāvid eka 'in mahī devasya savituḥ pariṣṭutiḥ svāhā

idaṃ viṣṇur vicakrame tredhā ni dadhe padam /
samūḍham asya pāsure svāhā

irāvatī dhenumatī hi bhūtaꣳ sūyavasinī manave daśasyā /
vyaskabhnā rodasī viṣṇav ete dādharttha pṛthivīm abhito mayūkhaiḥ svāhā

devaśrutau deveṣv ā ghoṣatam /
prācī pretam adhvaraṃ kalpayantī ' ūrdhvaṃ yajñaṃ nayataṃ mā jihvaratam /
svaṃ goṣṭham ā vadataṃ devī durye ' āyur mā nirvādiṣṭaṃ prajāṃ mā nirvādiṣṭam /
atra ramethāṃ varṣman pṛthivyāḥ

viṣṇor nu kaṃ vīryāṇi pra vocaṃ yaḥ pārthivāni vimame rajāꣳsi /
yo ' askabhāyad uttaraꣳ sadhasthaṃ vicakramāṇas tredhorugāyaḥ /
viṣṇave tvā

divo vā viṣṇa ' uta vā pṛthivyā maho vā viṣṇa'urorantarikṣāt /
ubhā hi hastā vasunā pṛṇasvā prayaccha dakṣiṇād ota savyāt /
viṣṇave tvā

pra tad viṣṇu stavate vīryeṇa mṛgo na bhīmaḥ kucaro giriṣṭhāḥ /
yasyoruṣu triṣu vikramaṇeṣv adhikṣiyanti bhuvanāni viśvā

viṣṇo rarāṭam asi /
viṣṇoḥ śnaptre sthaḥ /
viṣṇoḥ syūr asi /
viṣṇor dhruvo si /
vaiṣṇavam asi viṣṇave tvā

devasya tvā savituḥ prasave 'śvinor bāhubhyāṃ pūṣṇo hastābhyām /
ā dade nāry asi /
idam ahaꣳ rakṣasāṃ grīvā ' apikṛntāmi /
bṛhann asi bṛhadravā bṛhatīm indrāya vācaṃ vada

rakṣohaṇaṃ valagahanaṃ vaiṣṇavīm /
idam ahaṃ taṃ valagam ut kirāmi yaṃ me niṣṭyo yam amātyo nicakhāna /
idam ahaṃ taṃ valagam ut kirāmi yaṃ me samāno yam asamāno nicakhāna /
idam ahaṃ taṃ valagam ut kirāmi yaṃ me sabandhur yam asabandhur nicakhāna /
idam ahaṃ taṃ valagam ut kirāmi yaṃ me sajāto yam asajāto nicakhāna /
ut kṛtyāṃ kirāmi

svarāḍ asi sapatnahā /
satrarāḍ asy abhimātihā /
janarāḍ asi rakṣohā /
sarvarāḍ asy amitrahā

rakṣohaṇo vo valagahanaḥ prokṣāmi vaiṣṇavān /
rakṣohaṇo vo valagahano 'va nayāmi vaiṣṇavān /
rakṣohaṇo vo valagahano 'va stṛṇāmi vaiṣṇavān /
rakṣohaṇau vāṃ valagahanā ' upa dadhāmi vaiṣṇavī /
rakṣohaṇau vāṃ valagahanau pary ūhāmi vaiṣṇavī /
vaiṣṇavam asi /
vaiṣṇavā stha

devasya tvā savituḥ prasave 'śvinor bāhubhyāṃ pūṣṇo hastābhyām /
ā dade nāry asi /
idam ahaꣳ rakṣasāṃ grīvā ' api kṛntāmi /
yavo 'si yavayāsmad dveṣo yavayārātīḥ /
dive tvā'ntarikṣāya tvā pṛthivyai tvā /
śundhantāṃ lokāḥ pitṛṣadanāḥ /
pitṛṣadanam asi

ud divaꣳ stabhānāntarikṣaṃ pṛṇa dṛꣳhasva pṛthivyām /
dyutānās tvā māruto minotu mitrāvaruṇau dhruveṇa dharmaṇā /
brahmavani tvā kṣatravani tvā rāyaspoṣavani pary ūhāmi /
brahma dṛꣳha kṣatraṃ dṛꣳhāyur dṛꣳha prajāṃ dṛꣳha

dhruvāsi dhruvo 'yaṃ yajamāno 'sminn āyatane prajayā paśubhir bhūyāt /
ghṛtena dyāvāpṛthivī pūryethām /
indrasya chadir asi viśvajanasya chāyā

pari tvā girvaṇo gira ' imā bhavantu viśvataḥ /
vṛddhāyum anu vṛddhayo juṣṭā bhavantu juṣṭayaḥ

indrasya syūr asi /
indrasya dhruvo 'si /
aindram asi /
vaiśvadevam asi

vibhūr asi pravāhaṇaḥ /
vahnir asi havyavāhanaḥ /
śvātro 'si pracetāḥ /
tutho 'si viśvavedāḥ

uśig asi kaviḥ /
aṅghārir asi bambhāriḥ /
avasyūr asi duvasvān /
śundhyūr asi mārjālīyaḥ /
samrāḍ asi kṛśānuḥ /
pariṣadyo'si pavamānaḥ /
nabho'si pratakvā /
mṛṣṭo 'si havyasūdanaḥ /
'ṛtadhāmāsi svarjyotiḥ

samudro 'si viśvavyacāḥ /
'ajo 'sy ekapāt /
ahir asi budhnyaḥ /
vāg asy aindram asi sado 'si /
ṛtasya dvārau mā mā saṃtāptam /
adhvanām adhvapate pra mā tira svasti me 'smin pathi devayāne bhūyāt

mitrasya mā cakṣuṣekṣadhvam /
agnayaḥ sagarāḥ sagarā stha sagareṇa nāmnā rudreṇānīkena pāta māgnayaḥ pipṛta māgnayo gopāyata mā namo vo stu mā mā hiꣳsiṣṭa

jyotir asi viśvarūpaṃ viśveṣāṃ devānā samit /
tvaꣳ soma tanūkṛdbhyo dveṣobhyo 'nyakṛtebhya 'uru yantāsi varūthaꣳ svāhā /
juṣāṇo 'aptur ājyasya vetu svāhā

agne naya supathā rāye 'asmān viśvāni deva vayunāni vidvān /
yuyodhy asmaj juhurāṇam eno bhūyiṣṭhāṃ te nama'uktiṃ vidhema

ayaṃ no ' agnir varivas kṛṇotv ayaṃ mṛdhaḥ pura 'etu prabhindan /
ayaṃ vājān jayatu vājasātāv ayaꣳ śatrūn jayatu jarhṛṣāṇaḥ svāhā

uru viṣṇo vi kramasvoru kṣayāya nas kṛdhi /
ghṛtaṃ ghṛtayone piba pra-pra yajñapatiṃ tira svāhā

deva savitar eṣa te somas taꣳ rakṣasva mā tvā dabhan /
etat tvaṃ deva soma devo devām̐2 ' upāgā ' idam ahaṃ manuṣyānt saha rāyaspoṣeṇa svāhā nir varuṇasya pāśān mucye

agne vratapās tve vratapā yā tava tanūr mayy abhūd eṣā sā tvayi yo mama tanūs tvayy abhūd iyaꣳ sā mayi /
yathāyathaṃ nau vratapate vratāny anu me dīkṣāṃ dīkṣāpatir amaꣳstānu tapas tapaspatiḥ

uru viṣṇo vi kramasvoru kṣayāya nas kṛdhi /
ghṛtaṃ ghṛtayone piba pra-pra yajñapatiṃ tira svāhā

aty anyāꣳ ' agāṃ nānyāꣳ ' upāgām arvāk tvā parebhyo 'vidaṃ paro 'varebhyaḥ /
taṃ tvā juṣāmahe deva vanaspate devayajyāyai devās tvā devayajyāyai juṣantāṃ viṣṇave tvā /
oṣadhe trāyasva /
svadhite mainaꣳ hiꣳsīḥ

dyāṃ mā lekhīr antarikṣaṃ mā hiꣳsīḥ pṛthivyā saṃ bhava /
ayaꣳ hi tvā svadhitis tetijānaḥ praṇināya mahate saubhagāya /
atas tvaṃ deva vanaspate śatavalśo vi roha sahasravalśā vi vayaꣳ ruhema //