Shukla Yajurveda · Chapter 35

adhyāya 35 preta sūktam
pitṛmedhasambandhino mantrāḥ

apeto yantu paṇayo 'sumnā devapīyavaḥ /
asya lokaḥ sutāvataḥ /
dyubhir ahobhir aktubhir vyaktaṃ yamo dadātv avasānam asmai

savitā te śarīrebhyaḥ pṛthivyāṃ lokam icchatu /
tasmai yujyantām usriyāḥ

vāyuḥ punātu /
savitā punātu /
agner bhrājasā /
sūryasya varcasā /
vi mucyantām usriyāḥ

aśvatthe vo niṣadanaṃ parṇe vo vasatiṣ kṛtā /
gobhāja'it kilāsatha yat sanavatha pūruṣam

savitā te śarīrāṇi mātur upastha ' ā vapatu /
tasmai pṛthivi śaṃ bhava

prajāpatau tvā devatāyām upodake loke ni dadhāmy asau /
apa naḥ śośucad agham

paraṃ mṛtyo ' anu parehi panthāṃ yas te ' anya itaro devayānāt /
cakṣuṣmate śṛṇvate te bravīmi mā naḥ prajāꣳ rīriṣo mota vīrān

śaṃ vātaḥ śaꣳ hi te ghṛṇiḥ śaṃ te bhavantv iṣṭakāḥ /
śaṃ te bhavantv agnayaḥ pārthivāso mā tvābhi śūśucan

kalpantāṃ te diśas tubhyam āpaḥ śivatamās tubhyaṃ bhavantu sindhavaḥ /
antarikṣaꣳ śivaṃ tubhyaṃ kalpantāṃ te diśaḥ sarvāḥ

aśmanvatī rīyate saꣳ rabhadhvam ut tiṣṭhata pra taratā sakhāyaḥ /
atra jahīmo 'śivā ye ' asañchivān vayam uttaremābhi vājān

apāgham apa kilviṣam apa kṛtyām apo rapaḥ /
apāmārga tvam asmad apa duḥṣvapnyaꣳ suva

sumitriyā na ' āpa ' oṣadhayaḥ santu durmitriyās tasmai santu yo 'smān dveṣṭi yaṃ ca vayaṃ dviṣmaḥ

anaḍvāham ā rabhāmahe saurabheyaꣳ svastaye /
sa na ' indra ' iva devebhyo vahniḥ saṃtaraṇo bhava

ud vayaṃ tamasas pari svaḥ paśyanta ' uttaram /
devaṃ devatrā sūryam aganma jyotir uttamam

imaṃ jīvebhyaḥ paridhiṃ dadhāmi maiṣāṃ nu gād aparo ' artham etam /
śataṃ jīvantu śaradaḥ purūcīr antar mṛtyuṃ dadhatāṃ parvatena

agna ' āyūꣳṣi pavasa ' ā suvorjam iṣaṃ ca naḥ /
āre bādhasva ducchunām

āyuṣmān agne haviṣā vṛdhāno ghṛtapratīko ghṛtayonir edhi /
ghṛtaṃ pītvā madhu cāru gavyaṃ piteva putram abhi rakṣatād imānt svāhā

parīme gām aneṣata pary agnim ahṛṣata /
deveṣv akrata śravaḥ ka ' imāꣳ२' ā dadharṣati

kravyādam agniṃ pra hiṇomi dūraṃ yamarājyaṃ gacchatu ripravāhaḥ /
ihaivāyam itaro jātavedā devebhyo havyaṃ vahatu prajānan

vaha vapāṃ jātavedaḥ pitṛbhyo yatrainān vettha nihitān parāke /
medasaḥ kulyā ' upa tānt sravantu satyā ' eṣām āśiṣaḥ saṃ namantāꣳ svāhā

syonā pṛthivi no bhavānṛkṣarā niveśanī /
yacchā naḥ śarma saprathāḥ /
apa naḥ śośucad agham

asmāt tvam adhi jāto 'si tvad ayaṃ jāyatāṃ punaḥ /
asau svargāya lokāya svāhā //