શુક્લયજુર્વેદઃ · અધ્યાય 35

અધ્યાય 35 પ્રેત સૂક્તમ્
પિતૃમેધસમ્બન્ધિનો મન્ત્રાઃ

અપેતો યન્તુ પણયો ઽસુમ્ના દેવપીયવઃ ।
અસ્ય લોકઃ સુતાવતઃ ।
દ્યુભિર્ અહોભિર્ અક્તુભિર્ વ્યક્તં યમો દદાત્વ્ અવસાનમ્ અસ્મૈ

સવિતા તે શરીરેભ્યઃ પૃથિવ્યાં લોકમ્ ઇચ્છતુ ।
તસ્મૈ યુજ્યન્તામ્ ઉસ્રિયાઃ

વાયુઃ પુનાતુ ।
સવિતા પુનાતુ ।
અગ્નેર્ ભ્રાજસા ।
સૂર્યસ્ય વર્ચસા ।
વિ મુચ્યન્તામ્ ઉસ્રિયાઃ

અશ્વત્થે વો નિષદનં પર્ણે વો વસતિષ્ કૃતા ।
ગોભાજઽઇત્ કિલાસથ યત્ સનવથ પૂરુષમ્

સવિતા તે શરીરાણિ માતુર્ ઉપસ્થ ઽ આ વપતુ ।
તસ્મૈ પૃથિવિ શં ભવ

પ્રજાપતૌ ત્વા દેવતાયામ્ ઉપોદકે લોકે નિ દધામ્ય્ અસૌ ।
અપ નઃ શોશુચદ્ અઘમ્

પરં મૃત્યો ઽ અનુ પરેહિ પન્થાં યસ્ તે ઽ અન્ય ઇતરો દેવયાનાત્ ।
ચક્ષુષ્મતે શૃણ્વતે તે બ્રવીમિ મા નઃ પ્રજાꣳ રીરિષો મોત વીરાન્

શં વાતઃ શꣳ હિ તે ઘૃણિઃ શં તે ભવન્ત્વ્ ઇષ્ટકાઃ ।
શં તે ભવન્ત્વ્ અગ્નયઃ પાર્થિવાસો મા ત્વાભિ શૂશુચન્

કલ્પન્તાં તે દિશસ્ તુભ્યમ્ આપઃ શિવતમાસ્ તુભ્યં ભવન્તુ સિન્ધવઃ ।
અન્તરિક્ષꣳ શિવં તુભ્યં કલ્પન્તાં તે દિશઃ સર્વાઃ

અશ્મન્વતી રીયતે સꣳ રભધ્વમ્ ઉત્ તિષ્ઠત પ્ર તરતા સખાયઃ ।
અત્ર જહીમો ઽશિવા યે ઽ અસઞ્છિવાન્ વયમ્ ઉત્તરેમાભિ વાજાન્

અપાઘમ્ અપ કિલ્વિષમ્ અપ કૃત્યામ્ અપો રપઃ ।
અપામાર્ગ ત્વમ્ અસ્મદ્ અપ દુઃષ્વપ્ન્યꣳ સુવ

સુમિત્રિયા ન ઽ આપ ઽ ઓષધયઃ સન્તુ દુર્મિત્રિયાસ્ તસ્મૈ સન્તુ યો ઽસ્માન્ દ્વેષ્ટિ યં ચ વયં દ્વિષ્મઃ

અનડ્વાહમ્ આ રભામહે સૌરભેયꣳ સ્વસ્તયે ।
સ ન ઽ ઇન્દ્ર ઽ ઇવ દેવેભ્યો વહ્નિઃ સંતરણો ભવ

ઉદ્ વયં તમસસ્ પરિ સ્વઃ પશ્યન્ત ઽ ઉત્તરમ્ ।
દેવં દેવત્રા સૂર્યમ્ અગન્મ જ્યોતિર્ ઉત્તમમ્

ઇમં જીવેભ્યઃ પરિધિં દધામિ મૈષાં નુ ગાદ્ અપરો ઽ અર્થમ્ એતમ્ ।
શતં જીવન્તુ શરદઃ પુરૂચીર્ અન્તર્ મૃત્યું દધતાં પર્વતેન

અગ્ન ઽ આયૂꣳષિ પવસ ઽ આ સુવોર્જમ્ ઇષં ચ નઃ ।
આરે બાધસ્વ દુચ્છુનામ્

આયુષ્માન્ અગ્ને હવિષા વૃધાનો ઘૃતપ્રતીકો ઘૃતયોનિર્ એધિ ।
ઘૃતં પીત્વા મધુ ચારુ ગવ્યં પિતેવ પુત્રમ્ અભિ રક્ષતાદ્ ઇમાન્ત્ સ્વાહા

પરીમે ગામ્ અનેષત પર્ય્ અગ્નિમ્ અહૃષત ।
દેવેષ્વ્ અક્રત શ્રવઃ ક ઽ ઇમાꣳ૨ઽ આ દધર્ષતિ

ક્રવ્યાદમ્ અગ્નિં પ્ર હિણોમિ દૂરં યમરાજ્યં ગચ્છતુ રિપ્રવાહઃ ।
ઇહૈવાયમ્ ઇતરો જાતવેદા દેવેભ્યો હવ્યં વહતુ પ્રજાનન્

વહ વપાં જાતવેદઃ પિતૃભ્યો યત્રૈનાન્ વેત્થ નિહિતાન્ પરાકે ।
મેદસઃ કુલ્યા ઽ ઉપ તાન્ત્ સ્રવન્તુ સત્યા ઽ એષામ્ આશિષઃ સં નમન્તાꣳ સ્વાહા

સ્યોના પૃથિવિ નો ભવાનૃક્ષરા નિવેશની ।
યચ્છા નઃ શર્મ સપ્રથાઃ ।
અપ નઃ શોશુચદ્ અઘમ્

અસ્માત્ ત્વમ્ અધિ જાતો ઽસિ ત્વદ્ અયં જાયતાં પુનઃ ।
અસૌ સ્વર્ગાય લોકાય સ્વાહા ॥