Shukla Yajurveda · Chapter 36

pravargyāgnikāśvamedhopaniṣatsaṃbaddhā mantrāḥ

ṛcaṃ vācaṃ pra padye mano yajuḥ pra padye sāma prāṇaṃ pra padye cakṣuḥ śrotraṃ pra padye /
vāg ojaḥ sahaujo mayi prāṇāpānau

yan me chidraṃ cakṣuṣo hṛdayasya manaso vātitṛṇṇaṃ bṛhaspatir me tad dadhātu /
śaṃ no bhavatu bhuvanasya yas patiḥ

bhūr bhuvaḥ svaḥ /
tat savitur vareṇyaṃ bhargo devasya dhīmahi /
dhiyo yo naḥ pracodayāt

kayā naś citra ' ā bhuvad ūtī sadāvṛdhaḥ sakhā /
kayā śaciṣṭhayā vṛtā

kas tvā satyo madānāṃ maꣳhiṣṭho matsad andhasaḥ /
dṛḍhā cid āruje vasu

abhī ṣu ṇaḥ sakhīnām avitā jaritṝṇām /
śataṃ bhavāsy ūtibhiḥ

kayā tvam na ' ūtyābhi pra mandase vṛṣan /
kayā stotṛbhya ' ā bhara

indro viśvasya rājati /
śaṃ no ' astu dvipade śaṃ catuṣpade

śaṃ no mitraḥ śaṃ varuṇaḥ śaṃ no bhavatv aryamā /
śaṃ na ' indro bṛhaspatiḥ śaṃ no viṣṇur urukramaḥ

śaṃ no vātaḥ pavatāꣳ śaṃ nas tapatu sūryaḥ /
śaṃ naḥ kanikradad devaḥ parjanyo ' abhi varṣatu

ahāni śaṃ bhavantu naḥ śaꣳ rātrīḥ prati dhīyatām /
śaṃ na ' indrāgnī bhavatām avobhiḥ śaṃ na ' indrāvaruṇā rātahavyā /
śaṃ na ' indrāpūṣaṇā vājasātau śam indrāsomā suvitāya śaṃ yoḥ

śaṃ no devīr abhiṣṭaya ' āpo bhavantu pītaye /
śaṃ yor abhi sravantu naḥ

syonā pṛthivi no bhavānṛkṣarā niveśanī /
yacchā naḥ śarma saprathāḥ

āpo hi ṣṭhā mayobhuvas tā na ' ūrje dadhātana /
mahe raṇāya cakṣase

yo vaḥ śivatamo rasas tasya bhājayateha naḥ /
uśatīr iva mātaraḥ

tasmā ' araṃ gamāma vo yasya kṣayāya jinvatha /
āpo janayathā ca naḥ

dyauḥ śāntir antarikṣaꣳ śāntiḥ pṛthivī śāntir āpaḥ śāntir oṣadhayaḥ śāntiḥ /
vanaspatayaḥ śāntir viśve devāḥ śāntir brahma śāntiḥ sarvaꣳ śāntiḥ śāntir eva śāntiḥ sā mā śāntir edhi

dṛte dṛꣳha mā mitrasya mā cakṣuṣā sarvāṇi bhūtāni sam īkṣantām /
mitrasyāhaṃ cakṣuṣā sarvāṇi bhūtāni samīkṣe /
mitrasya cakṣuṣā sam īkṣāmahe

dṛte dṛꣳha mā /
jyok te saṃdṛśi jīvyāsaṃ jyok te saṃdṛśi jīvyāsam

namas te harase śociṣe namas te ' astv arciṣe /
anyāꣳs te ' asmat tapantu hetayaḥ pāvako ' asmabhyaꣳ śivo bhava

namas te ' astu vidyute namas te stanayitnave /
namas te bhagavann astu yataḥ svaḥ samīhase

yato-yataḥ samīhase tato no ' abhayaṃ kuru /
śaṃ naḥ kuru prajābhyo 'bhayaṃ naḥ paśubhyaḥ

sumitriyā na ' āpa ' oṣadhayaḥ santu durmitriyās tasmai santu yo 'smān dveṣṭi yaṃ ca vayaṃ dviṣmaḥ

tac cakṣur devahitaṃ purastāc chukram uc carat /
paśyema śaradaḥ śataṃ jīvema śaradaḥ śataꣳ śṛṇuyāma śaradaḥ śataṃ pra bravāma śaradaḥ śatam adīnāḥ syāma śaradaḥ śataṃ bhūyaś ca śaradaḥ śatāt //