Shukla Yajurveda · Chapter 30

puruṣamedha sambaddhā mantrāḥ

deva savitaḥ pra suva yajñaṃ pra suva yajñapatiṃ bhagāya /
divyo gandharvaḥ ketupūḥ ketaṃ naḥ punātu vācaspatir vājaṃ naḥ svadatu

tat savitur vareṇyaṃ bhargo devasya dhīmahi /
dhiyo yo naḥ pracodayat

viśvāni deva savitar duritāni parā suva /
yad bhadraṃ tan na ' ā suva

vibhaktāraꣳ havāmahe vasoś citrasya rādhasaḥ /
savitāraṃ nṛcakṣasam

brahmaṇe brāhmaṇaṃ kṣatrāya rājanyaṃ marudbhyo vaiśyaṃ tapase śūdraṃ tamase taskaraṃ nārakāya vīrahaṇaṃ pāpmane klībam ākrayāyā ' ayoguṃ kāmāya puꣳścalūm atikruṣṭāya māgadham

nṛttāya sūtaṃ gītāya śailūṣaṃ dharmāya sabhācaraṃ nariṣṭhāyai bhīmalaṃ narmāya rebhaꣳ hasāya kārim ānandāya strīṣakhaṃ pramade kumārīputraṃ medhāyai rathakāraṃ dhairyāya takṣāṇam

tapase kaulālaṃ māyāyai karmāraꣳ rūpāya maṇikāraꣳ śubhe vapaꣳ śaravyāyā ' iṣukāraꣳ hetyai dhanuṣkāraṃ karmaṇe jyākāraṃ diṣṭāya rajjusarjaṃ mṛtyave mṛgayum antakāya śvaninam

nadībhyaḥ pauñjiṣṭham ṛkṣīkābhyo naiṣādaṃ puruṣavyāghrāya durmadaṃ gandharvāpsarobhyo vrātyaṃ prayugbhya ' unmattaꣳ sarpadevajanebhyo 'pratipadamayebhyaḥ kitavam īryatāyā ' akitavaṃ piśācebhyo bidalakārīṃ yātudhānebhyaḥ kaṇṭakīkārīm

saṃdhaye jāraṃ gehāyopapatim ārtyai parivittaṃ nirṛtyai parivividānam arāddhyā ' edidhiṣuḥpatiṃ niṣkṛtyai peśaskārīꣳ saṃjñānāya smarakārīṃ prakāmodyāyopasadaṃ varṇāyānurudhaṃ balāyopadām

utsādebhyaḥ kubjaṃ pramude vāmanaṃ dvārbhyaḥ srāmaꣳ svapnāyāndham adharmāya badhiraṃ pavitrāya bhiṣajaṃ prajñānāya nakṣatradarśam āśikṣāyai praśninam upaśikṣāyā ' abhipraśninaṃ maryādāyai praśnavivākam

armebhyo hastipaṃ javāyāśvapaṃ puṣṭyai gopālaṃ vīryāyāvipālaṃ tejase 'japālam irāyai kīnāśaṃ kīlālāya surākāraṃ bhadrāya gṛhapaꣳ śreyase vittadham ādhyakṣyāyānukṣattāram

bhāyai dārvāhāraṃ prabhāyā ' agnyedhaṃ bradhnasya viṣṭapāyābhiṣektāraṃ varṣiṣṭhāya nākāya pariveṣṭāraṃ devalokāya peśitāraṃ manuṣyalokāya prakaritāraꣳ sarvebhyo lokebhyo ' upasektāram ava ' ṛtyai vadhāyopamanthitāraṃ medhāya vāsaḥpalpūlīṃ prakāmāya rajayitrīm

ṛtaye stenahṛdayaṃ vairahatyāya piśunaṃ viviktyai kṣattāram aupadraṣṭryāyānukṣattāraṃ bālāyānucaraṃ bhūmne pariṣkandaṃ priyāya priyavādinam ariṣṭyā ' aśvasādaꣳ svargāya lokāya bhāgadughaṃ varṣiṣṭhāya nākāya pariveṣṭāram

manyave 'yastāpaṃ krodhāya nisaraṃ yogāya yoktāraꣳ śokāyābhisartāraṃ kṣemāya vimoktāram utkīlebhyas triṣṭhinaṃ vapuṣe mānaskṛtaꣳ śīlāyāñjanīkārīṃ nirṛtyai kośakārīṃ yamāyāsūm

yamāya yamasūm atharvabhyo 'vatokāꣳ saṃvatsarāya paryāyiṇīṃ parivatsarāyāvijātām idāvatsarāyātītvarīm idvatsarāyātiṣkadvarīṃ vatsarāya vijarjarāꣳ saṃvatsarāya paliknīm ṛbhubhyo 'jinasaṃdhaꣳ sādhyebhyaś carmamnam

sarobhyo dhaivaram upasthāvarābhyo dāśaṃ vaiśantābhyo baindaṃ naḍvalābhyaḥ śauṣkalaṃ pārāya mārgāram avarāya kevartaṃ tīrthebhya ' āndaṃ viṣamebhyo mainālaꣳ svanebhyaḥ parṇakaṃ guhābhyaḥ kirātaꣳ sānubhyo jambhakaṃ parvatebhyaḥ kimpūruṣam

bībhatsāyai paulkasaṃ varṇāya hiraṇyakāraṃ tulāyai vāṇijaṃ paścādoṣāya glāvinaṃ viśvebhyo bhūtebhyaḥ sidhmalaṃ bhūtyai jāgaraṇam abhūtyai svapanam ārtyai janavādinaṃ vyṛddhyā ' apagalbhaꣳ saꣳśarāya pracchidam

akṣarājāya kitavaṃ kṛtāyādinavadarśaṃ tretāyai kalpinaṃ dvāparāyādhikalpinam āskandāya sabhāsthāṇuṃ mṛtyave govyaccham antakāya goghātaṃ kṣudhe yo gāṃ vikṛntantaṃ bhikṣamāṇa ' upatiṣṭhati duṣkṛtāya carakācāryaṃ pāpmane sailagam

pratiśrutkāyā ' artanaṃ ghoṣāya bhaṣam antāya bahuvādinam anantāya mūkaꣳ śabdāyāḍambarāghātaṃ mahase vīṇāvādaṃ krośāya tūṇavadhmam avarasparāya śaṅkhadhmaṃ vanāya vanapam anyatoraṇyāya dāvapam

narmāya puꣳścalūꣳ hasāya kāriṃ yādase śābalyāṃ grāmaṇyaṃ gaṇakam abhikrośakaṃ tān mahase vīṇāvādaṃ pāṇighnaṃ tūṇavadhmaṃ tān nṛtāyānandāya talavam

agnaye pīvānaṃ pṛthivyai pīṭhasarpiṇaṃ vāyave cāṇḍālam antarikṣāya vaꣳśanartinaṃ dive khalatiꣳ sūryāya haryakṣaṃ nakṣatrebhyaḥ kirmiraṃ candramase kilāsam ahne śuklaṃ piṅgākṣaꣳ rātryai kṛṣṇaṃ piṅgākṣam

athaitān aṣṭau virūpān ā labhate 'tidīrghaṃ cātihrasvaṃ cātisthūlaṃ cātikṛśaṃ cātiśuklaṃ cātikṛṣṇaṃ cātikulvaṃ cātilomaśaṃ ca /
aśūdrā ' abrāhmaṇās te prājāpatyāḥ /
māgadhaḥ puꣳścalī kitavaḥ klībo 'śūdrā ' abrāhmaṇās te prājāpatyāḥ //