Shukla Yajurveda · Chapter 2

darśapūrṇamāsayāgaḥ 2.1-2.28, piṇḍapitṛyajñaḥ 2.29-

kṛṣṇo'sy ākhareṣṭho 'gnaye tvā juṣṭaṃ prokṣāmi /
vedir asi barhiṣe tvā juṣṭāṃ prokṣāmi /
barhir asi srugbhyas tvā juṣṭaṃ prokṣāmi

adityai vyundanam asi /
viṣṇo stupo 'si /
ūrṇamradasaṃ tvā stṛṇāmi svāsasthāṃ devebhyaḥ /
bhuvapataye svāhā /
bhuvanapataye svāhā /
bhūtānāṃ pataye svāhā

gandharvas tvā viśvāvasuḥ pari dadhātu viśvasyāriṣṭyai yajamānasya paridhir asy agnir iḍa 'īḍitaḥ /
indrasya bāhur asi dakṣiṇo viśvasyāriṣṭyai yajamānasya paridhir asy agnir iḍa ' īḍitaḥ /
mitrāvaruṇau tvottarataḥ pari dhattāṃ dhruveṇa dharmaṇā viśvasyāriṣṭyai yajamānasya paridhir asy agnir iḍa ' īḍitaḥ

vītihotraṃ tvā kave dyumantaꣳ sam idhīmahi /
agne bṛhantam adhvare

samid asi /
sūryas tvā purastāt pātu kasyāś cid abhiśastyai /
savitur bāhū sthaḥ /
' ūrṇamradasaṃ tvā stṛṇāmi svāsasthaṃ devebhyaḥ /
' ā tvā vasavo rudrā ' ādityāḥ sadantu

ghṛtācy asi juhūr nāmnā sedaṃ priyeṇa dhāmnā priyaꣳ sada ' ā sīda /
ghṛtācy asy upabhṛn nāmnā sedaṃ priyeṇa dhāmnā priyaꣳ sada ' ā sīda /
ghṛtācy asi dhruvā nāmnā sedaṃ priyeṇa dhāmnā priyaꣳ sada' ā sīda /
priyeṇa dhāmnā priyaꣳ sada 'ā sīda /
dhruvā ' asadann ṛtasya yonau tā viṣṇo pāhi /
pāhi yajñaṃ /
pāhi yajñapatim /
pāhi māṃ yajñanyam

agne vājajid vājaṃ tvā sariṣyantaṃ vājajitaꣳ saṃ mārjmi /
namo devebhyaḥ /
svadhā pitṛbhyaḥ /
suyame me bhūyāstam

askannam adya devebhya' ājyaꣳ saṃ bhriyāsam /
aṅghriṇā viṣṇo mā tvāva kramiṣam /
vasumatīm agne te chāyām upa stheṣaṃ viṣṇo sthānam asi /
ita ' indro vīryam akṛṇod ūrdhvo dhvara 'āsthāt

agne ver hotraṃ ver dūtyam /
avatāṃ tvāṃ dyāvāpṛthivī /
'ava tvaṃ dyāvāpṛthivī sviṣṭakṛd devebhyo indra' ājyena haviṣā bhūt svāhā /
saṃ jyotiṣā jyotiḥ

mayīdam indra 'indriyaṃ dadhātv asmān rāyo maghavānaḥ sacantām /
asmākaꣳ santv āśiṣaḥ satyā naḥ santv āśiṣaḥ /
'upahūtā pṛthivī mātopa māṃ pṛthivī mātā hvayatām /
agnir āgnīdhrāt svāhā

upahūto dyauṣ pitopa māṃ dyauṣ pitā hvayatām agnir āgnīdhrāt svāhā /
devasya tvā savituḥ prasave 'śvinor bāhubhyāṃ pūṣṇo hastābhyām /
prati gṛhṇāmi /
agneṣ ṭvāsyena prāśnāmi

etaṃ te deva savitar yajñaṃ prāhur bṛhaspataye brahmaṇe /
tena yajñam ava tena yajñapatiṃ tena mām ava

mano jūtir juṣatām ājyasya bṛhaspatir yajñam imaṃ tanotu /
ariṣṭaṃ yajñaꣳ sam imaṃ dadhātu viśve devāsa' iha mādayantām o3ṃ pra tiṣṭha

eṣā te' agne samit tayā vardhasva cā ca pyāyasva /
vardhiṣīmahi ca vayam ā ca pyāsiṣīmahi /
agne vājajid vājaṃ tvā sasṛvāꣳsaṃ vājajitaꣳ saṃ mārjmi

agnīṣomayor ujjitim anūjjeṣaṃ vājasya mā prasavena prohāmi /
agnīṣomau tam apanudatāṃ yo'smān dveṣṭi yaṃ ca vayaṃ dviṣmo vājasyainaṃ prasavenāpohāmi /
indrāgnyor ujjitim anūjjeṣaṃ vājasya mā prasavena prohāmi /
indrāgnī tam apa nudatāṃ yo 'smān dveṣṭi yaṃ ca vayaṃ dviṣmo vājasyainaṃ prasavenāpohāmi

vasubhyas tvā /
rudrebhyas tvā /
ādityebhyas tvā /
saṃ jānāthāṃ dyāvāpṛthivī /
mitrāvaruṇau tvā vṛṣṭyāvatām /
vyantu vayo ktaꣳ rihāṇāḥ /
marutāṃ pṛṣatīr gaccha vaśā pṛśnir bhūtvā divaṃ gaccha tato no vṛṣṭim ā vaha /
cakṣuṣpā 'agne 'si cakṣur me pāhi

yaṃ paridhiṃ paryadhatthā' agne deva paṇibhir guhyamānaḥ /
taṃ ta' etam anu joṣaṃ bharāmy net tvad apacetayātai /
'agneḥ priyaṃ pātho'pītam

saꣳsravabhāgā stheṣā bṛhantaḥ prastareṣṭhāḥ paridheyāś ca devāḥ /
imāṃ vācam abhi viśve gṛṇanta 'āsadyāsmin barhiṣi mādayadhvam /
svāhā vāṭ

ghṛtācī stho dhuryau pātaꣳ sumne sthaḥ sumne mā dhattam /
yajña namaś ca ta' upa ca yajñasya śive saṃ tiṣṭhasva sviṣṭe me saṃtiṣṭhasva

agne' dabdhāyo 'śītama pāhi mā didyoḥ /
pāhi prasityai /
pāhi duriṣṭyai /
pāhi duradmanyā' aviṣaṃ naḥ pituṃ kṛṇu /
suṣadā yonau svāhā vāṭ /
agnaye saṃveśapataye svāhā /
sarasvatyai yaśobhaginyai svāhā

vedo 'si yena tvaṃ deva veda devebhyo vedo' bhavas tena mahyaṃ vedo bhūyāḥ /
devā gātuvido gātuṃ vittvā gātum ita /
manasas pata' imaṃ deva yajñaꣳ svāhā vāte dhāḥ

saṃ barhir aṅktāꣳ haviṣā ghṛtena sam ādityair vasubhiḥ saṃ marudbhiḥ /
sam indro viśvadevebhir aṅktāṃ divyaṃ nabho gacchatu yat svāhā

kas tvā vi muñcati sa tvā vi muñcati kasmai tvā vi muñcati tasmai tvā vi muñcati /
poṣāya /
rakṣasāṃ bhāgo 'si

saṃ varcasā payasā saṃ tanūbhir aganmahi manasā saꣳ śivena /
tvaṣṭā sudatro vi dadhātu rāyo' numārṣṭu tanvo yad viliṣṭam

divi viṣṇur vyakraꣳsta jāgatena chandasā tato nirbhakto yo 'smān dveṣṭi yaṃ ca vayaṃ dviṣmaḥ /
antarikṣe viṣṇur vyakraꣳsta jāgatena chandasā tato nirbhakto yo' smān dveṣṭi yaṃ ca vayaṃ dviṣmaḥ /
pṛthivyāṃ viṣṇur vyakraꣳsta jāgatena chandasā tato nirbhakto yo 'smān dveṣṭi yaṃ ca vayaṃ dviṣmaḥ /
asmād 'annādasyai pratiṣṭhāyai /
' aganma svaḥ /
saṃ jyotiṣābhūma

svayambhūr asi śreṣṭho raśmir 'varcodā asi varco me dehi /
sūryasyāvṛtam anv āvarte

agne gṛhapate sugṛhapatis tvayā'gne 'haṃ gṛhapatinā bhūyāsaꣳ sugṛhapatis tvaṃ mayā'gne gṛhapatinā bhūyāḥ /
asthūri ṇau gārhapatyāni santu śataꣳ himāḥ /
sūryasyāvṛtam anv āvarte

agne vratapate vratam acāriṣaṃ tad aśakaṃ tan me' rādhi /
idam ahaṃ ya' evā'smi so'smi

agnaye kavyavāhanāya svāhā /
somāya pitṛmate svāhā /
apahatā ' asurā rakṣāꣳsi vediṣadaḥ

ye rūpāṇi pratimuñcamānā ' asurāḥ santaḥ svadhayā caranti /
parāpuro nipuro ye bharanty agniṣṭām̐n lokāt pra ṇudāty asmāt

atra pitaro mādayadhvaṃ yathābhāgam ā vṛṣāyadhvam /
amīmadanta pitaro yathābhāgam ā vṛṣāyiṣata

namo vaḥ pitaro rasāya namo vaḥ pitaraḥ śoṣāya namo vaḥ pitaro jīvāya namo vaḥ pitaraḥ svadhāyai namo vaḥ pitaro ghorāya namo vaḥ pitaro manyave namo vaḥ pitaraḥ pitaro namo vo gṛhānnaḥ pitaro datta sato vaḥ pitaro deṣmaitadvaḥ pitaro vāsaḥ

ā dhatta pitaro garbhaṃ kumāraṃ puṣkarasrajam /
yatheha puruṣo 'sat

ūrjaṃ vahantīr amṛtaṃ ghṛtaṃ payaḥ kīlālaṃ parisrutam /
svadhā stha tarpayata me pitṝn //