Shukla Yajurveda · Chapter 28

sautrāmaṇyaṅgabhūtāḥ paśuprayājānuyāja praiṣamantrāḥ

hotā yakṣad samidhendram iḍas pade nābhā pṛthivyā ' adhi /
divo varṣmant sam idhyata ' ojiṣṭhaś carṣaṇīsahāṃ vetv ājyasya hotar yaja

hotā yakṣat tanūnapātamūtibhir jetāram aparājitam /
indraṃ devaꣳ svarvidaṃ pathibhir madhumattamair narāśaꣳsena tejasā vetv ājyasya hotar yaja

hotā yakṣad iḍābhir indram īḍitam ājuhvānam amartyam /
devo devaiḥ savīryo vajrahastaḥ puraṃdaro vetv ājyasya hotar yaja

hotā yakṣad barhiṣīndraṃ niṣadvaraṃ vṛṣabhaṃ naryāpasam /
vasubhī rudrair ādityaiḥ suyugbhir barhir āsadad vetv ājyasya hotar yaja

hotā yakṣad ojo na vīryaꣳ saho dvāra ' indram avardhayan /
suprāyaṇā ' asmin yajñe vi śrayantām ṛtāvṛdho dvāra ' indrāya mīḍhuṣe vyantv ājyasya hotar yaja

hotā yakṣad uṣe ' indrasya dhenū sudughe mātarā mahī /
savātarau na tejasā vatsam indram avardhatāṃ vītām ājyasya hotar yaja

hotā yakṣad daivyā hotārā bhiṣajā sakhāyā haviṣendraṃ bhiṣajyataḥ /
kavī devau pracetasāv indrāya dhatta ' indriyaṃ vītām ājyasya hotar yaja

hotā yakṣat tisro devīr na bheṣajaṃ trayas tridhātavo 'pasa iḍā sarasvat bhāratī mahīḥ /
indrapatnīr haviṣmatīr vyantv ājyasya hotar yaja

hotā yakṣat tvaṣṭāram indraṃ devaṃ bhiṣajaꣳ suyajaṃ ghṛtaśriyam /
pururūpaꣳ suretasaṃ maghonam indrāya tvaṣṭā dadhad indriyāṇi vetv ājyasya hotar yaja

hotā yakṣad vanaspatiꣳ śamitāraꣳ śatakratuṃ dhiyo joṣṭāram indriyam /
madhvā samañjan pathibhiḥ sugebhiḥ svadāti yajñaṃ madhunā ghṛtena vetv ājyasya hotar yaja

hotā yakṣad indraꣳ svāhājyasya svāhā medasaḥ svāhā stokānāꣳ svāhā svāhākṛtīnāꣳ svāhā havyasūktīnām /
svāhā devā ' ājyapā juṣāṇā ' indra ājyasya vyantu hotar yaja

devaṃ barhir indraꣳ sudevaṃ devair vīravat stīrṇaṃ vedyām avardhayat /
vastor vṛtaṃ prāktor bhṛtaꣳ rāyā barhiṣmato 'ty agād vasuvane vasudheyasya vetu yaja

devīr dvāra ' indraꣳ saṃghāte vīḍvīr yāmann avardhayan /
ā vatsena taruṇena kumāreṇa ca mīvatāpārvāṇaꣳ reṇukakāṭaṃ nudantāṃ vasuvane vasudheyasya vyantu yaja

devī uṣāsānaktendraṃ yajñe prayaty ahvetām /
daivīr viśaḥ prāyāsiṣṭāꣳ suprīte sudhite vasuvane vasudheyasya vītāṃ yaja

devī joṣṭrī vasudhitī devam indram avardhatām /
ayāvy anyāghā dveṣāꣳsy ānyā vakṣad vasu vāryāṇi yajamānāya śikṣite vasuvane vasudheyasya vītāṃ yaja

devī ' ūrjāhutī dughe payasendram avardhatām /
iṣamūrjam anyā vakṣat sagdhiꣳ sapītim anyā navena pūrvaṃ dayamāne purāṇena navam adhātāmūrjamūrjāhutī ' ūrjayamāne vasu vāryāṇi yajamānāya śikṣite vasuvane vasudheyasya vītāṃ yaja

devā devyā hotārā devam indram avardhatām /
hatāghaśaꣳsāv ābhārṣṭāṃ vasu vāryāṇi yajamānāya śikṣitau vasuvane vasudheyasya vītāṃ yaja

devīs tisras tisro devīḥ patim indram avardhayan /
aspṛkṣad bhāratī divaꣳ rudrair yajñaꣳ sarasvatīḍā vasumatī gṛhān vasuvane vasudheyasya vyantu yaja

deva ' indro narāśaꣳsas trivarūthas tribandhuro devam indram avardhayat /
śatena śitipṛṣṭhānām āhitaḥ sahasreṇa pra vartate mitrāvaruṇed asya hotram arhato bṛhaspati stotram aśvinādhvaryavaṃ vasuvane vasudheyasya vetu yaja

devo devair vanaspatir hiraṇyaparṇo madhuśākhaḥ supippalo devam indram avardhayat /
divam agreṇāspṛkṣad āntarikṣaṃ pṛthivīm adṛꣳhad vasuvane vasudheyasya vetu yaja

devaṃ barhir vāritīnāṃ devam indram avardhayat /
svāsastham indreṇāsannam anyā barhīꣳṣy abhy abhūd vasuvane vasudheyasya vetu yaja

devo ' agniḥ sviṣṭakṛd devam indram avardhayat /
sviṣṭaṃ kurvant sviṣṭakṛt sviṣṭam adya karotu no vasuvane vasudheyasya vetu yaja

agnim adya hotāram avṛṇītāyaṃ yajamānaḥ pacan paktīḥ pacan puroḍāśaṃ badhnann indrāya chāgam /
sūpasthā ' adya devo vanaspatir abhavad indrāya chāgena /
aghat taṃ medastaḥ prati pacatāgrabhīd avīvṛdhat puroḍāśena /
tvām adya ' ṛṣa [ārṣeya ṛṣīṇāṃ napād avṛṇītāyaṃ yajamāno bahubhya ā saṃgatebhya eṣa me deveṣu vasu vāryāyakṣyata iti tā yā devā deva dānāny adus tāny asmā ā ca śāssvā ca gurasveṣitaś ca hotar asi bhadravācyāya preṣito mānuṣaḥ sūktavākāya sūktā brūhi //]???

hotā yakṣat samidhānaṃ mahad yaśaḥ susamiddhaṃ vareṇyam agnim indraṃ vayodhasam /
gāyatrīṃ chanda ' indriyaṃ tryaviṃ gāṃ vayo dadhad vetv ājyasya hotar yaja

hotā yakṣat tanūnapātam udbhidaṃ yaṃ garbham aditir dadhe śucim indraṃ vayodhasam /
uṣṇihaṃ chanda ' indriyaṃ dityavāhaṃ gāṃ vayo dadhad vetv ājyasya hotar yaja

hotā yakṣad īḍenyam īḍitaṃ vṛtrahantamam iḍābhir īḍyaꣳ sahaḥ somam indraꣳ vayodhasam /
anuṣṭubhaṃ chanda ' indriyaṃ pañcāviṃ gāṃ vayo dadhad vetv ājyasya hotar yaja

hotā yakṣat subarhiṣaṃ pūṣaṇvantam amartyaꣳ sīdantaṃ barhiṣi priye 'mṛtendraṃ vayodhasam /
bṛhatīṃ chanda ' indriyaṃ trivatsaṃ gāṃ vayo dadhad vetv ājyasya hotar yaja

hotā yakṣad vyacasvatīḥ suprāyaṇā ' ṛtāvṛdho dvāro devīr hiraṇyayīr brahmāṇam indraṃ vayodhasam /
paṅktiṃ chanda ' ihendriyaṃ turyavāhaṃ gāṃ vayo dadhad vyantv ājyasya hotar yaja

hotā yakṣat supeśasā suśilpe bṛhatī ' ubhe naktoṣāsā na darśate viśvam indraṃ vayodhasam /
triṣṭubhaṃ chanda ' ihendriyaṃ paṣṭhavāhaṃ gāṃ vayo dadhad vītām ājyasya hotar yaja

hotā yakṣat pracetasā devānām uttamaṃ yaśo hotārā daivyā kavī sayujendraṃ vayodhasam /
jagatīṃ chanda ' indriyam anaḍvāhaṃ gāṃ vayo dadhad vītām ājyasya hotar yaja

hotā yakṣat peśasvatīs tisro devīr hiraṇyayīr bhāratīr bṛhatīr mahīḥ patim indraṃ vayodhasam /
virājaṃ chanda ' ihendriyaṃ dhenuṃ gāṃ na vayo dadhad vyantv ājyasya hotar yaja

hotā yakṣat suretasaṃ tvaṣṭāraṃ puṣṭivardhanaꣳ rūpāṇi bibhrataṃ pṛthak puṣṭim indraṃ vayodhasam /
dvipadaṃ chanda ' indriyam ukṣāṇaṃ gāṃ na vayo dadhad vetv ājyasya hotar yaja

hotā yakṣad vanaspatiꣳ śamitāraꣳ śatakratuꣳ hiraṇyaparṇam ukthinaꣳ raśanāṃ bibhrataṃ vaśiṃ bhagam indraṃ vayodhasam /
kakubhaṃ chanda ' ihendriyaṃ vaśāṃ vehataṃ gāṃ vayo dadhad vetv ājyasya hotar yaja

hotā yakṣat svāhākṛtīr agniṃ gṛhapatiṃ pṛthag varuṇaṃ bheṣajaṃ kaviṃ kṣatram indraṃ vayodhasam /
aticchandasaṃ chanda ' indriyaṃ bṛhad ṛṣabhaṃ gāṃ vayo dadhad vyantv ājyasya hotar yaja

devaṃ barhir vayodhasaṃ devam indram avardhayat /
gāyatryā chandasendriyaṃ cakṣur indre vayo dadhad vasuvane vasudheyasya vetu yaja

devīr dvāro vayodhasaꣳ śucim indram avardhayan /
uṣṇihā chandasendriyaṃ prāṇam indre vayo dadhad vasuvane vasudheyasya vyantu yaja

devī ' uṣāsānaktā devam indraṃ vayodhasaṃ devī devam avardhatām /
anuṣṭubhā chandasendriyaṃ balam indre vayo dadhad vasuvane vasudheyasya vītāṃ yaja

devī joṣṭrī vasudhitī devam indraṃ vayodhasaṃ devī devam avardhatām /
bṛhatyā chandasendriyaꣳ śrotram indre vayo dadhad vasuvane vasudheyasya vītāṃ yaja

devī ' ūrjāhutī dughe sudughe payasendraṃ vayodhasaṃ devī devam avardhatām /
paṅktyā chandasendriyaꣳ śukram indre vayo dadhad vasuvane vasudheyasya vītāṃ yaja

devā daivyā hotārā devam indraṃ vayodhasaṃ devau devam avardhatām /
triṣṭubhā chandasendriyaṃ tviṣim indre vayo dadhad vasuvane vasudheyasya vītāṃ yaja

devīs tisras tisro devīr vayodhasaṃ patim indram avardhayan /
jagatyā chandasendriyaꣳ śūṣam indre vayo dadhad vasuvane vasudheyasya vyantu yaja

devo narāśaꣳso devam indraṃ vayodhasaṃ devo devam avardhayat /
virājā chandasendriyaꣳ rupam indre vayo dadhad vasuvane vasudheyasya vetu yaja

devo vanaspatir devam indraṃ vayodhasaṃ devo devam avardhayat /
dvipadā chandasendriyaṃ bhagam indre vayo dadhad vasuvane vasudheyasya vetu yaja

devaṃ barhir vāritīnāṃ devam indraṃ vayodhasaṃ devaṃ devam avardhayat /
kakubhā chandasendriyaṃ yaśa ' indre vayo dadhad vasuvane vasudheyasya vetu yaja

devo ' agniḥ sviṣṭakṛd devam indraṃ vayodhasaṃ devo devam avardhayat /
aticchandasā chandasendriyaṃ kṣatram indre vayo dadhad vasuvane vasudheyasya vetu yaja

agnim adya hotāram avṛṇītāyaṃ yajamānaḥ pacan paktīḥ pacan puroḍāśaṃ badhnann indrāya vayodhase chāgam /
sūpasthā ' adya devo vanaspatir abhavad indrāya vayodhase chāgena /
aghat taṃ medastaḥ prati pacatāgrabhīd avīvṛdhat puroḍāśena /
tvām adya ' ṛṣa [ārṣeya ṛṣīṇāṃ napād avṛṇītāyaṃ yajamāno bahubhya ā saṃgatebhya eṣa me deveṣu vasu vāryāyakṣyata iti tā yā devā deva dānāny adus tāny asmā ā ca śāssvā ca gurasveṣitaś ca hotar asi bhadravācyāya preṣito mānuṣaḥ sūktavākāya sūktā brūhi // ]