Shukla Yajurveda · Chapter 1

darśapūrṇamāseṣṭiḥ

iṣe tvā ūrje tvā /
vāyava stha /
devo vaḥ savitā prārpayatu śreṣṭhatamāya karmaṇa' ā pyāyadhvam aghnyā 'indrāya bhāgaṃ prajāvatīr anamīvā 'ayakṣmā mā va stena' īśata māghaśaꣳso dhruvā 'asmin gopatau syāta bahvīḥ /
yajamānasya paśūn pāhi

vasoḥ pavitram asi /
dyaur asi pṛthivyasi /
mātariśvano 'gharmo si viśvadhā 'asi parameṇa dhāmnā dṛꣳhasva mā hvār mā te yajñapatir hvārṣīt

vasoḥ pavitram asi śatadhāraṃ vasoḥ pavitram asi sahasradhāram /
devas tvā savitā punātu vasoḥ pavitreṇa śatadhāreṇa supvā /
kām adhukṣaḥ

sā viśvāyuḥ /
sā viśvakarmā /
sā viśvadhāyāḥ /
indrasya tvā bhāgaꣳ somenā tanacmi /
viṣṇo havyaꣳ rakṣa

agne vratapate vrataṃ cariṣyāmi tac chakeyaṃ tan me rādhyatām /
idam aham anṛtāt satyam upaimi

kas tvā yunakti sa tvā yunakti kasmai tvā yunakti tasmai tvā yunakti /
karmaṇe vāṃ veṣāya vām

pratyuṣṭaꣳ rakṣaḥ pratyuṣṭā arātayaḥ /
niṣṭaptaꣳ rakṣo niṣṭaptā ' arātayaḥ /
urv antarikṣam anv emi

dhūr asi dhūrva dhūrvantaṃ dhūrva taṃ yo' smān dhūrvati taṃ dhūrva yaṃ vayaṃ dhūrvāmaḥ /
devānām asi vahnitamaꣳ samnitamaṃ papritamaṃ juṣṭatamaṃ devahūtamam

ahrutam asi havirdhānaṃ dṛꣳhasva mā hvār mā yajñapatir hvārṣīt /
viṣṇus tvā kramatām /
uru vātāya /
apahataꣳ rakṣaḥ /
yacchantāṃ pañca

devasya tvā savituḥ prasave'śvinor bāhubhyāṃ pūṣṇo hastābhyām /
agnaye juṣṭaṃ gṛhṇāmi /
agnīṣomābhyāṃ juṣṭaṃ gṛhṇāmi

bhūtāya tvā nārātaye /
svar abhivi khyeṣam /
dṛꣳhantāṃ duryāḥ pṛthivyām /
urv antarikṣam anv emi /
pṛthivyās tvā nābhau sādayāmy adityā 'upasthe' gne havyaꣳ rakṣa

pavitre stho vaiṣṇavyau /
savitur vaḥ prasava ut punāmy acchidreṇa pavitreṇa sūryasya raśmibhiḥ /
devīr āpo agreguvo' agrepuvo'gra imam adya yajñaṃ nayatāgre yajñapatiꣳ sudhātuṃ yajñapatiṃ devayuvam

yuṣmā ' indro'vṛṇīta vṛtratūrye yūyam indram avṛṇīdhvaṃ vṛtratūrye /
prokṣitā stha /
agnaye tvā juṣṭaṃ prokṣāmi /
agnīṣomābhyāṃ tvā juṣṭaṃ prokṣāmi /
daivyāya karmaṇe śundhadhvaṃ devayajyāyai yad vo'śuddhāḥ parājaghnur idaṃ vas tac chundhāmi

śarmāsi /
avadhūtaꣳ rakṣo'vadhūtā ' arātayaḥ /
'adityās tvag asi prati tvāditir vettu /
adrir asi vānaspatyaḥ /
grāvāsi pṛthubudhnaḥ prati tvādityās tvag vettu

agnes tanūr asi vāco visarjanaṃ devavītaye tvā gṛhṇāmi /
bṛhadgrāvāsi vānaspatyaḥ /
sa'idaṃ devebhyo haviḥ śamīṣva suśami śamīṣva /
haviṣkṛd ehi haviṣkṛd ehi haviṣkṛd ehi

kukkuṭo'si madhujihva'iṣamūrjam ā vada tvayā vayaꣳ saṃghātaꣳ-saṃghātaṃ jeṣma /
varṣavṛddham asi /
prati tvā varṣavṛddhaṃ vettu /
parāpūtaꣳ rakṣaḥ parāpūtā arātayaḥ /
'apahataꣳ rakṣaḥ /
vāyur vo vi vinaktu /
devo vaḥ savitā hiraṇyapāṇiḥ prati gṛbhṇātv acchidreṇa pāṇinā

dhṛṣṭir asi /
apā'gne ' agnim āmādaṃ jahi niṣ kravyādaꣳ sedha /
ā devayajaṃ vaha /
dhruvam asi pṛthivīṃ dṛꣳha brahmavani tvā kṣatravani sajātavany upa dadhāmi bhrātṛvyasya vadhāya

agne brahma gṛbhṇīṣva /
dharuṇam asy antarikṣaṃ dṛꣳha brahmavani tvā kṣatravani sajātavany upa dadhāmi bhrātṛvyasya vadhāya /
dhartram asi divaṃ dṛꣳha brahmavani tvā kṣatravani sajātavany upa dadhāmi bhrātṛvyasya vadhāya /
viśvābhyas tvāśābhya' upa dadhāmi /
cita sthordhvacitaḥ /
bhṛgūṇām aṅgirasāṃ tapasā tapyadhvam

śarmāsi /
avadhūtaꣳ rakṣo'vadhūtā ' arātayaḥ /
'adityās tvag asi prati tvāditir vettu /
dhiṣaṇāsi parvatī prati tvādityās tvag vettu /
diva skambhanīr asi /
dhiṣaṇāsi pārvateyī prati tvā parvatī vettu

dhānyam asi dhinuhi devān /
prāṇāya tvā /
udānāya tvā /
vyānāya tvā /
dīrghām anu prasitim āyuṣe dhāṃ devo vaḥ savitā hiraṇyapāṇiḥ prati gṛbhṇātv acchidreṇa pāṇinā /
cakṣuṣe tvā /
mahīnāṃ payo'si

devasya tvā savituḥ prasave'śvinor bāhubhyāṃ pūṣṇo hastābhyām /
saṃ vapāmi /
sam āpa'oṣadhībhiḥ sam oṣadhayo rasena /
saꣳ revatīr jagatībhiḥ pṛcyantāꣳ saṃ madhumatīr madhumatībhiḥ pṛcyantām

janayatyai tvā saṃ yaumi /
idam agneḥ /
idam agnīṣomayoḥ /
iṣe tvā /
gharmo'si viśvāyuḥ /
uruprathā' uru prathasvoru te yajñapatiḥ prathatām /
agniṣṭe tvacaṃ mā hiꣳsīt /
devas tvā savitā śrapayatu varṣiṣṭhe'dhi nāke

mā bher mā saṃvikthāḥ /
' atamerur yajño 'tamerur yajamānasya prajā bhūyāt /
tritāya tvā /
dvitāya tvā /
ekatāya tvā

devasya tvā savituḥ prasave 'śvinor bāhubhyāṃ pūṣṇo hastābhyām /
ā dade 'dhvarakṛtaṃ devebhyaḥ /
'indrasya bāhur asi dakṣiṇaḥ sahasrabhṛṣṭiḥ śatatejā vāyur asi tigmatejā dviṣato vadhaḥ

pṛthivi devayajany oṣadhyās te mūlaṃ mā hiꣳsiṣam /
vrajaṃ gaccha goṣṭhānam /
varṣatu te dyauḥ /
badhāna deva savitaḥ paramasyāṃ pṛthivyāꣳ śatena pāśair yo smān dveṣṭi yaṃ ca vayaṃ dviṣmas tam ato mā mauk

apāraruṃ pṛthivyai devayajanād vadhyāsam /
vrajaṃ gaccha goṣṭhānam /
varṣatu te dyauḥ /
badhāna deva savitaḥ paramasyāṃ pṛthivyā śatena pāśair yo'smān dveṣṭi yaṃ ca vayaṃ dviṣmas tam ato mā mauk /
araro divaṃ mā paptaḥ /
drapsas te dyāṃ mā skan /
vrajaṃ gaccha goṣṭhānam /
varṣatu te dyauḥ /
badhāna deva savitaḥ paramasyāṃ pṛthivyāꣳ śatena pāśair yo'smān dveṣṭi yaṃ ca vayaṃ dviṣmas tam ato mā mauk

gāyatreṇa tvā chandasā pari gṛhṇāmi /
traiṣṭubhena tvā chandasā pari gṛhṇāmi /
jāgatena tvā chandasā pari gṛhṇāmi /
sukṣmā cāsi śivā cāsi /
syonā cāsi suṣadā cāsi /
ūrjasvatī cāsi payasvatī ca

purā krūrasya visṛpo virapśinn udādāya pṛthivīṃ jīvadānum /
yām airayaꣳś candramasi svadhābhis tām u dhīrāso 'anudiśya yajante /
prokṣaṇīr ā sādaya /
dviṣato vadho' si

pratyuṣṭaꣳ rakṣaḥ pratyuṣṭā 'arātayaḥ /
niṣṭaptaꣳ rakṣo niṣṭaptā ' arātayaḥ /
aniśito' si sapatnakṣid vājinaṃ tvā vājedhyāyai saṃ mārjmi /
pratyuṣṭaꣳ rakṣaḥ pratyuṣṭā' arātayaḥ /
niṣṭaptaꣳ rakṣo niṣṭaptā' arātayaḥ /
aniśitā'si sapatnakṣid vājinīṃ tvā vājedhyāyai saṃ mārjmi

adityai rāsnāsi /
viṣṇor veṣyo si /
ūrje tvā /
'adabdhena tvā cakṣuṣāva paśyāmi /
agner jihvāsi suhūr devebhyo dhāmne-dhāmne me bhava yajuṣe-yajuṣe

savitus tvā prasava' ut punāmy acchidreṇa pavitreṇa sūryasya raśmibhiḥ /
savitur vaḥ prasava ' ut punāmy acchidreṇa pavitreṇa sūryasya raśmibhiḥ /
tejo 'si śukram asy amṛtam asi /
dhāma nāmāsi priyaṃ devānām anādhṛṣṭaṃ devayajanam asi //