Shukla Yajurveda · Chapter 18

vasordhārā homam
śravya sañcikā

śravya sañcikā

śatapathabrāhmaṇe vasordhārā homam

vasordhārādi mantrāḥ

vājaś ca me prasavaś ca me prayatiś ca me prasitiś ca me dhītiś ca me kratuś ca me svaraś ca me ślokaś ca me śravaś ca me śrutiś ca me jyotiś ca me svaś ca me yajñena kalpantām

prāṇaś ca me 'pānaś ca me vyānaś ca me 'suś ca me cittaṃ ca ma ' ādhītaṃ ca me vāk ca me manaś ca me cakṣuś ca me śrotraṃ ca me dakṣaś ca me balaṃ ca me yajñena kalpantām

ojas ca me sahaś ca ma ' ātmā ca me tanūś ca me śarma ca me varma ca me 'ṅgāni ca me 'sthīni ca me parūꣳṣi ca me śarīrāṇi ca ma ' āyuś ca me jarā ca me yajñena kalpantām

jyaiṣṭhyaṃ ca me ' ādhipatyaṃ ca me manyuś ca me bhāmaś ca me 'maś ca me 'mbhaś ca me mahimā ca me varimā ca me prathimā ca me varṣimā ca me drāghimā ca me vṛddhaṃ ca me vṛddhiś ca me yajñena kalpantām

satyaṃ ca me śraddhā ca me jagac ca me dhanaṃ ca me viśvaṃ ca me mahaś ca me krīḍā ca me modaś ca me jātaṃ ca me janiṣyamāṇaṃ ca me sūktaṃ ca me sukṛtaṃ ca me yajñena kalpantām

ṛtaṃ ca me 'mṛtaṃ ca me 'yakṣmaṃ ca me 'nāmayac ca me jīvātuś ca me dīrghāyutvaṃ ca me 'namitraṃ ca me 'bhayaṃ ca me sukhaṃ ca me śayanaṃ ca me sūṣāś ca me sudinaṃ ca me yajñena kalpantām

yantā ca me dhartā ca me kṣemaś ca me dhṛtiś ca me viśvaṃ ca me mahaś ca me saṃvic ca me jñātraṃ ca me sūś ca me prasūś ca me sīraṃ ca me layaś ca me yajñena kalpantām

śaṃ ca me mayaś ca me priyaṃ ca me 'nukāmaś ca me kāmaś ca me saumanasaś ca me bhagaś ca me draviṇaṃ ca me bhadraṃ ca me śreyaś ca me vasīyaś ca me yaśaś ca me yajñena kalpantām

ūrk ca me sūnṛtā ca me payaś ca me rasaś ca me ghṛtaṃ ca me madhu ca me sagdhiś ca me sapītiś ca me kṛṣiś ca me vṛṣṭiś ca me jaitraṃ ca ma ' audbhidyaṃ ca me yajñena kalpantām

rayiś ca me rāyaś ca me puṣṭaṃ ca me puṣṭiś ca me vibhu ca me prabhu ca me pūrṇaṃ ca me pūrṇataraṃ ca me kuyavaṃ ca me 'kṣitaṃ ca me 'nnaṃ ca me 'kṣuc ca me yajñena kalpantām

vittaṃ ca me vedyaṃ ca me bhūtaṃ ca me bhaviṣyac ca me sugaṃ ca me supathyaṃ ca ma ' ṛddhaṃ ca ma ' ṛddhiś ca me klṛptaṃ ca me klṛptiś ca me matiś ca me sumatiś ca me yajñena kalpantām

vrīhayaś ca me yavāś ca me māṣāś ca me tilāś ca me mudgāś ca me khalvāś ca me priyaṅgavaś ca me 'ṇavaś ca me śyāmākāś ca me nīvārāś ca me godhūmāś ca me masūrāś ca me yajñena kalpantām

aśmā ca me mṛttikā ca me girayaś ca me parvatāś ca me sikatāś ca me vanaspatayaś ca me hiraṇyaṃ ca me 'yaś ca me śyāmaṃ ca me lohaṃ ca me sīsaṃ ca me trapu ca me yajñena kalpantām

agniś ca ma ' āpaś ca me vīrudhaś ca ma ' oṣadhayaś ca me kṛṣṭapacyāś ca me 'kṛṣṭapacyāś ca me grāmyāś ca me paśava ' āraṇyāś ca me vittaṃ ca me vittiś ca me bhūtaṃ ca me bhūtiś ca me yajñena kalpantām

vasu ca me vasatiś ca me karma ca me śaktiś ca me 'rthaś ca ma ' emaś ca ma ' ityā ca me gatiś ca me yajñena kalpantām

agniś ca ma ' indraś ca me somaś ca ma ' indraś ca me savitā ca ma indraś ca me sarasvatī ca ma ' indraś ca me pūṣā ca ma ' indraś ca me bṛhaspatiś ca ma indraś ca me yajñena kalpantām

mitraś ca ma ' indraś ca me varuṇaś ca ma ' indraś ca me dhātā ca ma ' indraś ca me tvaṣṭā ca ma ' indraś ca me marutaś ca ma ' indraś ca me viśve ca me devā ' indraś ca me yajñena kalpantām

pṛthivī ca ma ' indraś ca me 'ntarikṣaṃ ca ma 'indraś ca me dyauś ca ' ma indraś ca me samāś ca ma ' indraś ca me nakṣatrāṇi ca ma ' indraś ca me diśaś ca ma ' indraś ca me yajñena kalpantām

aꣳśuś ca me raśmiś ca me 'dābhyaś ca me 'dhipatiś ca ma upāꣳśuś ca me 'ntaryāmaś ca ma ' aindravāyavaś ca me maitrāvaruṇaś ca ma ' āśvinaś ca me pratiprasthānaś ca me śukraś ca me manthī ca me yajñena kalpantām

āgrayaṇaś ca me vaiśvadevaś ca me dhruvaś ca me vaiśvānaraś ca ma ' aindrāgnaś ca me mahāvaiśvadevaś ca me marutvatīyāś ca me niṣkevalyaś ca me sāvitraś ca me sārasvataś ca me patnīvataś ca me hāriyojanaś ca me yajñena kalpantām

srucaś ca me camasāś ca me vāyavyāni ca me droṇakalaśaś ca me grāvāṇaś ca me 'dhiṣavaṇe ca me pūtabhṛc ca ma ' ādhavanīyaś ca me vediś ca me barhiś ca me 'vabhṛthaś ca me svagākāraś ca me yajñena kalpantām

agniś ca me gharmaś ca me 'rkaś ca me sūryaś ca me prāṇaś ca me 'śvamedhaś ca me pṛthivī ca me 'ditiś ca me ditiś ca me dyauś ca me 'ṅgulayaḥ śakvarayo diśaś ca me yajñena kalpantām

vrataṃ ca ma ' ṛtavaś ca me tapaś ca me saṃvatsaraś ca me 'horātre ūrvaṣṭhīve bṛhadrathantare ca me yajñena kalpantām

ekā ca me tisraś ca me tisraś ca me pañca ca me pañca ca me sapta ca me sapta ca me nava ca me nava ca ma ' ekādaśa ca ma ' ekādaśa ca me trayodaśa ca me trayodaśa ca me pañcadaśa ca me pañcadaśa ca me saptadaśa ca me saptadaśa ca me navadaśa ca me navadaśa ca ma ' ekaviꣳśatiś ca ma ' ekaviꣳśatiś ca me trayoviꣳśatiś ca me trayoviꣳśatiś ca me pañcaviꣳśatiś ca me pañcaviꣳśatiś ca me saptaviꣳśatiś ca me saptaviꣳśatiś ca me navaviꣳśatiś ca me navaviꣳśatiś ca ma ' ekatriꣳśac ca ma ' ekatriꣳśac ca me trayastriꣳśac ca me trayastriꣳśac ca me yajñena kalpantām

catasraś ca me 'ṣṭau ca me 'ṣṭau ca me dvādaśa ca me dvādaśa ca me ṣoḍaśa ca me ṣoḍaśa ca me viꣳśatiś ca me viꣳśatiś ca me caturviꣳśatiś ca me caturviꣳśatiś ca me 'ṣṭāviꣳśatiś ca me 'ṣṭāviꣳśatiś ca me dvātriꣳśac ca me dvātriꣳśac ca me ṣaṭtriꣳśac ca me ṣaṭtriꣳśac ca me catvāriꣳśac ca me catvāriꣳśac ca me catuścatvāriꣳśac ca me catuścatvāriꣳśac ca me ṣṭācatvāriꣳśac ca me ṣṭācatvāriꣳśac ca me yajñena kalpantām

tryaviś ca me tryavī ca me dityavāṭ ca me dityauhī ca me pañcāviś ca me pañcāvī ca me trivatsaś ca me trivatsā ca me turyavāṭ ca me turyauhī ca me yajñena kalpantām

paṣṭhavāṭ ca me paṣṭhauhī ca ma ' ukṣā ca me vaśā ca ma ' ṛṣabhaś ca me vehac ca me 'naḍvāꣳś ca me dhenuś ca me yajñena kalpantām

vājāya svāhā prasavāya svāhāpijāya svāhā kratave svāhā vasave svāhā 'harpataye svāhāhne svāhā mugdhāya svāhā mugdhāya vainaꣳśināya svāhā vinaꣳśina ' āntyāyanāya svāhāntyāya bhauvanāya svāhā bhuvanasya pataye svāhādhipataye svāhā prajāpataye svāhā / iyaṃ te rāṇ mitrāya yantāsi yamana ' ūrje tvā vṛṣṭyai tvā prajānāṃ tvādhipatyāya

āyur yajñena kalpatāṃ prāṇo yajñena kalpatāṃ cakṣur yajñena kalpatāꣳ śrotraṃ yajñena kalpatāṃ vāg yajñena kalpatāṃ mano yajñena kalpatām ātmā yajñena kalpatāṃ brahmā yajñena kalpatāṃ jyotir yajñena kalpatāꣳ svar yajñena kalpatāṃ pṛṣṭhaṃ yajñena kalpatāṃ yajño yajñena kalpatām / stomaś ca yajuś ca ' ṛk ca sāma ca bṛhac ca rathantaraṃ ca / svar devā ' aganmāmṛtā ' abhūma prajāpateḥ prajā ' abhūma veṭ svāhā

vājasya nu prasave mātaraṃ mahīm aditiṃ nāma vacasā karāmahe /
yasyām idaṃ viśvaṃ bhuvanam āviveśa tasyāṃ no devaḥ savitā dharma sāviṣat

viśve ' adya maruto viśva ' ūtī viśve bhavantv agnayaḥ samiddhāḥ /
viśve no devā ' avasā gamantu viśvam astu draviṇaṃ vājo ' asme

vājo naḥ sapta pradiśaś catasro vā parāvataḥ /
vājo no viśvair devair dhanasātāv ihāvatu

vājo no ' adya pra suvāti dānaṃ vājo devāꣳ' ṛtubhiḥ kalpayāti /
vājo hi mā sarvavīraṃ jajāna viśvā ' āśā vājapatir jayeyam

vājaḥ purastād uta madhyato no vājo devān haviṣā vardhayāti /
vājo hi mā sarvavīraṃ cakāra sarvā ' āśā vājapatir bhaveyam

saṃ mā sṛjāmi payasā pṛthivyāḥ saṃ mā sṛjāmy adbhir oṣadhībhiḥ /
so 'haṃ vājaꣳ saneyam agne

payaḥ pṛthivyāṃ paya ' oṣadhīṣu payo divyantarikṣe payo dhāḥ /
payasvatīḥ pradiśaḥ santu mahyam

devasya tvā savituḥ prasave 'śvinor bāhubhyāṃ pūṣṇo hastābhyām /
sarasvatyai vāco yantur yantreṇāgneḥ sāmrājyenābhi ṣiñcāmi

ṛtāṣāḍ ṛtadhāmāgnir gandharvas tasyau'ṣadhayopsaraso mudo nāma /
sa na ' idaṃ brahma kṣatraṃ pātu tasmai svāhā vāṭ tābhyaḥ svāhā

saꣳhito viśvasāmā sūryo gandharvas tasya marīcayo 'psarasa āyuvo nāma /
sa na ' idaṃ brahma kṣatraṃ pātu tasmai svāhā vāṭ tābhyaḥ svāhā

suṣumṇaḥ sūryaraśmiś candramā gandharvas tasya nakṣatrāṇy apsaraso bhekurayo nāma /
sa na ' idaṃ brahma kṣatraṃ pātu tasmai svāhā vāṭ tābhyaḥ svāhā

iṣiro viśvavyacā vāto gandharvas tasyāpo ' apsarasa ' ūrjo nāma /
sa na idaṃ brahma kṣatraṃ pātu tasmai svāhā vāṭ tābhyaḥ svāhā

bhujyuḥ suparṇo yajño gandharvas tasya dakṣiṇā ' apsarasa stāvā nāma /
sa na ' idaṃ brahma kṣatraṃ pātu tasmai svāhā vāṭ tābhyaḥ svāhā

prajāpatir viśvakarmā mano gandharvas tasya ' ṛksāmāny apsarasa ' eṣṭayo nāma /
sa na ' idaṃ brahma kṣatraṃ pātu tasmai svāhā vāṭ tābhyaḥ svāhā

sa no bhuvanasya pate prajāpate yasya ta ' upari gṛhā yasya veha /
asmai brahmaṇe 'smai kṣatrāya mahi śarma yaccha svāhā

samudro 'si nabhasvān ārdradānuḥ śambhūr mayobhūr abhi mā vāhi svāhā /
māruto 'si marutāṃ gaṇaḥ śambhūr mayobhūr abhi mā vāhi svāhā /
avasyūr asi duvasvāñ chambhūr mayobhūr abhi mā vāhi svāhā

yās te ' agne sūrye ruco divam ātanvanti raśmibhiḥ /
tābhir no ' adya sarvābhī ruce janāya nas kṛdhi

yā vo devāḥ sūrye ruco goṣv aśveṣu yā rucaḥ /
indrāgnī tābhiḥ sarvābhī rucaṃ no dhatta bṛhaspate

rucaṃ no dhehi brāhmaṇeṣu rucaꣳ rājasu nas kṛdhi /
rucaṃ viśyeṣu śūdreṣu mayi dhehi rucā rucam

tat tvā yāmi brahmaṇā vandamānas tad ā śāste yajamāno havirbhiḥ /
aheḍamāno varuṇeha bodhy uruśaꣳsa mā na ' āyuḥ pra moṣīḥ

svarṇa gharmaḥ svāhā /
svarṇārkaḥ svāhā /
svarṇa śukraḥ svāhā /
svarṇa jyotiḥ svāhā /
svarṇa sūryaḥ svāhā

agniṃ yunajmi śavasā ghṛtena divyaꣳ suparṇaṃ vayasā bṛhantam /
tena vayaṃ gamema bradhnasya viṣṭapaꣳ svo ruhāṇā ' adhi nākam uttamam

imau te pakṣāv ajarau patatriṇau yābhyāꣳ rakṣāꣳsy apahaꣳsy agne /
tābhyāṃ patema sukṛtām u lokaṃ yatra ' ṛṣayo jagmuḥ prathamajāḥ purāṇāḥ

indur dakṣaḥ śyena ' ṛtāvā hiraṇyapakṣaḥ śakuno bhuraṇyuḥ /
mahānt sadhasthe dhruva ' ā niṣatto namas te astu mā mā hiꣳsīḥ

divo mūrdhāsi pṛthivyā nābhir ūrg apām oṣadhīnām /
viśvāyuḥ śarma saprathā namas pathe

viśvasya mūrdhann adhi tiṣṭhasi śritaḥ samudre te hṛdayam apsv āyur apo dattodadhiṃ bhintta /
divas parjanyād antarikṣāt pṛthivyās tato no vṛṣṭyāva

iṣṭo yajño bhṛgubhir āśīrdā vasubhiḥ /
tasya na ' iṣṭasya prītasya draviṇehāgameḥ

iṣṭo ' agnir āhutaḥ pipartu na ' iṣṭaꣳ haviḥ /
svagedaṃ devebhyo namaḥ

yad ākūtāt samasusrod hṛdo vā manaso vā sambhṛtaṃ cakṣuṣo vā /
tad anu preta sukṛtām u lokaṃ yatra ' ṛṣayo jagmuḥ prathamajāḥ purāṇāḥ

etaꣳ sadhastha pari te dadāmi yam āvahāc śevadhiṃ jātavedāḥ /
anvāgantā yajñapatir vo ' atra taꣳ sma jānīta parame vyoman

etaṃ jānātha parame vyoman devāḥ sadhasthā vida rūpam asya /
yad āgacchāt pathibhir devayānair iṣṭāpūrte kṛṇavāthāvir asmai

ud budhyasvāgne prati jāgṛhi tvam iṣṭāpūrte saꣳ sṛjethām ayaṃ ca /
asmint sadhasthe ' adhy uttarasmin viśve devā yajamānāś ca sīdata

yena vahasi sahasraṃ yenāgne sarvavedasam /
tenemaṃ yajñaṃ no naya svar deveṣu gantave //
18.

prastareṇa paridhinā srucā vedyā ca barhiṣā /
ṛcemaṃ yajñaṃ no naya svar deveṣu gantave

yad dattaṃ yat parādānaṃ yat pūrtaṃ yāś ca dakṣiṇāḥ /
tad agnir vaiśvakarmaṇaḥ svar deveṣu no dadhat

yatra dhārā ' anapetā madhor ghṛtasya ca yāḥ /
tad agnir vaiśvakarmaṇaḥ svar deveṣu no dadhat

agnir asmi janmanā jātavedā ghṛtaṃ me cakṣur amṛtaṃ ma ' āsan /
arkas tridhātū rajaso vimāno 'jasro gharmo havir asmi nāma

ṛco nāmāsmi yajūꣳṣi nāmāsmi sāmāni nāmāsmi /
ye ' agnayaḥ prāñcajanyā ' asyāṃ pṛthivyām adhi /
teṣām asi tvam uttamaḥ pra no jīvatave suva

vārtrahatyāya śavase pṛtanāṣāhyāya ca /
indra tvā vartayāmasi

sahadānuṃ puruhūta kṣiyantam ahastam indra saṃ piṇak kuṇārum /
abhi vṛtraṃ vardhamānaṃ piyārum apādam indra tavasā jaghantha

vi na ' indra mṛdho jahi nīcā yaccha pṛtanyataḥ /
yo ' asmāꣳ' abhidāsaty adharaṃ gamayā tamaḥ

mṛgo na bhīmaḥ kucaro giriṣṭhāḥ parāvata ' ā jaganthā parasyāḥ /
sṛkaꣳ saꣳśāya pavim indra tigmaṃ vi śatrūn tāḍhi vi mṛdho nudasva

vaiśvānaro na ' ūtaya ' ā pra yātu parāvataḥ /
agnir naḥ suṣṭutīr upa

pṛṣṭo divi pṛṣṭo ' agniḥ pṛthivyāṃ pṛṣṭo viśvā ' oṣadhīr ā viveśa /
vaiśvānaraḥ sahasā pṛṣṭo ' agniḥ sa no divā sa riṣas pātu naktam

aśyāma taṃ kāmam agne tavotī ' aśyāma rayiꣳ rayivaḥ suvīram /
aśyāma vājam abhi vājayanto 'śyāma dyumnam ajarājaraṃ te

vayaṃ te ' adya rarimā hi kāmam uttānahastā namasopasadya /
yajiṣṭhena manasā yakṣi devān asredhatā manmanā vipro ' agne

dhāmacchad agnir indro brahmā devo bṛhaspatiḥ /
sacetaso viśve devā yajñaṃ prāvantu naḥ śubhe

tvaṃ yaviṣṭha dāśuṣo nṝm̐ḥ pāhi śṛṇudhī giraḥ /
rakṣā tokam uta tmanā //