Scripture Library

Shiva Purana · Chapter 7.40

7.40.7.2,40.1

śrīsūta uvāca
iti sa vijitamanyoryādavenopamanyoradhigatamabhidhāya jñānayogaṃ munibhyaḥ

7.40.7.2,40.1

praṇatimupagatebhyastebhya udbhāvitātmā sapadi viyati vāyuḥ sāyamantarhito 'bhūt

7.40.7.2,40.2

tataḥ prabhātasamaye naimiṣīyāstapodhanāḥ

7.40.7.2,40.2

satrānte 'vabhṛthaṃ kartuṃ sarva eva samudyayuḥ

7.40.7.2,40.3

tadā brahmasamādeśāddevī sākṣātsarasvatī

7.40.7.2,40.3

prasannā svādusalilā prāvartata nadīśubhā

7.40.7.2,40.4

sarasvatīṃ nadīṃ dṛṣṭvā munayo hṛṣṭamānasāḥ

7.40.7.2,40.4

samāpya satraṃ prārabdhaṃ cakrustatrāvagāhanam

7.40.7.2,40.5

atha saṃtarpya devādīṃstadīyaiḥ salilaiḥ śivaiḥ

7.40.7.2,40.5

smarantaḥ pūrvavṛttāntaṃ yayurvārāṇasīṃ prati

7.40.7.2,40.6

tadā te himavatpādātpaṃtatīṃ dakṣiṇāmukhīm

7.40.7.2,40.6

dṛṣṭvā bhāgīrathī tatra snātvā tattīrato yayuḥ

7.40.7.2,40.7

tato vārāṇasīṃ prāpya muditāssarva eva te

7.40.7.2,40.7

tadottarapravāhāyāṃ gaṃgāyāmavagāhya ca

7.40.7.2,40.8

avimukteśvaraṃ liṃgaṃ dṛṣṭvābhyarcya vidhānataḥ

7.40.7.2,40.8

prayātumudyatāstatra dadṛśurdivi bhāsvaram

7.40.7.2,40.9

sūryakoṭipratīkāśaṃ tejodivyaṃ mahādbhutam

7.40.7.2,40.9

ātmaprabhāvitānena vyāptasarvadigantaram

7.40.7.2,40.10

atha pāśupatāḥ siddhāḥ bhasmasañchannavigrahāḥ

7.40.7.2,40.10

munayo 'bhyetya śataśo līnāḥ syustatra tejasi

7.40.7.2,40.11

tathā vilīyamāneṣu tapasviṣu mahātmasu

7.40.7.2,40.11

sadyastirodadhe tejastadadbhutamivābhavat

7.40.7.2,40.12

taddṛṣṭvā mahadāścaryaṃ naimiṣīyā maharṣayaḥ

7.40.7.2,40.12

kimetadityajānanto yayurbrahmavanaṃ prati

7.40.7.2,40.13

prāgevaiṣāṃ tu gamanātpavano lokapāvanaḥ

7.40.7.2,40.13

darśanaṃ naimiṣīyāṇāṃ saṃvādastairmahātmanaḥ

7.40.7.2,40.14

śaddhāṃ buddhiṃ tatasteṣāṃ sāṃbe sānucare śive

7.40.7.2,40.14

samāptiṃ cāpi satrasya dīrghapūrvasya satriṇām

7.40.7.2,40.15

vijñāpya jagatāṃ dhātre brahmaṇe brahmayonaye

7.40.7.2,40.15

svakārye tadanujñāto jagāma svapuraṃ prati

7.40.7.2,40.16

atha sthānagato brahmā tumburornāradasya ca

7.40.7.2,40.16

paraspara spardhitayorgāne vivadamānayoḥ

7.40.7.2,40.17

tadudbhāvitagānottharasairmādhyasthamācaran

7.40.7.2,40.17

gandharvairapsarobhiśca sukhamāste niṣevitaḥ

7.40.7.2,40.18

tadānavasarādeva dvāḥsthairdvāri nivāritāḥ

7.40.7.2,40.18

munayo brahmabhavanādbahiḥ pārśvamupāviśan

7.40.7.2,40.19

atha tumburuṇā gāne samatāṃ prāpya nāradaḥ

7.40.7.2,40.19

sāhacaryeṣvanujñāto brahmaṇā parameṣṭhinā

7.40.7.2,40.20

tyaktvā parasparaspardhāṃ maitrīṃ ca paramāṃ gataḥ

7.40.7.2,40.20

saha tenāpsarobhiśca gandharvaiśca samāvṛtaḥ

7.40.7.2,40.21

upavīṇayituṃ devaṃ nakulīśvaramīśvaram

7.40.7.2,40.21

bhavanānniryayau dhāturjaladādaṃśumāniva

7.40.7.2,40.22

taṃ dṛṣṭvā ṣaṭkulīyāste nāradaṃ munigovṛṣam

7.40.7.2,40.22

praṇamyāvasaraṃ śaṃbhoḥ papracchuḥ paramādarāt

7.40.7.2,40.23

sa cāvasara evāyamitoṃtargamyatāmiti

7.40.7.2,40.23

vadanyayāvanyaparastvarayā parayā yutaḥ

7.40.7.2,40.24

tato dvāri sthitā ye vai brahmaṇe tānnyavedayan

7.40.7.2,40.24

tena te viviśurveśma piṃḍībhūyāṃḍajanmanaḥ

7.40.7.2,40.25

praviśya dūrato devaṃ praṇamya bhuvi daṃḍavat

7.40.7.2,40.25

samīpe tadanujñātāḥ parivṛtyopatasthire

7.40.7.2,40.26

tāṃstatrāvasthitān pṛṣṭvā kuśalaṃ kamalāsanaḥ

7.40.7.2,40.26

vṛttāṃtaṃ vo mayā jñātaṃ vāyurevāha no yataḥ

7.40.7.2,40.27

bhavadbhiḥ kiṃ kṛtaṃ paścānmāruteṃtarhite sati

7.40.7.2,40.27

ityuktavati deveśe munayo 'vabhṛthātparam

7.40.7.2,40.28

gaṃgātīrthesya gamanaṃ yātrāṃ vārāṇasīṃ prati

7.40.7.2,40.28

darśanaṃ tatra liṃgānāṃ sthāpitānāṃ sureśvaraiḥ

7.40.7.2,40.29

avimukteśvarasyāpi liṃgasyābhyarcanaṃ sakṛt

7.40.7.2,40.29

ākāśe mahatastasya tejorāśeśca darśanam

7.40.7.2,40.30

munīnāṃ vilayaṃ tatra nirodhaṃ tejasastataḥ

7.40.7.2,40.30

yāthātmyavedanaṃ tasya ciṃtitasyāpi cātmabhiḥ

7.40.7.2,40.31

sarvaṃ savistaraṃ tasmai praṇamyāhurmuhurmuhuḥ

7.40.7.2,40.31

munibhiḥ kathitaṃ śrutvā viśvakarmā caturmukhaḥ

7.40.7.2,40.32

kaṃpayitvā śiraḥ kiṃcitprāha gaṃbhīrayā girā

7.40.7.2,40.32

pratyāsīdati yuṣmākaṃ siddhirāmuṣmikī parā

7.40.7.2,40.33

bhavadbhirdīrghasatreṇa ciramārādhitaḥ prabhuḥ

7.40.7.2,40.33

prasādābhimukho bhūta iti bhutārthasūcitam

7.40.7.2,40.34

vārāṇasyāṃ tu yuṣmābhiryaddṛṣṭaṃ divi dīptimat

7.40.7.2,40.34

talliṃgasaṃjñitaṃ sākṣāttejo māheśvaraṃ param

7.40.7.2,40.35

tatra līnāśca munayaḥ śrautapāśupatavratāḥ

7.40.7.2,40.35

muktā babhūvuḥ svasthāśca naiṣṭhikā dagdhakilbiṣāḥ

7.40.7.2,40.36

prāpyānena yathā muktiracirādbhavatāmapi

7.40.7.2,40.36

sa cāyamarthaḥ sūcyeta yuṣmaddṛṣṭena tejasā

7.40.7.2,40.37

tatra vaḥ kāla evaiṣa daivādupanataḥ svayam

7.40.7.2,40.37

prayāta dakṣiṇaṃ meroḥ śikharaṃ devasevitam

7.40.7.2,40.38

sanatkumāro yatrāste mama putraḥ paro muniḥ

7.40.7.2,40.38

pratīkṣyāgamanaṃ sākṣādbhūtanāthasya naṃdinaḥ

7.40.7.2,40.39

purā sanatkumāropi dṛṣṭvāpi parameśvaram

7.40.7.2,40.39

ajñānātsarvayogīndramānī vinayadūṣitaḥ

7.40.7.2,40.40

abhyutthānādikaṃ yuktamakurvannatinirbhayaḥ

7.40.7.2,40.40

tato 'parādhātkruddhena mahoṣṭro naṃdinā kṛtaḥ

7.40.7.2,40.41

atha kālena mahatā tadarthe śocatā mayā

7.40.7.2,40.41

upāsya devaṃ devīñca naṃdinaṃ cānunīya vai

7.40.7.2,40.42

kathaṃciduṣṭratā tasya prayatnena nivāritā

7.40.7.2,40.42

prāpito hi yathāpūrvaṃ sanatpūrvāṃ kumāratām

7.40.7.2,40.43

tadāha ca mahādevaḥ smayanniva gaṇādhipam

7.40.7.2,40.43

avajñāya hi māmeva tathāhaṃkṛtavānmuniḥ

7.40.7.2,40.44

atastvameva yāthātmyaṃ mamāsmai kathayānagha

7.40.7.2,40.44

brahmaṇaḥ pūrvajaḥ putro māṃ mūḍha iva saṃsmaran

7.40.7.2,40.45

mayaiva śiṣyate datto mama jñānapravartakaḥ

7.40.7.2,40.45

dharmādhyakṣābhiṣekaṃ ca tava nirvartayiṣyati

7.40.7.2,40.46

sa evaṃ vyāhṛto bhūyassarvabhūtagaṇāgraṇīḥ

7.40.7.2,40.46

yatparājñāpanaṃ mūrdhnā prātaḥ pratigṛhītavān

7.40.7.2,40.47

tathā sanatkumāro 'pi merau madanuśāsanāt

7.40.7.2,40.47

prasādārthaṃ gaṇasyāsya tapaścarati duścaram

7.40.7.2,40.48

draṣṭavyaśceti yuṣmābhiḥ prāggaṇeśasamāgamāt

7.40.7.2,40.48

tatprasādārthamacirānnaṃdī tatrāgamiṣyati

7.40.7.2,40.49

iti satvaramādiśya preṣitā viśvayoginā

7.40.7.2,40.49

kumāraśikharaṃ merordakṣiṇaṃ munayo yayuḥ

iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe naimiṣarṣiyātrāvarṇanaṃ nāma catvāriṃśo'dhyāyaḥ

Original text: śivapurāṇam · Sanskrit Wikisource contributors · Sanskrit Wikisource · CC BY-SA 4.0