Language

ENहिગુ
Scripture Library

Shiva Purana · Chapter 7.41

7.41.7.2,41.1

sūta uvāca
tatra skaṃdasaro nāma sarassāgarasannibham

7.41.7.2,41.1

amṛtasvāduśiśirasvacchā gādhalaghūdakam

7.41.7.2,41.2

samaṃtataḥ saṃghaṭitaṃ sphaṭiko palasaṃcayaiḥ

7.41.7.2,41.2

sarvartukusumaiḥ phullaiśchāditākhiladiṅmukham

7.41.7.2,41.3

śaivalairutpalaiḥ padmaiḥ kumudaistārakopamaiḥ

7.41.7.2,41.3

taraṃgairabhrasaṃkāśairākāśamiva bhūmigam

7.41.7.2,41.4

sukhāvataraṇārohaiḥ sthalairnīlaśilāmayaiḥ

7.41.7.2,41.4

sopānamārgau ruciraiśśobhamānāṣṭadiṅmukham

7.41.7.2,41.5

tatrāvatīrṇaiśca yathā tatrottīrṇaśca bhūyasā

7.41.7.2,41.5

snātaiḥ sitopavītaiśca śuklākaupīnavalkalaiḥ

7.41.7.2,41.6

jaṭāśikhāyanairmuṃḍaistripuṃḍrakṛtamaṃḍanaiḥ

7.41.7.2,41.6

virāgavivaśasmeramukhairmunikumārakaiḥ

7.41.7.2,41.7

ghaṭaiḥ kamalinīpatrapuṭaiśca kalaśaiḥ śivaiḥ

7.41.7.2,41.7

kamaṇḍalubhiranyaiśca tādṛśaiḥ karakādibhiḥ

7.41.7.2,41.8

ātmārthaṃ ca parārthaṃ ca devatārthaṃ viśeṣataḥ

7.41.7.2,41.8

ānīyamānasalilamāttapuṣpaṃ ca nityaśaḥ

7.41.7.2,41.9

aṃtarjalaśilārūḍhairnīcānāṃ sparśaśaṃkayā

7.41.7.2,41.9

ācāravadbhirmunibhiḥ kṛtabhasmāṃgadhūsaraiḥ

7.41.7.2,41.10

itastato 'psu majjadbhiriṣṭaśiṣṭaiḥ śilāgataiḥ

7.41.7.2,41.10

tilaiśca sākṣataiḥ puṣpaistyaktadarbhapavitrakaiḥ

7.41.7.2,41.11

devādyamṛṣimadhyaṃ ca nirvartya pitṛtarpaṇam

7.41.7.2,41.11

nivedayedabhijñebhyo nityasnānagatān dvijān

7.41.7.2,41.12

sthānesthāne kṛtānekabalipuṣpasamīraṇaiḥ

7.41.7.2,41.12

saurārghyapūrvaṃ kurvadbhiḥsthaṃḍalebhyarcanādikam

7.41.7.2,41.13

kvacinnimajjadunmajjatprasrastagajayūthapam

7.41.7.2,41.13

kvacicca tṛṣayāyātamṛgīmṛgaturaṃgamam

7.41.7.2,41.14

kvacitpītajanottīrṇamayūravaravāraṇam

7.41.7.2,41.14

kvacitkṛtataṭāghātavṛṣaprativṛṣojjvalam

7.41.7.2,41.15

kvacitkāraṃḍavaravaiḥ kvacitsārasakūjitaiḥ

7.41.7.2,41.15

kvacicca kokaninadaiḥ kvacidbhramaragītibhiḥ

7.41.7.2,41.16

snānapānādikaraṇaiḥ svasaṃpaddrumajīvibhiḥ

7.41.7.2,41.16

praṇayātprāṇibhistaistairbhāṣamāṇamivāsakṛt

7.41.7.2,41.17

kūlaśākhiśikhālīnakokilākulakūjitaiḥ

7.41.7.2,41.17

ātapopahatānsarvānnāmaṃtrayadivāniśam

7.41.7.2,41.18

uttare tasya sarasastīre kalpataroradhaḥ

7.41.7.2,41.18

vedyāṃ vajraśilāmayyāṃ mṛdule mṛgacarmaṇi

7.41.7.2,41.19

sanatkumāramāsīnaṃ śaśvadbālavapurdharam

7.41.7.2,41.19

tatkālamātroparataṃ samādheracalātmanaḥ

7.41.7.2,41.20

upāsyamānaṃ munibhiryogīṃdrairapi pūjitam

7.41.7.2,41.20

dadṛśurnaimiṣeyāste praṇatāścopatasthire

7.41.7.2,41.21

yāvatpṛṣṭavate tasmai procuḥ svāgatakāraṇam

7.41.7.2,41.21

tumulaḥ śuśruve tāvaddivi duṃdubhinisvanaḥ

7.41.7.2,41.22

dadṛśe tatkṣaṇe tasminvimānaṃ bhānusannibham

7.41.7.2,41.22

gaṇeśvarairasaṃkhyeyaiḥ saṃvṛtaṃ ca samaṃtataḥ

7.41.7.2,41.23

apsarogaṇasaṃkīrṇaṃ rudrakanyābhirāvṛtam

7.41.7.2,41.23

mṛdaṃgamurajodghuṣṭaṃ veṇuvīṇāravānvitam

7.41.7.2,41.24

citraratnavitānāḍhyaṃ muktādāmavirājitam

7.41.7.2,41.24

munibhissiddhagaṃdharvairyakṣacāraṇakinnaraiḥ

7.41.7.2,41.25

nṛtyadbhiścaiva gāyadbhirvādayadbhiśca saṃvṛtam

7.41.7.2,41.25

vīragovṛṣacihnena vidramadrumayaṣṭinā

7.41.7.2,41.26

kṛtagopurasatkāraṃ ketunā mānyahetunā

7.41.7.2,41.26

tasya madhye vimānasya cāmaradvitayāṃtare

7.41.7.2,41.27

chattrasya maṇidaṃḍasya caṃdrasyeva śuceradhaḥ

7.41.7.2,41.27

divyasiṃhāsanārūḍhaṃ devyā suyaśayā saha

7.41.7.2,41.28

śriyā ca vapuṣā caiva tribhiścāpi vilocanaiḥ

7.41.7.2,41.28

prākārairabhikṛtyānāṃ pratyabhijñāpakaṃ prabhoḥ

7.41.7.2,41.29

avilaṃghya jagatkarturājñāpanamivāgatam

7.41.7.2,41.29

sarvānugrahaṇaṃ śaṃbhoḥ sākṣādiva puraḥsthitam

7.41.7.2,41.30

śilādatanayaṃ sākṣācchrīmacchūlavarāyudham

7.41.7.2,41.30

viśveśvaragaṇādhyakṣaṃ viśveśvaramivāparam

7.41.7.2,41.31

viśvasyāpi vidhātḥṇāṃ nigrahānugrahakṣamam

7.41.7.2,41.31

caturbāhumudārāṃgaṃ candrarekhāvibhūṣitam

7.41.7.2,41.32

kaṃṭhe nāgena maulau ca śaśāṃkenāpyalaṃkṛtam

7.41.7.2,41.32

savigrahamivaiśvaryaṃ sāmarthyamiva sakriyam

7.41.7.2,41.33

samāptamiva nirvāṇaṃ sarvajñamiva saṃgatam

7.41.7.2,41.33

dṛṣṭvā prahṛṣṭavadano brahmaputraḥ saharṣibhiḥ

7.41.7.2,41.34

tasthau prāñjalirutthāya tasyātmānamivārpayan

7.41.7.2,41.34

atha tatrāṃtare tasminvimāne cāvaniṃ gate

7.41.7.2,41.35

praṇamya daṇḍavaddevaṃ stutvā vyajñāpayanmunīm

7.41.7.2,41.35

ṣaṭkulīyā ime dīrghaṃ naimiṣe satramāsthitāḥ

7.41.7.2,41.35

āgatā brahmaṇādiṣṭāḥ pūrvamevābhikāṃkṣayā

7.41.7.2,41.36

śrutvā vākyaṃ brahmaputrasya naṃdīchittvā pāśāndṛṣṭipātena sadyaḥ

7.41.7.2,41.36

śaivaṃ dharmaṃ caiśvaraṃ jñānayogaṃ dattvā bhūyo devapārśvaṃ jagāma

7.41.7.2,41.37

sanatkumāreṇa ca tatsamastaṃ vyāsāya sākṣādgurave mamoktam

7.41.7.2,41.37

vyāsena coktaṃ mahitena mahyaṃ mayā ca tadvaḥ kathitaṃ samāsāt

7.41.7.2,41.38

nāvedavidbhyaḥ kathanīyametatpurāṇaratnaṃ puraśāsanasya

7.41.7.2,41.38

nābhaktaśiṣyāya ca nāstikebhyo dattaṃ hi mohānnirayaṃ dadāti

7.41.7.2,41.39

mārgeṇa sevānugatena yaistaddattaṃ gṛhītaṃ paṭhitaṃ śrutaṃ vā

7.41.7.2,41.39

tebhyaḥ sukhaṃ dharmamukhaṃ trivargaṃ nirvāṇamaṃte niyataṃ dadāti

7.41.7.2,41.40

parasparasyopakṛtaṃ bhavadbhirmayā ca paurāṇikamārgayogāt

7.41.7.2,41.40

ato gamiṣye 'hamavāptakāmaḥ samastamevāstu śivaṃ sadā naḥ

7.41.7.2,41.41

sūte kṛtāśiṣi gate munayaḥ suvṛttā yāge ca paryavasite mahati prayoge

7.41.7.2,41.41

kāle kalau ca viṣayaiḥ kaluṣāyamāṇe vārāṇasīparisare vasatiṃ vinetuḥ

7.41.7.2,41.42

atha ca te paśupāśamumukṣayākhilatayā kṛtapāśupatavratāḥ

7.41.7.2,41.42

adhikṛtākhilabodhasamādhayaḥ paramanirvṛtimāpuraniṃditāḥ

7.41.7.2,41.43

vyāsa uvāca
etacchivapurāṇaṃ hi samāptaṃ hitamādarāt

7.41.7.2,41.43

paṭhitavyaṃ prayatnena śrotavyaṃ ca tathaiva hi

7.41.7.2,41.44

nāstikāya na vaktavyamaśraddhāya śaṭhāya ca

7.41.7.2,41.44

abhaktāya maheśasya tathā dharmadhvajāya ca

7.41.7.2,41.45

etacchrutyā hyekavāraṃ bhavetpāpaṃ hi bhasmasāt

7.41.7.2,41.45

abhakto bhaktimāpnoti bhakto bhaktisamṛddhibhāk

7.41.7.2,41.46

punaḥ śrute ca sadbhaktirmuktissyācca śruteḥ punaḥ

7.41.7.2,41.46

tasmātpunaḥpunaścaiva śrotavyaṃ hi mumukṣubhiḥ

7.41.7.2,41.47

pañcāvṛttiḥ prakartavyā purāṇasyāsya saddhiyā

7.41.7.2,41.47

paraṃ phalaṃ samuddiśya tatprāpnoti na saṃśayaḥ

7.41.7.2,41.48

purātanāśca rājāno viprā vaiśyāśca sattamāḥ

7.41.7.2,41.48

saptakṛtvastadāvṛttyālabhanta śivadarśanam

7.41.7.2,41.49

śroṣyatyathāpi yaścedaṃ mānavo bhaktitatparaḥ

7.41.7.2,41.49

iha bhuktvākhilānbhogānaṃte muktiṃ labhecca saḥ

7.41.7.2,41.50

etacchivapurāṇaṃ hi śivasyātipriyaṃ param

7.41.7.2,41.50

bhuktimuktipradaṃ brahmasaṃmitaṃ bhaktivardhanam

7.41.7.2,41.51

etacchivapurāṇasya vaktuḥ śrotuśca sarvadā

7.41.7.2,41.51

sagaṇassasutassāṃbaśśaṃ karotu sa śaṃkaraḥ

iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe vyāsopadeśaśrīśivamahāpurāṇamāhātmyavarṇanaṃ nāmaikacatvāriṃśo'dhyāyaḥ
samāpto'yaṃ granthaḥ

Original text: śivapurāṇam · Sanskrit Wikisource contributors · Sanskrit Wikisource · CC BY-SA 4.0

Esc