Shiva Purana · Chapter 7.36

śrīkṛṣṇa uvāca
bhagavañchrotumicchāmi pratiṣṭhāvidhimuttamam

liṃgasyāpi ca berasya śivena vihitaṃ yathā

upamanyuruvāca
anātmapratikūle tu divase śuklapakṣake

śivaśāstroktamārgeṇa kuryālliṃgaṃ pramāṇavat

svīkṛtyātha śubhasthānaṃ bhūparīkṣāṃ vidhāya ca

daśopacārānkurvīta lakṣaṇoddhārapūrvakān

teṣāṃ daśopacārāṇāṃ pūrvaṃ pūjya १ vināyakam

sthānaśuddhyādikaṃ kṛtvāliṃgaṃ snānālayaṃ nayet

śalākayā kāṃcanayā २ kuṃkumādirasāktayā

lakṣitaṃ lakṣaṇaṃ śilpaśāstreṇa vilikhettataḥ

aṣṭamṛtsalilairvātha pañcamṛtsalilaistathā

liṅgaṃ piṃḍikayā sārdhaṃ pañcagavyaiśca śodhayet

savedikaṃ samabhyarcya divyādyaṃ tu jalāśayam

nītvādhivāsayettatra liṃgaṃ piṃḍikayā saha

adhivāsālaye śuddhe sarvaśobhāsamanvite

satoraṇe sāvaraṇe darbhamālāsamāvṛte

diggajāṣṭakasaṃpanne dikpālāṣṭaghaṭānvite

aṣṭamaṃgalakairyukte kṛtadikpālakārcite

tejasaṃ dāravaṃ vāpi kṛtvā padmāsanāṃkitam

vinyasenmadhyatastatra vipulaṃ pīṭhakālayam

dvārapālānsamabhyarcya bhadrādīṃścaturaḥkramāt

samudraśca vibhadraśca sunaṃdaśca vinaṃdakaḥ

snāpayitvā samabhyarcya liṃgaṃ vedikayā saha

sakūrcābhyāṃ tu vastrābhyāṃ samāveṣṭyaṃ samaṃtataḥ

prāpayya śanakaistoyaṃ pīṭhikopari śāyayet

prākśiraskamadhaḥsūtraṃ piṃḍikāṃ cāsya paścime

sarvamaṃgalasaṃyuktaṃ liṃgaṃ tatrādhivāsayet

pañcarātraṃ trirātraṃ vāpyekarātramathāpi vā

visṛjya pūjitaṃ tatra śodhayitvā ca pūrvavat

saṃpūjyotsavamārgeṇa śayanālayamānayet

tatrāpi śayanasthānaṃ kuryānmaṃḍalamadhyataḥ

śuddhairjalaiḥ snāpayitvā liṃgamabhyarcayetkramāt

aiśānyāṃ padmamālikhya śuddhalipte mahītale

śivakuṃbhaṃ śodhayitvā tatrāvāhya śivaṃ yajet

vedīmadhye sitaṃ padmaṃ parikalpya vidhānataḥ

tasya paścimataścāpi caṃḍikāpadmamālikhet

kṣaumādyairvāhatairvastraiḥ puṣpairdarbhairathāpi vā

prakalpya śayanaṃ tasminhemapuṣpaṃ vinikṣipet

tatra liṃgaṃ samānīya sarvamaṃgalaniḥsvanaiḥ

raktena vastrayugmena sakūrcena samaṃtataḥ

saha piṃḍikayāveṣṭya śāyayecca yathā purā

purastātpadmamālikhya taddaleṣu yathākramam

vidyeśakalaśānnyasyenmadhye śaivīṃ ca vardhanīm

parītya padmatritayaṃ juhuyurdvijasattamāḥ

te cāṣṭamūrtayaḥ kalpyāḥ pūrvādiparitaḥ sthitāḥ

catvāraścātha vā dikṣu svadhyetārassajāpakāḥ

juhuyuste viraṃcyādyāścatasro mūrtayaḥ smṛtāḥ

daiśikaḥ prathamaṃ teṣāmaiśānyāṃ paścime 'tha vā

pradhānahomaṃ kurvīta saptadravyairyathākramam

ācāryātpādamardhaṃ vā juhuyuścāpare dvijāḥ

pradhānamekamevātra juhuyādatha vā guruḥ

pūrvaṃ pūrṇāhutiṃ hutvā ghṛtenāṣṭottaraṃ śatam

mūrdhni mūlena liṃgasya śivahastaṃ pravinyaset

śatamardhaṃ tadardhaṃ vā kramāddravyaiśca saptabhiḥ

hutvāhutvā spṛśelliṃgaṃ vedikāṃ ca punaḥ punaḥ

pūrṇāhutiṃ tato hutvā kramāddadyācca dakṣiṇām

ācāryātpādamardhaṃ vā hotḥṇāṃ sthapaterapi

tadardhaṃ deyamanyebhyaḥ sadasyebhyaśca śaktitaḥ

tataḥ śvabhre vṛṣaṃ haimaṃ kūrcaṃ vāpi niveśya ca

mṛdaṃbhasā pañcagavyaiḥ punaḥ śuddhajalena ca

śodhitāṃ caṃdanāliptāṃ śvabhre brahmaśilāṃ kṣipet

karanyāsaṃ tataḥ kṛtvā navabhiḥ śaktināmabhiḥ

haritālādidhātūṃśca bījagaṃdhauṣadhairapi

śivaśāstroktavidhinā kṣipedbrahmaśilopari

pratiliṃgaṃ tu saṃsthāpya kṣīraṃ vṛkṣasamudbhavam

sthitaṃ buddhvā tadutsṛjya liṃgaṃ brahmaśilopari

prāgudakpravarāṃ kiṃcitsthāpayenmūlavidyayā

piṃḍikāṃ cātha saṃyojya śāktaṃ mūlamanusmaran

bandhanaṃ baṃdhakadravyaiḥ kṛtvā sthānaṃ viśodhya ca

dattvā cārghyaṃ ca puṣpāṇi kuryuryavanikāṃ punaḥ

yathāyogyaṃ niṣekādi liṃgasya puratastadā

ānīya śayanasthānātkalaśānvinyasetkramāt

mahāpūjāmathārabhya saṃpūjya kalaśāndaśa

śivamaṃtramanusmṛtya śivakuṃbhajalāṃtare

aṃguṣṭhānāmikāyogādādāya tamudīrayet

nyasedīśānabhāgasya madhye liṃgasya maṃtravit

śaktiṃ nyasettathā vidyāṃ vidyeśāṃśca yathākramam

liṅgamūle śivajalaistato liṃgaṃ niṣecayet

vardhanyāṃ piṃḍikāliṃgaṃ vidyeśakalaśaiḥ punaḥ

abhiṣicyāsanaṃ paścādādhārādyaṃ prakalpayet

kṛtvā pañcakalānyāsaṃ dīptaṃ liṃgamanusmaret

āvāhayecchivau sākṣātprāñjaliḥ prāgudaṅmukhaḥ

vṛṣādhirājamāruhya vimānaṃ vā nabhastalāt

alaṃkṛtaṃ sahāyāṃtaṃ devyā devamanusmaran

sarvābharaṇaśobhāḍhyaṃ sarvamaṃgalanisvanaiḥ

brahmaviṣṇumaheśārkaśakrādyairdevadānavaiḥ

ānaṃdaklinnasarvāṃgairvinyastāṃjalimastakaiḥ

stuvadbhireva nṛtyadbhirnāmadbhirabhito vṛtam

tataḥ pañcopacārāṃśca kṛtvā pūjāṃ samāpayet

nātaḥ parataraḥ kaścidvidhiḥ pañcopacārakāt

pratiṣṭhāṃ liṃgavatkuryātpratimāsvapi sarvataḥ

lakṣaṇoddhārasamaye kāryaṃ nayanamocanam

jalādhivāse śayane śāyayettāntvadhomukhīm

kumbhodaśāyitāṃ maṃtrairhṛdi tāṃ sanniyojayet

kṛtālayāṃ parāmāhuḥ pratiṣṭhāmakṛtālayāt

śaktaḥ kṛtālayaḥ paścātpratiṣṭhāvidhimācaret

aśaktaścetpratiṣṭhāpya liṃgaṃ beramathāpi vā

śakteranuguṇaṃ paścātprakurvīta śivālayam

gṛhārcāṃ ca punarvakṣye pratiṣṭhāvidhimuttamam

kṛtvā kanīyasaṃberaṃ liṃgaṃ vā lakṣaṇānvitam

ayane cottare prāpte śuklapakśe śubhe dine

devīṃ kṛtvā śubhe deśe tatrābjaṃ pūrvavallikhet

vikīrya patrapuṣpādyairmadhye kuṃbhaṃ nidhāya ca

paritastasya caturaḥ kalaśān dikṣu vinyaset

pañca brahmāṇi tadbījaisteṣu pañcasu pañcabhiḥ

nyasya saṃpūjya mudrādi darśayitvābhirakṣya ca

viśodhya liṃgaṃ beraṃ vā mṛttoyādyairyathā purā

sthāpayetpuṣpasaṃchannamuttarasthe varāsane

nidhāya puṣpaṃ śirasi prokṣayetprokṣaṇījalaiḥ

samabhyarcya punaḥ puṣpairjayaśabdādipūrvakam

kumbhairīśānavidyāṃtaiḥ snāpayenmūlavidyayā

tataḥ pañcakalānyāsaṃ kṛtvā pūjāṃ ca pūrvavat

nityamārādhayettatra devyā devaṃ trilocanam

ekamevātha vā kuṃbhaṃ mūrtimantrasamanvitam

nyasya padmāṃtare sarvaṃ śeṣaṃ pūrvavadācaret

atyaṃtopahataṃ liṃgaṃ viśodhya sthāpayetpunaḥ

saṃprokṣayedupahatamanāgupahataṃ yajet

liṃgāni bāṇasaṃjñāni sthāpanīyāni vā na vā

tāni pūrvaṃ śivenaiva saṃskṛtāni yatastataḥ

śeṣāṇi sthāpanīyāni yāni dṛṣṭāni bāṇavat

svayamudbhūtaliṃge ca divye cārṣe tathaiva ca

apīṭhe pīṭhamāveśya kṛtvā saṃprokṣaṇaṃ vidhim

yajettatra śivaṃ teṣāṃ pratiṣṭhā na vidhīyate

dagdhaṃ ślathaṃ kṣatāṃgaṃ ca kṣipelliṃgaṃ jalāśaye

saṃdhānayogyaṃ saṃdhāya pratiṣṭhāvidhimācaret

berādvā vikalālliṃgāddevapūjāpurassaram

udvāsya hṛdi saṃdhānaṃ tyāgaṃ vā yuktamācaret

ekāhapūjāvihatau kuryāddviguṇamarcanam

dvirātre ca mahāpūjāṃ saṃprokṣaṇamataḥ param

māsādūrdhvamanekāhaṃ pūjā yadi vihanyate

pratiṣṭhā procyate kaiścitkaiścitsaṃprokṣaṇakramaḥ

saṃprokṣaṇe tu liṃgāderdevamudvāsya pūrvavat

aṣṭapañcakrameṇaiva snāpayitvā mṛdaṃbhasā

gavāṃ rasaiśca saṃsnāpya darbhatoyairviśodhya ca

prokṣayetprokṣaṇītoyairmūlenāṣṭottaraṃ śatam

sapuṣpaṃ sakuśaṃ pāṇiṃ nyasya liṃgasya mastake

pañcavāraṃ japenmūlamaṣṭottaraśataṃ tataḥ

tato mūlena mūrdhādipīṭhāṃtaṃ saṃspṛśedapi

pūjāṃ ca mahatīṃ kuryāddevamāvāhya pūrvavat

alabdhe sthāpite liṃge śivasthāne jale 'tha vā

vahnau ravau tathā vyomni bhagavaṃtaṃ śivaṃ yajet

iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe pratiṣṭhāvidhivarṇanaṃ nāma ṣaṭtriṃśo'dhyāyaḥ