Shiva Purana · Verses 7.35-2

vāyuruvāca
atha sarve pradīptāṃgā vaikuṇṭhaṃ prayayurdrutam

praṇamyāhuśca tatsarvaṃ haraye devasattamāḥ

śrutvā teṣāṃ tadā vākyaṃ bhagavānpuruṣottamaḥ

kimidantviti saṃcintya jñātvā tatkāraṇaṃ ca saḥ

jagāma mandaraṃ tūrṇaṃ maheśvaradidṛkṣayā

dṛṣṭvā devaṃ praṇamyaivaṃ provāca sukṛtāṃjaliḥ

viṣṇuruvāca
bhagavanbrāhmaṇaḥ kaścidupamanyuriti śrutaḥ

kṣīrārthamadahatsarvaṃ tapasā tannivāraya

vāyuruvāca
iti śrutvā vaco viṣṇoḥ prāha devo maheśvaraḥ

śiśuṃ nivārayiṣyāmi tattvaṃ gaccha svamāśramam

tacchrutvā śaṃbhuvacanaṃ sa viṣṇurdevavallabhaḥ

jagāmāśvāsya tānsarvānsvalokamamarādikān

etasminnaṃtare devaḥ pinākī parameśvaraḥ

śakrasya rūpamāsthāya gantuṃ cakre matiṃ tataḥ

atha jagāma munestu tapovanaṃ gajavareṇa sitena sadāśivaḥ

saha surāsurasiddhamahoragairamararājatanuṃ svayamāsthitaḥ

sa vāraṇaścāru tadā vibhuṃ taṃ nivījya vālavyajanena divyam

dadhāra śacyā sahitaṃ sureṃdraṃ kareṇa vāmena śitātapatram

rarāja bhagavānsomaḥ śakrarūpī sadāśivaḥ

tenātapatreṇa yathā candrabiṃbena mandaraḥ

āsthāyaivaṃ hi śakrasya svarūpaṃ parameśvaraḥ

jagāmānugrahaṃ kartumupamanyostadāśramam

taṃ dṛṣṭvā parameśānaṃ śakrarūpadharaṃ śivam

praṇamya śirasā prāha mahāmunivaraḥ svayam

upamanyuruvāca
pāvitaścāśramasso 'yaṃ mama deveśvara svayam

prāpto yattvaṃ jagannātha bhagavandevasattama

vāyuruvāca
evamuktvā sthitaṃ prekṣya kṛtāṃjalipuṭaṃ dvijam

prāha gaṃbhīrayā vācā śakrarūpadharo haraḥ

śakra uvāca
tuṣṭo 'smi te varaṃ brūhi tapasānena suvrata

dadāmi cepsitānsarvāndhaumyāgraja mahāmune

vāyuruvāca
evamuktastadā tena śakreṇa munipuṃgavaḥ

vārayāmi śive bhaktimityuvāca kṛtāñjaliḥ

tanniśamya hariḥ १ prāha māṃ na jānāsi lekhapam

trailokyādhipatiṃ śakraṃ sarvadevanamaskṛtam

madbhakto bhava viprarṣe māmevārcaya sarvadā

dadāmi sarvaṃ bhadraṃ te tyaja rudraṃ ca nirguṇam

rudreṇa nirguṇenāpi kiṃ te kāryaṃ bhaviṣyati

devapaṅktibahirbhūto yaḥ piśācatvamāgataḥ

vāyuruvāca
tacchrutvā prāha sa munirjapanpañcākṣaraṃ manum

manyamāno dharmavighnaṃ prāha taṃ kartumāgatam

upamanyuruvāca
tvayaivaṃ kathitaṃ sarvaṃ bhavaniṃdāratena vai

prasaṃgādeva devasya nirguṇatvaṃ mahātmanaḥ

tvaṃ na jānāmi vai rudraṃ sarvadeveśvareśvaram

brahmaviṣṇumaheśānāṃ janaka prakṛteḥ param

sadasadvyaktamavyaktaṃ yamāhurbrahmavādinaḥ

nityamekamanekaṃ ca varaṃ tasmādvṛṇomyaham

hetuvādavinirmuktaṃ sāṃkhyayogārthadamparam

upāsate yaṃ tattvajñā varaṃ tasmādvṛṇomyaham

nāsti śaṃbhoḥ paraṃ tattvaṃ sarvakāraṇakāraṇāt

brahmaviṣṇvādidevānāṃ sraṣṭurguṇaparādvibhoḥ

bahunātra kimuktena mayādyānumitaṃ mahat

bhavāṃtare kṛtaṃ pāpaṃ śrutā nindā bhavasya cet

śrutvā niṃdāṃ bhavasyātha tatkṣaṇādeva santyajet

svadehaṃ tannihatyāśu śivalokaṃ sa gacchati

āstāṃ tāvanmameccheyaṃ kṣīraṃ prati surādhama

nihatya tvāṃ śivāstreṇa tyajāmyetaṃ kalevaram

vāyuruvāca
evamuktvopamanyustaṃ martuṃ vyavasitassvayam

kṣīre vāñchāmapi tyaktvā nihantuṃ śakramudyataḥ

bhasmādāya tadā ghoramaghorāstrābhimaṃtritam

visṛjya śakramuddiśya nanāda sa munistadā

smṛtvā śaṃbhupadadvaṃdvaṃ svadehaṃ dugdhumudyataḥ

āgneyīṃ dhāraṇāṃ bibhradupamanyuravasthitaḥ

evaṃ vyavasite vipre bhagavānbhaganetrahā

vārayāmāsa saumyena dhāraṇāṃ tasya yoginaḥ

tadvisṛṣṭamaghorāstraṃ naṃdīśvaraniyogataḥ

jagṛhe madhyataḥ kṣiptaṃ nandī śaṃkaravallabhaḥ

svaṃ rūpameva bhagavānāsthāya parameśvaraḥ

darśayāmāsa śiprāya bālendukṛtaśekharam

kṣīrārṇavasahasraṃ ca pīyūṣārṇavameva vā

dadhyāderarṇavāṃścaiva ghṛtodārṇavameva ca

phalārṇavaṃ ca bālasya bhakṣya bhojyārṇavaṃ tathā

apūpānāṃ giriṃ caiva darśayāmāsa sa prabhuḥ

evaṃ sa dadṛśe devo devyā sārdhaṃ vṛṣopari

gaṇeśvaraistriśūlādyairdivyāstrairapi saṃvṛtaḥ

divi duṃdubhayo neduḥ puṣpavṛṣṭiḥ papāta ca

viṣṇubrahmendrapramukhairdevaiśchannā diśo daśa

athopamanyurānandasamudrormibhirāvṛtaḥ

papāta daṇḍavadbhūmau bhaktinamreṇa cetasā

etasminsamaye tatra sasmito bhagavānbhavaḥ

ehyehīti tamāhūya mūrdhnyāghrāya dadau varān

śiva uvāca
bhakṣyabhojyānyathākāmaṃ bāndhavairbhukṣva sarvadā

sukhī bhava sadā duḥkhānnirmuktā bhaktimānmama

upamanyo mahābhāga tavāmbaiṣā hi pārvatī

mayā putrīkṛto hyadya dattaḥ kṣīrodakārṇavaḥ

madhunaścārṇavaścaiva dadhyannārṇava eva ca

ājyaudanārṇavaścaiva phalādyarṇava eva ca

apūpagirayaścaiva bhakṣyabhojyārṇavastathā

ete dattā mayā te hi tvaṃ gṛhṇīṣva mahāmune

pitā tava mahādevo mātā vai jagadambikā

amaratvaṃ mayā dattaṃ gāṇapatyaṃ ca śāśvatam

varānvaraya suprītyā mano 'bhilaṣitānparān

prasanno 'haṃ pradāsyāmi nātra kāryā vicāraṇā

vāyuruvāca
evamuktvā mahādevaḥ karābhyāmupagṛhyatam

mūrdhnyāghrāya sutaste 'yamiti devyai nyavedayat

devī ca guhavatprītyā mūrdhni tasya karāmbujam

vinyasya pradadau tasmai kumārapadamavyayam

kṣīrābdhirapi sākāraḥ kṣīraṃ svādu kare dadhat

upasthāya dadau piṇḍībhūtaṃ kṣīramanaśvaram

yogaiśvaryaṃ sadā tuṣṭiṃ brahmavidyāmanaśvarām

samṛddhiṃ paramāntasmai dadau saṃtuṣṭamānasaḥ

atha śaṃbhuḥ prasannātmā dṛṣṭvā tasya tapomahaḥ

punardadau varaṃ divyaṃ munaye hyupamanyave

vrataṃ pāśupataṃ jñānaṃ vratayogaṃ ca tattvataḥ

dadau tasmai pravaktṛtvapāṭavaṃ suciraṃ param

so 'pi labdhvā varāndivyānkumāratvaṃ ca sarvadā

tasmācchivācca tasyāśca śivāyā mudito 'bhavat

tataḥ prasannacetaskaḥ supraṇamya kṛtāṃjaliḥ

yayāce sa varaṃ vipro devadevānmaheśvarāt

upamanyuruvāca
prasīda devadeveśa prasīda parameśvara

svabhaktindehi paramāndivyāmavyabhicāriṇīm

śraddhāndehi mahādeva dvasambandhiṣu me sadā

svadāsyaṃ paramaṃ snehaṃ sānnidhyaṃ caiva sarvadā

evamuktvā prasannātmāharṣagadgadayā girā

satuṣṭāva mahādevamupamanyurdvijottamaḥ

upamanyuruvāca
devadeva mahādeva śaraṇāgatavatsala

prasīda karuṇāsiṃdho sāmba śaṃkara sarvadā

vāyuruvāca
evamukto mahādevaḥ sarveṣāṃ ca varapradaḥ

pratyuvāca prasannātmopamanyuṃ munisattamam

śiva uvāca
vatsopamanyo tuṣṭo 'smi sarvaṃ dattaṃ mayā hi te

dṛḍhabhakto 'si viprarṣe mayā vijñāsito hyasi

ajaraścāmaraścaiva bhava tvanduḥkhavarjitaḥ

yaśasvī tejasā yukto divyajñānasamanvitaḥ

akṣayā bāndhavāścaiva kulaṃ gotraṃ ca te sadā

bhaviṣyati dvijaśreṣṭha mayi bhaktiśca śāśvatī

sānnidhyaṃ cāśrame nityaṃ kariṣyāmi dvijottama

upakaṃṭhaṃ mama tvaṃ vai sānandaṃ vihariṣyasi

evamuktvā sa bhagavānsūryakoṭisamaprabhaḥ

īśānassa varāndattvā tatraivāntardadhe haraḥ

upamanyuḥ prasannātmā prāpya tasmādvarādvarān

jagāma jananīsthānaṃ sukhaṃ prāpādhikaṃ ca saḥ

iti śrīśivamahāpurāṇe vaiyāsikyāṃ caturviṃśatisāhasryāṃ saṃhitāyāṃ tadantargatāyāṃ saptamyāṃ vāyavīyasaṃhitāyāṃ pūrvakhaṇḍe upamanyucaritavarṇanaṃ nāma pañcatriṃśo 'dhyāyaḥ
samāpto 'yaṃ saptamyā vāyavīyasaṃhitāyāḥ pūrvakhaṇḍaḥ //