Shiva Purana · Chapter 7.19

upamanyuruvāca
ataḥ paraṃ pravakṣyāmi sādhakaṃ nāma nāmataḥ

saṃskāramantramāhātmyaṃ kathane sūcitaṃ mayā

saṃpūjya maṃḍale devaṃ sthāpya kumbhe ca pūrvavat

hutvā śiṣyamanuṣṇīṣaṃ prāpayedbhuvi maṃḍale

pūrvāṃtaṃ pūrvavatkṛtvā hutvāhutiśataṃ tathā

saṃtarpya mūlamantreṇa kalaśairdeśikottamaḥ

sandīpya ca yathāpūrvaṃ kṛtvā pūrvoditaṃ kramāt

abhiṣicya yathāpūrvaṃ pradadyānmantramuttamam

tatra vidyopadeśāṃtaṃ kṛtvā vistaraśaḥ kramāt

puṣpāmbunā śiśoḥ pāṇau vidyāṃ śaivīṃ samarpayet

tavaihikāmuṣmikayoḥ sarvasiddhiphalapradaḥ

bhavatyeva mahāmantraḥ prasādātparameṣṭhinaḥ

ityutvā devamabhyarcya labdhānujñaḥ śivādguruḥ

sādhanaṃ śivayogaṃ ca sādhakāya samādiśet

tacchrutvā gurusaṃdeśaṃ kramaśo maṃtrasādhakaḥ

purato viniyogasya mantrasādhanamācaret

sādhanaṃ mūlamantrasya puraścaraṇamucyate

purataścaraṇīyatvādviniyogākhyakarmaṇaḥ

nātyantaṃ karaṇīyantu mumukṣormantrasādhanam

kṛtantu tadihānyatra tāsyāpi śubhadaṃ bhavet

śubhe 'hani śubhe deśe kāle vā doṣavarjite

śukladantanakhaḥ snātaḥ kṛtapūrvāhṇikakriyaḥ

alaṃkṛtya yathā labdhairgaṃdhamālyavibhūṣaṇaiḥ

soṣṇīṣaḥ sottarāsaṃgaḥ sarvaśuklasamāhitaḥ

devālaye gṛhe 'nyasmindeśe vā sumanohare

sukhenābhyastapūrveṇa tvāsanena kṛtāsanaḥ

tanuṃ kṛtvātmanaḥ śaivīṃ śivaśāstroktavartmanā

saṃpūjya devadeveśaṃ nakulīśvaramīśvaram

nivedya pāyasaṃ tasmai samapyārādhanaṃ kramāt

praṇipatya ca taṃ devaṃ prāptānujñaśca tanmukhāt

koṭivāraṃ tadardhaṃ vā tadardhaṃ vā japecchivam

lakṣaviṃśatikaṃ vāpi daśalakṣamathāpi vā

tataśca pāyasākṣāralavaṇaikamitāśanaḥ

ahiṃsakaḥ kṣamī śāṃto dāṃtaścaiva sadā bhavet

alābhe pāyasasyāśnanphalamūlādikāni vā

vihitāni śivenaiva viśiṣṭānyuttarottaram

caruṃ bhakṣyamatho saktukaṇānyāvakameva ca

śākaṃ payo dadhi ghṛtaṃ mūlaṃ phalamathodakam

abhimaṃtrya ca mantreṇa bhakṣyabhojyādikāni ca

sādhane 'sminviśeṣeṇa nityaṃ bhuñjīta vāgyataḥ

mantrāṣṭaśatapūtena jalena śucinā vratī

snāyānnadīnadotthena prokṣayedvātha śaktitaḥ

tarpayecca tathā nityaṃ juhuyācca śivānale

saptabhiḥ pañcabhirdravyaistribhirvātha ghṛtena vā

itthaṃ bhaktyā śivaṃ śaivo yaḥ sādhayati sādhakaḥ

tasyehāmutra duṣprāpaṃ na kiṃcidapi vidyate

athavā 'haraharmaṃtraṃ japedekāgramānasaḥ

anaśnanneva sāhasraṃ vinā mantrasya sādhanam

na tasya durlabhaṃ kiṃcinna tasyāstyaśubhaṃ kvacit

iha vidyāṃ śriyaṃ saukhyaṃ labdhvā muktiṃ ca viṃdati

sādhane viniyoge ca nitye naimittike tathā

japejjalairbhasmanā ca snātvā mantreṇa ca kramāt

śucirbaddhaśikhassūtrī sapavitrakarastathā

dhṛtatripuṃḍrarudrākṣo vidyāṃ pañcākṣarīṃ japet

iti śrīśivamahāpurāṇe saptamyāṃ vāyavīyasaṃhitāyāmuttarakhaṃḍe sādhakasaṃskāramantramāhātmyaṃ nāmaikonaviṃśo 'dhyāyaḥ