Shiva Purana · Verses 7.14-2

vāyuruvāca
pratikalpaṃ pravakṣyāmi rudrāvirbhāvakāraṇam

yato vicchinnasaṃtānā brahmasṛṣṭiḥ pravartate

kalpekalpe prajāḥ sṛṣṭvā brahmā brahmāṃḍasaṃbhavaḥ

avṛddhihetorbhūtānāṃ mumoha bhṛśaduḥkhitaḥ

tasya duḥkhapraśāṃtyarthaṃ prajānāṃ ca vivṛddhaye

tattatkalpeṣu kālātmā rudro rudragaṇādhipaḥ

nirdiṣṭaḥ pamameśena maheśo nīlalohitaḥ

putro bhūtvānugṛhṇāti brahmāṇaṃ brahmaṇonujaḥ

sa eva bhagavānīśastejorāśiranāmayaḥ

anādinidhanodhātā bhūtasaṃkocako vibhuḥ

paramaiśvaryasaṃyuktaḥ parameśvarabhāvitaḥ

tacchaktyādhiṣṭhitaśśaśvattaccihnairapi cihnitaḥ

tannāmanāmā tadrūpastatkāryakaraṇakṣamaḥ

tattulyavyavahāraśca tadājñāparipālakaḥ

sahasrādityasaṃkāśaścandrāvayavabhūṣaṇaḥ

bhujaṃgahārakeyūravalayo muṃjamekhalaḥ

jalaṃdharaviriṃcendrakapālaśakalojjvalaḥ

gaṅgātuṃgataraṃgārdhapiṃgalānanamūrdhajaḥ

bhagnadaṃṣṭrāṃkurākrāntaprāntakāntadharādharaḥ

savyaśravaṇapārśvāṃtamaṃḍalīkṛtakuṇḍalaḥ

mahāvṛṣabhaniryāṇo mahājaladaniḥsvanaḥ

mahānalasamaprakhyo mahābalaparākramaḥ

evaṃ ghoramahārūpo brahmaputrīṃ maheśvaraḥ

vijñānaṃ brahmaṇe dattvā sarge sahakaroti ca

tasmādrudraprasādena pratikalpaṃ prajāpateḥ

pravāharūpato nityā prajāsṛṣṭiḥ pravartate

kadācitprārthitaḥ sraṣṭuṃ brahmaṇā nīlalohitaḥ

svātmanā sadṛśān sarvān sasarja manasā vibhuḥ

kapardino nirātaṃkānnīlagrīvāṃstrilocanān

jarāmaraṇanirmuktān dīptaśūlavarāyudhān

taistu saṃcchāditaṃ sarvaṃ caturdaśavidhaṃ jagat

tāndṛṣṭā vividhānrudrān rudramāha pitāmahaḥ

namaste devadeveśa māsrākṣīrīdṛśīḥ prajāḥ

anyāḥ sṛja tvaṃ bhadraṃ te prajā mṛtyusamanvitāḥ

ityuktaḥ prahasanprāha brahmāṇaṃ parameśvaraḥ

nāsti me tādṛśassargassṛja tvamaśubhāḥ prajāḥ

ye tvime manasā sṛṣṭā mahātmāno mahābalāḥ

cariṣyaṃti mayā sārdhaṃ sarva eva hi yājñikāḥ

ityuktvā viśvakarmāṇaṃ viśvabhūteśvaro haraḥ

saha rudraiḥ prajāsargānnivṛttātmā vyatiṣṭhata

tataḥ prabhṛti devo 'sau na prasūte prajāḥ śubhāḥ

ūrdhvaretāḥ sthitaḥ sthāṇuryāvadābhūtasaṃplavam

iti śrīśivamahāpurāṇe saptamyāṃ vāyavīyasaṃhitāyāṃ pūrvakhaṇḍe rudrāvirbhāvavarṇanaṃ nāma caturdaśo 'dhyāyaḥ