Shiva Purana · Chapter 7.15

śrīkṛṣṇa uvāca
bhagavānmaṃtramāhātmyaṃ bhavatā kathitaṃ prabho

tatprayogavidhānaṃ ca sākṣācchrutisamaṃ yathā

idānīṃ śrotumicchāmi śivasaṃskāramuttamam

maṃtrasaṃgrahaṇe kiṃcitsūcitanna tu vismṛtam

upamanyuruvāca
hanta te kathayiṣyāmi sarvapāpaviśodhanam

saṃskāraṃ paramaṃ puṇyaṃ śivena patibhāṣitam

samyakkṛtādhikāraḥ syātpūjādiṣu naro yataḥ

saṃskāraḥ kathyate tena ṣaḍadhvapariśodhanam

dīyate yena vijñānaṃ kṣīyate pāśabaṃdhanam

tasmātsaṃskāra evāyaṃ dīkṣetyapi ca kathyate

śāṃbhavī caiva śāktī ca māṃtrī caiva śivāgame

dīkṣopadiśyate tredhā śivena paramātmanā

gurorālokamātreṇa sparśātsaṃbhāṣaṇādapi

sadyassaṃjñā bhavejjaṃtoḥ pāśopakṣayakāriṇī

sā dīkṣā śāṃbhavī proktā sā punarbhidyate dvidhā

tīvrā tīvratarā ceti pāśo pakṣayabhedataḥ

yayā syānnirvṛtiḥ sadyassaiva tīvratarā matā

tīvrā tu jīvatotyaṃtaṃ puṃsaḥ pāpaviśodhikā

śaktī jñānavatī dīkṣā śiṣyadehaṃ praviśya tu

guruṇā yogamārgeṇa kriyate jñānacakṣuṣā

māṃtrī kriyāvatī dīkṣā kuṃḍamaṃḍalapūrvikā

maṃdamaṃdataroddeśātkartavyā guruṇā bahiḥ

śaktipātānusāreṇa śiṣyo 'nugrahamarhati

śaivadharmānusārasya tanmūlatvātsamāsataḥ

yatra śaktirna patitā tatra śuddhirna jāyate

na vidyā na śivācāro na muktirna ca siddhayaḥ

tasmālliṃgāni saṃvīkṣya śaktipātasya bhūyasaḥ

jñānena kriyayā vātha guruśśiṣyaṃ viśodhayet

yo 'nyathā kurute mohātsa vinaśyati durmatiḥ

tasmātsarvaprakāreṇa guruḥ śiṣyaṃ parīkṣayet

lakṣaṇaṃ śaktipātasya prabodhānaṃdasaṃbhavaḥ

sā yasmātparamā śaktiḥ prabodhānaṃdarūpiṇī

ānaṃdabodhayorliṃgamaṃtaḥkaraṇavikriyāḥ

yathā syātkaṃparomāṃcasvaranetrāṃgavikriyāḥ

śiṣyopi lakṣaṇairebhiḥ kuryādguruparīkṣaṇam

tatsaṃparkaiḥ śivārcādau saṃgatairvātha tadgataiḥ

śiṣyastu śikṣaṇīyatvādgurorgauravakāraṇāt

tasmātsarvaprayatnena gurorgauravamācaret

yo gurussa śivaḥ prokto yaḥ śivaḥ sa guruḥ smṛtaḥ

gururvā śiva evātha vidyākāreṇa saṃsthitaḥ

yathā śivastathā vidyā yathā vidyā tathā guruḥ

śivavidyā gurūṇāṃ ca pūjayā sadṛśaṃ phalam

sarvadevātmakaścāsau sarvamaṃtramayo guruḥ

tasmātsarvaprayatnena yasyājñāṃ śirasā vahet

śreyo 'rthī yadi gurvājñāṃ manasāpi na laṃghayet

gurvājñāpālako yasmājjñānasaṃpattimaśnute

gacchaṃstiṣṭhansvapanbhuṃjannānyatkarma samācaret

samakṣaṃ yadi kurvīta sarvaṃ cānujñayā guroḥ

gurorgṛhe samakṣaṃ vā na yatheṣṭāsano bhavet

gururdevo yataḥ sākṣāttadgṛhaṃ devamandiram

pāpināṃ ca yathā saṃgāttatpāpātpatito bhavet

yatheha vahnisaṃparkānmalaṃ tyajati kāṃcanam

tathaiva gurusaṃparkātpāpaṃ tyajati mānavaḥ

yathā vahnisamīpastho ghṛtakumbho vilīyate

tathā pāpaṃ vilīyeta hyācāryasya samīpataḥ

yathā prajvalito vahniḥ śuṣkamārdraṃ ca nirdahet

tathāyamapi saṃtuṣṭo guruḥ pāpaṃ kṣaṇāddahet

manasā karmaṇā vācā guroḥ krodhaṃ na kārayet

tasya krodhena dahyaṃte hyāyuḥśrījñānasatkriyāḥ

tatkrodhakāriṇo ye syusteṣāṃ yajñāśca niṣphalāḥ

yamaśca niyamāścaiva nātra kāryā vicāraṇā

gurorviruddhaṃ yadvākyaṃ na vadejjātucinnaraḥ

vadedyadi mahāmohādrauravaṃ narakaṃ vrajet

manasā karmaṇā vācā gurumuddiśya yatnataḥ

śreyorthī cennaro dhīmānna mithyācāramācaret

gurorhitaṃ priyaṃ kuryādādiṣṭo vā na vā sadā

asamakṣaṃ samakṣaṃ vā tasya kāryaṃ samācaret

itthamācāravānbhakto nityamudyuktamānasaḥ

gurupriyakaraḥ śiṣyaḥ śaivadharmāṃstato 'rhati

guruścedguṇavānprājñaḥ paramānaṃdabhāsakaḥ

tattvavicchivasaṃsakto muktido na tu cāparaḥ

saṃvitsaṃjananaṃ tattvaṃ paramānaṃdasaṃbhavam

tattattvaṃ viditaṃ yena sa evānaṃdadarśakaḥ

na punarnāmamātreṇa saṃvidārahitastu yaḥ

anyonyaṃ tārayennaukā kiṃ śilā tārayecchilām

etasyā nāmamātreṇa muktirvai nāmamātrikā

yaiḥ punarviditaṃ tattvaṃ te muktā mocayantyapi

tattvahīne kuto bodhaḥ kuto hyātmaparigrahaḥ

parigrahavinirmuktaḥ paśurityabhidhīyate

paśubhiḥ preritaścāpi paśutvaṃ nātivartate

tasmāttattvavideveha mukto mocaka iṣyate

sarvalakṣaṇasaṃyuktaḥ sarvaśāstravidapyayam

sarvopāyavidhijño 'pi tattvahīnastu niṣphalaḥ

yasyānubhavaparyaṃtā buddhistattve pravartate

tasyāvalokanādyaiśca parānando 'bhijāyate

tasmādyasyaiva saṃparkātprabodhānaṃdasaṃbhavaḥ

guruṃ tameva vṛṇuyānnāparaṃ matimānnaraḥ

sa śiṣyairvinayācāracaturairucito guruḥ

yāvadvijñāyate tāvatsevanīyo mumukṣubhiḥ

jñāte tasminsthirā bhaktiryāvattattvaṃ samāśrayet

na tu tattvaṃ tyajejjātu nopekṣeta kathaṃcana

yatrānaṃdaḥ prabodho vā nālpamapyupalabhyate

vatsarādapi śiṣyeṇa so 'nyaṃ gurumupāśrayet

gurumanyaṃ prapanne 'pi nāvamanyeta paurvikam

gurorbhrātḥṃstathā putrānbodhakānprerakānapi

tatrādāvupasaṃgamya brāhmaṇaṃ vedapāragam

gurumārādhayetprājñaṃ śubhagaṃ priyadarśanam

sarvābhayapradātāraṃ karuṇākrāṃtamānasam

toṣayettaṃ prayatnena manasā karmaṇā girā

tāvadārādhayecchiṣyaḥ prasannosau bhavedyathā

tasminprasanne śiṣyasya sadyaḥ pāpakṣayo bhavet

tasmāddhanāni ratnāni kṣetrāṇi ca gṛhāṇi ca

bhūṣaṇāni ca vāsāṃsi yānaśayyāsanāni ca

etāni gurave dadyādbhaktyā vittānusārataḥ

vittaśāṭhyaṃ na kurvīta yadīcchetparamāṃ gatim

sa eva janako mātā bhartā bandhurdhanaṃ sukham

sakhā mitraṃ ca yattasmātsarvaṃ tasmai nivedayet

nivedya paścātsvātmānaṃ sānvayaṃ saparigraham

samarpya sodakaṃ tasmai nityaṃ tadvaśago bhavet

yadā śivāya svātmānaṃ dattavān deśikātmane

tadā śaivo bhaveddehī na tato 'sti punarbhavaḥ

guruśca svāśritaṃ śiṣyaṃ varṣamekaṃ parīkṣayet

brāhmaṇaṃ kṣatriyaṃ vaiśyaṃ dvivarṣaṃ ca trivarṣakam

prāṇadravyapradānādyairādeśaiśca samāsamaiḥ

uttamāṃścādhame kṛtvā nīcānuttamakarmaṇi

ākruṣṭāstāḍitā vāpi ye viṣādaṃ na yāntyapi

te yogyāḥ saṃyatāḥ śuddhāḥ śivasaṃskārakarmaṇi

ahiṃsakā dayāvaṃto nityamudyuktacetasaḥ

amānino buddhimaṃtastyaktaspardhāḥ priyaṃvadāḥ

ṛjavo mṛdavaḥ svacchā vinītāḥ sthiracetasaḥ

śaucācārasamāyuktāḥ śivabhaktā dvijātayaḥ

evaṃ vṛttasamopetā vāṅmanaḥkāyakarmabhiḥ

śodhyā bodhyā yathānyāyamiti śāstreṣu niścayaḥ

nādhikāraḥ svato nāryāḥ śivasaṃskārakarmaṇi

niyogādbharturastyeva bhaktiyuktā yadīśvare

tathaiva bhartṛhīnāyā putrāderabhyanujñayā

adhikāro bhavatyeva kanyāyāḥ piturājñayā

śūdrāṇāṃ martyajātīnāṃ patitānāṃ viśeṣataḥ

tathā saṃkarajātīnāṃ nādhvaśuddhirvidhīyate

taipyakṛtrimabhāvaścecchive paramakāraṇe

pādodakapradānādyaiḥ kuryuḥ pāpaviśodhanam

atrānulomajātā ye yuktā eva dvijātiṣu

teṣāmadhvaviśuddhyādi kuryānmātṛkulocitam

yā tu kanyā svapitrādyaiśśivadharme niyojitā

sā bhaktāya pradātavyā nāparāya virodhine

dattā cetpratikūlāya pramādādbodhayetpatim

aśaktā taṃ parityajya manasā dharmamācaret

yathā munivaraṃ tyaktvā patimatriṃ pativratā

kṛtakṛtyā 'bhavatpūrvaṃ tapasārādhya śaṅkaram

yathā nārāyaṇaṃ devaṃ tapasārādhya pāṃḍavān

patīṃllabdhavatī dharme gurubhirna niyojitā

asvātantryakṛto doṣo nehāsti paramārthataḥ

śivadharme niyuktāyāśśivaśāsanagauravāt

bahunātra kimuktena yo 'pi ko 'pi śivāśrayaḥ

saṃskāryo gurvadhīnaścetsaṃskriyā na prabhidyate

gurorālokanādeva sparśātsaṃbhāṣaṇādapi

yasya saṃjāyate prajñā tasya nāsti parājayaḥ

manasā yastu saṃskāraḥ kriyate yogavartmanā

sa neha kathito guhyo guruvaktraikagocaraḥ

kriyāvānyastu saṃskāraḥ kuṃḍamaṃḍapapūrvakaḥ

sa vakṣyate samāsena tasya śakyo na vistaraḥ

iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe dīkṣāvidhāne gurumāhātmyaṃ nāma pañcadaśo 'dhyāyaḥ