Shiva Purana · Chapter 6.9

īśvara uvāca //
śivo maheśvaraścaiva rudro viṣṇuḥ pitāmahaḥ //
saṃsāravaidyassarvajñaḥ paramātmeti mukhyataḥ

nāmāṣṭakamidaṃ nityaṃ śivasya pratipādakam //
ādyantapañcakantatra śāntyatītādyanukramāt

saṃjñā sahāśivādīnāṃ pañcopādhiparigrahāt //
upādhivinivṛttau tu yathāsvaṃ vini vartate

padameva hitaṃ nityamanityāḥ padinaḥ smṛtāḥ //
padānāṃ parivṛtti syānmucyaṃte padino yataḥ

parivṛttyantare tvevaṃ bhūyastasyāpyupādhinā //
ātmāntarābhidhānaṃ syātpādādyaṃ nāmapaṃcakam

anyattu tritayaṃ nāmnāmupādānādibhedataḥ//
trividhopādhiracanācchiva eva tu vartate

anādimalasaṃśleṣaprāgabhāvātsvabhāvataḥ //
atyantapariśuddhātmetyato'yaṃ śiva ucyate

athavā'śeṣakalyāṇaguṇaikaghana īśvaraḥ //
śiva ityucyate sadbhiśśivatattvārthavedibhiḥ

trayoviṃśatitatvebhyaḥ parāprakṛtirucyate//
prakṛtestu paramprāhuḥ puruṣampañcaviṃśakam

yadvedādau svaramprāhurvācyavācakabhāvataḥ //
vedaikavedyaṃ yāthātmyādvedānte ca pratiṣṭhitam //

sa eva prakṛtau līno bhoktā yaḥ prakṛteryataḥ //
tasya prakṛtilīnasya yaḥ parassa maheśvaraḥ

tadadhīnapravṛttittvātprakṛteḥ puruṣasya ca //
athavā triguṇantattvaṃ māyeyamidamavyayam

māyāntu prakṛtimvidyānmāyinantu maheśvaram//
māyāvimocako'nantomaheśvarasamanvayāt

ru dduḥkhaṃ duḥkhaheturvā taddrāvayati yaḥ prabhuḥ//
rudra ityucyate tasmācchivaḥ paramakāraṇam

śivatattvādibhūmyantaṃ śarīrādi ghaṭādi ca//
vyāpyādhitiṣṭhati śivastamādviṣṇurudāhṛtaḥ

jagataḥ pitṛbhūtānāṃ śivo mūrtyātmanāmapi ///
pitṛbhāvena sarveṣāṃ pitāmaha udīritaḥ

nidānajño yathā vaidyo rogasya nivartakaḥ//
upāyairbheṣajaistadvallayabhogādhikārakaḥ

saṃsārasyeśvaro nityaṃ sthūlasya vinivartakaḥ //
saṃsāra vaidya ityuktassarvatattvārthavedibhiḥ

daśārddhajñānasiddhyarthamindriyeṣu ca satsvapi //
trikālabhāvino bhāvānsthūlānsūkṣmānaśeṣataḥ

aṇavo naiva jānanti māyārṇavamalāvṛtāḥ //
asatsvapi ca sarveṣu siddhasarvārthavediṣu

yadyathāvasthitaṃ vastu tattathaiva sadāśivaḥ //
ayatnenaiva jānāti tasmātsarvajña ucyate

sarvātmā paramairebhirguṇairnityasamanvayāt//
svasmātparātmavirahātparamātmā śivassvayam

iti stutvā mahādevaṃ praṇavātmānamavyayam//
dattvā parāṅmukhādyañca paścādīśānamastake

punararcya deveśampraṇavena samāhitaḥ//
hastena baddhāñjalinā pūjāpuṣpampragṛhya ca

unmanāntaṃ śivaṃ nītvā vāmanāsāpuṭādhvanā//
devomudvāsya ca tato dakṣanāsāpuṭādhvanā

śiva evāhamasmīti tadaikyamanubhūya ca//
sarvāvaraṇadevāṃśca punarudvāsayeddhṛdi

vidyāpūjāṃ guroḥpūjāṃ kṛtvā paścādyathākramam//
śaṃkhārghapātramaṃtrāṃśca hṛdaye vinyasetkramāt

nirmālyañca samarpyā'tha caṇḍeśāyeśagocare //
punaśca saṃyataprāṇa ṛṣyādikamathoccaret

kailāsaprastaro nāma maṇḍalamparibhāṣitam //
arcayennityamevaitatpakṣe vā māsimāsi vā

ṣaṇmāse vatsare vāpi cāturmāsyādiparvaṇi //
avaśyañca samabhyarcennityaṃ malliṅgamāstikaḥ

tasminkrame mahādevi viśeṣaḥ ko'pi kathyate //
upadeśadine liṃgampūjitaṃ guruṇā saha

gṛhṇīyādarcayiṣyāmi śivamāprāṇasaṃkṣayam//
evantrivāramuccāryya śapathaṃ gurusannidhau

tatassamarcayennityampūrvoktavidhinā priye//
arghaṃ samarpayelliṃgamūrddhanyarghyodakena ca

praṇavena samabhyarcya dhūpadīpau samarpayet //
aiśānyāṃ caṇḍamārādhya nirmālyañca nivedayet

prakṣālya lliṃgamvedīñca vastrapūtairjalaistataḥ //
niḥkṣipya puṣpaṃ śirasi liṃgasya praṇavena tu

ādhāraśaktimārabhya śuddhavidyāsanāvadhi //
vibhāvya sarvaṃ manasā sthāpayetparameśvaram

pañcagavyādibhirdravyairyathāvibhavasambhṛtaiḥ //
kevalairvā jalaiśśuddhaissurabhi dravyavāsitaiḥ

pāvamānena rudreṇa nīlena tvaritena ca //
ṛgbhiśca sāmabhirvāpi brahmabhiścaiva pañcabhiḥ

snāpayeddevadeveśaṃ praṇavena śivena ca //
viśeṣārghyodakenāpi praṇavenābhiṣecayet

viśodhya vāsasā puṣpaṃ liṃgamūrddhani vinyaset//
pīṭhe liṃgaṃ samāropya sūryādyarcāṃ samācaret

ādhāraśaktyanantau dvau pīṭhādhastātsamarcayet //
siṃhāsanantadūrdhvantu samabhyarcya yathākramam // ४१
athordhvacchadanampīṭhapāde skandaṃ samarcayet //
liṃge mūrtiṃ samākalpya māntvayā saha pūjayet

samyag bhaktyā vidhānena yatirmaddhyānatatparaḥ //
evammayā te kathitamatiguhyamidampriye

gopanīyaṃ prayatnena na deyaṃ yasya kasya cit //
mama bhaktāya dātavyaṃ yataye vītarāgiṇe

gurubhaktāya śāntāya madarthe yogabhāgine //
mamājñāmatilaṃghyaitadyo dadāti vimūḍhadhīḥ

sa nārakī mama drohī bhaviṣyati na saṃśayaḥ //
madbhaktadānāddeveśi matpriyaśca bhaveddhruvam //
iha bhuktvākhilānbhogānmatsānnidhyamavāpnuyāt

vyāsa uvāca //
etacchutvā mahādevī mahādevena bhāṣitam //
stutvā tu vividhaiḥ stotrairdevamvedārthagarvitaiḥ

śrīmatpādābjayoḥ patyuḥ praṇavaṃ parameśvarī //
atiprahṛṣṭahṛdayā mumoda munisattamāḥ

atiguhyamidamviprāḥ praṇavārthaprakāśakam //
śivajñānaparaṃ hyetadbhavatāmārtināśanam

sūta uvāca //
ityuktvā muniśārdūlaḥ parāśaryyo mahātapāḥ //
pūjitaḥ parayā bhaktyā munibhirvedavādibhiḥ

kailāsādrimanusṛtya yayau tasmāttapovanāt //
te'pi prahṛṣṭahṛdayāssatrānte parameśvaram

sampūjya parayā bhaktyā somaṃ somārddhaśekharam //
yamādiyoganiratāśśivadhyānaparābhavan

guhāya kathitaṃ hyetaddevyā tenāpi nandine //
sanatkumāramunaye provāca bhagavān hi saḥ

tasmāllabdhaṃ madguruṇā vyāsenāmitatejasā //
tasmāllabdhamidampuṇyammayāpi munipuṃgavāḥ

mayā vaśśrāvitaṃ hyetadguhyādguhyataramparam //
jñātvā śivapriyānbhaktyā bhavato giriśapriyam

bhavadbhirapi dātavyametadguhyaṃ śivapriyam //
yatibhyaśśāntacittebhyo bhaktebhyaśśivapādayoḥ

etaduktvā mahābhāgassūtaḥ paurāṇikottamaḥ //
tīrthayātrāprasaṃgena cacāra pṛthivīmimām

etadrahasyamparamaṃ labdhvā sūtānmunīśvarāḥ //
kāśyāmeva samāsīnā muktāśśivapadaṃ yayuḥ

iti śrīśivamahāpurāṇe ṣaṣṭhyāṃ kailāsasaṃhitāyāṃ praṇavārthapaddhativarṇanaṃ nāma navamo'dhyāyaḥ