Shiva Purana · Chapter 6.10

vyāsa uvāca //
gate'tha sūte munayassuvismitā vicintya cānyonyamidantu vismṛtam //
yadvāmadevasya matanmunīśvara pratyūcitantatkhalu naṣṭamadya naḥ

kadānubhūyānmunivaryadarśanambhāvābdhiduḥkhaughaharamparaṃ hi tat //
maheśvarārādhanapuṇyato'dhunā munīśvarassatvaramāvirastu naḥ

iti cintāsamāviṣṭā munayo munipuṃgavam//
vyāsaṃ saṃpūjya hṛtpadme tasthustaddaśarnotsukāḥ

samvatsarānte sa punaḥ kāśīmprāpa mahāmuniḥ //
śivabhaktirato jñānī purāṇārthaprakāśakaḥ

tandṛṣṭvā sūtamāyāntammunayo hṛṣṭacetasaḥ //
abhyutthānāsanārghyādipūjayā samapūjayan

sopi tānmuniśārdūlānabhinandya smitodaram //
prītyā snātvā jāhnavīye jale paramapāvane

ṛṣīnsaṃtarpya ca surānpitṝṃśca tilataṇḍulaiḥ //
tīramāgatya samprokṣya vāsasī paridhāya ca

dvirācamya samādāya bhasma sadyādimaṃtrataḥ //
uddhūlanādikramato vidhāryyā'tha munīśvaraḥ

rudrākṣamālābharaṇaḥ kṛtanityakriyassudhī //
yathoktāṃgeṣu vidhinā tripuṇḍraṃ racati sma ha

viśveśvaramumākāntaṃ sasutaṃ sagaṇādhipam //
pūjayāmāsa sadbhaktyā hyastau nnatvā muhurmuhuḥ

kālabhairavanāthaṃ ca saṃpūjyātha vidhānataḥ //
pradakṣiṇīkṛtya punastredhā natvā ca paṃcadhā

punaḥ pradakṣiṇī kṛtya praṇamya bhuvi daṇḍavat //
tuṣṭāva parayā stutyā saṃsmaraṃstatpadāmbujam

śrīmatpaṃcākṣarīmvidyāmaṣṭottarasahasrakam//
saṃjapya purataḥ sthitvā kṣamāpayya maheśvaram

caṇḍeśaṃ samprapūjyā'tha muktimaṇḍapamadhyataḥ //
nirddiṣṭamāsanaṃ bheje munibhirvedapāragaiḥ

evaṃ sthiteṣu sarveṣu namaskṛtya samaṃtrakam //
atha prāha munīndrāṇāṃ bhāvavṛddhikaramvaca

sūta kṛtaḥ //
dhanyā yūyaṃ mahāprājñā munayaśśaṃsitavratāḥ //
bhavadarthamiha prāpto'hantadvṛttamidaṃ śṛṇu

yadāhamupadiśyātha bhavataḥ praṇavārthakam//
gatastīrthāṭanārthāya tadvṛttāntambravīmi vaḥ

ito nirgatya samprāpya tīraṃ dakṣapayonidheḥ //
snātvā sampūjya vidhivaddevīṃ kanyāmayīṃ śivām //
punarāgatya viprendrāssuvarṇamukharītaṭam

śrīkālahastiśailākhyanagare paramādbhute //
suvarṇamukharītoye snātvā devānṛṣīnapi

santarpya vidhivadbhaktyā samudaṃ giriśaṃ smaran //
samarcya kālahastīśaṃ candrakāṃtasamaprabham

paścimābhimukhampaṃcaśirasamparamādbhutam //
sakṛddarśanamātreṇa sarvāghakṣayakāraṇam

sarvasiddhipradambhuktimuktidantriguṇeśvaram //
tataśca parayā bhaktyā tasya dakṣiṇagāṃ śivām

jñānaprasūnakalikāṃ samarcya hi jagatprasūm //
śrīmatpaṃcākṣarīṃ vidyāmaṣṭottarasahasrakam

japtvā pradakṣiṇīkṛtya stutvā natvā muhurmuhuḥ

tataḥ pradakṣiṇīkṛtya girimpratyahamādarāt //
āmodatīva manasi pratyahanniyamāsthitaḥ

anayañcaturo māsānevantatra munīśvarāḥ //
jñānaprasūnakalikā mahādevyāḥ prasādataḥ

ekadā tu samāstīrya cailājinakuśottaram //
āsanamparamantasminsthitvā ruddhendriyo muni

samādhimāsthāya sadā paramānaṃdaciddhanaḥ //
paripūrṇaśśivosmīti nirvyagrahṛdayo'bhavam

etasminneva samaye sadguruḥ karuṇānidhiḥ //
nīlajīmūtasaṅkāśo vidyutpiṅgajaṭādharaḥ

prāṃśuḥ kamaṇḍalūddaṇḍakṛṣṇājinadharassvayam //
bhasmāvadātasarvāṅgassarvalakṣaṇalakṣitaḥ

tripuṇḍravilasadbhālo rudrākṣālaṅkṛtākṛtiḥ //
padmapatrāruṇāyāmavistīrṇanayanadvayaḥ

prādurbhūya hṛdambhoje tadānīmeva satvaram //
vimohitastadaivāsametadadbhutamāstikāḥ

tata unmīlya nayane vilāpaṃ kṛtavānaham //
āsīnmamāśrupātaśca girinirjharasannibhaḥ

etasminneva samaye śrutā vāgaśarīriṇī //
vyomno mahādbhutā viprāstāmeva śṛṇutādarāt

sūtaputra mahābhāga gaccha vārāṇasīmpurīm //
tatrāsanmunayaḥ pūrvamupadiṣṭāstvayā'dhunā

tvadupāgamakalyāṇaṃ kāṃkṣaṃte vivaśā bhṛśam //
tiṣṭhanti te nirāhārā ityuktvā virarāma sā

tata utthāya tarasā devandevīñca bhaktitaḥ //
pradakṣiṇīkṛtya punaḥ praṇamya bhuvi daṇḍavat

dviṣaḍvāraṃ gurorājñāṃ vijñāya śivayoratha //
kṣetrānnirgatya tarasā catvāriṃśaddināntare

āgato'smi muniśreṣṭhā anugṛhṇantu māmiha //
mayā kimadya vaktavyaṃ bhavantastadbruvantu me

iti sūtavacaśśrutvā ṛṣayo hṛṣṭamānasāḥ //
avocanmuniśārdūlaṃ vyāsannatvā muhurmuhuḥ

iti śrīśivamahāpurāṇe ṣaṣṭhyāṃ kailāsasaṃhitāyāṃ sūtopadeśo nāma daśamo'dhyāyaḥ