Shiva Purana · Chapter 6.8

īśvara uvāca //
atrāsti ca mahādevi khalvāvaraṇapaṃcakam //
paṃcāvaraṇapūjāntu prārabheta yathākramam

prathamampūjitau yatra tatraiva kramaśassudhīḥ //
gandhādyairarcayetpūrvaṃ devau heraṃbaṣaṇmukhau

paṃca brahmāṇi parito vṛtte sampūjayetkramāt //
īśānadeśe pūrve ca dakṣiṇe cottare tathā

paścime ca tatastasminṣaḍaṃgāni samarcayeta //
āgneye ca tathaiśāne nairṛte vāyudeśake

madhye netrantadvadastrampūrvādiparitaḥ kramāt //
prathamāvaraṇamproktaṃ dvitīyāvaraṇaṃ śṛṇu

anantampūrvadikpatre sūkṣmandakṣiṇatastathā //
śivottamaṃ paścimata ekanetrantathottare

ekarudrantathaiśāne trimūrtiṃ vahnidigdale //
śrīkaṇṭhaṃ nairṛte vāyau śikhaṇḍīśaṃ samarcayet

dvitīyāvaraṇe caiva pūjyāste cakravartinaḥ //
pūrvadvārasya madhye tu vṛṣeśānamprapūjayet

taddakṣiṇe nandinañca mahākālantaduttare //
bhṛṃgīśandakṣiṇadvārapaścime samprapūjayet

tatpūrvakoṣṭhe gandhādyaissamprapūjya vināyakam //
paścimottarakoṣṭhe ca vṛṣabhandakṣiṇe guham

uttaradvārapūrve tu pradakṣiṇavidhānataḥ //
nāmāṣṭakavidhānena pūjayeducyate hi tat

bhavaṃ śarvaṃ tatheśānaṃ rudrampaśupatimpunaḥ //
ugrambhīmammahādevantṛtīyāvaraṇantvidam

yo vedādau svara iti samāvāhya maheśvaram //
pūjayetpūrvadigbhāge kamale karṇikopari

īśvarampūrvadikpatre viśveśandakṣiṇe tataḥ //
saumye tu parameśānaṃ sarveśampa ścime yajet

dakṣiṇe tu yajedrudramāvorājānamityṛcā //
āvāhya gandhapuṣpādyaiḥ karṇikāyāndaleṣu ca

śivaḥ pūrve dakṣiṇato hara uttarato mṛḍaḥ //
bhavaḥ paścimadikpatre pūjyā ete yathākramam

uttare viṣṇumāvāhya gandhapuṣpādibhiryajet //
pratadviṣṇuriti procya karṇikāyāndaleṣu ca

vāsudevampūrvabhāge dakṣiṇe cāniruddhakam //
saumye saṃkarṣaṇañcaiva pradyumnampaścime yajet

brahmāṇampaścime padme samāvāhya samarcayet //
hiraṇyagarbhaḥ samavartata iti maṃtreṇa maṃtravit

hiraṇyagarbhaṃ pūrvasyāṃ virājandakṣiṇe tataḥ //
uttare puṣkarañcaiva kālampaścimato yajet

sarvorddhvapaṃktau pūrvādipradakṣiṇavidhānataḥ//
tattatsthāneṣu saṃpūjya lokapālānanukramāt

rāntaṃpāntaṃ tathā jñāntaṃ lāntaṃ lāntamapūrvakam //
ṣāntaṃ sāntañca vedādyaṃ śrībījañca daśakramāt

bījāni lokapālānāmetairetānsamarcayet //
nairṛte cottare tadvadīśānasya ca dakṣiṇe

brahma viṣṇū ca vidhinā pūjayedupacārakaiḥ //
bāhyarekhāsu deveśampañcamāvaraṇe yajet

śrīmattriśūlamīśāne vajraṃ māhendradiṅmukhe //
paraśuṃ vahnidigbhāge yāmye sāyakamarcayet

nairṛte tu yajetkhaḍgampāśaṃ varuṇagocare //
aṃkuśaṃ mārute bhāge pinākaṃ cottare yajet

paścimābhimukhaṃ raudraṃ kṣetrapālaṃ samarcayet //
yathāvidhi vidhānajñaśśivaprītyarthameva ca

kṛtāñjalipuṭāssarve cintyāḥ smitamukhāmbujāḥ //
sādaraṃ prekṣamāṇāśca devaṃ devīñca sarvadā

itthamāvaraṇābhyarcāṃ kṛtvā vikṣepaśāntaye //
punarabhyarcya deveśampraṇavaṃ ca śivaṃ vadet

evamabhyarcya vidhivadgandhādyairupacārakaiḥ//
upacaryya tato dadyānnaivedyaṃ vidhisādhitam

punarācamanīyaṃ ca dadyādarghyaṃ yathā purā //
tato nivedya pānīyantāmbūlaṃ copadeśataḥ

nīrājanādikaṃ kṛtvā pūjāśeṣaṃ samāpayet //
dhyātvā devaṃ ca devīñca manumaṣṭottaraṃ japet

tata utthāya racitapuṣpāñjalipuṭaḥ sthitaḥ//
japeddhyātvā mahādevaṃ yo devānāmiti kramāt

yo vedādau svaraḥ prokta ityaṃtamparameśvari //
puṣpāñjalintato dattvā triḥ pradakṣiṇamācaret

sāṣṭāṃgampraṇamettaṃ sa bhaktyā paramayānvitaḥ //
punaḥ pradakṣiṇāṃ kṛtvā praṇametpunarekadhā

sthitvāsane samabhyarcya devaṃ nāmāṣṭakena ca //
sādhu vāsādhu vā karma yadyadācaritaṃ mayā

tatsarvaṃ bhagavañchambho bhavadārādhanamparam //
iti śaṃkhodakenaiva sapuṣpeṇa samarpayet

pūjyaṃ punassamabhyarcya sārthaṃ nāmāṣṭakaṃ japet //
tadeva śṛṇu deveśi saṃbruve tava bhaktitaḥ

iti śrīśivamahāpurāṇe ṣaṣṭhyāṃ kailāsasaṃhitāyāmāvaraṇapūjāvarṇanaṃ nāmāṣṭamo'dhyāyaḥ