Shiva Purana · Chapter 6.7

īśvara uvāca //
svavāme caturasraṃ tu maṇḍalaṃ parikalpayet//
omityabhyarcya tasmiṃstu śaṃkhamastropaśobhitam

sthāpya sādhārakaṃ taṃ tu praṇavenārcayettataḥ //
āpūryya śuddhatoyena candanādisugaṃdhinā

abhyarcya gandhapuṣpādyaiḥ praṇavena ca saptadhā /
abhimaṃtrya tatastasmindhenumudrāṃ pradarśayet

śaṃkhamudrāṃ ca purataścaturasraṃ prakalpayet //
tadantarerddhacandraṃ ca trikoṇaṃ ca tadantare

ṣaṭkoṇaṃ vṛttamevedaṃ maṇḍalaṃ parikalpayet //
abhyarcya gaṃdhapuṣpādyaiḥ praṇavenātha madhyataḥ

sādhāramarghyapātraṃ ca sthāpya gaṃdhādinārcayet //
āpūryya śuddhatoyena tasminpātre viniḥkṣipet

kuśāgrāṇyakṣatāścaiva yavavrīhitilānapi //
ājyasiddhārtha puṣpāṇi bhasitaṃ ca varānane

sadyojātādibhirmaṃtraiḥ ṣaḍaṃgaiḥ praṇavena ca //
abhyarcya gaṃdhapuṣpādyairabhimaṃtrya ca varmaṇā

avaguṃṇṭhyāstramaṃtreṇa saṃrakṣārthaṃ pradarśayet //
dhenumudrāṃ ca tenaiva prokṣayedastramaṃtrataḥ

svātmānaṃ gaṃdhapuṣpādipūjopakaraṇānyapi //
padmasyeśānadikpadmaṃ praṇavoccārapūrvakam

gurvāsanāya nama ityāsanaṃ parikalpayet //
gurormūrtiṃ ca tatraiva kalpa yedupadeśataḥ

praṇavaṃ guṃ gurubhyonte namaḥ procyāpi deśikam //
samāvāhya tato dhyāyeddakṣiṇābhimukhaṃ sthitam

suprasannamukhaṃ saumyaṃ śuddhasphaṭikanirmalam //
varadābhayahastaṃ ca dvinetraṃ śivavigraham

evaṃ dhyātvā yajedgandhapuṣpādibhiranukramāt //
padmasya nairṛte padme gaṇapatyāsanopari

mūrtimprakalpya tatraiva gaṇānāṃ tveti maṃtrataḥ //
samāvāhya tato devaṃ dhyāyedekā gramānasaḥ

raktavarṇaṃ mahākāyaṃ sarvābharaṇabhūṣitam //
pāśāṃkuśeṣṭadaśanāndadhānaṅkarapaṅkajaiḥ

gajānanamprabhuṃ sarvavighnaughaghnamupāsituḥ //
evandhyātvā yajedgandhapuṣpādyairupacārakaiḥ

kadalīnārikelāmraphalalaḍḍukapūrvakam //
naivedyaṃ ca samarpyātha namaskuryādgajānanam

padmasya vāyudikpadme saṃkalpya skāndamāsanam //
skandamūrtimprakalpyātha skandamāvāhayedbudhaḥ

uccāryya skandagāyatrīṃ dhyāyedatha kumārakam//
udyadādityasaṃkāśaṃ mayūravaravāhanam

caturbhujamudārāṅgaṃ mukuṭādivibhūṣitam//
varadābhayahastaṃ ca śaktikukkuṭadhāriṇam

evandhyātvā'tha gaṃdhādyairupacārairanukramāt//
saṃpūjya pūrvadvārasya dakṣaśākhāmupāśritam

antaḥpurādhipaṃ sākṣānnandinaṃ samyagarcayet //
cāmīkarācalaprakhyaṃ sarvābharaṇabhūṣitam

bālendumukuṭaṃ saumyaṃ trinetraṃ ca caturbhujam //
dīptaśūlamṛgīṭaṃkahemavetradharaṃ vibhum

candrabimbābhavadanaṃ harivaktramathāpi vā //
uttarasyāntathā tasya bhāryāṃ ca marutāṃ sutām

suyaśāṃ suvratāmambāpādamaṇḍanatatparām //
saṃpūjya vidhivadgandhapuṣpādyairupacārakaiḥ

tatassaṃprokṣayetpadmaṃ sāstraśaṃ khodabindubhiḥ //
kalpayedāsanaṃ paścādādhārādi yathākramāt

ādhāraśaktiṃ kalyāṇīṃ śyāmāṃ dhyāyedadho bhuvi //
tasyāḥ purastādutkaṃṭhamanantaṃ kuṃḍalākṛtim

dhavalaṃ paṃcaphaṇinaṃ lelihānamivāmbaram //
tasyoparyāsanaṃ bhadraṃ kaṃṭhīravacatuṣpadam

dharmo jñānaṃ ca vairāgyamaiśvaryaṃ ca padāni vai //
āgneyādiśvetapītaraktaśyāmāni varṇataḥ

adharmādīni pūrvādīnyuttarāṃ tānyanukramāt //
rājāvartamaṇiprakhyānyasya gātrāṇi bhāvayet

adhorddhvacchadanaṃ paścātkaṃdaṃ nālaṃ ca kaṇṭakān //
dalādikaṃ karṇikāñca vibhāvya kramaśo'rcayet

daleṣu siddhayaścāṣṭau kesareṣu ca śaktikāḥ //
rudrā vāmādayastvaṣṭau pūrvādiparitaḥ kramāt

karṇikāyāṃ ca vairāgyaṃ bījeṣu nava śaktayaḥ //
vāmādyā eva pūrvādi tadantaśca manonmanī

kande śivātmako dharmo nāle jñānaṃ śivāśrayam //
karṇikopari vāhneyaṃ maṃḍalaṃ sauramaindavam

ātmavidyā śivākhyaṃ ca tattvatrayamataḥ param //
sarvāsanopari sukhaṃ vicitrakusumojjvalam

paravyomāvakāśākhyaṃ vidyayātīva bhāsvaram //
parikalpyāsanaṃ mūrtteḥ puṣpavinyāsa pūrvakam

ādhāraśaktimārabhya śuddhavidyāsanāvadhi //
ॐkārādicaturthyaṃtaṃ nāmamantraṃ namontakam

uccārya pūjayedvidvānsarvatraivaṃ vidhikramaḥ //
aṅgavaktrakalābhedātpaṃcabrahmāṇi pūrvavat

vinyasetkramaśo mūrttau tattanmudrāvicakṣaṇaḥ //
āvāhayettato devaṃ puṣpāñjalipuṭasthitaḥ

sadyojātamprapadyāmītyārabhyomantamuccaran //
ādhārotthitanādaṃ tu dvādaśagrandhibhedataḥ

brahmarandhāṃtamuccārya dhyāyedoṃkāragocaram //
śuddhasphaṭikasaṃkāśaṃ devaṃ niṣkalamakṣaram

kāraṇaṃ sarvalokānāṃ sarvalokamayaṃ param //
antarbahiḥ sthitaṃ vyāpya hyaṇoralpaṃ mahattamam

bhaktānāmaprayatnena dṛśyamīśvaramavyayam //
brahmendraviṣṇurudrādyairapi devairagocaram

vedasārañca vidvadbhiragocaramiti śrutam //
āvirmadhyāntarahitaṃ bheṣajaṃ bhavarogiṇām

samāhitena manasā dhyātvaivaṃ parameśvaram //
āvāhanaṃ sthāpanaṃ ca sannirodhaṃ nirīkṣaṇam

namaskāraṃ ca kurvīta badhvā mudrāḥ pṛthakpṛthak//
dhyāyetsadāśivaṃ sākṣāddevaṃ sakalaniṣkalam

śuddhasphaṭikasaṃkāśaṃ prasannaṃ śītaladyutim//
vidyudvalayasaṃkāśaṃ jaṭāmukuṭabhūṣitam

/
śārdūlacarmavasanaṃ kiṃcitsmitamukhāmbujam//
raktapadmadalaprakhyapāṇipādatalādharam

sarvalakṣaṇasampannaṃ sarvābharaṇabhūṣitam//
divyā yudhakarairyuktaṃ divyagandhānulepanam

pañcavaktrandaśabhujañcandrakhaṇḍaśikhāmaṇim //
asya pūrvamukhaṃ saumyaṃ bālārkasadṛśaprabham

//
trilocanāravindāḍhyaṃ bālendukṛtaśekharam//
dakṣiṇaṃ nīlajīmūtasamānaruciraprabham

bhrukuṭīkuṭilaṃ ghoraṃ raktavṛttatrilocanam//
daṃṣṭrā karālaṃ duṣprekṣyaṃ sphuritādharapallavam

uttaraṃ vidrumaprakhyaṃ nīlālakavibhūṣitam//
sadvilāsantrinayanaṃ candrārddhakṛtaśekharam

/
paścimampūrṇacandrābhaṃ locanatritayojjvalam//
candralekhādharaṃ saumyaṃ mandasmitamanoharam

pañcamaṃ sphaṭikaprakhyamindurekhāsamujjvalam//
atīvasaumyamutphullalocanatritayojjvalam

dakṣiṇe śūlaparaśuvajrakhaḍgānalojjvalam

pūrvve pinākanārācaghaṇṭā pāśāṃkuśojjvalam//
nivṛttyājānuparyyaṃtamānābhi ca pratiṣṭhayā

ākaṇṭhaṃ vidyayā tadvadālalāṭaṃ tu śāntayā//
tadūrdhvaṃ śāntyatītākhyakalayā parayā tathā

pañcādhvavyāpinaṃ tasmātkalāpañcakavigraham //
īśānamukuṭaṃ devampuruṣākhyampurātanam

aghorahṛdayaṃ tadvadvāmaguhyaṃ maheśvaram //
sadyojātaṃ ca tanmūrtimaṣṭatriṃśatkalāmayam

mātṛkāmayamīśānampañcabrahmamayantathā//
ॐkārākhyamayaṃ caiva haṃsanyāsamayantathā

pañcākṣaramayandevaṃ ṣaḍakṣaramayantathā //
aṅgaṣaṭkamayañcaiva jātiṣaṭkasamanvitam

evandhyātvātha madvāmabhāge tvāṃ ca manonmanīm//
gaurī mimāya mantreṇa praṇavādyena bhaktitaḥ

āvāhya pūrvavatkuryānnamaskārāṃtamī śvari //
dhyāyettatastvāṃ deveśi samāhitamanā muniḥ

praphullotpalapatrābhāṃ vistīrṇāyatalocanām //
pūrṇacandrābhavadanānnīla kuṃcitamūrddhajām

nīlotpaladalaprakhyāñcandrārdhakṛtaśekharām //
ativṛttaghanottuṃgasnigdhapīnapayodharām

tanumadhyāmpṛthuśroṇīmpītasūkṣmatarāmbarām //
sarvābharaṇasampannāṃ lalāṭatilakojjvalām

vicitrapuṣpasaṃkīrṇakeśapāśopaśobhitām//
sarvato'nuguṇākārāṃ kiṃcillajjānatānanām

hemāravindaṃ vilasaddadhānāṃ dakṣiṇe kare //
caṇḍavaccāmaraṃ hastaṃ nyasyāsīnāṃ sukhāsane

evammāntvāṃ ca deveśi dhyātvā niyatamānasaḥ //
snāpayecchaṃkhatoyena praṇavaprokṣaṇakramāt

bhave bhave nātibhava iti pādyamprakalpayet //
vāmāya nama ityuktvā dadyādācamanīyakam

jyeṣṭhāya nama ityuktvā śubhravastramprakalpayet//
śreṣṭhāya nama ityuktvā dadyādyajñopavītakam

rudrāya nama ityuktvā punarācamanīyakam //
kālāya nama ityuktvā gandhandadyātsusaṃskṛtam

kalāvikaraṇāya namo'kṣataṃ ca parikalpayet //
balavikaraṇāya nama iti puṣpāṇi dāpayet

balāya nama ityuktvā dhūpandadyātpra yatnataḥ //
balapramathanāyeti sudīpaṃ caiva dāpayet

brahmabhiśca ṣaḍaṃgaiśca tato mātṛkayā saha //
praṇavena śivenaiva śaktiyuktena ca kramāt

mudrāḥ pradarśayenmahyantubhyañca varavarṇini //
mayi prakalpayetpūrvamupacārāṃstatastvayi

yadā tvayi prakurvīta strīliṃgaṃ yojayettadā //
iyāneva hi bhedo'sti nānyaḥ pārvati kaścana

evandhyānampūjanaṃ ca kṛtvā samyagvidhānataḥ //
mamāvaraṇapūjāṃ ca prārabheta vicakṣaṇaḥ

iti śrīśivamahāpurāṇe ṣaṣṭhyāṃ kailāśasaṃhitāyāṃ śivadhyānapūjanavarṇanaṃ nāma saptamo'dhyāyaḥ