Shiva Purana · Chapter 6.6

//īśvara uvāca //
dakṣiṇe maṃḍalasyātha vaiyāghraṃ carmaśobhanam//
āstīryya śuddhatoyena prokṣayedastramaṃtrataḥ

praṇavaṃ pūrvamuddhṛtya paścādādhāra muddharet //
tatpaścācchaktikamalaṃ caturthyaṃtaṃ namontakam

manumevaṃ samuccārya sthitvā tasminnudaṅmukhaḥ //
prāṇānāyamya vidhivatpra ṇavoccārapūrvakam

agnirityādibhirmaṃtrairbhasma saṃdhārayettataḥ //
śirasi śrīguruṃ natvā maṇḍalaṃ racayetpunaḥ

trikoṇavṛttaṃ bāhye tu caturasrātmakaṃ kramāt //
abhyarcyomiti sādhāraṃ sthāpya śaṃkhaṃ samarcayet

āpūrya śuddhatoyena praṇavena sugaṃdhinā//
abhyarcya gaṃdhapuṣpādyaiḥ praṇavena ca saptadhā

abhimaṃtrya tatastasmindhenumudrāṃ pradarśayeta //
śaṃkhamudrāṃ ca tenaiva prokṣayedastramaṃtrataḥ

ātmānaṃ gaṃdhapuṣpādipūjopakaraṇāni ca //
prāṇāyāmatrayaṃ kṛtvā ṛṣyādikamathācaret

asya śrīsauramaṃtrasya devabhāga ṛṣistataḥ //
chando gāyatramityuktaṃ devassūryo maheśvaraḥ

devatā syātṣaḍaṃgāni hrāmityādīni vinyaset //
tatassaṃprokṣayetpadmamastreṇāgneragocaram

tasminsamarcayedvidvān prabhūtāṃ vimalāmapi //
sārāṃ cātha samārādhya pūrvādiparataḥ kramāt

atha kālāgnirudraṃ ca śaktimādhārasaṃjñitām //
anantaṃ pṛthivīṃ caiva ratnadvīpaṃ tathaiva ca

saṃkalpavṛkṣodyānaṃ ca gṛhaṃ maṇimayaṃ tataḥ//
raktapīṭhaṃ ca saṃpūjya pādeṣu prāgupakramāt

dharmaṃ jñānaṃ ca vairāgyamaiśvaryaṃ ca catuṣṭayam//
adharmādyagnikoṇādikoṇeṣu ca samarcayet

māyādhaśchadanaṃ paścādvidyordhvacchadanaṃ tataḥ //
sattvaṃ rajastamaścaiva samabhyarcya yathākramam

pūrvādidikṣu madhye ca dīptāṃ sūkṣmāṃ jayāmapi //
bhadrāṃ vibhūti vimalāmamoghāṃ vaidyutāmapi

sarvatomukhasaṃjñāṃ ca kandanālaṃ tathaiva ca //
suṣiraṃ ca tatastaṃ tu kaṃṭakāṃstadanaṃtaram

mūlacchadanakiṃjalkaprakāśasakalātmanaḥ //
paṃcagraṃthikarṇikāṃ ca dalāni tadanaṃtaram

keśarānbrahmaviṣṇū ca rudramātmānameva ca //
antarātmānamapi ca jñānātmaparamātmani

sampūjya paścātsaurākhyaṃ yogapīṭhaṃ samarcayet //
pīṭhopari samākalpya mūrttiṃ mūlena mūlavit

niruddhaprāṇa āsīno mūlenaiva svamūlataḥ //
śaktimutthāpya tattejaḥ prabhāvātpiṃgalādhvanā

puṣpāṃjalau nirgamayya maṇḍalasthasya bhāsvataḥ //
sindūrāruṇadehasya vāmārddhadayitasya ca

akṣasrakpāśakhaṭvāṃgakapālāṃkuśapaṃkajam //
śaṃkhaṃ cakraṃ dadhānasya caturvaktrasya locanaiḥ

rājitasya dvādaśabhistasya hṛtpaṃkajodare //
praṇavaṃ pūrvamuddhṛtya hrāṃhrīṃsastadanantaram

prakāśaśaktisahitaṃ mārtaṇḍaṃ ca tataḥ param //
āvāhayāmi nama ityāvāhyā vāhanākhyayā

mudrayā sthāpanādyāśca mudrāssaṃdarśayettataḥ //
vinyasyāṃgāni hrāṃ hrīṃ hrūmaṃtena manunā tataḥ

paṃcopacārānsaṃkalpya mūlenābhyarcayettridhā //
keśareṣu ca padmasya ṣaḍaṃgāni maheśvari

vahnīśarakṣovāyūnāṃ paritaḥ kramataḥ sudhīḥ //
dvitīyāvaraṇe pūjyāścatasro mūrtayaḥ kramāt

pūrvādyuttaraparyaṃtaṃ dalamūleṣu pārvati //
ādityo bhāskaro bhānū raviścetyanupūrvaśaḥ

arko brahmā tathā rudro viṣṇuśceti punaḥ priye //
īśānādiṣu saṃpūjyāstṛtīyāvaraṇe punaḥ

somaṃ kujaṃ budhaṃ jīvaṃ kaviṃ maṃdaṃ tama stamaḥ //
samaṃtato yajedetānpūrvādidalamadhyataḥ

athavā dvādaśādityāndvitīyāvaraṇe yajeta //
tṛtīyāvaraṇe caiva rāśīrdvādaśa pūjayet

saptasāgaragaṃgāśca bahirasya samaṃtataḥ //
ṛṣīndevāṃśca gaṃdharvānpannagānapsarogaṇān

grāmaṇyaśca tathā yakṣānyātudhānāṃstathā hayān //
saptacchandomayāṃścaiva vālakhilyāṃśca pūjayet

evaṃ tryāvaraṇaṃ devaṃ samabhyarcya divākaram //
viracya maṃḍalaṃ paścāccaturasraṃ samāhitaḥ

sthāpya sādhārakaṃ tāmrapātraṃ prasthodavistṛtam //
pūrayitvā jalaiḥ śuddhairvāsitaiḥ kusumādibhiḥ

abhyarcya gaṃdhapuṣpādyairjānubhyāmavanīṃ gataḥ //
arghyapātraṃ samādāya bhūmadhyāntaṃ samuddharet

tato brūyādimaṃ maṃtraṃ sāvitraṃ sarvasiddhidam //
śṛṇu tacca mahādevi bhaktimuktipradaṃ sadā

sindūravarṇāya sumaṇḍalāya namo'stu vajrābharaṇāya tubhyam //
padmābhanetrāya supaṃkajāya brahmendranārāyaṇakāraṇāya

saraktacūrṇaṃ sasuvarṇatoyaṃ srakkuṃkumāḍhyaṃ sakuśaṃ sapuṣpam //
pradattamādāya sahemapātraṃ praśastamarghyaṃ bhagavanprasīda

evamuktvā tato dattvā tadarthaṃ sūryamūrttaye //
namaskuryādimaṃ maṃtraṃ paṭhitvā susamāhitaḥ

namaśśivāya sāmbāya sagaṇāyādihetave //
rudrāya viṣṇave tubhyaṃ brahmaṇe ca trimūrtaye

evamuktvā namaskṛtya svāsane samavasthitaḥ //
ṛṣyādikaṃ punaḥ kṛtvā karaṃ saṃśodhya vāriṇā

punaśca bhasma saṃdhārya pūrvoktenaiva vartmanā //
nyāsajātamprakurvīta śivabhāvavivṛddhdhaye

paṃcopacāraissaṃpūjya śirasā śrīgurumbudhaḥ //
praṇavaṃ śrīcaturthyaṃtaṃ namoṃtaṃ praṇamettataḥ

paṃcātmakaṃ binduyutaṃ paṃcamasvarasaṃyutam //
tadeva bindusahitaṃ paṃcamasvaravarjitam

paṃcamasvarasaṃyuktaṃ maṃtrīśaṃ ca sabindukam //
uddhṛtya bindusahitaṃ saṃvartakamathoddharet

etaireva kramādbījairuddhṛtaiḥ praṇamedbudhaḥ //
bhujayorūruyugme ca guruṃ gaṇapatintathā

durgāṃ ca kṣetrapālaṃ ca baddhāṃjalipuṭaḥ sthitaḥ //
omastrāya phaḍityuktvā karau saṃśodhya ṣaṭ kramāt

apasarppantviti procya praṇavaṃ tadanaṃtaram //
astrāya phaḍiti procya pārṣṇighātatrayeṇa tu

uddhṛtya vighnānbhūyiṣṭhānkara tālatrayeṇa tu //
antarikṣagatā ndṛṣṭvā vilokya divi saṃsthitān

niruddhaprāṇa āsīno haṃsamaṃtramanusmaran //
hṛdisthaṃ jīvacaitanyaṃ brahmanāḍyā samāna yet

dvādaśāṃtassthaviśade sahasrāramahāmbuje //
ciccandramaṇḍalāntasthaṃ cidrūpaṃ parameśvaram

śoṣadāhaplavānkuryādrecakādi krameṇa tu //
saṣoḍaśacatuṣṣaṣṭidvātriṃśadgaṇanāyutaiḥ

vāyvagnisalilādyaistaisstavedādyairanukramāt //
prāṇānāyamya mūlasthāṃ kuṇḍalīṃ brahmaraṃdhragām

ānīya dvādaśāṃtasthasahasrārāmbujodare //
ciccandramaṇḍalodbhūtaparamāmṛtadhārayā

saṃsiktāyāṃ tanau bhūyaśśuddhadehassubhāvanaḥ //
sohamityavatīryātha svātmānaṃ hṛdayāmbuje

ātmanyāveśya cātmānamamṛtaṃ sṛtidhārayā //
prāṇapratiṣṭhāṃ vidhivatkuryādatra samāhitaḥ

ekāgramānaso yogī vimṛśyāttāṃ ca mātṛkām //
puṭitāṃ praṇavenātha nyasedbāhye ca mātṛkām

punaśca saṃyataprāṇaḥ kuryāddṛṣṭyādikaṃ budhaḥ //
śaṃkaraṃ saṃsmaraṃścitte saṃnyasecca vimatsaraḥ

praṇavasya ṛṣirbrahmā devi gāyatramīritam //
chandotra devatāhaṃ vai paramātmā sadāśivaḥ

akāro bījamākhyātamukāraḥ śaktirucyate //
makāraḥ kīlakaṃ proktaṃ mokṣārthe viniyujyate

aṃguṣṭhadvayamārabhya talāṃtaṃ parimārjayet //
omityuktvātha deveśi karanyāsaṃ samārabhet

dakṣahastasthitāṃguṣṭhaṃ samārabhya yathākramam //
vāmahastakaniṣṭhāṃtaṃ vinyasetpūrvavatkramāt

akāramapyukāraṃ ca makāraṃ bindusaṃyutam //
namontaṃ procya sarvatra hṛdayādau nyasedatha

akāraṃ pūrvamuddhṛtya brahmātmānamathācaret //
ṅeṃtaṃ namoṃtaṃ hṛdaye viniyujyāttathā punaḥ

ukāraṃ viṣṇusahitaṃ śirodeśe pravinyaset//
makāraṃ rudrasahitaṃ śikhāyāntu pravinyaset

evamuktvā munirmaṃtrī kavacaṃ netramastake //
vinyaseddevadeveśi sāvadhānena cetasā

aṃgavaktrakalābhedātpaṃca brahmāṇi vinyaset //
śirovadanahṛdaguhyapādeṣvetāni vinyaset

īśānyasya kalāḥ paṃca paṃcasveteṣu ca kramāt //
tataścaturṣu vaktreṣu puruṣasya kalā api

catasraḥ praṇidhātavyāḥ pūrvādikramayogataḥ //
hṛtkaṃṭhāṃseṣu nābhau ca kukṣau pṛṣṭhe ca vakṣasi

aghorasya kalāścāṣṭau pūjanīyā yathākramam //
paścāttrayodaśakalāḥ pāyumeḍhrorujānuṣu

jaṃghāsphikkaṭipārśveṣu vāmadevasya bhāvayet//
sadyasyāpi kalā cāṣṭau netreṣu ca yathākramam

kīrtitāstāḥ kalāścaiva pādayorapi hastayoḥ//
prāṇe śirasi bāhvośca kalpayetkalpavittamaḥ

aṣṭatriṃśatkalānyāsamevaṃ kṛtvā tu sarvaśaḥ //
paścātpraṇavaviddhīmānpraṇavanyāsamācaret//
bāhudvaye kūrparayostathā ca maṇibandhayoḥ//
pārśvatodarajaṃgheṣu pādayoḥ pṛṣṭhatastathā

itthaṃ praṇavavinyāsaṃ kṛtvā nyāsavicakṣaṇaḥ//
haṃsanyāsaṃ prakurvīta paramātmavibodhini

iti śrīśivamahāpurāṇe ṣaṣṭhyāṃ kailāsasaṃhitāyāṃ saṃnyāsapaddhatau nyāsavarṇanaṃ nāma ṣaṣṭho'dhyāyaḥ