Shiva Purana · Chapter 6.2

vyāsa uvāca //
sādhu pṛṣṭamidaṃ viprā bhavadbhirbhāgyavattamaiḥ //
durlabhaṃ hi śivajñānaṃ praṇavārthaprakāśakam

yeṣāṃ prasanno bhagavānsākṣācchūlavarāyudhaḥ //
teṣāmeva śivajñānaṃ praṇavārthaprakāśakama

jāyate na hi sandeho netareṣāmiti śrutiḥ ///
śivabhaktivihīnānāmiti tattvārthaniścayaḥ

dīrghasatreṇa yuṣmābhirbhagavānambikāpatiḥ //
upāsita itīdaṃ me dṛṣṭamadya viniścitam

tasmādvakṣyāmi yuṣmākamitihāsampurātanam //
umāmaheśasamvādarūpamadbhutamāstikāḥ

purākhilajaganmātā satī dākṣāyaṇī tanum //
śivanindāprasaṅgena tyaktvā ca janakādhvare

tataḥ prabhāvātsā devī sutā'bhūddhimavadgireḥ //
śivārthamatapatsā vai nāradasyopadeśataḥ

tasminbhūdharavaryye tu svayaṃvaravidhānataḥ//
deveśe ca kṛtodvāhe pārvatī sukhamāpa sā

tathaikasminmahādevī samaye patinā saha //
sūpaviṣṭā mahāśaile gaurī devamabhāṣata

mahādevyuvāca //
bhagavanparameśāna pañcakṛtyavidhāyaka //
sarvajña bhaktisulabha paramāmṛtavigraha

dākṣāyaṇīntanuṃ tyaktvā tava nindāprasaṃgataḥ //
āsamadya maheśāna putrī himavato gireḥ///
kṛpayā parameśāna maṃtradīkṣāvidhānataḥ //
māṃ viśuddhātmatattvasthāṃ kuru nityaṃ maheśvara

iti samprārthito devyā devaḥ śītāṃśu bhūṣaṇaḥ //
pratyuvāca tato devīṃ prahṛṣṭenāntarātmanā

mahādeva uvāca //
dhanyā tvaṃ devadevaśi yadi jātedṛśī matiḥ //
kailāsa śikharaṃ gatvā kariṣye tvāṃ ca tādṛśīm

tato himavato gatvā kailāsambhūdhareśvaram//
jagau dīkṣāvidhānena praṇavādīnmanūn kramāt

uktvā maṃtrāṃśca tāndevīṃ kṛtvā śuddhātmani sthitām //
sārddhaṃ devyā mahādevo devodyānaṃ gato'bhavat

tataḥ sumālinīmukhyairdaivyāḥ priyasakhījanaiḥ//
samāhṛtaiḥ praphullaistaiḥ puṣpaiḥ kalpatarūdbhavaiḥ

alaṃkṛtya mahādevīṃ svāṃkamāropya śaṃkaraḥ//
prahṛṣṭavadanastasthau vilokya ca tadānanam

tataḥ priyakathā jātāḥ pārvatīparameśayoḥ //
hitāya sarvalokānāṃ sākṣācchrutyarthaṃ sammitā

tadā sarvajaganmātā bharturaṃkaṃ samāśritā //
vilokya vadanaṃ bharturidamāhaḥ tapodhanāḥ

// śrīdevyuvāca //
upadiṣṭāstvayā deva maṃtrāssapraṇavā matāḥ //
tatrādau śrotumicchāmi praṇavārthaṃ viniścitam

kathampraṇava utpannaḥ kathaṃ praṇava ucyate //
mātrāḥ kati samākhyātāḥ kathaṃ vedādirucyate

devatāḥ kati ca proktāḥ kathaṃ vedādibhāvanā//
kriyāḥ katividhāḥ proktā vyāpyavyāpakatā katham

brahmāṇi paṃca maṃtre'sminkathaṃ tiṣṭhaṃtyanukramāt//
kalāḥ kati samākhyātāḥ prapaṃcātmakatā katham /

vācyavācakasambandhasthānāni ca kathaṃ śiva //
ko'trādhikārī vijñeyo viṣayaḥ ka udāhṛtaḥ

sambandhaḥ kotra vijñeyaḥ kiṃprayojanamucyate //
upāsakastu kiṃrūpaḥ kiṃ vā sthānamupāsanam

upāsyaṃ vastu kiṃrūpaṃ kiṃ vā phalamupāsituḥ //
anuṣṭhāna vidhiḥ kovā pūjāsthānaṃ ca kiṃ prabho

pūjāyāṃ maṇḍalaṃ kiṃ vā kiṃ vā ṛṣyādikaṃ hara //
nyāsajātavidhiḥ ko vā ko vā pūjāvidhikramaḥ

etatsarvaṃ maheśāna samācakṣva viśeṣataḥ //
śrotumicchāmi tattvena yadyasti mayi te kṛpā

iti devyā samāpṛṣṭo bhagavānindubhūṣaṇaḥ //
sampraśasya maheśānīṃ vaktuṃ samupacakrame

iti śrīśivamahāpurāṇe ṣaṣṭhyāṃ kailāsa saṃhitāyāṃ devīdevasaṃvāde devīkṛtapraśnavarṇanaṃ nāma dvitīyo'dhyāyaḥ