Shiva Purana · Chapter 6.18

// śaunaka uvāca //
śrutvā vedāntasāraṃ tadrahasyamparamādbhutam //
kimpṛṣṭavānvāmadevo maheśvarasutaṃ tadā

dhanyo yogī vāmadevaḥ śivajñānaratassadā //
yatssambandhātkathotpannā divyā paramapāvanī

iti śrutvā munīnāntadvacanampremagarbhitam //
sūtaḥ prāha prasannastāñchivāsaktamanā budhaḥ

sūta uvāca //
dhanyā yūyaṃ mahādevabhaktā lokopakārakāḥ //
śṛṇudhvammunayassarve saṃvādaṃ ca tayoḥ punaḥ

śrutvā maheśatanayavacanaṃ dvaitanāśakam //
advaitajñānajanakaṃ santuṣṭo'bhūnmahānmuniḥ

natvā stutvā ca vividhaṃ kārtikeyaṃ śivātmajam //
punaḥ papraccha tattvaṃ hi vinayena mahāmuniḥ

vāmadeva uvāca //
bhagavansarvatattvajña ṣaṇmukhāmṛtavāridhe //
gurutvaṃ kathameteṣāṃ yatīnāmbhāvitātmanām

jīvānāṃ bhogamokṣādisiddhissidhyati yadvaśāt //
pāramparyyaṃ vinā naiṣā mupadeśādhikāritā

evaṃ ca kṣaurakarmāṃgaṃ snānañca kathamīdṛśam //
iti vijñāpaya svāminsaṃśayaṃ chettumarhasi

iti śrutvā kārtikeyo vāmadevavacaḥ smaran//
śivaṃ śivāṃ ca manasā vyācaṣṭumupacakrame

//
śrīsubrahmaṇya uvāca /
yogapaṭṭampravakṣyāmi gurutvaṃ yena jāyate //
tava snehādvāmadeva mahadgopyaṃ vimuktidam

vaiśākhe śrāvaṇemāsi tathāśvayuji kārtike //
mārgaśīrṣe ca māghe vā śuklapakṣe śubhe dine

paṃcamyāṃ paurṇamāsyāṃ vā kṛtaprābhātikakriyaḥ //
labdhānujñastu guruṇā snātvā niyatamānasaḥ

/
paryyaṃkaśaucaṃ kṛtvā tadvāsasāṃgaṃ pramṛjya ca //
dviguṇaṃ doramābadhya vāsasī paridhāya ca

kṣālitāṃghrirdvirācamya bhasma sadyādima ntrataḥ //
dhārayeddhi samādāya samuddhūlanamārgataḥ

gṛhītahasto guruṇā sānukūlena vai mune //
sacchiṣyaḥ sāñjalissvābhyāṃ hastābhyāmprāṅmukho yathā

tathopaveṣṭitastiṣṭhenmaṃḍape samalaṃkṛte//
gurvāsanavare śuddhe cailājinakuśottare

atha deśika ādāya śaṃkhaṃ sādhāramastrataḥ //
viśodhya tasya purataḥ sthāpayetsānukūlataḥ

sādhāraṃ śaṅkhamapi ca sampūjya kusumādibhiḥ//
niḥkṣipeda stravarmabhyāṃ śodhitaṃ tatra sajjalam

āpūrya pūrvavatpūjya ṣaḍaṃgoktakrameṇa ca //
praṇavena punastadvai saptadhaivābhimantrayet

abhyarcya gandhapuṣpādyairdhūpadīpau pradarśya ca//
saṃrakṣāstreṇa taṃ śaṃkhaṃ varmaṇāthāvaguṇṭhayet

dhenuśaṃkhākhyamudre ca darśayedatha deśikaḥ//
punassvapurataśśaṃkhaṃ dakṣiṇe deśa uttame

pūjyārghyoktavidhānena sundarammaṇḍalaṃ śubham //
kuryyātsampūjayettañca sugandhakusumā dibhiḥ

sādhāraṃ śodhitaṃ śuddhaṃ ghaṭantantupariṣkṛtam //
dhūpitaṃ sthāpitaṃ śuddhavāsitodaprapūritam

pañcatvakpañcapatraiśca mṛttikābhiśca pañcabhiḥ//
militaṃ ca sugandhena lepayettammunīśvara

vastrāmradaladūrvāgranārikelasumaistataḥ//
taṃ ghaṭaṃ vastubhiścānyaissaṃkuryātsamalaṃkṛtam

vinyasetpañcaratnāni ghaṭe tatra munīśvara //
hiraṇyañcāpi teṣāṃ vābhāve bhaktyā pravinyaset / २७/
nīlākhyaratnaṃ ca tathā ratne māṇikyahemanī //
pravālagomedake ca pañcaratnamidaṃ smṛtam

nṛmlaskamiti samprocya glūmityante 'tha deśikaḥ //
samyagvidhānataḥ prītyā sānukūlaḥ samarcayet

ādhāraśaktimārabhya yajanoktavidhānataḥ //
pañcāvaraṇamārgeṇa devamāvāhya pūjayet

nivedya pāyasānnañca tāṃbūlādi yathā purā //
nāmāṣṭakārcanāntaṃ ca kṛtvā tamabhimantrayet

praṇavāṣṭottaraśataṃ brahmabhiḥ pañcabhiḥ kramāt //
sadyādīśāntamapyastraṃ rakṣitaṃ varmaṇā punaḥ

avaguṃṭhya pradarśyātha dhūpadīpau ca bhaktitaḥ //
dhenuyonyākhyamudre ca samyaktatra pradarśayet

tataśca deśikastasya darbhairācchādya mastake //
maṇḍalastheśadigbhāge caturasraṃ prakalpayet

taduparyyāsanaṃ ramyaṃ kalpayitvā vidhānataḥ //
tatra saṃsthāpayecchiṣyaṃ śiśuṃ sānukūlataḥ

tataḥ kumbhaṃ samutthāya svastivācanapūrvakam //
abhiṣiṃcedguruḥ śiṣyaṃ prādakṣiṇyena mastake

praṇavaṃ pūrvamuccāryya saptadhā brahmabhi stataḥ //
pañcabhiścābhiṣekānte śaṃkhodenābhiveṣṭayet

cārudīpaṃ pradarśyātha vāsasā parimṛjya ca //
nūtanaṃ dorakaupīnaṃ vāsasī paridhāpayet

kṣālitāṃghrirdvirācamya dhṛtabhasmaguruśśiśum //
hastābhyāmavalaṃbyātha hastau maṃḍapamadhyataḥ

tadaṃgeṣu samālipya tadbhasma vidhinā guruḥ //
āsane saṃpraveśyātha kalpite sthāpayetsukham

pūrvābhimukhamātmīyatattvajñānābhilāṣiṇam//
svasanastho gururbrūyādamalātmā bhaveti tam

guruśca paripūrṇo'smi śiva ityacalasthitiḥ//
samādhimācaretsamyaṅmuhūrttaṃ gūḍhamānasaḥ

paścādunmīlya nayane sānukūlena cetasā //
sāṃjaliṃ saṃsthitaṃ śuddhaṃ paśyecchiṣyamanākulaḥ

svahastambhasitāliptaṃ vinyasya śiśumastake //
dakṣaśrutāvupadiśeddhaṃsassohamiti sphuṭam

tatrādyāhaṃpadasyārthaḥ śaktayātmā sa śivassvayam //
sa evāhaṃ śivosmīti svātmānaṃ saṃvibhāvaya

ya ityaṇorarthatattvamupadiśya tato vadet//
avāṃtarāṇāṃ vākyānāmarthatātparyamādarāt

vākyāni vacmi te brahmansāvadhānamatiśśṛṇu //
tāni dhāraya citte hi sa brūyāditi saṃsphuṭam

iti śrīśivamahāpurāṇe ṣaṣṭhyāṃ kailāsasaṃhitāyāṃ saṃnyāsapaddhatau śiṣyakaraṇavidhirnāmāṣṭādaśo'dhyāyaḥ