Shiva Purana · Chapter 6.14

vāmadeva uvāca //
bhagavanṣaṇmukhāśeṣa vijñānāmṛtavāridhe //
viśvāmareśvarasuta praṇatārttiprabhañjana

ṣaḍvidhārtthaparijñānamiṣṭadaṃ kimudāhṛtam //
ke tatra ṣaḍvidhā arthāḥ parijñānañca kiṃ prabho

pratipādyaśca kastasya parijñāne ca kiṃ phalam //
etatsarvaṃ samācakṣva yadyatpṛṣṭaṃ mayā guha

etamartthamavijñāya paśuśāstravimohitaḥ//
adyāpyahammahāsena bhrāntaśca śivamāyayā

ahaṃ śivapadadvaṃdvajñānāmṛtarasāyanam//
pīttvā vigatasammoho bhaviṣyāmi yathā tathā

kṛpāmṛtārdrayā dṛṣṭyā vilokya suciraṃ mayi //
karttavyo'nugrahaḥ śrīmatpādābjaśaraṇāgate

iti śrutvā munīndroktaṃ jñānaśaktidharo vibhuḥ //
prāhānyadarśanamahāsaṃtrāsajanakaṃ vacaḥ

subrahmaṇya uvāca //
śrūyatāmmuniśārdūla tvayā yatpṛṣṭamādarāt//
samaṣṭivyaṣṭibhāvena parijñānammaheśituḥ

praṇavārtthaparijñānarūpaṃ tadvistarādaham //
vadāmi ṣaḍvidhārthaikya parijñānena suvrata

prathamo maṃtrarūpaḥ syāddvitīyo maṃtrabhāvitaḥ //
devatārtthastṛtīyo'rthaḥ prapañcārthastataḥ param

caturthaḥ pañcamārthassyādgururūpapradarśakaḥ/
ṣaṣṭhaśśiṣyātmarūpo'rthaḥ ṣaḍvidhārthāḥ prakīrttitāḥ

tatra mantrasvarūpante vadāmi munisattama//
yena vijñātamātreṇa mahājñānī bhavennaraḥ

ādyassvaraḥ paṃcamaśca pañcamāntastataḥ paraḥ //
bindunādau ca pañcārṇāḥ proktā vedairna cānyathā

etatsamaṣṭirūpo hi vedādissamudāhṛtaḥ //
nādassarvvasamaṣṭiḥ syādbiṃdvāḍhyaṃ yaccatuṣṭayam

vyaṣṭirūpeṇa saṃsiddhaṃ praṇave śivavācake //
yaṃtrarūpaṃ śṛṇu prājña śivaliṃgaṃ tadeva hi

sarvvādhastāllikhetpīṭhaṃ tadūrdhvamprathamaṃ svaram //
uvarṇaṃ ca tadūrddhvaṃ sthampavargāntaṃ tadūrdhvagam

tanmastakasthaṃ biṃduṃ ca tadūrddhvaṃ nādamālikhet //
yaṃtre saṃpūrṇatāṃ yāti sarvakāmaḥ prasidhyati

etaṃ yaṃtraṃ samālikhya praṇave nava veṣṭayet //
tadutthenaiva nādena vidyannādāvasānakam

devatārtthampravakṣyāmi gūḍhaṃ sarvvatra yanmune //
tava snehādvāmadeva yathā śaṃkarabhāṣitam

sadyojātamprapadyāmītyupakramya sadāśivom //
iti prāha śrutistāraṃ brahmapaṃcakavācakam

vijñeyā brahmarūpiṇyassūkṣmāḥ paṃcaiva devatāḥ //
etā eva śivasyāpi mūrtitve nopabṛṃhitāḥ

śivasya vācako mantraśśivamūrtteśca vācakaḥ //
mūrttimūrtimatorbhedo nātyantaṃ vidyate yataḥ

īśānamukuṭopeta ityārabhya puroditaḥ //
śivasya vigrahaḥ pañcavaktrāṇi śṛṇu sāṃpratam

paṃcamādi samārabhya sadyojātādyanukramāt //
urddhvāṃtamīśānāṃtaṃ ca mukhapaṃcakamīritam

īśānasyaiva devasya caturvyūhapade sthitam //
puruṣādyaṃ ca sadyāṃtaṃ brahmarūpaṃ catuṣṭayam

paṃca brahmasamaṣṭissyādīśānaṃ brahma viśrutam //
puruṣādyaṃ tu tadvyaṣṭissadyojātāntikaṃ mune

anugrahamayaṃ cakramidaṃ paṃcārtthakāraṇam //
parabrahmātmakaṃ sūkṣmaṃ nirvikāramanāmayam

anugraho'pi dvividhastirobhāvādigocaraḥ //
prabhuścānyastu jīvānāṃ parāvaravimuktidaḥ

etatsadāśivasyaiva kṛtyadvayamudāhṛtam //
anugrahe'pi sṛṣṭyādikṛtyānāṃ paṃcakaṃ vibhoḥ

mune tatrāpi sadyādyā devatāḥ parikīrttitāḥ //
parabrahmasvarūpāstāḥ paṃca kalyāṇadāssadā

anugrahamayaṃ cakraṃ śāṃtyatītakalāmayam //
sadāśivādhiṣṭhitaṃ ca paramaṃ padamucyate

etadeva padaṃ prāpyaṃ yatīnāṃ bhavitātmanām //
sadāśivopāsakānāṃ praṇavāsaktacetasām

etadeva padaṃ prāpya tena sākaṃ munīśvarāḥ //
bhuktvā suvipulānbhogāndevena brahmarūpiṇā

mahāpralayasaṃbhūtau śivasāmyaṃ bhajaṃti hi //
na pataṃti punaḥ kvāpi saṃsārābdhau janāśca te

te brahmaloka iti ca śrutirāha sanātanī //
aiśvaryyaṃ tu śivasyāpi samaṣṭiridameva hi

sarvaiśvaryeṇa sampanna ityāhātharvvaṇī śikhā //
sarvaiśvaryyapradātṛtvamasyaiva pravadanti hi

camakasya padānnānya dadhikaṃ vidyate padam //
brahmapaṃcakavistāraprapaṃcaḥ khalu dṛśyate

brahmabhya evaṃ saṃjātā nivṛttyādyāḥ kalā matāḥ //
sūkṣmabhūtasvarūpiṇyaḥ kāraṇatvena viśrutāḥ

sthūlarūpasvarūpasya prapaṃcasyāsya suvrata //
paṃcadhāvasthitaṃ yattadbrahmapaṃcakamiṣyate

puruṣaḥ śrotravāṇyau ca śabdakāśau ca paṃcakam //
vyāptamīśānarūpeṇa brahmaṇā munisattama

prakṛtistvakca pāṇiśca sparśo vāyuśca paṃcakam //
vyāptaṃ puruṣarūpeṇa brahmaṇaiva munīśvara

ahaṃkārastathā cakṣuḥ pādo rūpaṃ ca pāvakaḥ //
aghorabrahmaṇā vyāptametatpaṃcakamaṃcitam

buddhiśca rasanā pāyū rasa āpaśca paṃcakam //
brahmaṇā vāmadevena vyāptaṃ bhavati nityaśaḥ

mano nāsā tathopastho gandho bhūmiśca paṃcakam//
sadyena brahmaṇā vyāptaṃ paṃcabrahmamayaṃ jagat

yaṃtrarūpeṇopadiṣṭaḥ praṇavaśśivavācakaḥ//
samaṣṭiḥ paṃcavarṇānāṃ biṃdvādyaṃ yaccatuṣṭayam

śivopadiṣṭamārgeṇa yaṃtrarūpaṃ vibhāvayet//
praṇavamparamaṃ mantrādhirājaṃ śivarūpiṇam

iti śrīśivamahāpurāṇe ṣaṣṭhyāṃ kailāsasaṃhitāyāṃ śivarūpapraṇavavarṇanaṃ nāma caturddaśodhyāyaḥ