Shiva Purana · Chapter 6.13

// subrahmaṇya uvāca //
atha madhyāhnasamaye snātvā niyatamānasaḥ //
gandhapuṣpākṣatādīni pūjādravyāṇyupāhareta////
nairṛtye pūjayeddevaṃ vighreśaṃ devapūjitam//
gaṇānāṃ tveti mantreṇāvāhayetsuvidhānataḥ

raktavarṇaṃ mahākāyaṃ sarvvābharaṇabhūṣitam//
pāśāṃkuśākṣābhīṣṭañca dadhānaṃ karapaṃkajaiḥ

evamāvāhya sandhyāya śaṃbhuputraṃ gajānanam//
abhyarcya pāyasāpūpanālikeraguḍādibhiḥ

naivedyamuttamaṃ dadyāttāmbūlādimathāparam//
paritoṣya namaskṛtya nirvighnamprārthayettataḥ

aupāsanāgnau karttavyaṃ svagṛhyoktavidhānataḥ //
ājyabhāgāntamāgneyaṃ makhatantramataḥ param

bhūḥ svāheti tryṛcā pūrṇāhutiṃ hutvā samāpya ca//
gāyatrīṃ prajapedyāvadaparāhṇamataṃdritaḥ

atha sāyantanīṃ sandhyāmupāsya snānapūrvakam // /
sāyamaupāsanaṃ hutvā maunī vijñāpayedgurum

śrapayitvā caruntasminsamidannājyabhedataḥ //
juhuyādraudrasūktena sadyojātādi pañcabhiḥ

brahmabhiśca mahādevaṃ sāṃbaṃ vahnau vibhāvayet //
gaurīrmimāya mantreṇa hutvā gaurīmanusmaran

tato'gnaye sviṣṭakṛte svāheti juhuyātsakṛt//
hutvopariṣṭāttantrantu tato'gneruttare budhaḥ

sthitvāsane japenmaunī cailājinakuśottare //
ābrāhmaṃ ca muhūrte tu gāyatrī dṛḍhamānasaḥ

tataḥ snātvā tvaśaktaścedbhasmanā vā vidhānataḥ //
śrapayitvā caruṃ tasminnagnāve vābhidhāritam

udagudvāsya barhiṣyāsādyājyena caruṃ tataḥ //
abhighāryya vyāhṛtīśca raudrasūktañca pañca ca

japedbrahmāṇi sandhāryya cittaṃ śivapadāṃbuje //
prajāpatimathendrañca viśvedevāstataḥ param //१५/
brahmāṇaṃ sacaturthyantaṃ svāhāṃtānpraṇavā dikān //
saṃjapya vācayitvā'tha puṇyāhaṃ ca tataḥ param

parastāttaṃtramagnaye svāhetyagnimukhāvadhi //
nirvartya paścātprāṇāya svāhetyārabhya pañcabhiḥ

sājyena caruṇā paścādagniṃ sviṣṭakṛtaṃ hunet //
punaśca prajapetsūktaṃ raudraṃ brahmāṇi pañca ca

maheśādicaturvyūhamantrāṃśca prajapetpunaḥ //
hutvopariṣṭāttantrantu svaśākhoktena vartmanā

tattaddevānsamuddiśya sāṃgaṃ kuryyādvicakṣaṇaḥ//
evamagnimukhādyaṃ yatkarmatantrampravarttitam

ataḥ paraṃ prajuhuyādvirajāhomamātmanaḥ //
ṣaḍviṃśatattvarūpesmindehe līnasya śuddhaye

tattvānyetāni maddehe śudhyantāmityanusmaran //
tatrātmatattvaśuddhyarthaṃ mantrairāruṇaketukaiḥ

paṭhyamānaiḥ pṛthivyādipuruṣāṃtaṃ kramānmune //
sājyena caruṇā maunī śivapādāmbujaṃ smaran

pṛthivyādi ca śabdādi vāgādyaṃ pañcakaṃ punaḥ //
śrotrādyañca śiraḥ pārśvapṛṣṭhodaracatuṣṭayam

jaṃghāṃ ca yojayetpaścāttvagādyaṃ dhātusaptakam //
prāṇādyaṃ pañcakaṃ paścādannādyaṃ kośapañcakam

/
manāścittaṃ ca buddhiścāhaṃkṛtiḥ khyātireva ca //
saṃkalpantu guṇāḥ paścātprakṛtiḥ puruṣastataḥ

puruṣasya tu bhoktṛtvaṃ pratipannasya bhojane //
antaraṃgatayā tattvapaṃcakaṃ parikīrtitam

niyatiḥ kālarāgaśca vidyā ca tadanantaram //
kalā ca paṃcakamidaṃ mayotpannammunīśvara

māyāntu prakṛtiṃ vidyāditi māyā śrutīritā //
tajjānyetāni tattvāni śrutyuktāni na saṃśayaḥ

/
kālasvabhāvo niyatiriti ca śrutitabravīt //
etatpañcakamevāsya pañcakañcakramucyate

ajānanpañcatattvāni vidvānapi ca/ mūḍhadhīḥ //
nipatyādhastātprakṛterupariṣṭātpumānayam

kākākṣinyāyamāśritya varttate pārśvatonvaham //
vidyātattvamidaṃ proktaṃ śuddhavidyāmaheśvarau

sadāśivaśca śaktiśca śivaścedaṃ tu pañcakam //
śiva tattvamidambrahmanprajñānabrahmavāgyataḥ

/
pṛthivyādiśivāṃtaṃ yattattvajātaṃ munīśvara //
svakāraṇalayadvārā śuddhirasya vidhīyatām

ekādaśānāṃ mantrāṇāmparasmaipada pūrvakam //
śivajyotiścaturthyantamidampadamathoccaret

na mameti vadetpaścāduddeśatyāga īritaḥ //
ataḥ paraṃ vividyaiti kapotakāyeti mantrayoḥ

vyāpakāya padasyānte paramātmana ityapi //
śivajyotiścaturthyantaṃ viśvabhūtapadampunaḥ

ghasanotsukaśabdañca caturthyaṃtamatho vadet //
parasmaipadamuccāryya devāya padamuccaret

uttiṣṭhasveti mantrasya viśvarūpāya śabdataḥ //
puruṣāya padambrūyādosvāhetyasya saṃvadet

lokatrayapadasyānte vyāpine paramātmane//
śivāyedaṃ na mama ca padambrūyādataḥ param

/
sva śākhoktaprakāreṇa purastāttantrakarmma ca //
nirvartya sarpiṣā miśraṃ carumprāśya purodhase

pradadyāddakṣiṇāntasmai hemādiparibṛṃhitām //
brahmāṇamudvāsya tataḥ prātaraupāsanaṃ hunet

saṃ māṃ siñcantu maruta iti mantrañjapennaraḥ //
yāte agna ityanena mantreṇāgnau pratāpya ca

hastamagnau samāropya svātmanyadvaitadhāmani //
prābhātikīṃ tataḥ sandhyāmupāsyādityamapyatha

upasthāya praviśyāpsu nābhidaghnaṃ praveśayan //
tanmantrānprajapetprītyā niścalātmā samutsukaḥ

āhitāgnistu yaḥ kuryyātprājāpatyeṣṭimāhite //
śraute vaiśvānare samyaksarvavedasadakṣiṇām

athāgnimātmanyāropya brāhmaṇaḥ pravrajedgṛhāt//
sāvitrīprathamaṃ pādaṃ sāvitrīmityudīrya ca

praveśayāmi śabdānte bhūromiti ca saṃvadet //
dvitīyampādamuccāryya sāvitrīmiti pūrvvavat

praveśayāmi śabdānte bhuvaromiti saṃvadet//
tṛtīyampādamuccāryya sāvitrīmityataḥ param

praveśayāmi śabdānte suvaromityudīrayet//
tripādamuccaretpūrvaṃ sāvitrīmityataḥ param

praveśayāmi śabdānte bhūrbhuvassuvaromiti //
udīrayetparamprītyā niścalātmā munīśvara

iyambhagavatī sākṣācchaṃkarārddhaśarīriṇī //
paṃcavaktrā daśabhujā vipañcanayanojjvalā

navaratnakirīṭodyaccandra lekhāvataṃsinī //
śuddhasphaṭikasaṃkāśā dayāyudhadharā śubhā

hārakeyūrakaṭakakiṃkiṇīnūpurādibhiḥ //
bhūṣitāvayavā divyavasanā ratnabhūṣaṇā

viṣṇunā vidhinā devaṛṣigaṃdharvvanāyakaiḥ //
mānavaiśca sadā sevyā sarvvātmavyāpinī śivā

sadāśivasya devasya dharmapatnī manoharā //
jagadambā trijananī triguṇā nirguṇāpyajā

ityevaṃ saṃvicāryyātha gāyatrīṃ prajapetsudhīḥ //
ādidevīṃ ca tripadāṃ brāhmaṇatvādidāmajām

yo hyanyathā japetpāpo gāyatrī śivarūpiṇīm//
sa pacyate mahāghore narake kalpasaṃkhyayā

sā vyāhṛtibhyaḥ saṃjātā tāsveva vilayaṃ gatā//
tāśca praṇavasambhūtāḥ praṇave vilayaṃ gatā

praṇavassarvavedādiḥ praṇavaḥ śivavācakaḥ //
mantrādhirājarājaśca mahābījaṃ manuḥ paraḥ

śivo vā praṇavo hyeṣa praṇavo vā śivaḥ smṛtaḥ //
vācyavācakayorbhedo nātyantaṃ vidyate yataḥ

enameva mahāmantrañjīvānāñca tanutyajām //
kāśyāṃ saṃśrāvya maraṇe datte muktiṃ parāṃ śivaḥ

tasmādekākṣarandevaṃ śivaṃ paramakāraṇam //
upāsate yatiśreṣṭhā hṛdayāmbhojamadhyagam

mumukṣavo'pare dhīrā viraktā laukikā narāḥ//
viṣayānmanasā jñātvopāsate paramaṃ śivam

evaṃ vilāpya gāyatrīṃ praṇave śivavācake //
ahaṃ vṛkṣasya rerivetyanuvākaṃ japetpunaḥ

yaśchandasāmṛṣabha ityanuvākamupakramāt //
gopāyāṃtaṃ japanpaścādutthitohamitīrayet

vadejjayettridhā mandamadhyocchrāyakramānmune//
praṇavampūrvvamuddhatya sṛṣṭisthitilayakramāt

teṣāmatha kramādbhūyādbhūssaṃnyastambhuvastathā //
saṃnyastaṃ suvarityuktvā saṃnyastaṃ padamuccaram

sarvamaṃtrādyaḥ pradeśe mayeti ca padaṃ vadet //
praṇavaṃ pūrvamuddhṛtya samaṣṭiṃ vyāhṛtīrvadet

samastamityato brūyānmayeti ca samabravīt //
sadāśivaṃ hṛdi dhyātvā maṃdādīti tato mune

praiṣamaṃtrāṃstu japtvaivaṃ sāvadhānena cetasā //
abhayaṃ sarvabhūtebhyo mattaḥ svāheti saṃjapan

prācyāṃ diśyapa uddhṛtya prakṣipedajaliṃ tataḥ //
śikhāṃ yajñopavītaṃ ca yatrotpāṭya ca pāṇinā

gṛhītvā praṇavaṃ bhūśca samudraṃ gaccha samvadet //
vahnijāyāṃ samuccāryya sodakāñjalinā tataḥ

apsu hūyādatha preṣairabhimaṃtrya tridhā tvapaḥ /
prāśya tīre samāgatya bhūmau vastrādikaṃ tyajet

udaṅmukhaḥ prāṅmukho vā gacchessaptapadādhikam //
kiñciddūramathācāryastiṣṭha tiṣṭheti saṃvadet

lokasya vyavahārārthaṃ kaupīnaṃ daṇḍameva ca //
bhagavansvīkuruṣveti dadyātsvenaiva pāṇinā

dattvā sudoraṃ kaupīnaṃ kāṣāyavasanaṃ tataḥ //
ācchādyācamya ca dvedhā ta śiṣyamiti saṃvadet

indrasya vajro'si tata iti mantramudāharet //
samprārthya daṇḍaṃ gṛhṇīyātsakhāya iti saṃjapan

atha gatvā guroḥ pārśvaṃ śivapādāṃbujaṃ smaran //
praṇameddaṇḍavadbhūmau trivāraṃ saṃyatātmavān

punarutthāya ca śanaiḥ premṇā paśyanguruṃ nijam //
kṛtāñjalipuṭastiṣṭhedgurupāda samīpataḥ

karmmārambhātpūrvameva gṛhītvā gomayaṃ śubham //
sthūlāmalakamātreṇa kṛtvā piṇḍānviśoṣayeta

sauraistu kiraṇaireva homārambhāgnimadhyagān//
nikṣipya homasampūrttau bhasma saṃgṛhya gopayet

tato gurussamādāya virajānalajaṃ sitam //
bhasma tenaiva taṃ śiṣyamagnirityādibhiḥ kramāt

maṃtrairaṃgāni saṃspṛśya mūrddhādicaraṇāntataḥ //
īśānādyaiḥ pañcamaṃtrai śira ārabhya sarvataḥ

samuddhṛtya vidhānena tripuṇḍraṃ dhārayettataḥ//
triyāyuṣaistryambakaiśca mūrdhna ārabhya ca kramāt

tatassadbhaktiyuktena cetasā śiṣyasattamaḥ//
hṛtpaṃkaje samāsīnaṃ dhyāyecchivamumāsakham

hastaṃ nidhāya śirasi śiṣyasya sa gururvadet //
trivāraṃ praṇavaṃ dakṣakarṇe ṛṣyādisaṃyutam

tataḥ kṛtvā ca karuṇāṃ praṇavasyārtha mādiśet //
ṣaḍvidhārtthapari jñānasahitaṃ gurusattamaḥ

dviṣaṭprakāraṃ sa guruṃ praṇamedbhuvi daṇḍavat//
tadadhīno bhavennityaṃ nānyatkarmma samācaret

tadājñayā tataḥ śiṣyo vedāntārthānusārataḥ //
śivajñānaparo bhūyātsaguṇāguṇabhedataḥ

tatastenaiva śiṣyeṇa śravaṇādyaṃgapūrvvakam //
prabhātikādyanuṣṭhānaṃ japānte kārayedguruḥ

pūjāṃ ca maṇḍale tasminkailāsaprastarāhvaye //
śivoditena mārgeṇa śiṣyastatraiva pūjayet

devannityamaśaktaścetpūjituṃ guruṇā śubham //
sphāṭikaṃ pīṭhikopetaṃ gṛhṇīyālliṃgamaiśvaram

varaṃ prāṇaparityāgaśchedanaṃ śiraso'pi me //
na tvanabhyarcya bhuñjīyāṃ bhagavantaṃ trilocanam

evantrivāramuccāryya śapathaṃ gurusannidhau /
kuryyāddṛḍhamanāśśiṣyaḥ śivabhaktisamudvahan

tata eva mahādevaṃ nityamudyuktamānasaḥ//
pūjayetparayā bhaktyā pañcāvaraṇamārgataḥ

iti śrīśivamahāpurāṇe ṣaṣṭhyāṃ kailāsasaṃhitāyāṃ trayodaśo'dhyāyaḥ