Shiva Purana · Chapter 6.11

ṛṣaya ūcuḥ //
sūta sūta mahābhāgastvamasmadgururuttamaḥ //
atastvāṃ paripṛcchāmo bhavato'nugraho yadi

śraddhāluṣu ca śiṣyeṣu tvādṛśā guravassadā //
snigdhabhāvā itīdaṃ no darśitambhavatādhunā

virajāhomasamaye vāmadevamatampurā //
sūcitambhavatāsmābhirna śrutaṃ vistarānmune

tadidānīṃ śrotukāmāḥ śraddhayā paramādarāt //
vayaṃ sarvve kṛpāsiṃdho prītyā tadvaktumarhasi

iti teṣāṃ vacaḥ śrutvā sūto hṛṣṭatanūruhaḥ //
namaskṛtya mahādevaṃ guroḥ parataraṃ gurum

mahādevīṃ trijananīṃ guruṃ vyāsaśca bhaktitaḥ //
prāha gambhīrayā vācā munīnāhlādayannidam

sūta uvāca //
svastyastu munayassarve sukhina ssantu sarvvadā //
śivabhaktā sthirātmānaśśive bhaktipravartakāḥ

tadatīva vicitraṃ hi śrutaṃ gurumukhāmbujāt //
itaḥ pūrvammayā noktaṃ guhyaprākaṭyaśaṃkayā

yūyaṃ khalu mahābhāgāśśivabhaktā dṛḍhavratāḥ //
iti niścitya yuṣmākaṃ vakṣyāmi śrūyatāmmudā

purā rathantare kalpe vāmadevo mahāmuniḥ //
garbhamuktaśśivajñānavidāṃ gurutamassvayam

vedāgamapurāṇādisarvvaśāstrārthavattvavit//
devāsuramanuṣyādijīvānāṃ janmakarmmavit

bhasmāvadātasarvvāṃgo jaṭāmaṇḍalalamaṃḍitaḥ //
nirāśrayo niḥspṛhaśca nirdvandvo nirahaṃkṛtiḥ

digaṃbaro mahājñānī maheśvara ivāparaḥ //
śiṣyabhūtairmunīndraiśca tādṛśaiḥ parivāritaḥ

paryyaṭanpṛthivīmetāṃ svapāda sparśapuṇyataḥ //
pavitrayanpare dhāmni nimagnahṛdayonvaham

kumāraśikharammerorddakṣiṇaṃ prāviśanmudā//
yatrāste bhagavānīśatanayaśśikhivāhanaḥ

jñānaśaktidharo vīrassarvāsuravimardanaḥ //
gajāvallīsamāyuktassarvvairdevairnamaskṛtaḥ

tatra skandasaro nāma sarassāgarasannibham //
śiśirasvādupānīyaṃ svacchāgādhabahūdakam

sarvvāścaryyaguṇopetaṃ vidyate svāmisannidhau //
tatra snātvā vāmadevassahaśiṣyairmahāmuniḥ

kumāraṃ śikharāsīnaṃ munivṛndaniṣevitam//
udyadādityasaṃkāśaṃ mayūravaravāhanam

caturbhujamudārāṃgaṃ mukuṭādivibhūṣitam//
śaktiratnadvayopāsyaṃ śaktikukkuṭadhāriṇam

varadābhayahastañca dṛṣṭvā skandaṃ munīśvaraḥ//
sampūjya parayā bhaktyā stotuṃ samupacakrame

// vāmadeva uvāca //
ॐ namaḥ praṇavārthāya praṇavārthavidhāyine //
praṇavākṣarabījāya praṇavāya namonamaḥ

vedāntārthasvarūpāya vedāntārthavidhāyine //
vedāntārthavide nityaṃ viditāya namonamaḥ

namo guhāya bhūtānāṃ guhāsu nihitāya ca //
guhyāya guhyarūpāya guhyāgamavide namaḥ

aṇoraṇīyase tubhyaṃ mahatopi mahīyase //
namaḥ parāvarajñāya paramātmasvarūpiṇe

skandāya skandarūpāya mihirāruṇetejase //
namo mandāramālodyanmukuṭādibhṛte sadā

śivaśiṣyāya putrāya śivasya śivadāyine //
śivapriyāya śivayorānandanidhaye nama

gāṃgeyāya namastubhyaṃ kārtikeyāya dhīmate //
umāputrāya mahate śarakānanaśāyine

ṣaḍakṣaraśarīrāya ṣaḍvidhārthavidhāyine //
ṣaḍadhvātītarūpāya ṣaṇmukhāya namonamaḥ //

dvādaśāyatanetrāya dvādaśodyatabāhave //
dvādaśāyudhadhārāya dvādaśātmannamostu te

caturbhujāya śāntāya śaktikukkuṭa dhāriṇe //
varadāya vihastāya namo'suravidāriṇe

gajāvallīkucāliptakuṃkumāṃkitavakṣase //
namo gajānanānandamahimānaṃditātmane

brahmādidevamunikinnaragīyamānagāthāviśeṣaśuciciṃtitakīrttidhāmne //
vṛndārakāmalakirīṭavibhūṣaṇasrakpūjyābhirāmapadapaṃkaja te namostu

iti skandastavandivyaṃ vāmadevena bhāṣitam //
yaḥ paṭhecchṛṇuyādvāpi sa yāti paramāṃ gatim

mahāprajñākaraṃ hyetacchivabhaktivivarddhanam //
āyurārogyadhanakṛtsarvvakāmapradaṃ sadā

iti stutvā vāmadevo devaṃ senāpatiṃ prabhum //
pradakṣiṇātrayaṃ kṛtvā praṇamya bhuvi daṇḍavat

sāṣṭāṃgaṃ ca punaḥ kṛtvā pradakṣiṇanamaskṛtam //
abhavatpārśvatastasya vinayāvanato dvijāḥ

vāmadevakṛtaṃ stotramparamārthavijṛmbhitam //
śrutvābhavatprasanno hi maheśvarasutaḥ prabhuḥ

tamuvāca mahāsenaḥ prītosmi tava pūjayā //
bhaktyā stutyā ca bhadrante kimadyakaravāṇyaham

mune tvaṃ yoginānmukhyaḥ paripūrṇaśca nispṛhaḥ //
bhavādṛśāṃ hi lokesmiprārthanīyaṃ na vidyate

tathāpi dharmmarakṣāyai lokānugrahakāṃkṣayā//
tvādṛśā sādhavassanto vicaranti mahītale

śrotavyamasti cedbrahmanvaktumarhasi sāmpratam//
tadidānīmahaṃ vakṣye lokānugrahahe tave

iti skandavacaḥ śrutvā vāmadevo mahāmuniḥ//
praśrayāvanataḥ prāha meghagambhīrayā girā

vāmadeva uvāca ///
bhagavanparameśastvaṃ parāparavibhūtidaḥ //
sarvvajñasarvakarttā ca sarvvaśaktidharaḥ prabhuḥ

jīvā vayaṃ tu te vaktuṃ sannidhau parameśituḥ //
tathāpyanugraho yante yattvaṃ vadasi māṃ prati

kṛtārthohaṃ mahāprājña vijñānakaṇamātrataḥ //
preritaḥ paripṛcchāmi kṣantavyotikramo mama

praṇavo hi paraḥ sākṣātparameśvaravācakaḥ //
vācyaḥ paśupatirdevaḥ paśūnāṃ pāśamocakaḥ

vācakena samāhūtaḥ paśūnmocayate kṣaṇāt //
tasmādvācakatāsiddhiḥ praṇavena śivamprati

ॐ mitīdaṃ sarvamiti śrutirāha sanātanī //
omiti brahma sarvvaṃ hi brahmeti ca samabravīt

devasenāpate tubhyandevānāmpataye namaḥ //
namo yatīnāmpataye paripūrṇāya te namaḥ

evaṃ sthite jagatyasmiñchivādanyanna vidyate //
sarvvarūpadharaḥ svāmī śivo vyāpī maheśvaraḥ

samaṣṭivyaṣṭibhāvena praṇavārthaḥ śruto mayā //
na jātucinmahāsena saṃprāptastvādṛśo guruḥ

ataḥ kṛtvānukaṃpāṃ vai tamarthaṃ vaktumarhasi//
upadeśavidhānena sadācārakrameṇa ca

svāmyekaḥ sarbvajantūnāṃ pāśacchedakaro guruḥ //
atastvatkṛpayā so'rthaḥ śrotavyo hi mayā guro

iti sa muninā pṛṣṭaḥ skandaḥ praṇamya sadāśivaṃ praṇavavapuṣaṃ sāṣṭatriṃśatkalāvaralakṣitam//
sahitamumayā śaśvatpārśve munipravarānvitaṃ gaditumupacakrāma śreyaḥ śrutiṣvapi gopitam

iti śrīśivamahāpurāṇe ṣaṣṭhyāṃ kailāsasaṃhitāyāṃ vāmadevabrahmavarṇanannāmaikādaśo'yāya