Shiva Purana · Chapter 5.9

// sanatkumāra uvāca //
eṣu pāpāḥ prapacyaṃte śoṣyaṃte narakāgniṣu //
yātanābhirvicitrābhirāsvakarmmakṣayādbhṛśam

svamalaprakṣayādyadvadagnau dhāsyaṃti dhātavaḥ //
tatra pāpakṣayātpāpā narāḥ karmānurūpataḥ

sugāḍhaṃ hastayorbaddhvā tataśśṛṃkhalayā narāḥ //
mahāvṛkṣāgraśākhāsu lambyante yamakiṃkaraiḥ

tataste sarvayatnena kṣiptā dolaṃti kiṃkaraiḥ //
dolaṃtaścātivegena visaṃjñā yāṃti yojanam

aṃtarikṣasthitānāṃ ca lohabhāraśataṃ punaḥ //
pādayorbadhyate teṣāṃ yamadūtairmahābalaiḥ

tena bhāreṇa mahatā prabhṛśaṃ tāḍitā narāḥ //
dhyāyaṃti svāni karmāṇi tūṣṇīṃ tiṣṭhanti niścalāḥ

tatoṃ'kuśairagnivarṇairloha daṇḍaiśca dāruṇaiḥ //
hanyaṃte kiṃkaraighoraissamantātpāpakarmmiṇaḥ

tataḥ kṣāreṇa dīptena vahnerapi viśeṣataḥ //
samaṃtataḥ pralipyaṃte tīveṇa tu punaḥ punaḥ

drutenātyaṃtaliptena kṛttāṃgā jarjarīkṛtāḥ //
punarvidāryya cāṃgāni śirasaḥ prabhṛti kramāt

vṛtākavatprapacyaṃte taptalohakaṭāhakaiḥ//
viṣṭhāpūrṇe tathā kūpe kṛmīṇāṃ nicaye punaḥ

medo'sṛkpūyapūrṇāyāṃ vāpyāṃ kṣipyaṃti te punaḥ //
bhakṣyaṃte kṛmibhistīkṣṇairloṃhatuṃḍaiśca vāyasaiḥ

śvabhirddaṃśairvṛkairvyāghrairraudraiśca vikṛtānanaiḥ //
pacyaṃte matsyavaccāpi pradīptāṃgārarāśiṣu

bhinnāḥ śūlaistu tīkṣṇaiśca narāḥ pāpena karmmaṇā //
tailayantreṣu cākramya ghoraiḥ karmmabhirātmanaḥ

tilā iva prapīḍyaṃte cakrākhye janapiṃḍakāḥ //
bhrajyaṃte cātape tapte lohabhāṇḍeṣvanekadhā

tailapūrṇakaṭāheṣu sutapteṣu punaḥpunaḥ//
bahudhā pacyate jihvā prapīḍyorasi pādayoḥ

yātanāśca mahatyo'tra śarīrasyāti sarvataḥ //
niśśeṣanarakeṣvevaṃ kramaṃti kramaśo narāḥ

narakeṣu ca sarveṣu vicitrā yamayātanā//
yāmyaiśca dīyate vyāsa sarvāṃgeṣu sukaṣṭadā

jvaladaṃgāramādāya mukhamāpūryya tāḍyate //
tataḥ kṣāreṇa dīptena tāmreṇa ca punaḥpunaḥ

ghṛtenātyantataptena tadā tailena tanmukham //
itastataḥ pīḍayitvā bhṛśamāpūryya hanyate

viṣṭhābhiḥ kṛmibhiścāpi pūryamāṇāḥ kvacitkvacit //
pariṣvajaṃti cātyugrāṃ pradīptāṃ lohaśālmalīm

hanyaṃte pṛṣṭhadeśe ca punardīptairmahāghanaiḥ //
dantureṇādikaṃṭhena krakacena balīsayā

śiraḥprabhṛti pīḍyaṃte ghoraiḥ karmabhirātmajaiḥ //
khādyaṃte ca svamāṃsāni pīyate śoṇitaṃ svakam

annaṃ pānaṃ na dattaṃ yaissarvadā svātmapoṣakaiḥ//
ikṣuvatte prapīḍyaṃte jarjarīkṛtya mudgaraiḥ

asitālavane ghore chidyante khaṇḍaśastataḥ //
sūcībhirbhinnasarvāṅgāstaptaśūlāgraropitāḥ

saṃcālyamānā bahuśaḥ kliśyaṃte na mriyanti ca //
tathā ca taccharīrāṇi sukhaduḥkhasahāni ca

dehādutpāṭya māṃsāni bhidyaṃte svaiśca mudgaraiḥ//
daṃturākṛtibhirrghorairyamadūtairbalotkaṭaiḥ

nirucchvāse niruchvāsāstiṣṭhaṃti narake ciram //
uttāḍyaṃte tathochvāse vālukāsadane narāḥ

raurave rodamānāśca pīḍyaṃte vividhai vadhaiḥ //
mahārauravapīḍābhirmahāṃto'pi rudaṃti ca

patsu vaktre gude muṃḍe netrayoścaiva mastake //
nihanyaṃte ghanaistīkṣṇaissutaptairloha śaṃkubhiḥ

sutaptāvālukāyāṃ tu prayojyaṃte muhurmuhuḥ //
jaṃtupaṃke bhṛśaṃ tapte kṣiptāḥ krandaṃti visvaram

kuṃbhīpākeṣu ca tathā taptataileṣu vai mune//
pāpinaḥ kūrakarmmāṇo'sahyeṣu sarvathā punaḥ

lālābhakṣeṣu pāpāste pātyaṃte duḥkhadeṣu vai //
nānāsthāneṣu pacyaṃte narakeṣu punaḥpunaḥ

sūcīmukhe mahākleśe narake pātyate naraḥ //
pāpī puṇyavihīnaśca tāḍyate yamakiṃkaraiḥ

lauhakumbhe viniḥkṣiptāḥ śvasantaśca śanaiḥśanaiḥ //
mahāgninā prapacyaṃte svapāpaireva mānavāḥ

dṛḍhaṃ rajjvādibhirbaddhvā prapīḍyaṃte śilāsu ca //
kṣipyaṃte cāndhakūpeṣu daśyaṃte bhramarairbhṛśam

kṛmibhirbhinnasarvāṃgāśśataśo jarjarīkṛtāḥ //
sutīkṣṇakṣārakūpeṣu kṣipyaṃte tadanaṃtaram

mahājvāle'tra narake pāpāḥ krandaṃti duḥkhitāḥ //
itaścetaśca dhāvaṃti dahyamānāstadarciṣā

pṛṣṭhe cānīya tuṇḍābhyāṃ vinyasta skaṃdhayojite //
tayormadhyena vākṛṣya bāhupṛṣṭhena gāḍhataḥ

baddhvā parasparaṃ sarve subhṛśaṃ pāparajjubhiḥ //
baddhapiṃḍāstu dṛśyaṃte mahā jvāle tu yātanāḥ

rajjubhirveṣṭitāścaiva praliptāḥ karddamena ca //
karīṣatuṣavahnau ca pacyaṃte na mriyaṃti ca

sutīkṣṇaṃ caritāste hi karkaśāsu śilāsu ca //
āsphālya śataśaḥ pāpāḥ pacyaṃte tṛṇavattataḥ

śarīrābhyaṃtaragataiḥ prabhūtaiḥ kṛmibhirnarāḥ //
bhakṣyaṃte tīkṣṇavadanairātmadehakṣayādbhṛśam

kṛmīṇāṃ nicaye kṣiptāḥ pūyamāṃsāsthirāśiṣu//
tiṣṭhaṃtyudvignahṛdayāḥ parvatābhyāṃ nipīḍitāḥ

taptena vajralepena śarīramanulipyate //
adhomukhordhvapādāśca tātapyaṃte sma vahninā

vadanāṃtaḥ pravinyastāṃ suprataptāmayogadām //
te khādanti parādhīnāstaistāḍyaṃte samudgaraiḥ

itthaṃ vyāsa kukarmmāṇo narakeṣu pacaṃti hi//
varṇayāmi vivarṇatvaṃ teṣāṃ tattvāya karmmiṇām

iti śrīśivamahāpurāṇe pañcamyāmumāsaṃhitāyāṃ sāmānyato narakagativarṇanaṃnāma navamo'dhyāyaḥ