Shiva Purana · Chapter 5.8

citragupta uvāca //
bho bho duṣkṛtakarmmāṇaḥ para dravyāpahārakāḥ //
garvitā rūpavīryeṇa paradārāvamarddakāḥ

yastvayaṃ kriyate karma tadidaṃ bhujyate punaḥ //
tatkimātmopaghātārthaṃ bhavadbhirduṣkṛtaṃ kṛtam

idānīṃ kiṃ pralapyadhve pīḍyamānāssvakarmabhiḥ //
bhujyaṃtāṃ svāni karmmāṇi nāsti doṣo hi kasyacit

sanatkumāra uvāca //
evaṃ te pṛthivīpālāssaṃprāptāstatsamīpataḥ //
svakīyaiḥ karmmabhighaurairduṣkarmmabaladarpiṇaḥ

tānapi krodhasaṃyuktaścitragupto mahāprabhuḥ //
saṃśikṣayati dharmajño yamarājānuśikṣayā

citragupta uvāca//
bho bho nṛpā durācārāḥ prajā vidhvaṃsakāriṇaḥ //
alpakālasya rājyasya kṛte kiṃ duṣkṛtaṃ kṛtam

rājyabhogena mohena balādanyāyataḥ prajāḥ //
yaddaṇḍitāḥ phalaṃ tasya bhujyatāmadhunā nṛpāḥ

kva tadrājyaṃ kalatraṃ ca yadarthamaśubhaṃ kṛtam //
tatsarvaṃ saṃparityajya yūyamekākinaḥ sthitāḥ

paśyāmi tadbalaṃ naṣṭaṃ yena vidhvaṃsitāḥ prajāḥ //
yamadūtairyojyamānā adhunā kīdṛśaṃ bhavet

sanatkumāra uvāca //
evaṃ bahuvidhairvākyairupalabdhā yamena te //
svāni karmāṇi śocaṃti tūṣṇīṃ tiṣṭhaṃti pārthivāḥ

iti karmma samuddiśya nṛpāṇāṃ dharmmarāḍyamaḥ//
tatpāpapaṃkaśuddhyarthamidaṃ dūtānbravīti ca

yamarāja uvāca //
bhobhoścaṇḍa mahācaṃḍa gṛhītvā nṛpatīnbalāt //
niyamena viśudyadhvaṃ krameṇa narakāgniṣu

sanatkumāra uvāca //
tataśśīghraṃ samādāya nṛpānsaṃgṛhya pādayoḥ//
bhrāmayitvā tu vegena nikṣipyordhvaṃ pragṛhya ca ///
sarvaprāyeṇa mahatātīva tapte śilātale//
āsphālayaṃti tarasā vajreṇeva mahādrumān

tatassaraktaṃ śrotreṇa sravate jarjarīkṛtaḥ//
nissaṃjñassa sadā dehī niśceṣṭassaṃprajāyate

tatassa vāyunā spṛṣṭassatairujjīvitaḥ punaḥ//
tataḥ pāpaviśuddhyarthaṃ kṣipaṃti narakārṇave

aṣṭāviṃśatisaṃkhyābhiḥ kṣityadhassaptakoṭayaḥ//
saptamasya talasyāṃte ghore tamasi saṃsthitaḥ

ghorākhyā prathamā koṭiḥ sughorā tadadhaḥ sthitā //
atighorā mahāghorā ghorarūpā ca paṃcamī

ṣaṣṭhī talātalākhyā ca saptamī ca bhayānakā//
aṣṭamī kālarātriśca navamī ca bhayotkaṭā

daśamī tadadhaścaṇḍā mahācaṇḍā tato'pyadhaḥ //
caṇḍakolāhalā cānyā pracaṇḍā caṇḍanāyikā

padmā padmāvatī bhītā bhīmā bhīṣaṇanāyikā //
karālā vikarālā ca vajrāviṃśatimā smṛtā

trikoṇā pañcakoṇā ca sudīrghā cākhilārtidā//
samā bhīmabalā bhogrā dīptaprāyeti cāntimī

iti te nāmataḥ proktā ghorā narakakoṭayaḥ//
aṣṭāviṃśatirevaitāḥ pāpānāṃ yātanātmikāḥ

tāsāṃ krameṇa vijñeyāḥ paṃca pañcaiva nāyakāḥ//
pratyekaṃ sarvakoṭīnāṃ nāmatassaṃnibodhata

rauravaḥ prathamasteṣāṃ ruvaṃte yatra dehinaḥ //
mahārauravapīḍābhirmahāṃto'pi rudaṃti ca

tataśśītaṃ tathā coṣṇaṃ paṃcādyā nāyakāssmṛtāḥ //
sughorastu mahātīkṣṇastathā saṃjīvanaḥ smṛtaḥ

mahātamo vilomaśca vilopaścāpi kaṃṭaka//
tīvravegaḥ karālaśca vikarālaḥ prakaṃpanaḥ

mahāvakraśca kālaśca kālasūtraḥ pragarjanaḥ //
sūcīmukhassunetiśca khādakassuprapīḍanaḥ

kumbhīpākasupākau ca krakacaścātidāruṇaḥ //
aṃgārarāśibhavanaṃ merurasṛkprahitastataḥ

tīkṣṇatuṇḍaśca śakunirmahāsaṃvartakaḥ kratuḥ//
taptajaṃtuḥ paṃkalepaḥ pratimāṃsastrapūdbhavaḥ

ucchvāsassunirucchvāso sudīrghaḥ kūṭaśālmaliḥ//
duriṣṭassumahāvādaḥ pravādassupratāpanaḥ

tato megho vṛṣaḥ śālmassiṃhavyāghragajānanāḥ//
śvasūkarājamahiṣaghūkakokavṛkānanāḥ

grāhakuṃbhīnanakrākhyā ssarpakūrmākhyavāyasāḥ//
gṛdhrolūkahalokākhyāḥ śārdūlakrathakarkaṭāḥ

maṃḍūkāḥ pūtivaktrāśca raktākṣaḥ pūtimṛttikāḥ//
kaṇadhūmrastathāgniśca kṛmigandhivapustathā

agnīdhraścāpratiṣṭhaśca rudhirābhaśśvabhojanaḥ //
lālā bhekṣāṃtrabhakṣau ca sarvabhakṣaḥ sudāruṇaḥ

kaṃṭakassuviśālaśca vikaṭaḥ kaṭapūtanaḥ//
aṃbarīṣaḥ kaṭāhaśca kaṣṭā vaitaraṇī nadī

sutaptalohaśayana ekapādaḥ prapūraṇaḥ //
asitālavanaṃ ghoramasthibhaṃgaḥ supūraṇaḥ

vilātaso'suyaṃtro'pi kūṭapāśaḥ pramardanaḥ //
mahācūrṇṇo sucūrṇṇo'pi taptalohamayaṃ tathā

parvataḥ kṣuradhārā ca tathā yamalaparvataḥ //
mūtraviṣṭhāśrukūpaśca kṣārakūpaśca śītalaḥ

musalolūkhalaṃ yantraṃ śilāśakaṭalāṃgalam//
tālapatrāsigahanaṃ mahāśakaṭamaṇḍapam

saṃmohamasthibhaṃgaśca taptaścalamayo guḍam//
bahudukhaṃ mahākleśaḥ kaśmalaṃ samalaṃ malāt

hālāhalo virūpaśca svarūpaśca yamānugaḥ // ,
ekapādastripādaśca tīvraścācīvaraṃ tamaḥ

aṣṭāviṃśatirityete kramaśaḥ paṃcapaṃcakam //
koṭīnāmānupūrvyeṇa paṃca paṃcaiva nāyakāḥ /

rauravāya prabodhyaṃte narakāṇāṃ śataṃ smṛtam//
catvāriṃśacchataṃ proktaṃ mahānarakamaṇḍalam

iti te vyāsa saṃproktā narakasya sthitirmayā //
prasaṃkhyānācca vairāgyaṃ śṛṇu pāpagatiṃ ca tām

iti śrīśivamahāpurāṇe pañcamyāmumāsaṃhitāyāṃ narakalokavarṇanaṃ nāmāṣṭamo'dhyāyaḥ // ८