Shiva Purana · Chapter 5.10

sanatkumāra uvāca //
mithyāgamaṃ pravṛttastu dvijihvākhye ca gacchati //
jihvārddhakośavistīrṇahalaistīkṣṇaḥ prapīḍyate

nirbhartsayati yaḥ krūro mātaraṃ pitaraṃ gurum //
viṣṭhābhiḥ kṛmimiśrābhirmukhamāpūryya hanyate

ye śivāyatanārāmavāpīkūpataḍāgakān//
vidravaṃti dvijasthānaṃ narāstatra ramaṃti ca

kāmāyodvartanābhyaṃga snānapānāmbubhojanam //
krīḍanaṃ maithunaṃ dyūtamācaranti madoddhatā

pecire vividhairgherairikṣuyaṃtrādipīḍanaiḥ //
nirayāgniṣu pacyaṃte yāvadābhūtasaṃplavam

tena tenaiva rūpeṇa tāḍyate pāradārikāḥ //
gāḍhamāliṃgya te nārīṃ sutaptāṃ lohanirmitām

pūrvākārāśca puruṣāḥ prajvalanti samaṃtataḥ //
duścāriṇīṃ striyaṃ gāḍhamāliṃgaṃti rudaṃti ca

ye śṛṇvaṃti satāṃ niṃdāṃ teṣāṃ karṇaprapūraṇam //
agnivarṇairayaḥkīlaistaptaistāmrādinirmitaiḥ

trapusīsārakūṭādbhiḥ kṣīreṇa ca punaḥpunaḥ//
sutaptatīkṣṇatailena vajralepena vā punaḥ

kramādāpūryyakarṇāṃstu narakeṣu ca yātanāḥ //
anukrameṇa sarveṣu bhavaṃtyetāḥ samaṃtataḥ

sarvendriyāṇāmapyevaṃ kramātpāpena yātanāḥ //
bhavaṃti ghorāḥ pratyekaṃ śarīreṇa kṛtena ca

sparśadoṣeṇa ye mūḍhāsspṛśaṃti ca parastriyam //
teṣāṃ karo'gnivarṇābhiḥ pāṃśubhiḥ pūryyate bhṛśam

teṣāṃ kṣārādibhissarvaiśśarīramanulipyate //
yātanāśca mahākaṣṭāssarveṣu narakeṣu ca

kurvanti pitrorbhṛkuṭiṃ karanetrāṇi ye narā //
vaktrāṇi teṣāṃ sāṃtāni kīryyaṃte śaṃkubhirdṛḍham

yairindriyairnarā ye ca kurvanti parastriyam //
indriyāṇi ca teṣāṃ vai vikurvaṃti tathaiva ca

paradārāṃśca paśyanti lubdhāsstabdhena cakṣuṣā //
sūcībhiścāgnivarṇābhisteṣāṃ netraprapūraṇam

kṣārādyaiśca kramātsarvā ihaiva yamayātanāḥ //
bhavaṃti muniśārdūla satyaṃsatyaṃ na saṃśayaḥ

devāgniguruviprebhyaścānivedya prabhuṃjate //
lohakīlaśataistaptaistajjihvāsyaṃ ca pūryyate

ye devārāmapuṣpāṇi lobhātsaṃgṛhya pāṇinā //
jighraṃti ca narā bhūyaḥ śirasā dhārayaṃti ca

āpūryyate śirasteṣāṃ taptairlohasya śaṃkubhiḥ //
nāsikā vātibahulaistataḥ kṣārādibhirbhṛśam

ye niṃdanti mahātmānaṃ vācakaṃ dharmmadeśikam //
devāgnigurubhaktāṃśca dharmaśāstraṃ ca śāśvatam

teṣāmurasi kaṇṭhe ca jihvāyāṃ daṃtasandhiṣu //
tālunyoṣṭhe nāsikāyāṃ mūrdhni sarvāṅgasandhiṣu

agnivarṇāstu taptāśca triśākhā lohaśaṃkavaḥ //
ākhidyaṃte ca bahuśaḥ sthāneṣveteṣu mudgaraiḥ

tataḥ kṣāreṇa dīptena pūryate hi samaṃ tataḥ //
yātanāśca mahatyo vai śarīrasyāti sarvataḥ

aśeṣanarakeṣveva kramaṃti kramaśaḥ punaḥ //
ye gṛhṇanti paradravyaṃ padbhyāṃ vipraṃ spṛśaṃti ca

śivopakaraṇaṃ gāṃ ca jñānādilikhitaṃ ca yat //
hastapādādibhisteṣāmāpūryyaṃte samaṃtataḥ

narakeṣu ca sarveṣu vicitrā dehayātanāḥ //
bhavaṃti bahuśaḥ kaṣṭāḥ pāṇipādasamudbhavāḥ

śivāyatanaparyyaṃte devārāmeṣu kutracit//
samutsṛjaṃti ye pāpāḥ purīṣaṃ mūtrameva ca

teṣāṃ śiśnaṃ savṛṣaṇaṃ cūrṇyate lohamudgaraiḥ//
sūcībhiragnivarṇābhiskathā tvāpūryyate punaḥ

tataḥ kṣāreṇa mahatā tīvreṇa ca punaḥ punaḥ //
drutena pūryate gāḍhaṃ gude śiśne ca dehinaḥ

manassarvendriyāṇāṃ ca yasmā dduḥkhaṃ prajāyate //
dhane satyapi ye dānaṃ na prayacchaṃti tṛṣṇayā

atithiṃ cāvamanyate kāle prāpte gṛhāśrame //
tasmātte duṣkṛtaṃ prāpya gacchaṃti niraye'śucau

ye'nnaṃ dattvā hi bhuṃjaṃti na śvabhyassaha vāyasaiḥ //
teṣāṃ ca vivṛtaṃ vaktraṃ kīlakadvayatāḍitam

kṛmibhiḥ prāṇibhiścograirlohatuṇḍaiśca vāyasaiḥ //
upadravairbahuvidhairugrairaṃtaḥ prapīḍyate

śyāmaśca śabalaścaiva yamamārgānurodhakau //
yau stastābhyāṃ prayacchāmi tau gṛhṇītāmimaṃ balim

ye vā varuṇavāyavyā yāmyā nairṛtyavāyasāḥ //
vāyasā puṇyakarmāṇaste pragṛhṇaṃtu me balim

śivāmabhyarcya yatnena hutvāgnau vidhipūrvakam //
śaivairmantrairbaliṃ ye ca dadaṃte na ca te yamam

paśyaṃti tridivaṃ yāṃti tasmāddadyāddinedine//
maṇḍalaṃ caturasraṃ tu kṛtvā gaṃdhādivāsitam

dhanvantaryarthamīśānyāṃ prācyāmindrāya niḥkṣipet //
yāmyāṃ yamāya vāruṇyāṃ sudakṣomāya dakṣiṇe

pitṛbhyastu vinikṣipya prācyāmaryamaṇe tataḥ //
dhātuścaiva vidhātuśca dvāradeśe viniḥkṣipet

śvabhyaśca śvapatibhyaśca vayobhyo vikṣipedbhuvi //
devaiḥ pitṛmanuṣyaiśca pretairbhūtaissaguhyakai

vayobhiḥ kṛmikīṭaiśca gṛhasthaścopajīvyate //
svāhākāraḥ svadhākāro vaṣaṭkārastṛtīyakaḥ

haṃtakārastathaivānyo dhenvā stanacatuṣṭayam//
svāhākāraṃ stanaṃ devāssvadhāṃ ca pitarastathā

vaṣaṭkāraṃ tathaivānye devā bhūteśvarāstathā //
haṃtakāraṃ manuṣyāśca pibaṃti satataṃ sta nam

yastvetāṃ mānavo dhenuṃ śraddhayā hyanupūrvikām //
karoti satataṃ kāle sāgnitvāyopakalpyate

yastāṃ jahāti vā svasthastāmisre sa tu majjati //
tasmāddattvā baliṃ tebhyo dvārasthaściṃtayetkṣaṇam

kṣudhārtamatithiṃ samyagekagrāmanivāsinam //
bhojayettaṃ śubhānnena yathāśaktyātmabhojanāt

atithiryasya bhagnāśo gṛhātpratinivartate //
sa tasmai duṣkṛtaṃ dattvā puṇyamā dāya gacchati

tato'nnaṃ priyamevāśnannaraḥ śṛṃkhalavānpunaḥ //
jihvāvegena viddhotra ciraṃ kālaṃ sa tiṣṭhati

yatastaṃ māṃsamuddhatya tilamātrapramāṇataḥ //
khādituṃ dīyate teṣāṃ bhittvā caiva tu śoṇitam

niśśeṣataḥ kaśābhistu pīḍyate kramaśaḥ punaḥ //
bubhukṣayātikaṣṭaṃ hi tathāyāti pipāsayā

evamādyā mahāghorā yātanāḥ pāpakarmaṇām //
aṃte yatpratipannaṃ hi tatsaṃkṣepeṇa saṃśṛṇu

yaḥ karoti mahāpāpaṃ dharmmaṃ carati vai laghu //
dharmmaṃ gurutaraṃ vāpi tathāvasthe tayoḥ śṛṇu

sukṛtasya phalaṃ noktaṃ gurupā paprabhāvataḥ //
na minoti sukhaṃ tatra bhogairbahubhiranvitaḥ

tathodvignotisaṃtapto na bhakṣyairmanyate sukham //
abhāvādagrato'nyasya pratikalpaṃ dinedine

pumānyo gurudharmmā'pi sopavāso yathā gṛhī //
vittavānna vijānāti pīḍāṃ niyamasaṃsthitaḥ

tāni pāpāni ghorāṇi saṃti yaiśca naro bhuvi //
śatadhā bhedamāpnoti girirvajrahato yathā

//
iti śrīśivamahāpurāṇe pañcamyāmumāsaṃhitāyāṃ narakagatibhogavarṇanaṃ nāma daśamo'dhyāyaḥ