Shiva Purana · Chapter 5.7

sanatkumāra uvāca //
atha pāpairnarā yāṃti yamalokaṃ caturvidhaiḥ //
saṃtrāsajananaṃ ghoraṃ vivaśāssarvadehinaḥ

garbhasthairjāyamānaiśca bālaistaruṇamadhyamaiḥ //
strīpunnapuṃsakairjīvairjñātavyaṃ sarvajaṃtuṣu

śubhāśubhaphalaṃ cātra dehināṃ saṃvicāryate //
citraguptādibhissarvairvasiṣṭhapramukhaistathā

na kecitprāṇinassaṃti ye na yāṃti yamakṣayam //
avaśyaṃ hi kṛtaṃ karma bhoktavyaṃ tadvicāryyatām

tatra ye śubhakarmāṇassaumyacittā dayānvitāḥ //
te narā yāṃti saumyena pūrvaṃ yamaniketanam

ye punaḥ pāpakarmmāṇaḥ pāpā dānavivarjitāḥ //
te ghoreṇa pathā yāṃti dakṣiṇena yamālayam

ṣaḍaśītisahasrāṇi yojanānāmatītya tat //
vaivasvatapuraṃ jñeyaṃ nānārūpamavasthitam

samīpasthamivābhāti narāṇāṃ puṇyakarmaṇām//
pāpināmatidūrasthaṃ pathā raudreṇa gacchatām

tīkṣṇakaṃṭakayuktena śarkarāvicitena ca //
kṣuradhārānibhaistīkṣṇaiḥ pāṣāṇai racitena ca

kvacitpaṃkena mahatā urutokaiśca pātakaiḥ //
lohasūcīnibhairdarbhaissampannena pathā kvacit

taṭaprāyātiviṣamaiḥ parvatairvṛkṣasaṃkulaiḥ //
prataptāṃgārayuktena yāṃti mārgeṇa duḥkhitāḥ

kvacidviṣamagartaiśca kvacilloṣṭaissuduṣkaraiḥ //
sutaptavālukābhiśca tathā tīkṣṇaiśca śaṃkubhiḥ

aneka śākhāvitatairvyāptaṃ vaṃśavanaiḥ kvacit//
kaṣṭena tamasā mārge nānālambena kutracit

ayaśśṛṃgāṭakaistīkṣṇaiḥ kvaciddāvāgninā punaḥ //
kvacittaptaśilābhiśca kvacidvyāptaṃ himena ca

kvacidvālukayā vyāptamākaṃṭhāṃtaḥ praveśayā //
kvacidduṣṭāmbunā vyāptaṃ kvacicca kariṣāgninā

kvacitsiṃhairvṛkairvyāghrairmaśakaiśca sudāruṇaiḥ //
kvacinmahājalaukābhiḥ kvaciccājagaraistathā

makṣikābhiśca raudrābhiḥ kvacitsarpairviṣolbaṇaiḥ //
mattamātaṃgayūthaiśca balonmattaiḥ pramāthibhiḥ

paṃthānamullikhadbhiśca sūkaraistīkṣṇadaṃṣṭribhiḥ//
tīkṣṇaśṛṃgaiśca mahiṣaissarvabhūtaiśca śvāpadaiḥ

ḍākinībhiśca raudrābhirvikarālaiśca rākṣasaiḥ //
vyādhibhiśca mahāghoraiḥ pīḍyamānā vrajaṃti hi

mahādhūlivimiśreṇa mahācaṇḍena vāyunā //
mahāpāṣāṇavarṣeṇa hanyamānā nirāśrayāḥ

kvacidvidyutprapātena dahyamānā vrajanti ca //
mahatā bāṇavarṣeṇa vidhyamānāśca sarvataḥ

patadbhirvajrapātaiśca ulkāpātaiśca dāruṇaiḥ //
pradīptāṃgāravarṣeṇa dahyamānāśca saṃti hi

mahatā pāṃsuvarṣeṇa pūryamāṇā rudaṃti ca//
mahāmegharavairghoraistrasyaṃte ca muhurmuhuḥ

niśitāyudhavarṣeṇa bhidyamānāśca sarvataḥ //
mahākṣārāmbudhārābhissicyamānā vrajaṃti ca

mahīśītena marutā rūkṣeṇa paruṣeṇa ca //
samaṃtādbādhyamānāśca śuṣyaṃte saṃkucanti ca

itthaṃ mārgeṇa raudreṇa pātheyarahitena ca //
nirālambena durgeṇa nirjalena samaṃtataḥ

viṣameṇaiva mahatā nirjanāpāśrayeṇa ca //
tamorūpeṇa kaṣṭena sarvaduṣṭāśrayeṇa ca

nīyaṃte dehinassarve ye mūḍhāḥ pāpakarmiṇaḥ //
yamadūtairmahāghoraistadājñākāribhirbalāt

ekākinaḥ parādhīnā mitrabandhuvivarjitāḥ //
śocaṃtassvāni karmmāṇi rudaṃtaśca muhurmuhuḥ

pretā bhūtvā vivastrāśca śuṣkakaṃṭhauṣṭhatālukāḥ //
asaumyā bhayabhītāśca dahyamānāḥ kṣudhānvitāḥ

baddhāśśṛṃkhalayā keciduttā napādakā narāḥ //
kṛṣyaṃte kṛṣyamāṇāśca yamadūtairbalotkaṭaiḥ

urasādhomukhāścānye ghṛṣyamāṇāssuduḥkhitāḥ //
keśapāśani baṃdhena saṃskṛṣyaṃte ca rajjunā

lalāṭe cāṃkuśenānye bhinnā duṣyaṃti dehinaḥ //
uttānāḥ kaṃṭakapathā kvacidaṃgāravartmanā

paścādbāhunibaddhāśca jaṭhareṇa prapīḍitāḥ //
pūritāśśṛṃkhalābhiśca hastayośca sukīlitāḥ

grīvāpāśena kṛṣyaṃte prayāṃtyanye suduḥkhitāḥ //
jihvāṃkuśapraveśena rajjvākṛṣyanta eva te

nāsābhedena rajjvā ca tvākṛśyante tathāpare //
bhinnāḥ kapolayo rajjvākṛṣyaṃte'nye tathauṣṭhayoḥ

chinnāgrapādahastāśca cchinnakarṇoṣṭhanāsikāḥ //
saṃchinnaśiśnavṛṣaṇāḥ chinnabhinnāṃgasaṃdhayaḥ

ābhidyamānāḥ kuṃtaiśca bhidyamānāśca sāyakaiḥ //
itaścetaśca dhāvaṃtaḥ kraṃdamānā nirāśrayāḥ

mudgarairlohadaṇḍaiśca hanyamānā muhurmuhuḥ //
kaṃṭakairvividhairghorairjvalanārkasamaprabhaiḥ

bhindipālairvibhiyaṃte sravataḥ pūyaśoṇitam //
śakṛtā kṛmidigdhāśca nīyaṃte vivaśā narāḥ

yācamānāśca salilamannaṃ vāpi bubhukṣitāḥ //
chāyāṃ prārthayamānāśca śītārtāścānalaṃ punaḥ

dānahīnāḥ prayāṃtyevaṃ prārthayaṃtassukhaṃ narāḥ //
gṛhītadāna pātheyāssukhaṃ yāṃti yamālayam

evaṃ nyāyena kaṣṭena prāptāḥ pretapuraṃ yadā //
prajñāpitāstato dūtairniveśyaṃte yamāgrataḥ //

tatra ye śubhakarmmāṇastāṃstu sammānayedyamaḥ //
svāgatāsanadānena pādyārghyeṇa priyeṇa ca

dhanyā yūyaṃ mahātmāno nigamoditakāriṇaḥ //
yaiśca divyasukhārthāya bhavadbhissukṛtaṃ kṛtam

divyaṃ vimānamāruhya divyastrībhogabhūṣitam //
svargaṃ gacchadhvamamalaṃ sarvakāmasamanvitam

tatra bhuktvā mahābhogānaṃte puṇyasya saṃkṣayāt //
yatkiṃcidalpamaśubhaṃ punastadiha bhokṣyatha

dharmmātmāno narā ye ca mitrabhūtvā ivātmanaḥ //
saumyaṃ sukhaṃ prapaśyaṃti dharmarājatvameva ca

ye punaḥ krūrakarmmāṇaste paśyaṃti bhayānakam //
daṃṣṭrākarālavadanaṃ bhṛkuṭīkuṭilekṣaṇam

ūrdhvakeśaṃ mahāśmaśrumūrdhvaprasphuritādharam //
aṣṭādaśabhujaṃ kruddhaṃ nīlāṃjanacayopamam

sarvāyudhoddhatakaraṃ sarvadaṇḍena tarjayan //
mahāmahiṣamārūḍhaṃ dīptāgnisamalocanam

raktamālyāṃbaradharaṃ mahāmerumivocchritam//
pralayāmbudanirghoṣaṃ pibanniva mahodadhim //

grasaṃtamiva śailendramudgiraṃtamivānalam //
mṛtyuścaiva samīpasthaḥ kālānalasamaprabhuḥ

kālaścāṃjanasaṃkāśaḥ kṛtāṃtaśca bhayānakaḥ //
mārīcogramahāmārī kālarātriśca dāruṇā

vividhā vyādhayaḥ kuṣṭhā nānārūpā bhayāvahāḥ //
śaktiśūlāṃkuśadharāḥ pāśacakrāsipāṇayaḥ

vajatuṃḍadharā rudrā kṣuratūṇadhanurddharāḥ//
nānāyudhadharāssarve mahāvīrā bhayaṃkarāḥ

asaṃkhyātā mahāvīrāḥ kālāñjanasamaprabhāḥ //
sarvāyudhodyatakarā yamadūtā bhayānakāḥ

anena paricāreṇa vṛtaṃ taṃ ghoradarśanam //
yamaṃ paśyaṃti pāpiṣṭhāścitraguptaṃ ca bhīṣaṇam

nirbhartsayati cātyaṃtaṃ yamastānpāpakarmmaṇaḥ //
citraguptaśca bhagavāndharmmavākyaiḥ prabodhayet

iti śrīśivamahāpurāṇe pañcamyāmumāsaṃhitāyāṃ narakalokamārgayamadūtasvarūpavarṇanaṃ nāma saptamo'dhyāyaḥ