Shiva Purana · Chapter 5.6

sanatkumāra uvāca //
dvijadravyāpaharaṇamapi dāyavyatikramaḥ //
atimāno'tikopaśca dāṃbhikatvaṃ kṛtaghnatā

'
atyaṃtaviṣayāsaktiḥ kārpaṇyaṃ sādhumatsaraḥ //
paradārābhigamanaṃ sādhukanyāsudūṣaṇam

parivittiḥ parivettā ca yayā ca parividyate //
tayordānaṃ ca kanyāyāstayoreva ca yājanam

śivāśramatarūṇāṃ ca puṣpārāmavināśanam //
yaḥ pīḍāmāśramasthānāmācaredalpikāmapi

sabhṛtyaparivārasya paśudhānyadhanasya ca //
kupyadhānyapaśusteyamapāṃ vyāpāvanaṃ tathā

yajñārāmataḍāgānāṃ dārāpatyasya vikrayam //
tīrthayātropavāsānāṃ vratopanayakarmmiṇām

strīdhanānyupajīvaṃti strībhirapyantanirjitāḥ //
arakṣaṇaṃ ca nārīṇāṃ māyayā strīniṣevaṇam

kālāgatāpradānaṃ ca dhānyavṛddhyupasevanam //
niṃditācca dhanādānaṃ paṇyānāṃ kūṭa jīvanam

viṣamāraṇyapatrāṇāṃ satataṃ vṛṣavāhanam //
uccāṭanābhicāraṃ ca dhānyādānaṃ bhiṣakkriyā

jihvākāmopabhogārthaṃ yasyāraṃbhaḥ sukarmasu //
mūlenakhyāpako nityaṃ vedajñānādikaṃ ca yat

brāhmyādivratasaṃtyāgaścānyācāraniṣevaṇam //
asacchāstrādhigamanaṃ śuṣkatarkāvalambanam

devāgnigurusādhūnāṃ nindayā brāhmaṇasya ca //
pratyakṣaṃ vā parokṣaṃ vā rājñāṃ maṇḍalināmapi

utsannapitṛdevejyā svakarmmatyāginaśca ye //
duḥśīlā nāstikāḥ pāpāssadā vā'satyavādinaḥ

parvakāle divā vāpsu viyonau paśuyoniṣu //
rajasvalāyā yonau ca maithunaṃ yaḥ samācaret

strīputramitrasaṃprāptāvāśācchedakarāśca ye //
janasyāpriya vaktāraḥ krūrā samayavedinaḥ

bhettā taḍāgakūpānāṃ saṃkrayāṇāṃ rasasya ca //
ekapaṃktisthitānāṃ ca pākabhedaṃ karoti yaḥ

/
ityetaiḥ strīnarāḥ pāpairupapātakinaḥ smṛtāḥ //
yuktā ebhistathānye'pi śṛṇu tāṃstu bravīmi te

ye gobrāhmaṇakanyānāṃ svāmimitratapasvinām //
vināśayaṃti kāryyāṇi te narā nārakāḥ smṛtāḥ

parastriyābhitapyaṃte ye paradravyasūcakāḥ //
paradravyaharā nityaṃ taulamithyānusārakāḥ

dvijaduḥkhakarā ye ca prahāraṃ coddharaṃti ye //
sevante tu dvijāśśūdrāṃ surāṃ badhnaṃti kāmataḥ

ye pāpaniratāḥ krūrāḥ ye'pi hiṃsāpriyā narāḥ//
vṛttyarthaṃ ye'pi kurvaṃti dānayajñādikāḥ kriyāḥ

goṣṭhāgnijalarathyāsu tarucchāyā nageṣu ca//
tyajaṃti ye purīṣādyānārāmāyataneṣu ca//२२/
lajjāśramaprāsādeṣu mayapānaratāśca ye//
kṛtakelibhujaṃgāśca randhrānveṣaṇatatparāḥ

vaṃśeṣṭakā śilākāṣṭhaiḥ śṛṅgaiśśaṃkubhireva ca//
ye mārgamanuruṃdhaṃti parasīmāṃ haraṃti ye

kūṭaśāsanakartāraḥ kūṭakarmakriyāratāḥ//
kūṭapākānnavastrāṇāṃ kūṭasaṃvyavahāriṇaḥ

dhanuṣaḥ śastraśalyānāṃ kartā yaḥ krayavikrayī//
nirddayo'tīvabhṛtyeṣu paśūnāṃ damanaśca yaḥ

mithyā pravadato vāca ākarṇayati yaśśanaiḥ//
svāmimitragurudrohī māyāvī capalaśśaṭhaḥ

ye bhāryyāputramitrāṇi bālavṛddhakṛśāturān//
bhṛtyānatithibaṃdhūṃśca tyaktvāśnaṃti bubhukṣitān

yaḥ svayaṃ miṣṭamaśnāti viprebhyo na prayacchati //
vṛthāpākassa vijñeyo brahmavādiṣu garhitaḥ

niyamānsvayamādāya ye tyajaṃtyajitendriyāḥ //
pravrajyāvāsitā ye ca harasyāsyaprabhedakāḥ

ye tāḍayaṃti gāṃ krūrā damayaṃte muhurmuhuḥ //
durbalānye na puṣṇaṃti satataṃ ye tyajaṃti ca

pīḍayaṃtyatibhāreṇā'sahaṃtaṃ vāhayaṃti ca //
yojayannakṛtāhārānna vimuṃcaṃti saṃyatān

ye bhārakṣatarogārtāngovṛṣāṃśca kṣudhāturān //
na pālayaṃti yatnena goghnāste nārakāssmṛtāḥ

vṛṣāṇāṃ vṛṣaṇānye ca pāpiṣṭhā gālayaṃti ca //
vāhayaṃti ca gāṃ vaṃdhyāṃ mahānārakino narāḥ

āśayā samanuprāptānkṣuttṛṣṇāśramakarśitān //
atithīṃśca tathānāthānsvatantrā gṛhamāgatān

annābhilāṣāndīnānvā bālavṛddhakṛśāturān //
nānukaṃpaṃti ye mūḍhāste yāṃti narakārṇavam

gṛheṣvarthā nivartante smaśānādapi bāṃdhavāḥ //
sukṛtaṃ duṣkṛtaṃ caiva gacchaṃtamanugacchati

ajāviko māhiṣikassāmudro vṛṣalīpatiḥ //
śūdravatkṣatravṛttiśca nārakī syād dvijādhamaḥ

śilpinaḥ kāravo vaidyā hemakārā nṛpadhvajāḥ //
bhṛtakā kūṭasaṃyuktāḥ sarve te nārakāḥ smṛtāḥ

yaścocitamatikramya svecchayai vāharetkaram //
narake pacyate so'pi yopi daṇḍarucirnaraḥ

utkocakai rucikrītaistaskaraiśca prapīḍyate //
yasya rājñaḥ prajā rāṣṭre pacyate narakeṣu saḥ

ye dvijāḥ parigṛhṇaṃti nṛpasyānyāyavartinaḥ //
te prayāṃti tu ghoreṣu narakeṣu na saṃśayaḥ

anyāyātsamupādāya dvijebhyo yaḥ prayacchati //
prajābhyaḥ pacyate so'pi narakeṣu nṛpo yathā

pāradārikacaurāṇāṃ caṃḍānāṃ vidyate tvagham //
paradāraratasyāpi rājño bhavati nityaśaḥ

acauraṃ cauravatpaśyeccauraṃ vācaurarūpiṇam //
avicārya nṛpastasmāddhātayannarakaṃ vrajet

ghṛtatailānnapānāni madhumāṃsasurāsavam //
guḍekṣuśākadugdhāni dadhimūlaphalāni ca

tṛṇaṃ kāṣṭhaṃ patrapuṣpamauṣadhaṃ cātmabhojanam //
upānatchatraśakaṭamāsanaṃ ca kamaṃḍalum

tāmrasīsatrapuḥ śastraṃ śaṃkhādyaṃ ca jalodbhavam//
vaidyaṃ ca vaiṇavaṃ cānyadgṛhopaskaraṇāni ca

aurṇṇakārpāsakauśeyapaṭṭasūtrodbhavāni ca //
sthūlasūkṣmāṇi vastrāṇi ye lobhāddhi haraṃti ca

evamādīni cānyāni dravyāṇi vividhāni ca //
narakeṣu dhruvaṃ yānti cāpahṛtyālpakāni ca

tadvā yadvā paradravyamapi sarṣapamātrakam //
apahṛtya narā yāṃti narakaṃ nātra saṃśayaḥ

evamādyairnaraḥ pāpairutkrāṃtisamanaṃtaram//
śarīrayātanārthāya sarvākāramavāpnuyāt

yamalokaṃ vrajaṃtyete śarīreṇa yamājñayā //
yamadūtairmahāghorainīyamānāssuduḥkhitāḥ

devatiryaṅmanuṣyāṇāmadharmaniratātmanām //
dharmarājaḥ smṛtaśśāstā sughorairvividhairvadhaiḥ

niyamācārayuktānāṃ pramādātskhalitātmanām //
prāyaścittairguruśśāstā na budhairiṣyate yamaḥ

pāradārikacaurāṇāmanyāyavyavahāriṇām //
nṛpatiśśāsakaḥ proktaḥ pracchannānāṃ sa dharmmarāṭ

tasmātkṛtasya pāpasya prāyaścittaṃ samācaret //
nābhuktasyānyathānāśaḥ kalpakoṭiśatairapi

yaḥ karoti svayaṃ karmma kārayeccānumodayet //
kāyena manasā vācā tasya pāpagatiḥ phalam

iti śrīśivamahāpurāṇe pañcamyā mumāsaṃhitāyāṃ pāpabhedavarṇanaṃ nāma ṣaṣṭho'dhyāyaḥ