Shiva Purana · Chapter 5.5

vyāsa uvāca //
ye pāpaniratā jīvā mahānarakahetavaḥ //
bhagavaṃstānsamācakṣva brahmaputra namo'stu te

sanatkumāra uvāca //
ye pāpaniratā jīvā mahānarakahetavaḥ //
te samāsena kathyaṃte sāvadhānatayā śṛṇu

/
parastrīdravyasaṃkalpaścetasā'niṣṭaciṃtanam //
akāryābhiniveśaśca caturddhā karma mānasam

tu. mahābhāratam anuśāsana १३.२
avibaddhapralāpatvamasatyaṃ cāpriyaṃ ca yat //
parokṣataśca paiśunyaṃ caturddhā karma vācikam

abhakṣyabhakṣaṇaṃ hiṃsā mithyākāryya niveśanam //
parasvānāmupādānaṃ caturddhā karma kāyikam

ityetadvā daśavidhaṃ karma proktaṃ trisādhanam //
asya bhedānpunarvakṣye yeṣāṃ phalamanaṃtakam

ye dviṣaṃti mahādevaṃ saṃsārārṇavatārakam //
sumahatpātakaṃ teṣāṃ nirayārṇavagāminām

ye śivajñānavaktāraṃ nindaṃti ca tapasvinam //
gurūnpitṝnathonmattāste yāṃti nirayārṇavam

śivanindā gurornindā śivajñānasya dūṣaṇam //
devadravyāpaharaṇaṃ dvijadravyavināśanam

haraṃti ye ca saṃmūḍhāśśivajñānasya pustakam //
mahāṃti pātakānyāhuranantaphaladāni ṣaṭ

nābhinandaṃti ye dṛṣṭvā śivapūjāṃ prakalpitām //
na namaṃtyarcitaṃ dṛṣṭvā śivaliṃgaṃ stuvaṃti na

yatheṣṭaceṣṭā niśśaṃkāssaṃtiṣṭhaṃte ramaṃti ca //
upacāravinirmuktāśśivāgre gurusannidhau

sthānasaṃskārapūjāṃ ca ye na kurvaṃti parvasu //
vidhivadvā gurūṇāṃ ca karmmayogavyavasthitāḥ

ye tyajaṃti śivācāraṃ śivabhaktāndviṣaṃti ca //
asaṃpūjya śivajñānaṃ ye'dhīyaṃte likhaṃti ca

anyāyataḥ prayacchaṃti śṛṇvantyuccārayaṃti ca //
vikrīḍaṃti ca lobhena kujñānaniyamena ca

asaṃskṛtapradeśeṣu yatheṣṭaṃ svāpayaṃti ca //
śivajñānakathā''kṣepaṃ yaḥ kṛtvānyatprabhāṣate

na bravīti ca yaḥ satyaṃ na pradānaṃ karoti ca //
aśucirvā'śucisthāne yaḥ pravakti śṛṇoti ca

gurupūjāmakṛtvaiva yaśśāstraṃ śrotumicchati //
na karoti ca śuśrūṣāmājñāṃ ca bhaktibhāvataḥ

nābhinandaṃti tadvākyamuttaraṃ ca prayacchati //
gurukarmaṇyasādhyaṃ yattadupekṣāṃ karoti ca

gurumārttamaśaktaṃ ca videśaṃ prasthitaṃ tathā //
vairibhiḥ paribhūtaṃ vā yassaṃtyajati pāpakṛt

tadbhāryyāputramitreṣu yaścāvajñāṃ karoti ca //
evaṃ suvācakasyāpi gurordharmānudarśinaḥ

etāni khalu sarvāṇi karmāṇi munisattama //
sumahatpātakānyāhuśśivanindāsamāni ca

brahmaghnaśca surāpaśca steyī ca gurutalpagaḥ //
mahāpātakinastvete tatsaṃyogī ca paṃcamaḥ

krodhāllobhādbhayāddveṣādbrāhmaṇasya vadhe tu yaḥ //
marmāṃtikaṃ mahādoṣamuktvā sa brahmahā bhavet

brāhmaṇaṃ yaḥ samāhūya dattvā yaścādadāti ca //
nirddoṣaṃ dūṣayedyastu sa naro brahmahā bhavet

yaśca vidyābhimānena nistejayati sudvijam //
udāsīnaṃ sabhāmadhye brahmahā sa prakīrtitaḥ

mithyāguṇairya ātmānaṃ nayatyutkarṣatāṃ balāt //
guṇānapi nirudvāsya sa ca vai brahmahā bhavet

gavāṃ vṛṣābhibhūtānāṃ dvijānāṃ gurupūrvakam //
yassamācarate vipra tamāhurbrahmaghātakam

devadvijagavāṃ bhūmiṃ pradattāṃ harate tu yaḥ //
pranaṣṭāmapi kālena tamāhurbrahmaghātakam //

devadvijasvaharaṇamanyāyenārjitaṃ tu yat //
brahmahatyāsamaṃ jñeyaṃ pātakaṃ nātra saṃśayaḥ

adhītya yo dvijo vedaṃ brahmajñānaṃ śivātmakam //
yadi tyajati yo mūḍhaḥ surāpānasya tatsamam

yatkiṃciddhi vrataṃ gṛhya niyamaṃ yajanaṃ tathā //
saṃtyāgaḥ pañcayajñānāṃ surāpānasya tatsamam

pitṛmātṛparityāgaḥ kūṭasākṣyaṃ dvijānṛtam //
āmiṣaṃ śivabhaktānāmabhakṣyasya ca bhakṣaṇam

vane niraparādhānāṃ prāṇināṃ cāpaghātanam //
dvijārthaṃ prakṣipetsādhurna dharmārthaṃ niyojayet

gavāṃ mārge vane grāme yaiścaivāgniḥ pradīyate //
iti pāpāni ghorāṇi brahmahatyāsamāni ca

dīnasarvasvaharaṇaṃ narastrīgajavājinām //
gobhūrajatavastrāṇāmauṣadhīnāṃ rasasya ca

candanāgarukarpūrakastūrīpaṭṭavāsasām//
vikrayastvavipattau yaḥ kṛto jñānād dvijātibhiḥ

hastanyāsāpaharaṇaṃ rukmasteyasamaṃ smṛtam //
kanyānāṃ varayogyānāmadānaṃ sadṛśe vare

putramitrakalatreṣu gamanaṃ bhaginīṣu ca //
kumārīsāhasaṃ ghoramadyapastrīniṣevaṇam

savarṇāyāśca gamanaṃ gurubhāryyāsamaṃ smṛtam //
mahāpāpāni coktāni śṛṇu tvamupapātakam

iti śrīśivamahāpurāṇe paṃcamyāmumāsaṃhitāyāṃ mahāpātakavarṇanaṃ nāma paṃcamo'dhyāyaḥ