Shiva Purana · Chapter 5.47

// ṛṣiruvāca //
āsīcchumbhāsuro daityo niśuṃbhaśca pratāpavān //
trailokyamojasā krāntaṃ bhrātṛbhyāṃ sacarācaram

tābhyāmprapīḍitā devā himavantaṃ samāyayuḥ //
jananīṃ sarvabhūtānāṃ kāmadātrīṃ vavandire

devā ūcuḥ //
jaya durge maheśāni jayātmīyajanapriye //
trailokyatrāṇakāriṇyai śivāyai te namonamaḥ

namo muktipradāyinyai parāmbāyai namonamaḥ //
namaḥ samastasaṃsārotpattisthityantakārike

kālikārūpasaṃpanno namaskārākṛte namaḥ //
chinnamastāsvarūpāyai śrīvidyāyai namostu te

bhuvaneśi namastubhyaṃ namaste bhairavākṛte //
namostu bagalāmukhyai dhūmāvatyai namonamaḥ

namastripurasundaryyai mātaṅgayai te namonamaḥ //
ajitāyai namastubhyaṃ vijayāyai namonamaḥ

jayāyai maṃgalāyai te vilāsinyai namonamaḥ //
dogdhrīrūpe namastubhyaṃ namo ghorākṛte'stu te

mano'parājitākāre nityākāre namonamaḥ //
śaraṇāgatapālinyai rudrāṇyai te namonamaḥ

namo vedāntavedyāyai namaste paramātmane //
anantakoṭibrahmāṇḍanāyikāyai namonamaḥ

iti devaiḥ stutā gaurī prasannā varadā śivā //
provāca tridaśānsarvānyuṣmābhiḥ stūyate'tra kā

tato gaurītanorekā prādurāsītkumārikā//
sovāca miṣatāṃ teṣāṃ śivaśaktiṃ parādarāt

stotraṃ me kriyate mātaḥ samastaiḥ svargavāsibhiḥ//
niśuṃbhaśuṃbhadaityābhyāṃ prabalābhyāṃ prapīḍitaiḥ

śarīrakośādyattasyā nirgatā tena kauśikī//
nāmnā sā gīyate sākṣācchuṃbhāsuranibarhiṇī

caivogratārikā proktā mahogratārikāpi ca//
prādurbhūtā yataḥ sā vai mātaṃgītyucyate bhuvi

babhāṣe nikhilāndevānyūyaṃ tiṣṭhata nirbhayāḥ//
kāryaṃ vaḥ sādhayiṣyāmi svatantrāhaṃ vināśrayam

ityuktvā sā tadā devī tarasāntarhitā'bhavat//
cāṇḍamuṇḍau tu tāndevīmadrāṣṭāṃ sevakau tayoḥ

dṛṣṭvā manoharaṃ tasyā rūpaṃ netrasukhāvaham//
petatustau dharāmadhye naṣṭasaṃjñau vimohitau

gatvā vyājahratuḥ sarvaṃ rājñe vṛttāntamāditaḥ //
dṛṣṭā kācinmayā pūrvā nārī rājanmanoramā

himavacchikhare ramye saṃsthitā siṃhavāhinī//
samantāddevakanyābhiḥ sevitā baddhapāṇibhiḥ

kurute pādasaṃvāhaṃ kācitsaṃskurute kacān//
pāṇisaṃvāhanaṃ kācitkācinnetrāñjanaṃ nyadhāt

kācid gṛhītvā hastenādarśaṃ darśayate mukham//
nāgavallīṃ dadātyekā lavaṃgailādisaṃyutām

patadgrahaṃ kare kṛtvā sthitā kācitsakhī puraḥ//
bhūṣayatyakhilāṃgāni kācidbhūṣāmbarādibhiḥ

kadalīstaṃbhajaṃghoruḥ kīranāsā'hidaurlatā//
raṇanmañjīracaraṇā ramyamekhalayā yutā/२४/
lasatkastūrikāmodamuktāhāracalastanī//
graiveyakalasadgrīvā lalantīdāmamaṇḍitā/२५/
arddhacandradharā devī maṇikuṇḍaladhāriṇī//
ramyaveṇirviṃśālākṣī locanatrayabhūṣitā

sākṣarā mālikopetā paṇirājitakaṃkaṇā //
svarṇormikāṃgulirbhrājatpārihāryyalasatkarā

śubhavastrāvṛtā gaurī padmāsanavirājitā //
kāśmīrabindutilakā candrālaṃkṛtamastakā

taḍiddyutirmahāmūlyāmbara colonnamatkucā //
bhujairaṣṭābhiruttuṃgairdhārayantī varāyudhān

tādṛśī nāsurī nāgī na gandharvī na dānavī //
vidyate triṣu lokeṣu yādṛśī sā manoramā

tasmātsaṃbhogayogyatvaṃ tasyāstvayyeva śobhate //
nārīratnaṃ yataḥ sā vai puṃratnaṃ ca bhavānprabho

ityuktaṃ caṇḍamuṇḍābhyāṃ niśamya sa mahāsuraḥ //
dūtaṃ sugrīvanāmānaṃ preṣayāmāsa tāṃ prati

gaccha dūta tuṣārādrau tatrāste kāpi sundarī //
sā netavyā prayatnena kathayitvā vaco mama

iti vijñāpitastena sugrīvo dānavottamaḥ //
gatvā himācalaṃ prāha jagadambāṃ maheśvarīm

dūta uvāca //
devi śuṃbhāsuro daityo niśuṃbhastasya cānujaḥ //
vikhyātastriṣu lokeṣu mahā balaparākramaḥ

cārohaṃ preṣitastena sannidhinte samāgamam //
sa yajjagau sureśāni tatsamākarṇayādhunā

indrādīnsamare jitvā teṣāṃ ratnānyapāharam //
devabhāgaṃ svayaṃ bhuñje yāge dattaṃ surādibhiḥ

strīratnaṃ tvāmahaṃ manye sarvaratnopari sthitam //
sā tvaṃ mamānujaṃ māṃ vā bhajatātkāmajai rasaiḥ

iti dūtoktamākarṇya vacanaṃ śuṃbhabhāṣitam //
jagāda sā mahāmāyā bhūteśaprāṇavallabhā

// devyuvāca //
satyaṃ vadasi bho dūta nānṛtaṃ kiṃciducyate //
parantvekā kṛtā pūrvaṃ pratijñā tānnibodha me

yo me darpaṃ vidhunute yo māṃ jayati saṃgare //
utsahe tamahaṃ kartuṃ patiṃ nānyamiti dhruvam

sa tvaṃ kathaya śuṃbhāya niśuṃbhāya vaco mama //
yathā yuktaṃ bhavedevaṃ vidadhātu tathā'tra saḥ

itthaṃ devīvacaḥ śrutvā sugrīvo nāma dānavaḥ //
rājñe vijñāpayāmāsa gatvā tatra savistaram

atha dūtoktamākarṇya śuṃbho bhairavaśāsanaḥ //
dhūmrākṣaṃ prāha sakrodhaḥ senānyaṃ balināṃ varam

he dhūmrākṣa tuṣārādrau vartate kāpi sundarī //
tāmānaya drutaṃ gatvā yathā yāsyati sātra vai

tasyā ānayane bhītirna kāryyā'surasattama //
yuddhaṃ kāryaṃ prayatnena yadi sā yoddhumicchati

evaṃ vijñāpito daityo dhūmralocanasaṃjñakaḥ //
gatvā himācalaṃ prāha bhuvaneśīmumāṃśajām

bharturmamāntikaṃ gaccha nocettvāṃ ghātayāmyaham //
puṣṭyā'surāṇāṃ sahitaḥ sahasrāṇāṃ nitaṃbini

devyuvāca //
daityarāṭpreṣito vīra haṃsi cetkiṃ karomi te //
parantvasādhyaṃ gamanaṃ manye saṃgrāmamantarā

ityuktastāmanvadhāvaddānavo dhūmralocanaḥ//
huṃkāroccāraṇenaiva tandadāha maheśvarī

tataḥ prabhṛti sā devī dhūmāvatyucyate bhuvi//
ārādhitā svabhaktānāṃ śatruvarganikartinī

dhūmrākṣe nihate devyā vāhanenātikopinā //
carvitāstadgaṇāssarve'palāyantāvaśeṣitāḥ

itthaṃ devyā hataṃ daityaṃ śrutvā śuṃbhaḥ pratāpavān //
cakāra bahulaṃ kopaṃ sandaṣṭoṣṭhapuṭadvayaḥ

caṇḍaṃ muṃḍaṃ raktabījaṃ praiṣayatkramato' surān //
tepi cājñāpitā daityā yayuryatrāmbikā sthitā

siṃhārūḍhā bhagavatīmaṇimādibhirāśritām//
bhāsayaṃtī diśo bhāsā dṛṣṭvocurddānavarṣabhāḥ

he devi tarasā mūlaṃ yāhi śuṃbhaniśuṃbhayoḥ //
anyathā ghātayiṣyāmaḥ sagaṇāṃ tvāṃ savāhanām

vṛṇīṣva taṃ patiṃ vāme lokapālādibhiḥ stutam //
prapatsyase mahānaṃdaṃ devānāmapi durlabham

ityuktamākalayyāmbā smayitvā parameśvarī //
udājahāra sā devī sūnṛtaṃ rasavadvacaḥ

devyuvāca //
advitīyo maheśānaḥ parabrahma sadāśivaḥ //
yattattvanna vidurvedā viṣṇvādīnāṃ ca kā kathā

tasyāhaṃ prakṛtiḥ sakṣmā kathamanyaṃ patimvṛṇe //
siṃhī kāmāturā naiva jambukaṃ vṛṇute kvacit //

kareṇurgardabhaṃ naiva dvīpinī śaśakaṃ na vā //
mṛṣā vadata bho daityo mṛtyuvyālaniyaṃtritāḥ

yūyaṃ prayāta pātālaṃ yudhyadhvaṃ śaktirasti cet //
iti krodhakaraṃ vākyaṃ śrutvocuste parasparam

abalāṃ manasi jñātvā na hanmo bhavatīṃ vayam //
atho sthiraihi pañcāsye yuddhecchā mānase'sti cet

teṣāmevaṃ vivadatāṃ kalahaḥ samavarddhata//
vavṛṣu samare bāṇā ubhayorddalayośśitāḥ

evaṃ taiḥ samaraṃ kṛtvā līlayā parameśvarī//
jaghāna caṇḍamuṇḍābhyāṃ raktabījaṃ mahāsuram

dveṣabuddhiṃ vidhāyāpi tridaśasthitayo'pyamī //
ante'prāpanparaṃ lokaṃ yam̐llokaṃ yānti tajjanāḥ

iti śrīśivamahāpurāṇe pañcamyāmumāsaṃhitāyāṃ dhūmralocana caṇḍamuṇḍaraktabījavadho nāma saptacatvāriṃśo'dhyāyaḥ