Shiva Purana · Chapter 5.46

ṛṣiruvāca //
āsīdraṃbhāsuro nāma daityavaṃśaśiromaṇiḥ //
tasmājjāto mahātejā mahiṣo nāma dānavaḥ

sa saṃgrāme surānsarvānnirjitya danujādhipaḥ //
cakāra rājyaṃ svarloke mahendrāsanasaṃsthitaḥ

parājitāstato devā brahmāṇaṃ śaraṇaṃ yayuḥ //
brahmāpi tānsamādāya yayau yatra vṛṣākapī

tatra gatvā surāssarve natvā śaṃkarakeśavau //
svavṛttaṃ kathāyāmāsuryathāvadanupūrvaśaḥ

bhagavantau vayaṃ sarve mahiṣeṇa durātmanā //
ujjāsitāśca svarlokānnirjitya samarāṃgaṇe

bhramāmo martyaloke'sminna labhemahi śaṃ kvacit //
kāṃ kāṃ na durdaśāṃ nītā devā indrapurogamāḥ

sūryācandramasau pāśī kubero yama eva ca //
indrāgnivātagandharvā vidyādharasucāraṇāḥ

eteṣāmapareṣāṃ ca vidheyaṃ karma sosuraḥ //
svayaṃ karoti pāpātmā daityapakṣa bhayaṃkara

tasmāccharaṇamāpannāndevānnastrātumarhathaḥ //
vadhopāyaṃ ca tasyāśu cintayethāṃ yuvāṃ prabhū

iti devavacaḥ śrutvā dāmodarasatīśvarau //
cakratuḥ paramaṃ kopaṃ roṣāghūrṇitalocanau

tatotikopapūrṇasya viṣṇośśaṃbhośca vaktrataḥ //
tathānyeṣāṃ ca devānāṃ śarīrānnirgataṃ mahaḥ

atīva mahasaḥ puṃjaṃ jvalantaṃ daśadikṣu ca //
apaśyaṃstridaśāssarve durgā dhyānaparāyaṇāḥ

sarvadevaśarīrotthaṃ tejastadatibhīṣaṇam //
saṃghībhūyābhavannārī sākṣānmahiṣamardinī

śaṃbhutejasa utpannaṃ mukhamasyāḥ subhāsvaram //
yāmyena bālā abhavanvaiṣṇavena ca bāhavaḥ

candramastejasā tasyāḥ stanayugmaṃ vyajāyata//
madhyame ndreṇa jaṃghorū vāruṇena babhūvatuḥ

bhūtejasā nitaṃbobhūdbrāhmeṇa caraṇadvayam //
ārkeṇa caraṇāṃgulyaḥ karāṃgulyaśca vāsavāt

kuberatejasā nāsā radanāśca prajāpateḥ //
pāvakīyena nayanatrayaṃ sāndhyena bhrūdvayam

ānilena śravodvandvaṃ tathānyeṣāṃ svarokasām //
tejasāṃ saṃbhavaḥ padmālayā sā parameśvarī

tato nikhiladevānāṃ tejorāśisamudbhavām //
tāmālokya surāssarve paraṃ harṣaṃ prapedire

nirāyudhāṃ ca tāṃ dṛṣṭvā brahmādyāstridiveśvarāḥ //
sāyudhāntāṃ śivāṃ kartuṃ manaḥ sandadhire surāḥ

tataḥ śūlaṃ maheśāno maheśānyai samarpayata //
cakraṃ ca kṛṣṇo bhagavāñcchaṃkhaṃ pāśaṃ ca pāśabhṛta

śaktiṃ hutāśano'yacchanmārutaścāpameva ca /////
bāṇapūrṇeṣudhī caiva vajraghaṇṭe śacīpatiḥ

yamo dadau kāladaṇḍamakṣamālāṃ prajāpatiḥ //
brahmā kamaṇḍaluṃ prādādromaraśmīndivākaraḥ

kālaḥ khaḍgandadau tasyai phalakaṃ ca samujvalam //
kṣīrābdhī ruciraṃ hāramajare ca tathāmbare

cūḍāmaṇiṃ kuṇḍale ca kaṭakāni tathaiva ca //
arddhacandraṃ ca keyūrānnūpurau ca manoharo

graiveyakamaṃgulīṣu samastāsvaṃgulīyakam//
viśvakarmā ca paraśuṃ dadau tasyai manoharam

astrāṇyanekāni tathābhedyaṃ caiva tanucchadam //
suramyasarasāṃ mālāṃ paṅkajaṃ cāmbudhirdadau

dadau siṃhaṃ ca himavānratnāni vividhāni ca //
surayā pūritaṃ pātraṃ kubero'syai samarpayat

śeṣaśca bhogināṃ netā vicitrara canāñcitam //
dadau tasyai nāgahāraṃ nānāstramaṇiguṃphitam

etaiścānyaissurairdevī bhūṣaṇairāyudhaistathā //
satkṛtoccairnanādāsau sāṭṭahāsaṃ punaḥpunaḥ

tasyā bhīṣaṇanādena pūritā ca nabhaḥsthalī //
pratiśabdo mahānāsīccukṣubhe bhuvanatrayam

celuḥ samudrāścatvāro vasudhā ca cacāla ha //
jayaśabdastato devairakāri mahiṣārditaiḥ

tato'mbikāṃ parāṃ śaktiṃ mahālakṣmīsvarūpiṇīm //
tuṣṭuvuste surāssarve bhaktigadgadayā girā

lokaṃ saṃkṣubdhamālokya devatāparipanthinaḥ //
sannaddhasainikāste ca samuttasthurudāyudhāḥ

mahiṣo'pi ca taṃ śabdamabhyadhāvadruṣānvitaḥ //
sa dadarśa tato devīṃ vyāptalokatrayāṃ rucā

/
etasminnantare tatra mahiṣāsurapālitāḥ //
samājagmurmahāvīrāḥ koṭiśo dhṛtahetayaḥ

cikṣuraścāmarodagrau karāloddhatabāṣkalāḥ //
tāmrogrāsyogravīryāśca biḍālo'ndhaka eva ca

durdharo durmukhaścaiva trinetraśca mahāhanuḥ //
ete cānye ca bahavaḥ śūrā yuddhaviśā radāḥ

yuyudhuḥ samare devyā saha śastrāstrapāragāḥ //
itthaṃ kālo vyatīyāya yudhyatorbhīṣaṇastayoḥ

arivargakarakṣiptā nānāśastrāstrarāśayaḥ //
mahāmāyāprabhāveṇa viphalā abhavan kṣaṇāt

tato jaghāna sā devī cikṣurapramukhānarīn //
sagaṇāngadayā bāṇaiḥ śūlaśaktiparaśvadhaiḥ

evaṃ svīyeṣu sainyeṣu hateṣu mahiṣāsuraḥ //
devīniḥśvāsasaṃbhūtānbhāvayāmāsa tāngaṇān

atāḍayatsaraiḥ kāścitkāścicchṛṅgadvayena ca //
lāṃgūlena ca tuṇḍena bhinatti sma muhurmuhuḥ

itthaṃ devīgaṇā nhatvābhyadhāvatso'surādhipaḥ //
siṃhaṃ mārayitundevyāstato'sau kupitā'bhavat

kopātsopi mahāvīryaḥ khurakuṭṭitabhūtalaḥ //
śṛṅgābhyāṃ śailamutpāṭya cikṣepa praṇanāda ca

vegena viṣvag bhramatā prakṣiptā guravo'drayaḥ //
ākāśato mahīmadhye nipeturnṛpasattama

śṛṃgabhinnāḥ payovāhāḥ khaṇḍaṃ khaṇḍamayāsiṣuḥ //
lāṃgūlenāhataścābdhirviṣvagudvelamaspadat

evaṃ kruddhaṃ samālokya mahiṣāsuramambikā //
vidadhe tadvadhopāyaṃ devānāmabhayaṃkarī

tataḥ pāśaṃ samutthāya kṣiptvā tasyoparī śvarī //
babandha mahiṣaṃ so'pi rūpantatyāja māhiṣam

tataḥ siṃho babhūvāśu māyāvī tacchirombikā //
yāvadbhinatti tāvatsa khaṅgapāṇirbabhūva ha

sacarmmāsikaraṃ taṃ ca devī bāṇairatāḍayat //
tato gajavapurbhūtvā siṃhaṃ ciccheda śuṇḍayā

tato'sya ca karaṃ devī cakarta svamahāsinā //
adhāri ca punā rūpaṃ svakīyaṃ tena rakṣasā

tadaiva kṣobhayāmāsa trailokyaṃ sacarācaram //
tataḥ kruddhā mahāmāyā caṇḍikā mānavikramā

papau punaḥpunaḥ pānaṃ jahāsodbhrāntalocanā //
jagarja cāsuraḥ so'pi balavīryamado ddhataḥ

tasyā upari cikṣepa śailānutpāṭya so'suraḥ //
sā ca bāṇāvalīghātaiścūrṇayāmāsa satvaram

vāruṇīmadrasaṃ jātamukharāgā''kulendriyā //
provāca parameśānī meghagaṃbhīrayā girā

// devyuvāca //
re mūḍha re hataprajña vyartha kiṃ kuruṣe haṭham //
na madagre'surāḥ kepi sthāsnavo jagatītraye

ṛṣi ruvāca //
ekamābhāṣya kūrditvā devī sarvakalāmayī //
padākramyāsuraṃ kaṇṭhe śūlenogreṇa sā'bhinat

tatastaccaraṇākrāntassa svakīyamukhāttataḥ //
arddhaniṣkrānta evāsīddevyā vīryeṇa saṃvṛtaḥ

arddhaniṣkrānta evāsau yudhyamāno mahādhamaḥ //
mahāsinā śiro bhittvā nyapāti dharaṇītale

hāhāśabdaṃ samuccāryyāvāṅmukhāstadgaṇāstataḥ //
palāyanta raṇādbhītāstrāhitrāhīti vādinaḥ

tuṣṭuvuśca tadā devīmindrādyāḥ sakalāḥ surāḥ //
gandharvā gītamuccerurnanṛturnartakījanāḥ

evante kathito rājanmahālakṣmyāḥ samudbhavaḥ //
sarasvatyāstathotpattiṃ śṛṇu susthena cetasā

iti śrīśivamahāpurāṇe pañcamyāmumāsaṃhitāyāṃ mahiṣāsuravadhopākhyāne mahālakṣmyavatāravarṇanaṃ nāma ṣaṭcatvāriṃśo'dhyāyaḥ