Shiva Purana · Chapter 5.32

sūta uvāca //
aditirditiśca surasāriṣṭelā danureva ca //
surabhirvinatā celā tāmrā krodhavaśā tathā

kadūrmuniśca viprendra tāsvapatyāni me śṛṇu //
pūrvamanvaṃtare śreṣṭhe dvādaśāsansurottamāḥ

tuṣitā nāma te'nyonyamūcurvaivasvateṃtare //
upasthite suyaśasaścākṣuṣasyāṃtare manoḥ

hitāya sarvalokānāṃ samāgamya parasparam //
āgacchatastu tānūcuraditiṃ ca praviśya vai

manvaṃtare prasūyāmassatāṃ śreyo bhaviṣyati //
evamuktāstu te sarve cākṣuṣasyāntare manoḥ

mārīcātkaśyapājjātāste'dityāṃ dakṣakanyayā//
tatra viṣṇuśca śakraśca jajñāte punareva hi

aryamā caiva dhātā ca tvaṣṭā pūṣā tathaiva ca //
vivasvānsavitā caiva mitrāvaruṇa eva ca

aṃśo bhagaścātitejā ādityā dvādaśa smṛtāḥ //
pūrvamāsanye tuṣitāssurāḥ

puraiva tasyāṃtare tu ādityā dvādaśa smṛtāḥ //
iti proktāni kramaśo'dityapatyāni śaunaka

saptaviṃśati yāḥ proktāssomapatnyo'tha suvratāḥ//
tāsāmapatyānyabhavandīptayo'mitatejasaḥ

ariṣṭanemipatnīnāmapatyānīha ṣoḍaśa //
bahuputrasya viduṣaścatasro yāssutāḥ smṛtāḥ

kṛśāśvasya tu devarṣe devapraharaṇāḥ smṛtāḥ //
bhārmyāyāmarciṣi mune dhūmrakeśastathaiva ca

svadhā satī ca dve patnyau svadhā jyeṣṭhā satī parā //
svadhāsūta pitṝnvedamatharvāṅgirasaṃ satī

ete yugasahasrāṃte jāyaṃte punareva hi//
sarvadevanikāyāśca trayastriṃśattu kāmajāḥ

yathā sūryyasya nityaṃ hi udayāstamayāviha //
evaṃ devānikāste ca saṃbhavaṃti yugeyuge

dityāṃ babhūvatuḥ putrau kaśyapāditi naḥ śrutam//
hiraṇyakaśipuścaiva hiraṇyākṣaśca vīryavān

siṃhikā hyabhavatkanyā vipracitteḥ parigrahaḥ //
hiraṇyakaśipoḥ putrāścatvāraḥ prathitaujasaḥ

anuhrādaśca hrādaśca saṃhrādaścaiva vīryavān //
prahrādaścānujastatra viṣṇubhaktivicāradhīḥ

anuhrādasya sūryāyāṃ pulomā mahiṣastathā//
hrādasya dhamanirbhāryāsūta vātāpimilvalam

saṃhrādasya kṛtirbhāryāsūtaḥ paṃcajanaṃ tataḥ //
virocanastu prāhrādirdevyāstasyābhavadbaliḥ /

baleḥ putraśataṃ tvāsīdaśanāyāṃ munīśvara//
balirāsīnmahāśaivaḥ śivabhaktiparāyaṇaḥ

dānaśīla udāraśca puṇyakīrti tapāḥ smṛtaḥ//
tatputro bāṇanāmā yatso'ṣi śaivavarassudhīḥ //
yassaṃtoṣya śivaṃ samyaggāṇapatyamavāpa ha

sā kathā śrutapūrvā te bāṇasya hi mahātmanaḥ //
kṛṣṇaṃ yassamare vīrassuprasannaṃ cakāra ha

hiraṇyākṣasutāḥ paṃca paṃḍitāstu mahābalāḥ //
kukuraḥ śakuniścaiva bhūtasaṃtāpanastathā // २४
mahānādaśca vikrāṃtaḥ kālanābhastathaiva ca //
ityuktā ditiputrāśca danoḥ putrānmune śṛṇu

abhavandanuputrāśca śataṃ tīvraparākramāḥ //
ayomukhaśśaṃbaraśca kapolo vāmanastathā

vaiśvānaraḥ pulomā ca vidrāvaṇamahāśirau //
svarbhānurvṛṣaparvā ca vipracittiśca vīryavān

ete sarve danoḥ putrāḥ kaśyapādanujajñire //
eṣāṃ putrāñcchṛṇu mune prasaṃgādvacmi te'nagha

svabhārnostu prabhā kanyā pulomnastu śacī sutā //
upadānavī hayaśirā śarmmiṣṭhā vārṣaparvaṇī

pulomā pulomikā caiva vaiśvānarasute ubhe //
bahvapatye mahāvīryye mārīcestu parigrahaḥ

tayoḥ putrasahasrāṇi ṣaṣṭirdānavanandanāḥ //
marīcirjanayāmāsa mahatā tapasānvitaḥ

paulomāḥ kālakhaṃjāśca dānavānāṃ mahābalā //
avadhyā devatānāṃ ca hiraṇyapuravāsinaḥ

pitāmahaprasādena ye hatāḥ savyasācinā //
siṃhikāyāmathotpannā vipracittessutāstathā

daityadānavasaṃyogājjātāstīvraparākramāḥ //
saiṃhikeyā iti khyātāstrayodaśa mahābalāḥ

rāhuḥ śalyo subalino balaścaiva mahābalaḥ //
vātāpirnamuciścaivāthelvalaḥ svasṛpastathā

ajiko narakaścaiva kālanābhastathaiva ca //
śaramāṇaśśarakalpaśca ete vaṃśavivarddhanāḥ

eṣāṃ putrāśca pautrāśca danuvaṃśavivarddhanāḥ //
bahavaśca samudbhūtā vistaratvānna varṇitāḥ .

saṃhrādasya tu daiteyā nivātakavacāḥ kule //
utpannā marutastasmiṃstapasā bhāvitātmanaḥ

ṣaṇmukhādyā mahāsattvāstāmrāyāḥ parikīrtitāḥ //
kākī śyenī ca bhāsī ca sugrīvī ca śukī tathā

gṛddhrikāśvī hyulūkī ca tāmrā kanyāḥ prakīrtitāḥ //
kākī kākānajanayadulūkī pratyulūkakān

śyenī śyenāṃstathā bhāsī bhāsā ngṛddhī tu gṛdhrakān //
śukī śukānajanayatsugrīvī śubhapakṣiṇaḥ

aśvānuṣṭrāngardabhāṃśca tāmrā ca kaśyapapriyā //
janayāmāsa cetyevaṃ tāmrāvaṃśāḥ prakīrtitāḥ

vinatāyāśca putrau dvāvaruṇo garuḍastathā //
suparṇaḥ patatāṃ śreṣṭho nāruṇassvena karmaṇā

surasāyāssahasraṃ tu sarpāṇāmamitaujasām //
anekaśirasāṃ teṣāṃ khecarāṇāṃ mahātmanām

yeṣāṃ pradhānā rājānaḥ śeṣavāsukitakṣakāḥ //
airāvato mahāpadmaḥ kaṃbalāśvatarāvubhau

ailāputrastathā padmaḥ karkoṭakadhanaṃjayau//
mahānīlamahākarṇau dhṛtarāṣṭro balāhakaḥ

kuharaḥ puṣpadantaśca durmukhāssumukhastathā //
bahuśaḥ khararomā ca pāṇirityevamādayaḥ

gaṇāḥ krodhavaśāyāśca tasyāssarve ca daṃṣṭriṇaḥ //
aṃḍajāḥ pakṣiṇo'bjāśca varāhyāḥ paśavo matāḥ

anāyuṣāyāḥ putrāśca paṃcāśacca mahābalāḥ //
abhavanbalavṛkṣau ca vikṣaro'tha bṛhaṃstathā

śaśāṃstu janayāmāsa surabhirmahiṣāṃstathā//
ilā vṛkṣām̐llatā vallīstṛṇajātīstu sarvaśaḥ

khaśā tu yakṣarakṣāṃsi munirapsarasastathā //
ariṣṭāsūta sarpāṃśca prabhāvairmānavottamān

ete kaśyapadāyādāḥ kīrtitāste munīśvara //
yeṣāṃ putrāśca pautrāśca śataśo'tha sahasraśaḥ

iti śrīśivamahāpurāṇe pañcamyā mumāsaṃhitāyāṃ kaśyapavaṃśavarṇanaṃ nāma dvātriṃśo'dhyāyaḥ