Shiva Purana · Chapter 5.31

śaunaka uvāca //
devānāṃ dānavānāṃ ca gandharvoragarakṣasām //
sṛṣṭiṃ tu vistareṇemāṃ sūtaputra vadāśu me

sūta uvāca //
yadā na vavṛdhe sā tu vīraṇasya prajāpatiḥ //
sutāṃ sutapasā yuktāmāhvayatsargakāraṇāt

sa maithunena dharmeṇa sasarja vividhāḥ prajāḥ //
tāḥ śṛṇu tvaṃ mahāprājña kathayāmi samāsataḥ

tasyāṃ putrasahasrāṇi vīriṇyāṃ paṃca vīryavān//
āśritya janayāmāsa dakṣa eva prajāpatiḥ

etānsṛṣṭāṃstu tāndṛṣṭvā nāradaḥ prāha vai muniḥ //
sarvaṃ sa tu samutpanno nāradaḥ parameṣṭhinaḥ

śrutavānvā kaśyapādvai puṃsāṃ sṛṣṭirbhaviṣyati //
dakṣasyeva duhitṛṣu tasmāttānabravīttu saḥ

ajānataḥ kathaṃ sṛṣṭiṃ bāliśā vai kariṣyatha //
diśaṃ kāṃcidajānaṃtastasmādvijñāya tāṃ bhuvam

ityuktāḥ prayayussarve āśāṃ vijñātumojasā //
tadaṃtaṃ na hi saṃprāpya na nivṛttāḥ piturgṛham

tajjñātvā janayāmāsa punaḥ paṃcaśatānsutān//
tānuvāca punasso'pi nāradassarvadarśanaḥ

nārada uvāca //
bhuvo mānamajānaṃtaḥ kathaṃ sṛṣṭiṃ kariṣyatha //
sarve hi bāliśāḥ kiṃ hi sṛṣṭikartuṃ samudyatāḥ

sūta uvāca//
te'pi tadvacanaṃ śrutvā niryātāssarvatodiśam //
subalāśvā dakṣasutā haryaśvā iva te purā

anaṃtaṃ puṣkaraṃ prāpya gatāste'pi parābhavam //
adyāpi na nivartaṃte samudrebhya ivāpagāḥ

tadāprabhṛti vai bhrātā bhrāturanveṣaṇe rataḥ //
prayāto naśyati mune tanna kāryyaṃ vipaścitā

tāṃścāpi naṣṭānvijñāya putrāndakṣaḥ prajāpatiḥ //
sa ca krodhā ddadau śāpaṃ nāradāya mahātmane

kutracinna labhasveti saṃsthitiṃ kalahapriya //
tava sānnidhyato loke bhavecca kalahassadā

sāṃtvito'tha vidhātrā hi sa dakṣastu prajāpatiḥ//
kanyāḥ ṣaṣṭyasṛjatpaścādvīriṇyāmiti naḥ śrutam

dadau sa daśa dharmāya kaśyapāya trayodaśa //
saptaviṃśati somāya catasro'riṣṭanemine

dve caivaṃ brahmaputrāya dve caivāṅgirase tadā //
dve kṛśāśvāya viduṣe tāsāṃ nāmāni me śṛṇu

aruṃdhatī vasuryyāmirlambā bhānurmarutvatī //
saṃkalpā ca muhūrtā ca saṃdhyā viśvā ca vai mune

dharmapatnyo mune tvetāstāsvapatyāni me śṛṇu //
viśvedevāstu viśvāyāssādhyānsādhyā vyajāyata

marutvatyāṃ marutvaṃto vasostu vasavastathā //
bhānostu bhānavassarve muhūrtāyāṃ muhūrtajāḥ

lambāyāścaiva ghoṣo'tha nāgavīthī ca yāmijā //
pṛthivī viṣamastasyāmarundhatyāmajāyata

saṃkalpāyāstu satyātmā jajñe saṃkalpa eva hi//
ayādayā vasoḥ putrā aṣṭau tāñchṛṇu śaunaka // २३ /
ayo dhuvaśca somaśca dharaścaivānilo'nalaḥ //
pratyūṣaśca prabhāsaśca vasavā'ṣṭā ca nāmataḥ

ayasya putro vaitaṇḍaḥ śramaḥ śāṃto munistathā //
dhruvasya putro bhagavānkālo lokabhāvanaḥ

somasya bhagavānvarcā varcasvī yena jāyate //
dharasya putro draviṇo hutahavyavahastathā

manoharāyāśśiśiraḥ prāṇo'tha ramaṇastathā //
anilasya śivā bhāryyā yasyāḥ putrāḥ purojavaḥ

avijñātagatiścaiva dvau putrāvanilasya tu//
agniputraḥ kumārastu śarastambe śriyāvṛte

tasya śākho viśākhaśca naigameyaśca pṛṣṭhataḥ//
apatyaṃ kṛttikānāṃ tu kārtikeya iti smṛtaḥ

pratyūṣasya tvabhūtputra ṛṣirnāmnā tu devalaḥ//
dvau putrau devalasyāpi prajāvantau manīṣiṇau

bṛhaspate tu bhaginī varastrī brahmacāriṇī //
yogasiddhā jagatkṛtsnaṃ samaṃtādvyacarattadā

prabhāsasya tu sā bhāryyā vasūnāmaṣṭamasya ca//
viśvakarmā mahābhāga tasya jajñe prajāpatiḥ

kartā śilpasahasrāṇāṃ tridaśānāṃ ca vārddhakiḥ//
bhūṣaṇānāṃ ca sarveṣāṃ kartā śilpavatāṃ varaḥ

yassarvāsāṃ vimānāni devatānāṃ cakāra ha //
manuṣyāścopajīvanti yasya śilpaṃ mahātmanaḥ

matāṃtaramāha //
raivato'jo bhavo bhīmo vāma ugro vṛṣākapiḥ //
ajaikapādahirbudhnyo bahurūpo mahāniti

sarūpāyāṃ prasūtasya striyāṃ rudraśca koṭiśaḥ //
tatraikādaśamukhyāstu tannāmāni mune śṛṇu

ajaikapādahirbudhnyastvaṣṭā rudraśca vīryavān//
haraśca bahurūpaśca tryambakaścāparājitaḥ

vṛṣākapiśca śambhuśca kapardī raivatastathā //
ekādaśaite kathitā rudrāstribhuvaneśvarāḥ

śataṃ tvevaṃ samākhyātaṃ rudrāṇāmamitaujasām//
śṛṇu kaśyapapatnīnāṃ nāmāni munisattama

iti śrīśivamahāpurāṇe pañcamyāmumāsaṃhitāyāṃ sargavarṇanaṃ nāmaika'triṃśodhyāyaḥ