Shiva Purana · Chapter 5.3

// sanatkumāra uvāca //
etacchrutvā vacastasya sobravīttaṃ mahāmunim//
vismayaṃ paramaṃ gatvopamanyuṃ śāṃtamānasam

vāsudeva uvāca //
dhanyastvamasi viprendra kastvāṃ stotumalaṃ kṛtī //
yasya devādidevaste sānnidhyaṃ kurute śrame

darśanaṃ muniśārdūla dadyātsa bhagavāñchivaḥ //
api tāvanmamāpyevaṃ prasādaṃ vā karotvasau / ३ //
upamanyuruvāca //
acireṇaiva kālena mahādevaṃ na saṃśayaḥ //
tasyaiva kṛpayā tvaṃ vai drakṣyase puruṣottama

ṣoḍaśe māsi suvarān prāpsyasi tvaṃ maheśvarāt //
sapatnīkātkathaṃ no dāsyate devo varānhare

pūjyosi daivataissarvaiḥ ślāghanīyassadā guṇaiḥ //
jāpyaṃ te'haṃ pravakṣyāmi śraddadhānāya cācyuta

tena japaprabhāveṇa satyaṃ drakṣyasi śaṃkaram //
ātmatulyabalaṃ putraṃ labhiṣyasi maheśvarāt

japo namaśśivāyeti maṃtrarājamimaṃ hare //
sarvakāmapradaṃ divyaṃ bhuktimuktipradāyakam

// sanatkumāra uvāca //
evaṃ kathayatastasya mahādevāśritāḥ kathāḥ //
dinānyaṣṭau prayātāni muhūrtamiva tāpasa

navame tu dine prāpte muninā sa ca dīkṣitaḥ //
maṃtramadhyāpitaṃ śārvamātharvaśirasaṃ mahat

jaṭī muṇḍī ca sadyo'sau babhūva susamāhitaḥ //
pādāṃguṣṭhoddhṛtatanustepe corddhvabhujastathā

saṃprāpte ṣoḍaśe māsi saṃtuṣṭaḥ parameśvaraḥ //
pārvatyā sahitaśśaṃbhurdadau kṛṣṇāya darśanam

pārvatyā sahitaṃ devaṃ trinetraṃ candraśekharam //
brahmādyaisstūyamānaṃ tu pūjitaṃ siddhakoṭibhiḥ

divyamālyāmbaradharaṃ bhaktinamraissurāsuraiḥ //
praṇataṃ ca viśeṣeṇa nānābhūṣaṇabhūṣitam

sarvāścaryamayaṃ kāṃtaṃ maheśamajamavyayam //
nānāgaṇānvitaṃ tuṣṭaṃ putrābhyāṃ saṃyutaṃ prabhum

śrīkṛṣṇaḥ prāṃjalirdṛṣṭvā vismayotphullalocanaḥ //
īdṛśaṃ śaṃkaraṃ prītaḥ praṇanāma mahotsavaḥ

nānāvidhaiḥ stutipadairvāṅmayenārcayattadā //
sahasranāmnā deveśaṃ tuṣṭāva natakaṃdharaḥ

tato devāssagaṃdharvā vidyādharamahoragāḥ //
mumucuḥ puṣpavṛṣṭiṃ ca sādhuvādānmanonugān

pārvatyāśca mukhaṃ dṛṣṭvā bhagavānbhaktavatsalaḥ //
uvāca keśavaṃ tuṣṭo rudraścātha biḍaujasā

śrīmahādeva uvāca //
kṛṣṇaṃ jānāmi bhaktaṃ tvāṃ mayi nityaṃ dṛḍhavratam //
vṛṇīṣva tvaṃ varānmattaḥ puṇyāṃstrailokyadurlabhān

// sanatkumāra uvāca //
tasya tadvacanaṃ śrutvā kṛṣṇaḥ prāṃjalirādarāt //
prāha sarveśvaraṃ śambhuṃ supraṇamya punaḥ punaḥ

// kṛṣṇa uvāca //
devadeva mahādeva yāce'haṃ hyuttamānvarān //
tvatto'ṣṭapramitānnātha tvayoddiṣṭānmaheśvara

tava dharmme matirnityaṃ yaśaścāpracalaṃ mahat //
tvatsāmīpyaṃ sthirā bhaktistvayi nityaṃ mamāstviti

putrāṇi ca daśādyānāṃ putrāṇāṃ mama saṃtu vai //
vadhyāśca ripavassarve saṃgrāme baladarpitāḥ

apamāno bhavennaiva kvacinme śatrutaḥ prabho //
yogināmapi sarveṣāṃ bhaveyamativallabhaḥ

ityaṣṭau suvarāndehi devadeva namo'stu te //
sarveśvarastvamevāsi matprabhuśca viśeṣataḥ

sanatkumāra uvāca //
tasya tadvacanaṃ śrutvā tamāha bhagavānbhavaḥ //
sarvaṃ bhaviṣyatītyevaṃ punassa prāha śūladhṛk

sāmbo nāma mahāvīryaḥ putraste bhavitā balī//
ghorasaṃvartakādityaśśapto munibhireva ca

mānuṣo bhavitāsīti sa te putro bhavi ṣyati //
yadyacca prārthitaṃ kiṃcittatsarvaṃ ca labhasva vai

sanatkumāra uvāca //
evaṃ labdhvā varānsarvāñchrīkṛṣṇaḥ parameśvarāt //
nānāvidhābhirbahvībhisstutibhissamatoṣayat

tamāhātha śivā tuṣṭā pārvatī bhaktavatsalā//
vāsudevaṃ mahātmānaṃ śaṃbhubhaktaṃ tapasvinam

// pārvatyuvāca //
vāsudeva mahābuddhe kṛṣṇa tuṣṭāsmi te'nagha //
gṛhāṇa mattaśca varānmanojñānbhuvi durlabhān

sanatkumāra uvāca //
ityākarṇya vacastasyāḥ pārvatyāssa yadūdvahaḥ //
uvāca suprasannātmā bhaktiyuktena cetasā

śrīkṛṣṇa uvāca //
devi tvaṃ parituṣṭāsi ceddadāsi varānhi me //
tapasā'nena satyena brāhmaṇānprati māsmabhūt

dveṣaḥ kadācidbhadraṃ pūjayeyaṃ dvijānsadā //
tuṣṭau ca mātāpitarau bhavetāṃ mama sarvadā

sarvabhūteṣvānukūlyaṃ bhajeyaṃ yatra tatragaḥ//
kule prabhṛti rucitā mamāstu tava darśanāt

tarpayeyaṃ surendrādīndevān yajñaśatena tu //
yatīnāmatithīnāṃ ca sahasrāṇyatha sarvadā

/
bhojayeyaṃ sadā gehe śraddhāpūtaṃ tu bhojanam //
bāṃdhavaissaha prītistu nityamastu sunirvṛtiḥ

devi bhāryyāsahasrāṇāṃ bhaveyaṃ prāṇavallabhaḥ //
akṣīṇā kāmyatā tāsu prasādāttava śāṃkari

āsāṃ ca pitaro loke bhaveyuḥ satyāvādinaḥ //
ityādyāḥ suvarāssaṃtu prasādāttava pārvati

// sanatkumāra uvāca //
tasya tadvacanaṃ śrutvā devī taṃ cāha vismitā //
evamastviti bhadraṃ te śāśvatī sarvakāmadā

tasmiṃstāṃśca varāndattvā pārvatīparameśvarau //
tatraivāṃtaśca dadhatuḥ kṛtvā kṛṣṇasya satkṛpām

kṛṣṇaḥ kṛtārthamātmānamamanyata munīśvaraḥ //
upamanyormunarāśu prāpāśramamanuttamam

praṇamya śirasā tatra taṃ muniṃ keśihā tataḥ //
tayā vṛttaṃ ca tasmai tatsamācaṣṭopamanyave

sa ca taṃ prāha ko'nyassyāccharvāddevājjanārddana //
mahādānapatirloke krodhe vā'tīva dussahaḥ / ४५ //
jñāne tapasi vā śauryye sthairyye vā pada eva ca //
śṛṇu śaṃbhostu govinda devaiśvaryyaṃ mahāyaśāḥ

tacchrutvā śraddhayā yukto'bhavacchaṃbhostu bhaktimān //
papraccha śivamāhātmyaṃ sa taṃ prāha munīśvaraḥ

upamanyuruvāca //
bhagavāñśaṃkaraḥ pūrvaṃ brahmaloke mahātmanā //
stuto nāmasahasreṇa daṇḍinā brahmayoginā

sāṃkhyāḥ paṭhaṃti tadgītaṃ vistīrṇaṃ ca nighaṃṭavat//
durjñānaṃ mānuṣāṇāṃ tu stotraṃ tatsarvakāmadam

smarannityaṃ śaṃkaraṃ tvaṃ gaccha kṛṣṇa gṛhaṃ sukhī //
bhaviṣyasi sadā tāta śivabhaktagaṇāgraṇīḥ

ityuktastaṃ namaskṛtya vāsudevo munīśvaram //
manasā saṃsmarañśaṃbhuṃ keśavo dvārakāṃ yayau

sanatkumāra uvāca //
evaṃ kṛṣṇassamārādhya śaṃkaraṃ lokaśaṃkaram //
kṛtārtho'bhūnmuniśreṣṭha sarvājeyo'bhavattathā

tathā dāśarathī rāmaśśivamārādhya bhaktitaḥ //
kṛtārtho'bhūnmuniśreṣṭha vijayī sarvato'bhavat

tapastaptvā'tivipulaṃ purā rāmo girau mune//
śivāddhanuśśaraṃ cāpaṃ jñānaṃ vai paramuttamam

rāvaṇaṃ sagaṇaṃ hatvā setuṃ baddhvāṃbhasāṃnidhau//
sītāṃ prāpya gṛhaṃ yāto bubhuje nikhilāṃ mahīm

tathā ca bhārgavo rāmo hyārādhya tapasā vibhum//
nirīkṣya duḥkhitaśśarvātpitaraṃ kṣatriyairhatam

tīkṣṇaṃ sa paraśuṃ lebhe nirdadāha ca tena tān //
trissaptakṛtvaḥ kṣatrāṃśca prasannātparameśvarāt

ajeyaścāmaraścaiva so'dyāpi tapasāṃnidhiḥ //
liṃgārcanarato nityaṃ dṛśyate siddhacāraṇaiḥ

mahendraparvate rāmaḥ sthitastapasi tiṣṭhati //
kalpāṃte punarevāsāvṛṣisthānamavāpsyati

asitasyānujaḥ pūrvaṃ pīḍayā kṛtavāṃstapaḥ //
mūlagrāheṇa viśvasya devalo nāma tāpasaḥ

purandareṇa śaptastu tapasvī yaśca susthiram //
adharmyaṃ dharmamala malliṃgamāradhya kāmadam

cākṣuṣasya manoḥ putro mṛgo'bhūttu marusthale //
vasiṣṭhaśāpādgṛtsamado daṇḍakāraṇya ekalaḥ

hṛdaye saṃsmanbhaktyā pravaṇena yutaṃ śivam //
tasmānmṛtyumukhākāro gaṇo mṛgamukho'bhavat

ajarāmaratāṃ nītastīrtvā śāpaṃ punaśca saḥ //
śaṃkareṇa kṛtaḥ prītyā nityaṃ lambodarānugaḥ

gārgyāya pradadau śarvo mokṣaṃ ca bhuvi durlabham //
kāmacārī mahākṣetraṃ kālajñānaṃ maharddhimat

catuṣpādaṃ sarasvatyāḥ pāraṃgatvaṃ ca śāśvatam //
na tulyaṃ ca sahasraṃ tu putrāṇāṃ pradadau śivaḥ

vedavyāsaṃ tu yogīndraṃ putraṃ tuṣṭaḥ pināka dhṛk //
parāśarāya ca dadau jarāmṛtyuvivarjitam

māṃḍavyaśśaṃkaraṇaiva jīvaṃ dattvā visarjitaḥ//
varṣāṇāṃ daśa lakṣāṇi śūlāgrā davaropitaḥ

daridro brāhmaṇaḥ kaścinnikṣipya guruveśmani //
putraṃ tu gālavaṃ yaśca pūrvamāsīdgṛhāśramī

gupto vā muniśālāyāṃ bhikṣurāyāti tadgṛham //
bhāryyāmuvāca yaḥ kaścidavaśyaṃ nirdhano yataḥ

sa tu vācyo bhavatyā ca na dṛśyaṃta iti priyaḥ //
atitherāgatasyāpi kiṃ dāsyāmi gṛhe vasan

kadācidatithiḥ kaścitkṣuttṛṣākṣāmatarṣitaḥ //
tāmuvāca sa bhartā te kva gataśceti taṃ ca sā

prāha bhartā madīyastu sāṃprataṃ na ca dṛśyate //
sa ṛṣistāmuvācedaṃ jñātvā divyena cakṣuṣā

gṛhasthitaḥ praticchannastatraiva sa mṛto dvijaḥ //
viśvāmitrasyanujñātastatputro gālavastathā

gṛhamāgatya mātussa śrutvā śāpaṃ sudāruṇam //
ārādhya śaṃkaraṃ devaṃ pūjāṃ kṛtvā tu śāṃbhavīm

gṛhādasau viniṣkrāṃtassaṃsmarañśaṃkaraṃ hṛdā//
atha taṃ tanayaṃ dṛṣṭvā pitā taṃ prāha sāñjalim

mahādevaprasādācca kṛtakṛtyo'smi kṛtyataḥ //
dhanavānputravāṃścaiva mṛto'haṃ jīvitaḥ punaḥ

iti vaḥ kathitamaśeṣaṃ nāhaṃ śaktaḥ samāsato vyāsāt //
vaktuṃ śaṃbhośca guṇāñśeṣasyāpi na mukhāni syuḥ

iti śrīśivamahāpurāṇe paṃcamyāmumāsaṃhitāyāṃ kṛṣṇādiśivabhaktoddhāraṇa śivamāhātmyavarṇanaṃnāma tṛtīyo'dhyāyaḥ