Shiva Purana · Chapter 5.2

sanatkumāra uvāca //
ityākarṇya munervākyamupamanyormahātmanaḥ //
jātabhaktirmahādeve kṛṣṇaḥ provāca taṃ munim

// śrīkṛṣṇa uvāca //
upamanyo mune tāta kṛpāṃ kuru mamopari //
ye ye śivaṃ samārādhya kāmānāpuśca tānvada

sanatkumāra uvāca //
ityākarṇyopamanyussa muniśśaivavaro mahān //
kṛṣṇavākyaṃ supraśasya pratyuvāca kṛpānidhiḥ

upamanyuruvāca//
yairyairbhavārādhanataḥ prāpto hṛtkāma eva hi //
tāṃstānbhaktānpravakṣyāmi śṛṇu tvaṃ vai yadūdvaha

śarvātsarvāmaraiśvaryyaṃ hiraṇyakaśipuḥ purā //
varṣāṇāṃ daśalakṣāṇi so'labhaccandraśekharāt

tasyā'tha putrapravaro nandano nāma viśrutaḥ //
sa ca śarvavarādindraṃ varṣāyutamadhonayat

viṣṇucakraṃ ca taddhoraṃ vajramākhaṇḍalasya ca //
śīrṇaṃ purā'bhavatkṛṣṇa tadaṃgeṣu mahāhave

na śastrāṇi vahaṃtyaṃge dharmatastasya dhīmataḥ //
grahasyātibalasyājau cakravajramukhānyapi

ardyamānāśca vibudhā graheṇa subalīyasā //
devadattavarā jaghnurasurendrāssurānbhṛśam

tuṣṭo vidyutprabhasyāpi trailokyeśvaratā madāt //
śatavarṣasahasrāṇi sarvalokeśvaro bhavaḥ

tathā putrasahasrāṇāmayutaṃ ca dadau śivaḥ //
mama cānucaro nityaṃ bhaviṣyasyabravīditi

kuśadvīpe śubhaṃ rājyamadadādbhagavānbhavaḥ //
sa tasmai śaṅkaraḥ prītyā vāsudeva prahṛṣṭadhīḥ

dhātrā sṛṣṭaśśatamakho daityo varṣaśataṃ purā //
tapaḥ kṛtvā sahasraṃ tu putrāṇāmalabhadbhavāt

yājñavalkya iti khyāto gīto vedeṣu vai muniḥ//
ārādhya sa mahādevaṃ prāptavāñjñānamuttamam

vedavyāsastu yo nāmnā prāptavānatulaṃ yaśaḥ//
so'pi śaṃkaramārādhya trikālajñānamāptavān

indreṇa vālakhilyāste paribhūtāstu śaṅkarāt //
lebhire somahartāraṃ garuḍaṃ sarvadurjayam

āpaḥ pranaṣṭāḥ sarvāśca pūrvaroṣātkaparddinaḥ //
śarvaṃ samakapālena devairiṣṭvā pravartitam

atrerbhāryyā cānasūyā trīṇi varṣaśatāni ca //
muśaleṣu nirāhārā suptvā śarvāttatassutān

dattātreyaṃ muniṃ lebhe candraṃ durvāsasaṃ tathā //
gaṃgāṃ pravartayāmāsa citrakūṭe pativratā

vikarṇaśca mahādevaṃ tathā bhaktasukhāvaham //
prasādya mahatīṃ siddhimāptavānmadhusūdana

citraseno nṛpaśśaṃbhuṃ prasādya dṛḍhabhaktimān //
samastanṛpabhītibhyo'bhayaṃ prāpātulaṃ ca kam

śrīkaro gopikāsūnurnṛpapūjāvilokanāt //
jātabhaktirmahādeve paramāṃ siddhimāptavān

citrāṅgado nṛpasutassīmantinyāḥ patirhare //
śivānugrahato magno yamunāyāṃ mṛto na hi

sa ca takṣālayaṃ gatvā tanmaitrīṃ prāpya suvrataḥ //
āyātaḥ svagṛhaṃ prīto nānādhanasamanvitaḥ

sīmaṃtinī priyā tasya somavrataparāyaṇā//
śivānugrahataḥ kṛṣṇa lebhe saubhāgyamuttamam

tatprabhāvādvrate tasminneko dvijasutaḥ purā //
kaścitstrītvaṃ gato lobhātkṛtadārākṛtiśchalāt

caṃcukā puṃścalī duṣṭā gokarṇe dvijataḥ purā //
śrutvā dharmakathāṃ śaṃbhorbhaktyā prāpa parāṃ gatim

svastryanugrahataḥ pāpī biṃdugo caṃcukāpatiḥ //
śrutvā śivapurāṇaṃ sa sadgatiṃ prāpa śāṃkarīm

piṃgalā gaṇikā khyātā madarāhvo dvijādhamaḥ //
śaivamṛṣabhamabhyarcya lebhāte sadgatiṃ ca tau

mahānandābhidhā kaścidveśyā śivapadādṛtā //
dṛḍhātpaṇātsuprasādya śivaṃ lebhe ca sadgatim

kaikeyī dvijabālāḥ ca sādarāhvā śivavratā //
paramaṃ hi sukhaṃ prāpa śiveśavratadhāraṇāt

vimarṣaṇaśca nṛpatiśśivabhaktiṃ vidhāya vai //
gatiṃ lebhe parāṃ kṛṣṇa śivānugrahataḥ purā

durjanaśca nṛpaḥ pāpī bahustrīlaṃpaṭaḥ khalaḥ //
śivabhaktyā śivaṃ prāpa nirliptaḥ sarvakarmasu

sastrīkaśśabaro nāmnā śaṃkaraśca śivavratī //
citābhasmarato bhaktyā lebhe tadgatimuttamām

sauminī nāma cāṇḍālī saṃpūjyājñānato hi sā //
lebhe śaivīṃ gatiṃ kṛṣṇa śaṃkarānugrahātparāt

mahākālābhidho vyādho kirātaḥ parahiṃsakaḥ //
samabhyarcya śivaṃ bhaktyā lebhe sadgatimuttamām

durvāsā muniśārdūlaśśivānugrahataḥ purā //
tastāra svamataṃ loke śivabhaktiṃ vimuktidām

kauśikaśca samārādhya śaṃkaraṃ loka śaṃkaram //
brāhmaṇo'bhūtkṣatriyaśca dvitīya iva padmabhūḥ

śivamabhyarcya sadbhaktyā viraṃciśśaivasattamaḥ //
abhūtsargakaraḥ kṛṣṇa sarvalokapitāmahaḥ

mārkaṇḍeyo munivaraściraṃjīvī mahāprabhuḥ//
śivabhaktavaraḥ śrīmāñśivānugrahato hare

devendro hi mahāśaivastrailokyaṃ bubhuje purā//
śivānugrahataḥ kṛṣṇa sarvadevādhipaḥ prabhuḥ

baliputro mahāśaivaśśivānugrahato vaśī//
bāṇo babhūva brahmāṇḍanāyakassakaleśvaraḥ

hariśśaktiśca sadbhaktyā dadhīcaśca maheśvaraḥ //
śivānugrahato'bhūvaṃstathā rāmo hi śāṃkaraḥ

kaṇādo bhārgavaścaiva gururgautama eva ca //
śivabhaktyā babhūvuste mahāprabhava īśvarā

śākalyaśśaṃsitātmā ca navavarṣaśātānyapi //
bhavamārādhayāmāsa manoyajñena mādhava

tutoṣa bhagavānāha graṃthakartā bhaviṣyasi//
vatsākṣayyā ca te kīrtistrailokye prabhaviṣyati

akṣayaṃ ca kulaṃ te'stu maharṣibhiralaṃkṛtam //
bhaviṣyasi ṛṣiśreṣṭha sūtrakartā tatastataḥ

ityevaṃ śaṃkarātprāpa varaṃ munivarassa vai //
trailokye vitataścāsītpūjyaśca yadunandana

sāvarṇiriti vikhyāta ṛṣirāsītkṛte yuge //
iha tena tapastaptaṃ ṣaṣṭivarṣaśatāni ca

tamāha bhagavānrudrassākṣāttuṣṭosmi te'nagha //
graṃthakṛllokavikhyāto bhavitāsyajarāmaraḥ

evaṃvidho mahādevaḥ puṇyapūrvataraistataḥ //
samarccitaśśubhānkāmānpradadāti yathepsitān

ekenaiva mukhenāhaṃ vaktuṃ bhagavato guṇāḥ //
ye saṃti tānna śaknomi hyapi varṣaśatairapi

iti śrīśivamahāpurāṇe paṃcamyāmumāsaṃhitāyāṃ sanatkumāravyāsasaṃvāde upamanyūpadeśo nāma dvitīyo'dhyāyaḥ