Shiva Purana · Chapter 5.20

// vyāsa uvāca //
sanatkumāra sarvajña tatprāptiṃ vada sattama //
yadgatvā na nivartaṃte śivabhaktiyutā narāḥ

// sanatkumāra uvāca //
parāśarasuta vyāsa śṛṇu prītyā śubhāṃ gatim //
vrataṃ hi śuddhabhaktānāṃ tathā śuddhaṃ tapasvinām

ye śivaṃ śuddhakarmāṇassuśuddhatapasānvitāḥ //
samarcayanti taṃ nityaṃ vandyāste sarvathānvaham

nātaptatapaso yāṃti śivalokamanāmayam //
śivānugrahasaddhetustapa eva mahāmune

tapasā divi modante pratyakṣaṃ devatāgaṇāḥ//
ṛṣayo munayaścaiva satyaṃ jānīha madvacaḥ

sudurddharaṃ durāsādhyaṃ sudhuraṃ duratikramam//
tatsarvaṃ tapasā sādhyaṃ tapo hi duratikramam

susthitastapasi brahmā nityaṃ viṣṇurharastathā//
devā devyo'khilāḥ prāptāstapasā durlabhaṃ phalam

yena yena hi bhāvena sthitvā yatkriyate tapaḥ //
tatassaṃprāpyate'sau tairiha loke na saṃśayaḥ

sāttvikaṃ rājasaṃ caiva tāmasaṃ trividhaṃ smṛtam //
vijñeyaṃ hi tapo vyāsa sarvasādhanasādhanam

sāttvikaṃ daivatānāṃ hi yatīnāmūrddhvaretasām //
rājasaṃ dānavānāṃ hi manuṣyāṇāṃ tathaiva ca //
tāmasaṃ rākṣasānāṃ hi narāṇāṃ krūrakarmaṇām

trividhaṃ tatphalaṃ proktaṃ munibhistattvadarśibhiḥ //
japo dhyānaṃ tu devānāmarcanaṃ bhaktitaśśubham

sāttvikaṃ taddhi nirdiṣṭamaśeṣaphalasādhakam //
iha loke pare caiva manobhipretasādhanam

kāmanāphalamuddiśya rājasaṃ tapa ucyate //
nijadehaṃ susaṃpīḍya dehaśoṣakadussahaiḥ

tapastāmasamuddiṣṭaṃ manobhipretasādhanam

uttamaṃ sāttvikaṃ vidyāddharmabuddhiśca niścalā //
snānaṃ pūjā japo homaḥ śuddhaśaucamahiṃsanam

vratopavāsacaryā ca maunamindriyanigrahaḥ //
dhīrvidyā satyamakrodho dānaṃ kṣāṃtirdamo dayā

vāpīkūpataḍāgādeḥ prasādasya ca kalpanā //
kṛcchraṃ cāṃdrāyaṇaṃ yajñassutīrthānyāśramāḥ punaḥ

dharmasthānāni caitāni sukhadāni manīṣiṇām //
sudharmaḥ paramo vyāsaḥ śivabhakteśca kāraṇam

saṃkrātiviṣuvadyogo nādamukte niyujyatām//
dhyānaṃ trikālikaṃ jyotirunmanībhāvadhāraṇā

recakaḥ pūrakaḥ kumbhaḥ prāṇāyāmastridhā smṛtaḥ //
nāḍīsaṃcāravijñānaṃ pratyāhāranirodhanam

turīyaṃ tadadho buddhiraṇimādyaṣṭasaṃyutam//
pūrvottamaṃ samuddiṣṭaṃ parajñānaprasādhanam

kāṣṭhāvasthā mṛtāvasthā haritāveti kīrtitāḥ//
nānopalabdhayo hyetāssarvapāpapraṇāśanāḥ

nārī śayyā tathā pānaṃ vastradhūpavilepanam//
tāmbūlabhakṣaṇaṃ paṃca rājaiśvaryyavibhūtayaḥ

hemabhārastathā tāmraṃ gṛhāśca ratnadhenavaḥ//
pāṃḍityaṃ vedaśāstrāṇāṃ gītanṛtyavibhūṣaṇam/ā२४//
śaṃkhavīṇāmṛdaṃgāśca gajendraśchatracāmare//
bhogarūpāṇi caitāni ebhiśśakto'nurajyate

ādarśavanmunesnehaistilavatsa nipīḍyate//
araṃ gaccheti cāpyenaṃ kurute jñānamohitaḥ

jānannapīha saṃsāre bhramate ghaṭiyaṃtravat//
sarvayoniṣu duḥkhārtassthāvareṣu careṣu ca

evaṃ yoniṣu sarvāsu pratikramya bhrameṇa ta//
kālāṃtaravaśādyāti mānuṣyamatidurlabham

vyutkrameṇāpi mānuṣyaṃ prāpyate puṇyagauravāt //
vicitrā gatayaḥ proktāḥ karmaṇāṃ gurulāghavāt

mānuṣyaṃ ca samāsādya svargamokṣaprasādhanam //
nācaratyātmanaḥ śreyassa mṛtaśśocate ciram

devāsurāṇāṃ sarveṣāṃ mānuṣyaṃ cāti durlabhaṃ //
tatsaṃprāpya tathā kuryānna gacchennarakaṃ yathā

svargāpavargalābhāya yadi nāsti samudyamaḥ //
durlabhaṃ prāpya mānuṣyaṃ vṛthā tajjanma kīrtitam

sarvasya mūlaṃ mānuṣyaṃ caturvargasya kīrtitam //
saṃprāpya dharmato vyāsa tadyattādanupālayet

dharmamūlaṃ hi mānuṣyaṃ labdhvā sarvārthasādhakam //
yadi lābhāya yatnaḥ syānmūlaṃ rakṣetsvayaṃ tataḥ

mānuṣye'pi ca vipratvaṃ yaḥ prāpya khalu durlabham //
nācaratyātmanaḥ śreyaḥ ko'nyastasmādacetanaḥ

dvīpānāmeva sarveṣāṃ karmabhūmiriyamucyate //
itassvargaśca mokṣaśca prāpyate samupārjitaḥ

deśe'sminbhārate varṣe prāpya mānuṣyamadhruvam //
na kuryādātmanaḥ śreyastenātmā khalu vaṃcitaḥ

karmabhūmiriyaṃ vipra phalabhūmirasau smṛtā //
iha yatkriyate karma svarge tadanubhujyate

yāvatsvāsthyaṃ śarīrasya tāvaddharmaṃ samācaret//
asvasthaścodito'pyanyairna kiṃcitkartumutsahet

adhruveṇa śarīreṇa dhruvaṃ yo na prasādhayet //
dhruvaṃ tasya paribhraṣṭamadhruvaṃ naṣṭameva ca

āyuṣaḥ khaṃḍakhaṃḍāni nipataṃti tadagrataḥ //
ahorātropadeśena kimarthaṃ nāvabudhyate

yadā na jñāyate mṛtyuḥ kadā kasya bhaviṣyati //
ākasmike hi maraṇe dhṛtiṃ viṃdati kastathā

parityajya yadā sarvamekākī yāsyati dhruvam //
na dadāti kadā kasmātpātheyārthamidaṃ dhanam

gṛhītadānapātheyaḥ sukhaṃ yāti yamālayam //
anyathā kliśyate jaṃtuḥ pātheyarahite pathi

yeṣāṃ kāleya puṇyāni paripūrṇāni sarvataḥ//
gacchatāṃ svargadeśaṃ hi teṣāṃ lābhaḥ padepade

iti jñātvā naraḥ puṇyaṃ kuryātpāpaṃ vivarjayet //
puṇyena yāti devatvamapuṇyo narakaṃ vrajet

ye manāgapi deveśaṃ prapannāśśaraṇaṃ śivam //
te'pi ghoraṃ na paśyaṃti yamaṃ na narakaṃ tathā

kiṃtu pāpairmahāmohaiḥ kiṃcitkāle śivājñayā //
vasaṃti tatra mānuṣyāstato yāṃti śivāspadam

ye punassarvabhāvena pratipannā maheśvaram //
na te limpaṃti pāpena padmapatramivāmbhasā

uktaṃ śiveti yairnāma tathā harahareti ca//
na teṣāṃ narakādbhītiryamāddhi munisattama

paralokasya pātheyaṃ mokṣopāyamanāmayam //
puṇyasaṃghaikanilayaṃ śiva ityakṣaradvayam

śivanāmaiva saṃsāramahārogekaśāmakam //
nānyatsaṃsārarogasya śāmakaṃ dṛśyate mayā

brahmahatyāsahasrāṇi purā kṛtvā tu pulkasaḥ //
śiveti nāma vimalaṃ śrutvā mokṣaṃ gataḥ purā

tasmādvivarddhayedbhaktimīśvare satataṃ budhaḥ//
śivabhaktyā mahāprājña bhuktiṃ muktiṃ ca viṃdati

iti śrīśivamahāpurāṇe pañcamyāmumāsaṃhitāyāṃ manuviśeṣakathanaṃ nāma viṃśo'dhyāyaḥ