Shiva Purana · Chapter 5.19

sanatkumāra uvāca //
ravicandramasoryāvanmayūkhā bhāsayaṃti hi//
tāvatpramāṇā pṛthivī bhūlokassa tu gīyate

bhūmeryojanalakṣe tu saṃsthitaṃ ravimaṇḍalam //
yojanānāṃ sahasrāṇi sadaiva parisaṃkhyayā

śaśinastu pramāṇāya jagataḥ paricakṣate//
raverūrdhvaṃ śaśī tasthau lakṣayojanasaṃkhyayā

grahāṇāṃ maṇḍalaṃ kṛtsnaṃ śaśerupari saṃsthitam//
sanakṣatraṃ sahasrāṇi daśaiva paritopari

budhastasmādatho kāvyastasmādbhaumasya maṇḍalam//
bṛhaspatistadūrdhvaṃ tu tasyopari śanaiścaraḥ

saptarṣimaṇḍalaṃ tasmāllakṣeṇaikena saṃsthitam //
ṛṣibhya tu sahasrāṇāṃ śatādūrdhvaṃ dhruvaḥ sthitaḥ

meḍhībhūtassa yastasya jyotiścakrasya vai dhruvaḥ//
bhūrbhuvaḥsvariti jñeyaṃ bhuva ūrdhvaṃ dhruvādavāk

ekayojanakoṭistu yatra te kalpavāsinaḥ//
dhruvādūrdhvaṃ maharlokassaptaite brahmaṇassutāḥ

sanakaśca sanandaśca tṛtīyaśca sanātanaḥ//
kapilaścāsuriścaiva voḍhuḥ paṃcaśikhastathā

upariṣṭāttataśśukro dvilakṣābhyaṃtare sthitaḥ//
dvilakṣayojanaṃ tasmādadhaḥ somasutaḥ smṛtaḥ

dvilakṣayojanaṃ tasmādūrdhvaṃ bhaumassthito mune//
dvilakṣayojanaṃ tasmādūrdhvaṃ jīvaḥ sthito guru

dvilakṣayojanaṃ jīvādūrdhvaṃ saurirvyavasthitaḥ //
ete saptagrahāḥ proktāssvasvarāśivyavasthitā

rudralakṣairyojanatassaptordhvamṛṣayaḥ sthitāḥ //
viśvalakṣairyojanato dhruvasthitirudāhṛtā

caturguṇottare cārddhe janalokāttapaḥ smṛtam //
vairājā yatra devā vai sthitā dāhavivarjitāḥ

ṣaḍguṇena tapolokātsatyaloko vyavasthitaḥ //
brahmalokaḥ sa vijñeyo vasaṃtyamalacetasaḥ

satyadharmaratāścaiva jñānino brahmacāriṇaḥ//
yadgāmino'tha bhūlokānnivasaṃti hi mānavāḥ

bhuvarloke tu saṃsiddhā munayo devarūpiṇaḥ //
svargaloke surādityā maruto vasavo'śvinau

viśvedevāstathā rudrāssādhyā nāgāḥ khagādayaḥ //
navagrahāstatastatra ṛṣayo vītakalmaṣāḥ

ete sapta mahālokāḥ kāleya kathitāstava //
pātālāni ca saptaiva brahmāṇḍasya ca vistaraḥ

dadhivṛkṣaphalaṃ yadvadvṛttiścordhvamadhastathā //
etadaṃḍakaṭāhena sarvato vai samāvṛtam

daśaguṇena payasā sarvatastatsamāvṛtam //
vahninā vāyunā cāpi nabhasā tamasā tathā

bhūtādināpi mahatā digguṇottaraveṣṭitaḥ //
mahāṃtaṃ ca samāvṛtya pradhānaṃ puruṣaḥ sthitaḥ

anaṃtasya na tasyāsti saṃkhyāpi paramātmanaḥ //
tenānaṃta iti khyātaḥ pramāṇaṃ nāsti vai yataḥ

hetubhūtassamastasya prakṛtissā parā mune //
aṃḍānāṃ tu sahasrāṇāṃ sahasrāṇyayutāni ca

īdṛśānāṃ prabhūtāni tasmādavyaktajanmanaḥ //
dāruṇyagnistile tailaṃ payassu ca yathā ghṛtam

tathāsau paramātmā vai sarvaṃ vyāpyātmavedanaḥ //
ādibījātprasuvate tatastebhyaḥ pareṇḍajāḥ

tebhyaḥ putrāstathānyeṣāṃ bījānyanyāni vai tataḥ //
mahadādayo viśeṣāṃtāstadbhavaṃti surādayaḥ

bījādvṛkṣapraroheṇa yathā nāpacayastaroḥ //
sūryyakāṃtamaṇeḥ sūryyādyadvadvahniḥ prajāyate

tadvatsaṃjāyate sṛṣṭiḥ śiva
statraḥ
na kāmayet //
śivaśaktisamāyoge devādyāḥ prabhavaṃti hi

tathā svakarmaṇaikena prarohamupayāṃti vai //
brahmā viṣṇuśca rudrāśca sa śivaḥ parigīyate

tasmāduddharate sarvaṃ yasmiṃśca layameṣyati //
kartā kriyāṇāṃ sarvāsāṃ sa śivaḥ parigīyate

vyāsa uvāca //
sanatkumāra sarvajña chiṃdhi me saṃśayaṃ mahat //
santi lokā hi brahmāṃḍādupariṣṭānna vā mune

sanatkumāra uvāca //
brahmāṃḍādupariṣṭācca saṃti lokā munīśvara //
tāñchṛṇu tvaṃ viśeṣeṇa vacmi te'haṃ samāgataḥ

vidhilokātparo loko vaikuṃṭha iti viśrutaḥ //
virājate mahādīptyā yatra viṣṇuḥ pratiṣṭhitaḥ

tasyopariṣṭātkaumāro loko hi paramādbhutaḥ //
senānīḥ śaṃbhutanayo rājate yatra suprabhaḥ

tataḥ paramumāloko mahādivyo virā jate//
yatra śaktirvibhātyekā tridevajananī śivā

parātparā hi prakṛtī rajassattvatamomayī//
nirguṇā ca svayaṃ devī nirvikārā śivātmikā

tasyopariṣṭādvijñeyaśśivalokassanātanaḥ //
avināśī mahādivyo mahāśobhānvitassadā

virājate paraṃ brahma yatra śaṃbhurmaheśvaraḥ //
tridevajanakasvāmī sarveṣāṃ triguṇātparaḥ

tata ūrdhvaṃ na lokāśca golokastatsamīpataḥ //
gomātarassuśīlākhyāstatra saṃti śivapriyā

tatpālaḥ kṛṣṇanāmā hi rājate śaṃkarājñayā //
pratiṣṭhitaśśivenaiva śaktyā svacchandacāriṇā

śivaloko'dbhuto vyāsa nirādhāro manoharaḥ //
atinirvacanīyaśca nānāvastuvirājitaḥ

śivastu tadadhiṣṭhātā sarvadevaśiromaṇiḥ //
viṣṇubrahmaharaissevyaḥ paramātmā nirañjanaḥ

iti te kathitā tāta sarvabrahmāṃḍasaṃsthitiḥ //
tadūrdhvaṃ lokasaṃsthānaṃ kimanyacchrotumicchasi

iti śrīśivamahāpurāṇe pañcamyāmumāsaṃhitāyāṃ lokavarṇanaṃnāmaikonaviṃśo'dhyāyaḥ