Shiva Purana · Chapter 5.1

śrīgaṇeśāya namaḥ //
śrīgaurīśaṃkarābhyāṃ namaḥ //
atha pañcamyumāsaṃhitā prārabhyate //
yo dhatte bhuvanāni sapta guṇavānsraṣṭā rajassaṃśrayassaṃhartā tamasānvito guṇavatīṃ māyāmatītya sthitaḥ //
satyānandamanantabodhamamalaṃ brahmādisaṃjñāspadaṃ nityaṃ sattvasamanvayādadhigataṃ pūrṇaṃ śivaṃ dhīmahi

ṛṣaya ūcuḥ //
sūtasūta mahāprājña vyāsaśiṣyana mo'stu te //
caturthī koṭirudrākhyā śrāvitā saṃhitā tvayā

athomāsaṃhitāntaḥstha nānākhyānasamanvitam //
brūhi śaṃbhoścaritraṃ vai sāmbasya paramātmanaḥ

sūta uvāca //
maharṣayaśśaunakādyāḥ śṛṇuta premataḥ śubham //
śāṃkaraṃ caritaṃ divyaṃ bhuktimuktipradaṃ param

itīdṛśaṃ puṇyapraśnaṃ pṛṣṭavānmunisattamaḥ //
vyāsassanatkumāraṃ vai śaivaṃ saccaritaṃ jagau

// sanatkumāra uvāca //
vāsudevāya yatproktamupamanyumaharṣiṇā //
taducyate mayā vyāsa caritaṃ hi maheśituḥ

purā putrārthamagamatkailāsaṃ śaṃkarālayam //
vasudevasutaḥ kṛṣṇastapastaptuṃ śivasya hi

atropamanyuṃ saṃdṛṣṭvā tapaṃtaṃ śṛṃga uttame //
praṇamya bhaktyā sa muniṃ paryapṛcchatkṛtāñjaliḥ

śrīkṛṣṇa uvāca //
upamanyo mahāprājña śaivapravara sanmate //
putrārthamagamaṃ taptuṃ tapo'tra giriśasya hi

brūhi śaṃkaramāhātmyaṃ sadānandakaraṃ mune //
yacchrutvā bhaktitaḥ kuryyāṃ tapa aiśvaramuttamam

// sanatkumāra uvāca //
iti śrutvā vacastasya vāsudevasya dhīmataḥ //
pratyuvāca prasannātmā hyupamanyussmarañchivam

// upamanyuruvāca //
śṛṇu kṛṣṇa mahāśaiva mahimānaṃ maheśituḥ //
yamadrākṣamahaṃ śaṃbhorbhaktivarddhanamuttamam

tapaḥstho'haṃ samadrākṣaṃ śaṃkaraṃ ca tadāyudhān //
parivāraṃ samastaṃ ca viṣṇvādīnamarādikān

tribhiraṃśaiśśobhamānamajasrasukhamavyayam//
ekapādaṃ mahādaṃṣṭraṃ sajvālakavalairmukhaiḥ

dvisahasramayūkhānāṃ jyotiṣā'tivirājitam //
sarvāstrapravarābādhamanekākṣaṃ sahasrapāt

yaśca kalpāntasamaye viśvaṃ saṃharati dhruvam //
nāvadhyo yasya ca bhavettrailaukye sacarācare

maheśvarabhujotsṛṣṭaṃ trailokyaṃ sacarācaram //
nirdadāha drutaṃ kṛtsnaṃ nimeṣārddhānna saṃśayaḥ

tapaḥstho rudrapārśvasthaṃ dṛṣṭavānahamavyam //
guhyamastraṃ paraṃ cāsya na tulyamadhikaṃ kvacit

yattacchūlamiti khyātaṃ sarvalokeṣu śūlinaḥ //
vijayābhidhamatyugraṃ sarvaśastrāstranāśakam

dārayedyanmahīṃ kṛtsnāṃ śoṣayedyanmahodadhim //
pātayedakhilaṃ jyotiścakraṃ yannātra saṃśayaḥ

yauvanāśvo hato yena māṃdhātā sabalaḥ purā //
cakravartī mahātejāstrailokyavijayo nṛpaḥ

darpāviṣṭo haihayaśca niḥ kṣipto lavaṇāsuraḥ //
śatrughnaṃ nṛpatiṃ yuddhe samāhūya samaṃtataḥ

tasmindaitye vinaṣṭe tu rudrahaste gataṃ tu yat//
tacchūlamiti tīkṣṇāgraṃ saṃtrāsajananaṃ mahat

triśikhāṃ bhṛkuṭīṃ kṛtvā tarjayaṃtamiva sthitam //
vidhūmrānalasaṃkāśaṃ bālasūryamivoditam

sūryya hastamanirddeśyaṃ pāśahastamivāṃtakam//
paraśuṃ tīkṣṇadhāraṃ ca sarpādyaiśca vibhūṣitam

kalpāntadahanākāraṃ tathā puruṣavigraham//
yattadbhārgavarāmasya kṣatriyāntakaraṃ raṇe

rāmo yadbalamāśritya śivadattaśca vai purā //
triḥsaptakṛtvo nakṣatraṃ dadāha hṛṣito muniḥ

sudarśanaṃ tathā cakraṃ sahasravadanaṃ vibhum //
dvisahasrabhujaṃ devamadrākṣaṃ puruṣākṛtim

dvisahasrekṣaṇaṃ dīptaṃ sahasracaraṇākulam //
koṭisūryapratīkāśaṃ trailokyadahanakṣamam

vajraṃ mahojjvalaṃ tīkṣṇaṃ śataparvapranuttamam //
mahādhanuḥ pinākaṃ ca satūṇīraṃ mahādyutim

śaktiṃ khaṅgaṃ ca pāśaṃ ca mahādīptaṃ samāṃkuśam //
gadāṃ ca mahatīṃ divyāmanyānyastrāṇi dṛṣṭavān

tathā ca lokapālānāmastrāṇyetāni yāni ca //
adrākṣaṃ tāni sarvāṇi bhagavadrudrapārśvataḥ

savyadeśe tu devasya brahmā lokapitāmahaḥ //
vimānaṃ divyamāsthāya haṃsayuktaṃ manonugam

vāmapārśve tu tasyaiva śaṃkhacakragadādharaḥ //
vainateyaṃ samāsthāya tathā nārāyaṇaḥ sthitaḥ

svāyaṃbhuvādyā manavo bhṛgvādyā ṛṣayastathā //
śakrādyā devatāścaiva sarva eva samaṃ yayuḥ

skaṃdaśśaktiṃ samādāya mayūrasthassaghaṃṭakaḥ //
devyāssamīpe saṃtasthau dvitīya iva pāvakaḥ

naṃdī śūlaṃ samādāya bhavāgre samavasthitaḥ //
sarvabhūtagaṇāścaivaṃ mātaro vividhāḥ sthitāḥ

te'bhivādya maheśānaṃ parivāryya samaṃtataḥ //
astuvanvividhaiḥ stotrairmahādevaṃ tadā surāḥ

yatkiṃcittu jagatyasmindṛśyate śrūyate'thavā //
tatsarvaṃ bhagavatpārśve nirīkṣyāhaṃ suvismitaḥ

sumahaddhairyyamālaṃbya prāṃjalirvividhaiḥ stavaiḥ//
paramānandasaṃmagno'bhūvaṃ kṛṣṇāhamaddhvare

saṃmukhe śaṃkaraṃ dṛṣṭvā bāṣpagadgadayā girā //
apūjayaṃ suvidhivadahaṃ śraddhāsamanvitaḥ

bhagavānatha suprītaśśaṃkaraḥ parameśvaraḥ //
vāṇyā madhurayā prītyā māmāha prahasanniva

na vicālayituṃ śakyo mayā vipra punaḥ punaḥ //
parīkṣitosi bhadraṃ te bhavānbhaktyānvito dṛḍhaḥ

tasmātte parituṣṭo'smi varaṃ varaya suvrata //
durlabhaṃ sarvadeveṣu nādeyaṃ vidyate tava

sa cāhaṃ tadvacaḥ śrutvā śaṃbhoḥ satpremasaṃyutam//
devaṃ taṃ prāṃjalirbhūtvā'bruvaṃ bhaktānukaṃpinam

// upamanyuruvāca //
bhagavanyadi tuṣṭo'si yadi bhaktiḥ sthirā mayi //
tena satyena me jñānaṃ trikālaviṣayaṃ bhavet

prayaccha bhaktiṃ vipulāṃ tvayi cāvyabhicāriṇīm //
sānvayasyāpi nityaṃ me bhūri kṣīraudanaṃ bhavet

mamāstu tava sānnidhyaṃ nityaṃ caivāśrame vibho //
tava bhakteṣu sakhyaṃ syādanyonyeṣu sadā bhavet

evamukto mayā śaṃbhurvihasya parameśvaraḥ //
kṛpādṛṣṭyā nirīkṣyāśu māṃ sa prāha yadūdvaha

// śrīśiva uvāca //
upamanyo mune tāta varjjitastvaṃ bhaviṣyasi //
jarāmaraṇajairdoṣaissarvakāmānvito bhava

munīnāṃ pūjanīyaśca yaśodhanasamanvitaḥ //
śīlarūpaguṇaiśvaryaṃ matprasādātpadepade

kṣīrodasāgarasyaiva sānnidhyaṃ payasāṃ nidheḥ //
tatra te bhavitā nityaṃ yatrayatrecchase mune

amṛtātmakaṃ tu tatkṣīraṃ yāvatsaṃyāmyate tataḥ //
imaṃ vaivasvataṃ kalpaṃ paśyase bandhubhissaha

tvadgotraṃ cākṣayaṃ cāstu matprasādātsadaiva hi //
sānnidhyamāśrame te'haṃ kariṣyāmi mahāmune

madbhaktistu sthirā cāstu sadā dāsyāmi darśanam //
smṛtaśca bhavatā vatsa priyastvaṃ sarvathā mama

yathākāmasukhaṃ tiṣṭha notkaṇṭhāṃ kartumarhasi //
sarvaṃ prapūrṇatāṃ yātu ciṃtitaṃ nātra saṃśayaḥ

upamanyuruvāca//
evamuktvā sa bhagavānsūryyakoṭisamaprabhaḥ//
mameśāno varāndattvā tatraivāntaradhīyata

evaṃ dṛṣṭo mayā kṛṣṇa parivārasamanvitaḥ //
śaṃkaraḥ parameśāno bhaktimuktipradāyakaḥ

śaṃbhunā parameśena yaduktaṃ tena dhīmatā//
tadavāptaṃ ca me sarvaṃ devadevasamādhinā

pratyakṣaṃ caiva tai jātāngandharvāpsarasastathā//
ṛṣīnvidyādharāṃścaiva paśya siddhānvyavasthitān

paśya vṛkṣānmanoramyānsnigdhapatrānsugaṃdhinaḥ//
sarvartukusumairyuktānsadāpuṣpaphalanvitān

sarvametanmahābāho śaṃkarasya mahātmanaḥ //
prasādāddevadevasya viśvaṃ bhāvasamanvitama

mamāsti tvakhilaṃ jñānaṃ prasādācchūlapāṇinaḥ //
bhūtaṃ bhavyaṃ bhaviṣyaṃ ca sarvaṃ jānāmi tattvataḥ

tamahaṃ dṛṣṭavāndevamapi devāḥ sureśvarāḥ //
yaṃ na paśyaṃtyanārādhya ko'nyo dhanyataro mayā

ṣaḍviṃśakamiti khyātaṃ paraṃ tattvaṃ sanātanam //
evaṃ dhyāyaṃti vidvāṃsau mahatparamamakṣaram

sarva tattvavidhānajñaḥ sarvatattvārthadarśanaḥ //
sa eva bhagavāndevaḥ pradhānapuruṣeśvaraḥ

yo nijāddakṣiṇātpārśvādbrahmāṇaṃ lokakāraṇam//
vāmādapyasṛjadviṣṇuṃ lokarakṣārthamīśvaraḥ

kalpānte caiva saṃprāpte'sṛjadrudraṃ hṛdaḥ prabhuḥ //
tatassamaharatkṛtsnaṃ jagatsthāvarajaṃgamam

yugāṃte sarvabhūtāni saṃvartaka ivānalaḥ //
kālo bhūtvā mahādevo grasamānassa tiṣṭhati

sarvajñassarvabhūtātmā savarbhūtabhavodbhavaḥ //
āste sarvagato devo dṛśyassarvaiśca daivataiḥ

atastvaṃ putralābhāya samārādhaya śaṃkaram //
śīghraṃ prasanno bhavitā śivaste bhaktavatsalaḥ

iti śrīśivamahāpurāṇe paṃcamyāmumāsaṃhitāyāṃ kṛṣṇopamanyusaṃvāde svagativarṇanaṃ nāma prathamo'dhyāyaḥ