Shiva Purana · Chapter 4.7

ṛṣaya ūcuḥ //
kathaṃ gaṃgā samāyātā vaiśākhe saptamīdine //
narmadāyāṃ viśeṣeṇa sūtaitadvarṇaya prabho

īśvaraśca kathaṃ jāto nandikeśo hi nāmataḥ //
vṛttaṃ tadapi suprītyā kathaya tvaṃ mahāmate

sūta uvāca //
sādhu pṛṣṭamṛṣiśreṣṭhā nandikeśāśritaṃ vacaḥ //
tadahaṃ kathayāmyadya śravaṇātpuṇyavarddhanam

brāhmaṇī ṛṣikā nāmnā kasyacicca dvijanmanaḥ //
sutā vivāhitā kasmaiciddvijāya vidhānataḥ

pūrvakarmaprabhāvena patnī sā hi dvijanmanaḥ //
suvratāpi ca viprendrā bālavaidhavyamāgatā

atha sā dvijapatnī hi brahmacaryyavratānvitā //
pārthivārcanapūrvaṃ hi tapastepe sudāruṇam

tasminnavasare duṣṭo mūḍhanāmā'suro balī //
yayau tatra mahāmāyī kāmabāṇena tāḍitaḥ

tapantīṃ tāṃ samālokya sundarīmatikāminīm //
tayā bhogaṃ yayāce sa nānālobhaṃ pradarśayan

atha sā suvratā nārī śivadhyānaparāyaṇā //
tasmindṛṣṭiṃ dadhau naiva kāmadṛṣṭyā munīśvarāḥ

na mānitavatī taṃ ca brāhmaṇī sā taporatā //
atīva hi taponiṣṭhāsīcchivadhyānamāśritā

atha mūḍhaḥ sa daityendraḥ tayā tanvyā tiraskṛtaḥ //
cukrodha vikaṭaṃ tasyai paścādrūpamadarśayat

atha provāca duṣṭātmā durvaco bhayakārakam //
trāsayāmāsa bahuśastāṃ ca patnīṃ dvijanmanaḥ

tadā sā bhayasaṃtrastā bahuvāraṃ śiveti ca //
babhāṣe snehatastanvī dvijapatnī śivāśrayā

vihvalātīva sā nārī śivanāmaprabhāṣiṇī //
jagāma śaraṇaṃ śambhoḥ svadharmāvanahetave

śaraṇāgatarakṣārthaṃ kartuṃ sadvṛttamāhitam //
ānandārthaṃ hi tasyāstu śiva āvirbabhūva ha

atha taṃ mūḍhanāmānaṃ daityendraṃ kāma vihvalam //
cakāra bhasmasātsadyaḥ śaṃkaro bhaktavatsalaḥ

tataśca parameśāno kṛpādṛṣṭyā vilokya tām //
varaṃ brūhīti covāca bhaktarakṣaṇadakṣadhīḥ

śrutvā maheśavacanaṃ sā sādhvī dvijakāminī //
dadarśa śāṃkaraṃ rūpamānandajanakaṃ śubham

tataḥ praṇamya taṃ śaṃbhuṃ parameśasukhāvaham //
tuṣṭāva sāñjaliḥ sādhvī nataskandhā śubhāśayā

ṛṣikovāca //
devadeva mahādeva śaraṇāgatavatsala //
dīnabandhustvamīśāno bhaktarakṣākaraḥ sadā

tvayā me rakṣito dharmo mūḍhanāmno'surādiha //
yadayaṃ nihato duṣṭo jagadrakṣā kṛtā tvayā

svapādayoḥ parāṃ bhaktiṃ dehi me hyanapāyinīm //
ayameva varo nātha kimanyadadhikaṃ hyataḥ

anyadākarṇaya vibho prārthanāṃ me maheśvara //
lokānāmupakārārthamiha tvaṃ saṃsthito bhava

sūta uvāca //
iti stutvā mahādevamṛṣikā sā śubhavratā //
tūṣṇīmāsātha giriśaḥ provāca karuṇākaraḥ

giriśa uvāca //
ṛṣike sucaritrā tvaṃ mama bhaktā viśeṣataḥ //
dattā varāśca te sarve tubhyaṃ yeye hi yācitāḥ

etasminnaṃtare tatra haribrahmādayaḥ surāḥ //
śivāvirbhāvamājñāya yayurharṣasamanvitāḥ

śivaṃ praṇamya suprītyā samānarcuśca te'khilāḥ //
tuṣṭuvurnatakā viprāḥ karau baddhvā sucetasaḥ

etasminsamaye gaṃgā sādhvī tāṃ svardhunī jagau//
ṛṣikāṃ suprasannātmā praśaṃsanto ca tīdvidhim

gaṃgovāca//
mamārthe caiva vaiśākhe māsi deyaṃ tvayā vacaḥ //
sthityarthaṃ dinamekaṃ me sāmīpyaṃ kāryyameva hi

sūta uvāca//
gaṃgāvacanamākarṇya sā sādhvī prāha suvratā//
tathāstviti vacaḥ prītyā lokānāṃ hitahetave

ānandārthaṃ śivastasyāḥ suprasannaśca pārthive //
tasmim̐lliṃge layaṃ yātaḥ pūrṇāṃśena tayā haraḥ

devaḥ sarve suprasannāḥ praśaṃsaṃti śivaṃ ca tām//
svaṃsvaṃ dhāma yayurviṣṇubrahmādyā api svarṇadī

taddinātpāvanaṃ tīrthamāsīdīdṛśamuttamam//
nandikeśaḥ śivaḥ khyātaḥ sarvapāpavināśanaḥ

gaṃgāpi prativarṣaṃ taddine yāti śubhecchayā/
kṣālanārthaṃ svapāpasya yadgrahītaṃ nṛṇāṃ dvijāḥ

tatra snāto naraḥ samyaṅ naṃdikeśaṃ samarcya ca //
brahmahatyādibhiḥ pāpairmucyate hyakhilairapi

iti śrīśivamahāpurāṇe caturthyāṃ koṭirudrasaṃhitāyāṃ nandikeśvaraśivaliṃgamāhātmyavarṇanaṃnāma saptamo'dhyāyaḥ