શિવ પુરાણ · અધ્યાય 4.8

સૂત ઉવાચ॥
દ્વિજાઃ શૃણુત સદ્ભક્ત્યા શિવલિંગાનિ તાનિ ચ ॥
પશ્ચિમાયાં દિશાયાં વૈ યાનિ ખ્યાતાનિ ભૂતલે

કપિલાયાં નગર્યાં તુ કાલરામેશ્વરાભિધે ॥
શિવલિંગે મહાદિવ્યે દર્શનાત્પાપહારકે

પશ્ચિમે સાગરે ચૈવ મહાસિદ્ધેશ્વરઃ સ્મૃતઃ ॥
ધર્માર્થકામદશ્ચૈવ તથા મોક્ષપ્રદોઽપિ હિ

પશ્ચિમામ્બુધિતીરસ્થં ગોકર્ણં ક્ષેત્રમુત્તમમ્ ॥
બ્રહ્મહત્યાદિપાપઘ્નં સર્વકામફલપ્રદમ્

ગોકર્ણે શિવલિંગાનિ વિદ્યન્તે કોટિકોટિશઃ ॥
અસંખ્યાતાનિ તીર્થાનિ તિષ્ઠન્તિ ચ પદેપદે

બહુનાત્ર કિમુક્તેન ગોકર્ણસ્થાનિ સર્વશઃ ॥
શિવપ્રત્યક્ષલિંગાનિ તીર્થાન્યમ્ભાંસિ સર્વશઃ

ગોકર્ણે શિવલિંગાનાં તીર્થાનામપિ સર્વશઃ ॥
વર્ણ્યતે મહિમા તાત પુરાણેષુ મહર્ષિભિઃ

કૃતેયુગે સ હિ શ્વેતસ્ત્રેતાયાં સોતિલોહિતઃ ॥
દ્વાપરે પીતવર્ણશ્ચ કલૌ શ્યામો ભવિષ્યતિ

આક્રાન્તસપ્તપાતાલકુહરોપિ મહાબલઃ ॥
પ્રાપ્તે કલિયુગે ઘોરે મૃદુતામુપયાસ્યતિ

મહાપાતકિનશ્ચાત્ર સમભ્યર્ચ્ય મહાબલમ્ ॥
શિવલિંગં ચ ગોકર્ણે પ્રયાતાશ્શાંકરમ્પદમ્

ગોકર્ણે તત્ર મુનયો ગત્વા પુણ્યર્ક્ષવાસરે ॥
યેઽર્ચયન્તિ ચ તં ભક્ત્યા તે રુદ્રાઃ સ્યુર્ન સંશય

યદા કદાચિદ્ગોકર્ણે યો વા કો વાપિ માનવઃ ॥
પૂજયેચ્છિવલિંગં તત્સ ગચ્છેદ્બ્રહ્મણઃ પદમ્

બ્રહ્મવિષ્ણ્વાદિદેવાનાં શંકરો હિત કામ્યયા ॥
મહાબલાભિધાનેન દેવઃ સંનિહિતસ્સદા ।

ઘોરેણ તપસા લબ્ધં રાવણાખ્યેન રક્ષસા॥
તલ્લિંગં સ્થાપયામાસ ગોકર્ણ ગણનાયકઃ

વિષ્ણુર્બ્રહ્મા મહેન્દ્રશ્ચ વિશ્વદેવો મરુદ્ગણાઃ॥
આદિત્યા વસવો દસ્રૌ શશાંકશ્ચ સતારકઃ

એતે વિમાનગતયો દેવાશ્ચ સહ પાર્ષદૈઃ ॥
પૂર્વદ્વારં નિષેવન્તે તસ્ય વૈ પ્રીતિકારણાત્

યમો મૃત્યુઃ સ્વયં સાક્ષાચ્ચિત્રગુપ્તશ્ચ પાવકઃ॥
પિતૃભિઃ સહ રુદ્રૈશ્ચ દક્ષિણદ્વારમાશ્રિતઃ

વરુણઃ સરિતાં નાથો ગંગાદિસરિતા ગણૈઃ ॥
મહાબલં ચ સેવન્તે પશ્ચિમદ્વારમાશ્રિતાઃ

તથા વાયુઃ કુબેરશ્ચ દેવેશી ભદ્રકાલિકા ॥
માતૃભિશ્ચણ્ડિકાદ્યાભિરુત્તરદ્વારમાશ્રિતાઃ

સર્વે દેવાસ્સગન્ધર્વાઃ પિતરઃ સિદ્ધચારણાઃ ॥
વિદ્યાધરાઃ કિંપુરુષાઃ કિન્નરા ગુહ્યકાઃ ખગાઃ

નાનાપિશાચા વેતાલા દૈતેયાશ્ચ મહાબલાઃ ॥
નાગાશ્શેષાદયસ્સર્વે સિદ્ધાશ્ચ મુનયોઽખિલાઃ

પ્રણુવન્તિ ચ તં દેવં પ્રણમન્તિ મહાબલમ્ ॥
લભન્ત ઈપ્સિતાન્કામાન્રમન્તે ચ યથાસુખમ્

બહુભિસ્તત્ર સુતપસ્તપ્તં સમ્પૂજ્ય તં વિભુમ્ ॥
લબ્ધા હિ પરમા સિદ્ધિરિહામુત્રાપિ સૌખ્યદા

ગોકર્ણે શિવલિંગં તુ મોક્ષદ્વાર ઉદાહૃતઃ ॥
મહાબલાભિધાનોઽસૌ પૂજિતઃ સંસ્તુતો દ્વિજાઃ

માઘાસિતચતુર્દશ્યાં મહાબલસમર્ચનમ્ ॥
વિમુક્તિદં વિશેષેણ સર્વેષાં પાપિનામપિ

અસ્યાં શિવતિથૌ સર્વે મહોત્સવદિદૃક્ષવઃ ॥
આયાંતિ સર્વદેશેભ્યશ્ચાતુર્વર્ણ્યમહાજનાઃ

સ્ત્રિયો વૃદ્ધાશ્ચ બાલાશ્ચ ચતુરાશ્રમવાસિનઃ ॥
દૃષ્ટ્વા તત્રેત્ય દેવેશં લેભિરે કૃતકૃત્યતામ્

મહાબલપ્રભાવાત્તુ તચ્ચ લિંગં શિવસ્ય તુ ॥
સમ્પૂજ્યૈકાથ ચાણ્ડાલી શિવલોકં ગતા દ્રુતમ્

ઇતિ શ્રીશિવમહાપુરાણે ચતુર્થ્યાં કોટિરુદ્રસંહિતાયાં મહાબલમાહાત્મ્યવર્ણનં નામાષ્ટમોઽધ્યાયઃ