Shiva Purana · Chapter 4.5

sūta uvāca //
kālaṃjare girau divye nīlakaṇṭho maheśvaraḥ //
liṃgarūpassadā caiva bhaktānandapradaḥ sadā

mahimā tasya divyosti śrutismṛtiprakītitaḥ //
tīrthaṃ tadākhyayā tatra snānātpātakanāśakṛt

revātīre yāni santi śivaliṃgāni suvratāḥ //
sarvasaukhyakarāṇīha teṣāṃ saṃkhyā na vidyate

sā ca rudrasvarūpā hi darśanātpāpahārikā //
tasyāṃ sthitāśca ye kecitpāṣāṇāḥ śivarūpiṇaḥ

tathāpi ca pravakṣyāmi yathānyāni munīśvarāḥ //
pradhānaśivaliṃgāni bhuktimuktipradāni ca

ārteśvarasunāmā hi vartate pāpahārakaḥ //
parameśvara iti khyātaḥ siṃheśvara iti smṛtaḥ

śarmeśaśca tathā cātra kumāreśvara eva ca //
puṇḍarīkeśvaraḥ khyāto maṇḍapeśvara eva ca

tīkṣṇeśanāmā tatrāsīddarśanātpāpahārakaḥ //
dhuṃdhureśvaranāmāsītpāpahā narmadātaṭe

śūleśvara iti khyātastathā kuṃbheśvaraḥ smṛtaḥ //
kubereśvaranāmāpi tathā someśvaraḥ smṛtaḥ

nīlakaṇṭho maṃgaleśo maṃgalāyatano mahān //
mahākapīśvaro devaḥ sthāpito hi hanūmatā

tataśca naṃdiko devo hatyākoṭinivārakaḥ //
sarvakāmārthadaścaiva mokṣado hi prakīrtita.

nandīkeśaṃ ca yaścaiva pūjayetparayā mudā //
nityaṃ tasyākhilā siddhirbhaviṣyati na saṃśayaḥ

tatra tīre ca yaḥ snāti revāyāṃ munisattamāḥ //
tasya kāmāśca sidhyanti sarvaṃ pāpaṃ vinaśyati

ṛṣaya ūcuḥ//
evaṃ tasya ca māhātmyaṃ kathaṃ tatra mahāmate //
nandikeśasya kṛpayā kathyatāṃ ca tvayādhunā

sūta uvāca //
samyakpṛṣṭaṃ bhavadbhiśca kathayāmi yathāśrutam//
śaunakādyāśca munayaḥ sarve hi śṛṇutādarāt

purā yudhiṣṭhireṇaiva pṛṣṭaśca ṛṣisattamaḥ //
yathovāca tathā vacmi bhavatsnehānusārataḥ

revāyāḥ paścime tīre karṇikī nāma vai purī //
virājate suśobhāḍhyā caturvarṇasamākulā

tatra dvijavaraḥ kaściduttasya? kulasambhavaḥ //
kāśyāṃ gataśca putrābhyāmarpayitvā svapatnikām

tatraiva sa mṛto vipraḥ putrābhyāṃ ca śrutantadā//
tadīyaṃ caiva tatkṛtyaṃ cakrāte putrakāvubhau

patnī ca pālayāmāsa putrau putrahitaiṣiṇī //
putrau ca varjayitvā ca vibhaktaṃ vai dhanaṃ tayā

svīyaṃ ca rakṣitaṃ kiṃciddhanaṃ maraṇahetave //
tataśca dvijapatnī hi kiyatkālaṃ mṛtā ca sā

kadācitkriyamāṇā sā vividhaṃ puṇyamācarat //
na mṛtā daivayogena dvijapatnī ca sā dvijāḥ

yadā prāṇānna mumuce mātā daivāttayośca sā //
taddṛṣṭvā jananīkaṣṭaṃ putrakāvūcatustadā

putrāvūcatuḥ //
kiṃ nyūnaṃ vidyate mātaḥ kaṣṭaṃ yadvidyate mahat //
vriyatāṃ tadṛtaṃ prītyā tadāvāṃ karavāvahe

sūta uvāca //
tacchrutvoktaṃ tayā tatra nyūnaṃ tu vidyate bahu //
tadeva kriyate cedvai sukhena maraṇaṃ bhavet

jyeṣṭhaputraśca yastasyāstenoktaṃ kathyatāntvayā //
kariṣyāmi tadetaddhi tayā ca kathitantadā

dvijapatnyuvāca //
śṛṇu putra vacaḥ prītyā purāsīnme manaḥ spṛhā //
kāśyāṃ gaṃtuṃ tathā nāsīdidānīṃ mriyate punaḥ

mamāsthīni tvayā putra kṣepaṇīyānyatandritam //
gaṃgājale śubhaṃ tedya bhaviṣyati na saṃśayaḥ

// sūta uvāca //
ityukte ca tayā mātrā sa jyeṣṭhatanayobravīt //
mātaraṃ mātṛbhaktistu suvratāṃ maraṇonmukhīm

// putra uvāca //
mātastvayā sukhenaiva prāṇāstyājyā na saṃśayaḥ //
tava kāryaṃ purā kṛtvā paścātkāryaṃ madīyakam

iti haste jalaṃ dattvā yāvatputro gṛhaṃ gataḥ //
tāvatsā ca mṛtā tatra harasmaraṇatatparā

tasyāścaiva tu yatkṛtyaṃ tatsarvaṃ saṃvidhāya saḥ //
māsikaṃ karma kṛtvā tu gamanāya pracakrame

dvayoḥ śreṣṭhatamo yo vai suvādo nāma viśrutaḥ //
tadasthīni samādāya nissṛtastīrthakāmyayā

saṃgṛhya sevakaṃ kaṃcittenaiva sahitastadā //
āśvāsya bhāryyāputrām̐śca mātuḥ priyacikīrṣayā

śrāddhadānādikaṃ bhojyaṃ kṛtvā vidhimanuttamam //
maṃgalasmaraṇaṃ kṛtvā nirjagāma gṛhāddvijaḥ

taddine yojanaṃ gatvā viṃśati grāmake śubhe //
uvāsāstaṃ gate bhānau gṛhe viprasya kasyacit

cakre sandhyādisatkarma sa dvijo vidhipūrvakam //
stavādi kṛtavāṃstatra śaṃbhoradbhutakarmaṇaḥ

sevakena tadā yukto brāhmaṇaḥ saṃsthitastadā //
yāminī ca gatā tatra muhūrtadvayasaṃmitā

etasminnaṃtare tatraikamāścaryyamabhūttadā //
śṛṇutādaratastacca munayo vo vadāmyaham

iti śrīśivamahāpurāṇe caturthyāṃ koṭirudrasaṃhitāyāṃ nandikeśvaramāhātmye brāhmaṇīmaraṇavarṇanaṃ nāma paṃcamo'dhyāyaḥ