Shiva Purana · Chapter 4.39

ṛṣaya ucuḥ//
udyāpanavidhiṃ brūhi śivarātrivratasya ca//
yatkṛtvā śaṃkarassākṣātprasanno bhavati dhuvam

sūta uvāca//
śrūyatāmṛṣayo bhaktyā tadudyāpanamādarāt//
yasyānuṣṭhānataḥ pūrṇaṃ vrataṃ bhavati taddhruvam

caturdaśābdaṃ kartavyaṃ śivarātrivrataṃ śubham//
ekabhaktaṃ trayodaśyāṃ caturdaśyāmupoṣaṇam

śivarātridine prāpte nityaṃ saṃpādya vai vidhim//
śivālayaṃ tato gatvā pūjāṃ kṛtvā yathāvidhi

tataśca kārayeddivyaṃ maṇḍalaṃ tatra yatnataḥ//
gaurītilakanāmnā vai prasiddhaṃ bhuvanatraye/५//
tanmadhye lekhayeddivyaṃ liṃgato bhadramaṇḍalam//
athavā sarvatobhadraṃ maṇḍapāntaḥ prakalpayet

kuṃbhāstatra prakartavyāḥ prājāpatyavisaṃjñayā//
savastrāssaphalāstatra dakṣiṇāsahitāḥ śubhāḥ

maṇḍalasya ca pārśve vai sthāpanīyāḥ prayatnataḥ //
madhye caikaśca saṃsthāpyaḥ sauvarṇo vāparo ghaṭaḥ

tatromāsahitāṃ śaṃbhumūrtinnirmāya hāṭakīm //
palena vā tadarddhena yathāśaktyāthavā vratī

nidhāya vāmabhāge tu śivāmūrttimatandritaḥ //
madīyāṃ dakṣiṇe bhāge kṛtvā rātrau prapūjayet

ācāryaṃ varayettatra cartvigbhissahitaṃ śucim //
anujñātaśca tairbhaktyā śivapūjāṃ samācaret

rātrau jāgaraṇaṃ kuryātpūjāṃ yāmodbhavāṃ caran//
rātrimākramayetsarvāṃ gītanṛtyādinā vratī

evaṃ sampūjya vidhivatsaṃtoṣya prātareva ca //
punaḥ pūjāṃ tataḥ kṛtvā homaṃ kuryādyathāvidhi

yathāśakti vidhānaṃ ca prājāpatyaṃ samācaret //
brāhmaṇānbhojayetprītyā dadyāddānāni bhaktitaḥ

ṛtvijaśca sapatnīkānvastrālaṅkārabhūṣaṇaiḥ //
alaṅkṛtya vidhānena dadyāddānaṃ pṛthakpṛthak

gāṃ savatsāṃ vidhānena yathopaskarasaṃyutām //
uktvācāryāya vai dadyācchivo me prīyatāmiti

tattassakumbhāṃ tanmūrtiṃ savastrāṃ vṛṣabhe sthitām //
sarvālaṃkārasahitāmācāryāya nivedayet

tataḥ saṃprārthayeddevaṃ maheśānaṃ mahāprabhum//
kṛtāṃjalirnataskandhassuprītyā gadgadākṣaraḥ

devadeva mahādeva śaraṇāgatavatsala //
vratenānena deveśa kṛpāṃ kuru mamopari

mayā bhaktyanusāreṇa vratametatkṛtaṃ śivā //
nyūnaṃ sampūrṇatāṃ yātu prasādāttava śaṅkara

ajñānādyadi vā jñānājjapapūjādikaṃ mayā //
kṛtaṃ tadastu kṛpayā saphalaṃ tava śaṅkara

evaṃ puṣpāṃjaliṃ dattvā śivāya paramātmane //
namaskāraṃ tataḥ kuryātprārthanāṃ punareva ca

evaṃ vrataṃ kṛtaṃ yena nyūnaṃ tasya na vidyate //
manobhīṣṭāṃ tataḥ siddhiṃ labhate nātra saṃśayaḥ

iti śrīśivamahāpurāṇe caturthyāṃ koṭittvasaṃhitāyāṃ śivarātrivratodyāpanaṃ nāmaikonacatvāriṃśo'dhyāyaḥ