શિવ પુરાણ · અધ્યાય 4.39

ઋષય ઉચુઃ॥
ઉદ્યાપનવિધિં બ્રૂહિ શિવરાત્રિવ્રતસ્ય ચ॥
યત્કૃત્વા શંકરસ્સાક્ષાત્પ્રસન્નો ભવતિ ધુવમ્

સૂત ઉવાચ॥
શ્રૂયતામૃષયો ભક્ત્યા તદુદ્યાપનમાદરાત્॥
યસ્યાનુષ્ઠાનતઃ પૂર્ણં વ્રતં ભવતિ તદ્ધ્રુવમ્

ચતુર્દશાબ્દં કર્તવ્યં શિવરાત્રિવ્રતં શુભમ્॥
એકભક્તં ત્રયોદશ્યાં ચતુર્દશ્યામુપોષણમ્

શિવરાત્રિદિને પ્રાપ્તે નિત્યં સંપાદ્ય વૈ વિધિમ્॥
શિવાલયં તતો ગત્વા પૂજાં કૃત્વા યથાવિધિ

તતશ્ચ કારયેદ્દિવ્યં મણ્ડલં તત્ર યત્નતઃ॥
ગૌરીતિલકનામ્ના વૈ પ્રસિદ્ધં ભુવનત્રયે।૫॥
તન્મધ્યે લેખયેદ્દિવ્યં લિંગતો ભદ્રમણ્ડલમ્॥
અથવા સર્વતોભદ્રં મણ્ડપાન્તઃ પ્રકલ્પયેત્

કુંભાસ્તત્ર પ્રકર્તવ્યાઃ પ્રાજાપત્યવિસંજ્ઞયા॥
સવસ્ત્રાસ્સફલાસ્તત્ર દક્ષિણાસહિતાઃ શુભાઃ

મણ્ડલસ્ય ચ પાર્શ્વે વૈ સ્થાપનીયાઃ પ્રયત્નતઃ ॥
મધ્યે ચૈકશ્ચ સંસ્થાપ્યઃ સૌવર્ણો વાપરો ઘટઃ

તત્રોમાસહિતાં શંભુમૂર્તિન્નિર્માય હાટકીમ્ ॥
પલેન વા તદર્દ્ધેન યથાશક્ત્યાથવા વ્રતી

નિધાય વામભાગે તુ શિવામૂર્ત્તિમતન્દ્રિતઃ ॥
મદીયાં દક્ષિણે ભાગે કૃત્વા રાત્રૌ પ્રપૂજયેત્

આચાર્યં વરયેત્તત્ર ચર્ત્વિગ્ભિસ્સહિતં શુચિમ્ ॥
અનુજ્ઞાતશ્ચ તૈર્ભક્ત્યા શિવપૂજાં સમાચરેત્

રાત્રૌ જાગરણં કુર્યાત્પૂજાં યામોદ્ભવાં ચરન્॥
રાત્રિમાક્રમયેત્સર્વાં ગીતનૃત્યાદિના વ્રતી

એવં સમ્પૂજ્ય વિધિવત્સંતોષ્ય પ્રાતરેવ ચ ॥
પુનઃ પૂજાં તતઃ કૃત્વા હોમં કુર્યાદ્યથાવિધિ

યથાશક્તિ વિધાનં ચ પ્રાજાપત્યં સમાચરેત્ ॥
બ્રાહ્મણાન્ભોજયેત્પ્રીત્યા દદ્યાદ્દાનાનિ ભક્તિતઃ

ઋત્વિજશ્ચ સપત્નીકાન્વસ્ત્રાલઙ્કારભૂષણૈઃ ॥
અલઙ્કૃત્ય વિધાનેન દદ્યાદ્દાનં પૃથક્પૃથક્

ગાં સવત્સાં વિધાનેન યથોપસ્કરસંયુતામ્ ॥
ઉક્ત્વાચાર્યાય વૈ દદ્યાચ્છિવો મે પ્રીયતામિતિ

તત્તસ્સકુમ્ભાં તન્મૂર્તિં સવસ્ત્રાં વૃષભે સ્થિતામ્ ॥
સર્વાલંકારસહિતામાચાર્યાય નિવેદયેત્

તતઃ સંપ્રાર્થયેદ્દેવં મહેશાનં મહાપ્રભુમ્॥
કૃતાંજલિર્નતસ્કન્ધસ્સુપ્રીત્યા ગદ્ગદાક્ષરઃ

દેવદેવ મહાદેવ શરણાગતવત્સલ ॥
વ્રતેનાનેન દેવેશ કૃપાં કુરુ મમોપરિ

મયા ભક્ત્યનુસારેણ વ્રતમેતત્કૃતં શિવા ॥
ન્યૂનં સમ્પૂર્ણતાં યાતુ પ્રસાદાત્તવ શઙ્કર

અજ્ઞાનાદ્યદિ વા જ્ઞાનાજ્જપપૂજાદિકં મયા ॥
કૃતં તદસ્તુ કૃપયા સફલં તવ શઙ્કર

એવં પુષ્પાંજલિં દત્ત્વા શિવાય પરમાત્મને ॥
નમસ્કારં તતઃ કુર્યાત્પ્રાર્થનાં પુનરેવ ચ

એવં વ્રતં કૃતં યેન ન્યૂનં તસ્ય ન વિદ્યતે ॥
મનોભીષ્ટાં તતઃ સિદ્ધિં લભતે નાત્ર સંશયઃ

ઇતિ શ્રીશિવમહાપુરાણે ચતુર્થ્યાં કોટિત્ત્વસંહિતાયાં શિવરાત્રિવ્રતોદ્યાપનં નામૈકોનચત્વારિંશોઽધ્યાયઃ